Luka 22
22
Yesũ aivũnyaniwa nĩ Yutasi
(MATHAYO 26.1–5,14–16; MALIKO 14.1–2,10–11)
1Na mboka ya kĩmũtũ kĩte ĩlawa yathengeea, ĩla yĩtawa Vasaka. 2#Lk 20.19.Na athembi anene na aandĩki mamantha nzĩa ya kũmũaa; nũndũ nĩmakĩaa andũ.
3 #
Mt 26.14–16; Mko 14.10,11; Yoa 13.2,27. Na Satani alika nthĩnĩ wa Yutasi ũla wetawa Isikalioti, nake aĩ ũmwe wa ala ĩkũmi na elĩ. 4Nake athi, na aneenan’ya na athembi anene na makavuteni ma asikalĩ, ũndũ ũtonya kũmũnengane kwoo. 5Nao matana, na meew’ana nake mamũnenge mbesa. 6Nake eetĩkĩla, na amantha mwanya wa kũmũnengane kwoo ĩkomano yĩte vo.
Kwĩyũmbanĩsya mboka ya vasaka ya mũminũkĩlyo
(MATHAYO 26.17–19; MALIKO 14.12–16)
7 #
Kuma 12.18–20. Na mũthenya wa kĩmũtũ kĩte ĩlawa wavika, yĩla katena ka vasaka kaaĩlaa kũawa. 8Na atũma Vetelo na Yoana, akyasya, Endai mũkatũseũvĩsye vasaka, nĩ kana tũye. 9Na mamwĩa, Wĩenda tũkaseũvĩsye va? 10Nake amea, Sisyai, mwavota ndũanĩ, mũkakomana na mũndũ ũkuĩte kĩkuu kya manzĩ; mũvikĩlei nyũmbanĩ o vala wĩlika. 11Na mũkamwie mwene nyũmba, Mũmanyĩsya aũkũlya, Nyũmba ya aeni ĩĩva vala ngũĩa vasaka na amanyĩw’a makwa? 12Nake akamwon’ya nyũmba nene ya iũlũ yĩ na mĩio; seũvĩsyai vo. 13#Lk 19.32.Na mathi na moona o ũndũ ũmatavisye: na maseũvya vasaka.
Mboka ya vasaka ya mũminũkĩlyo
(MATHAYO 26.20–30; MALIKO 14.22–26; 1 AKOLINTHO 11.23–25)
14Na saa wavika, ekala nthĩ vamwe na atũmwa. 15Na amea, Nĩnendaa mũno kũĩsanĩa nenyu vasaka ũũ ndanamba kũnyamaw’a: 16#Lk 13.29.nũndũ nĩngũmũtavya, Ndikaya w’o ĩngĩ, kũvika yĩla ũkeanĩw’a ũsumbĩnĩ wa Ngai. 17Nake oosa kĩkombe, na amina kũtũnga mũvea, asya, Osai kĩĩ, mũolane inyw’onthe: 18nũndũ nĩngũmwĩa, Kuma yu ndikanyw’a ĩngĩ ya ũsyao wa mũsavivũ, mũvaka ũsumbĩ wa Ngai wooka. 19#1 Ako 11.23–25; Meko 27.35.Nake oosa kĩmũtũ, na amina kũtũnga mũvea, atilanga, na amanenga, akyasya, Kĩĩ nĩkyo mwĩĩ wakwa ũla wanenganiwe nũndũ wenyu: ĩkaai ũu ũndũ wa kũndilikana. 20#Kuma 24.8; Yel 31.31; Nzek 9.11.Na mamina kũya, oosa kĩkombe eeka o ũu, akyasya, Kĩkombe kĩĩ nĩ ũtianĩo mweũ nthĩnĩ wa nthakame yakwa, ĩla ĩĩtĩkwa kwondũ wenyu. 21#Yoa 13.21,22.Ĩndĩ sisyai, kw’oko kwa ũla ũnũkũmbũnyanĩa kwĩ vamwe nakwa vaa mesanĩ. 22Nũndũ nĩ w’o Mwana wa mũndũ ethi, o tondũ kweeaiwe: ĩndĩ woo ni wa mũndũ ũla wĩmũvũnyanĩa! 23Nao mambĩlĩlya kũkũlan’ya ene kwa ene, nĩ wĩva katĩ woo ũla wĩĩka ũndũ ũsu.
Ũnene wa w’o
24 #
Lk 9.46. Na veethĩwa ngananĩo katĩ woo, nũũ ũla ũtalawa kwĩthĩwa nĩ mũnene. 25Nake amea, Andũ‐ma‐mbaĩ‐ingĩ nĩmasumbĩkawa nĩ asumbĩ moo; na ala me ũkũmũ ĩũlũ woo metawa Eki‐ma‐nesa. 26Ĩndĩ inyw’ĩ mũtikethĩwe mũily ũu: ĩndĩ ũla mũnene katĩ wenyu, nĩethĩwe ta ũla mũnini; na ũla wĩ mbee, nĩethĩwe ta ũla ũthũkũmaa. 27#Yoa 13.4–14.Nũndũ mũnene nĩ wĩva, ũla wĩkalaa nthĩ akĩya, kana nĩ ũla ũthũkũmaa? Ti ũla ũilyĩ nthĩ akĩya? Ĩndĩ nyie katĩ wenyu nĩilyĩ ta ũla ũthũkũmaa. 28Ĩndĩ inyw’ĩ mwĩ ala mwĩkalanĩtye nakwa matatwanĩ makwa; 29#Lk 12.32.nakwa nĩngũmwiĩa ũsumbĩ, o tondũ Asa wakwa wambiĩe, 30#Mt 19.28.nĩ kana mũkaĩsaa na kũnyusaa mesanĩ yakwa ũsumbĩnĩ wakwa; na nĩmũkekalĩla ivĩla sya ũsumbĩ mũkĩsilĩla mbaĩ ĩkũmi na ilĩ sya Isilaeli.
Ũkaĩo wa Vetelo ũkyathanwa
(MATHAYO 26.31–35; MALIKO 14.27–31; YOANA 13.36–38)
31 #
2 Ako 2.11; Amo 9.9. Simoni, Simoni, sisya, Satani nũkũlĩtye anengwe inyw’ĩ, nĩ kana amũthũngũthangye tondũ nganũ ithũngũthangaw’a: 32#Yoa 17.11,15,20; Sav 51.13.ĩndĩ nĩnakũvoyea, kana mũĩkĩĩo waku ndũkathele; naku wasyoka, lũlũmĩlya ana‐a‐au. 33Na amwĩa, Mwĩaĩi, nĩnĩyũmbanĩtye kũendan’ya naku kolokolonĩ na kĩkw’ũnĩ. 34Na asya, Nĩngũkwĩa, Vetelo, ũtũkũ ũũ nzamba ndĩkasya, ũtakaĩĩte katatũ atĩ ndũmbĩsĩ.
35 #
Lk 9.3; 10.4. Na amakũlya, Yĩla namũtũmie mũte na ngusu ya mbesa, kana mũvuko, kana iatũ, nĩmwaaĩwe nĩ kĩndũ? Na masya, Aiee, tũtyaaĩwa. 36Nake amea, Ĩndi yu, ũla wĩ na ngusu ya mbesa, nakue, na mũvuko o ta ũu; na ũla ũte na ũvyũ, athoosye ngũa yake ya ĩũlũ, athooe. 37#Isa 53.12; Lk 22.52.Nũndũ nĩngũmwĩa, ũũ ũla ũandĩkĩtwe ndwĩ ndĩi ya ũlea kwĩanĩw’a nthĩnĩ wakwa atĩĩ, Nake atalilwe vamwe na avĩtan’ya: nĩkwĩthĩwa maũndũ ala maandĩkĩtwe kwondũ wakwa makeanĩw’a. 38Na masya, Mwĩaĩi, sisya, vaa ve mbyũ ilĩ. Na amea, Nũu.
Yesũ e Ngesemanii
(MATHAYO 26.36–46; MALIKO 14.32–42)
39 #
Lk 21.37; Yoa 18.1. Na aumaala, na athi kĩĩmanĩ kya Mĩthata, o tondũ wekaa; na avikĩlwa nĩ amanyĩw’a. 40Na avika vo, amea, Voyai mũtikalike matatwani. 41Nake ataanĩsya nao o ta vandũ va kwĩkya ĩvia; na atulya ndu avoya, 42#Mt 6.10.akyasya, Asa, ethĩwa nũkwenda, mbathũkĩsya kĩkombe kĩĩ: ĩndĩ ti ũndũ ngwenda nyie, ĩndĩ nĩwĩkĩke ũla ũkwenda we. 43#1 Asu 19.5; Yoa 12.29.Na aumĩlĩlwa nĩ mũlaĩka kuma ĩtunĩ, amwĩkĩa vinya. 44Nake kwa kwĩthĩwa aĩ na thĩna mũnene, ongelela kũvoya na kĩthing’ĩĩsyo; na yuutĩa yake yatw’ĩka ta mavoloto manene ma nthakame, maivolotanga nthĩ. 45Na yĩla wokĩlile kuma kũvoyanĩ kwake, athi vala ve amanyĩw’a make, amethĩa makomete nĩ too wa kĩmako, 46na amea, Nĩkĩ mũkomie? Ũkĩlai mũvoye, mũikalike ũtatwanĩ.
Kũkwatwa kwa Yesũ
(MATHAYO 26.47–56; MALIKO 14.43–50; YOANA 18.2–11)
47Na aineena, sisya, ĩkomano yaumĩla, na ũla wetawa Yutasi, ũmwe wa ala ĩkũmi na eli, amatongoesye; na amũthengeea Yesũ nĩ kana amũmumunye. 48Ĩndĩ Yesũ amwĩa, Yutasi, nũũmũvũnyanĩa Mwana wa mũndũ na kũmũmumunya? 49Na yĩla ala maĩ nake moonie ũndũ ũla ũkwĩkwa masya, Mwĩaĩi, nĩtũmateme na ũvyũ? 50Na ũmwe woo amĩtema ngombo ya mũthembi mũnene, amĩtila kũtũ kwa ngalĩ ya kw’oko kwa aũme. 51Ĩndĩ Yesũ asũngĩa na asya, Ekai, nũu. Na akiita kũtũ kwayo, na amĩvosya. 52#Lk 22.37.Na Yesũ amea athembi anene, na ala anene ma ĩkalũ, na atumĩa, ala mookĩte mamũkwate, Nĩmwaumĩla, tondũ mũvutani wumĩlĩlawa, mwĩ na mbyũ na mathimbũ? 53#Yoa 7.30; 8.20; Ako 1.13.Mũiaambũkĩlĩlya moko yĩla naĩ nenyu kĩla mũthenya ĩkalũnĩ: ĩndĩ ũũ nĩw’o saa wenyu, na ũkũmũ wa kĩvindu.
Vetelo aikaĩa Yesũ
(MATHAYO 26.57–58,69–75; MALIKO 14.53–54,66–72; YOANA 18.12–18,25–27)
54Namo mamũkwata, na mamũtongoesya, mamũtwaa nyũmbanĩ ya mũthembi mũnene. Ĩndĩ Vetelo amũatĩĩa e kũasa. 55Na mavuva mwaki nza, na mekala nthĩ vamwe, na Vetelo ekala katĩ woo. 56Na mwĩĩtu mũthũkũmi amwona ailyĩ kyeninĩ amũketeea, na asya, Mũndũ ũũ eĩ vamwe nake. 57Ĩndĩ akaĩa, akyasya, Mũndũ mũka, ndimwĩsĩ. 58Na ĩtina vandũ vanini mũndũ ũngĩ amwona, na asya, Naku wĩ ũmwe wa asu. Ĩndĩ Vetelo asya, Mũndũ we, ndi ũmwe. 59Na ĩtina ta vandũ va saa ũmwe mũndũ ũngĩ athetheesya kũneena, akyasya, Nĩ w’o ki mũndũ ũũ eĩ vamwe nake; nũndũ we nĩ Mũkalilii. 60Ĩndĩ Vetelo asya, Mũndũ we, ndimanya ũndũ ũkwasya. Na kavinda kau, yĩla waneenaa ũu, nzamba yasya. 61#Lk 22.34.Na Mwĩaĩi eethyũũa, na amũsisya Vetelo. Na Vetelo alilikana ndeto sya Mwiaĩi, ila wamwĩie, Ũmũnthĩ nzamba ĩtanamba kwasya ũkangaĩa katatũ. 62Nake aumaala, na aĩa kĩĩo kĩ woo.
Yesũ aithekeewa na kĩvũthya na kũkũnwa
(MATHAYO 26.67–68; MALIKO 14.65)
63Na andũ ala mamũkwete Yesũ mamũthekeea na kĩvũthya, na mamũkũna. 64Na mamũvw’ĩka metho, na mamũkũlya, makyasya, Athana: nũũ ũla wakũkũna? 65Na mamũneenea maũndũ angĩ maingĩ, makĩmũumanga.
Yesũ e mbee wa athembi anene
(MATHAYO 26.59–66; MALIKO 14.55–64; YOANA 18.19–24)
66Na kwakya, nzama ya atumĩa ma andũ yoombana, o athembi anene na aandĩki; na mamũtwaa nzamanĩ yoo, makyasya, 67#Yoa 3.12; 8.45; 10.24.Ethĩwa nue Klĩsto, tũtavye. Ĩndĩ amea. O na ethĩwa nĩngũmũtavya, mũtyĩtĩkĩla: 68o na ethĩwa nĩngũmũkũlya, mũinzũngĩa. 69#Nda 7.13; Sav 110.1.Ĩndĩ kuma yu Mwana wa mũndũ akeethĩwa ailyĩ kw’okonĩ kwa aũme kwa vinya wa Ngai. 70Na onthe masya, Ĩndĩ we nue Mwana wa Ngai? Nake amea, Inyw’ĩ nĩmũkwasya ninyie we. 71Na masya, Twĩ na vata ũngĩ mwaũ wa ũkũsĩ? Nũndũ ithyĩ ene nĩtweew’a kuma kanyw’anĩ wake.
Àwon tá yàn lọ́wọ́lọ́wọ́ báyìí:
Luka 22: Mbivlia
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
