लूका 17
17
चतन्न रहणा
(मत्ती 18:6,7,21,22; मरकु. 9:41)
1एक ध्याड़े यीसूए आपणे चेले किन्हें बोल्या, “हुई सकां कि लोका आपणा विस्वास खोई दे, पर तिन्हा लोका जो बौह्त सजा मिलणी, जेसरी वजहा ले से हूंणा! 2जो कोई इन्हा छोटे मन्झा ले केसी ले पाप कुराहें, तेसरे कठे ये खरा हुन्दा कि, एक बड़ा चक्की रा पाट तेसरे गला मन्झ टांग्या जाए होर तेस जो समुद्रा मन्झ सट्टी दितेया जाए। 3चतन्न रैहया! कि तुस्से क्या करें, अगर तेरा विस्वासी भाई पाप करहे ता तेस जो समझा, होर अगर से आपणे पापा ले पछताए ता तेस जो माफ करी दे। 4अगर पूरे ध्याड़े से सात बार तेरे बरखलाफ पाप करहे, होर सात बारी तेरे वाले आई किन्हें बोले कि, हांऊँ पछताया करहा ता तेस जो माफ करी देआ।”
विस्वास
5तेबे चुणिरे चेले प्रभु यीसू किन्हें बोल्या, “आस्सा रे विस्वासा जो मजबूत बणा” 6प्रभुए बोल्या कि, “अगर तुस्सा जो राई रे एक दाणे रे बराबर भी विस्वास हुन्दा, ता तुस्से एस तुता रे डाला किन्हें बोल्दे कि जड़ा ले पठ्ही किन्हें समुद्रा मन्झ पई जा, ता तेस तुस्सा री गल मनी लैंदा।”
एक सेऊआदारा रा फर्ज
7तुस्सा मन्झ एह्ड़ा कुण आ, “अगर तुस्सा रा नौकर हल च्लाई किन्हें डोहर्रिया ले आहूँआं, या भेडा री रखवाली करी किन्हें आहूँआं, ता तुस्सा तेस किन्हें बोलणा कि, ‘झटपट आऊ होर खाणा खांदे बैठी जा?’ 8नी बल्कि तेस बोलणा कि, मेरा खाणा त्यार कर, होर जेबे तक हांऊँ खाणा खांऊँ तेबे तक मेरी सेऊआ करणे रे कठे तैयार रेह, होर एता ले बाद तू भी खाई पी लैया। 9तुस्सा तेस नौकरा रा धन्यावाद नी करणा, तिन्हा चीजा रे कठे जेता रे बारे तैं तेस किन्हें करणे रे कठे बोलिरा था। 10इंहां ईं तुस्से भी, जेबे तुस्से स्यों सभ काम करी बैठघे जिन्हारा हुक्म जे मैं तुस्सा जो दितिरा था, ता एह्ड़ा ही बोल्या कि, ‘आस्से लायक सेऊआदार नी ऐं, आस्से जो कितेया से सिर्फ आस्सा रा फर्ज था।’”
दस कोढ़िया रा ठीक हूंणा
11यीसू होर तेसरे यरुस्लेम सैहरा जो जांदे वक्त सामरिया ईलाके होर गलील जिल्ले मन्झा ले हुई किन्हें जाया करहा था। 12जेबे ही स्यों गांऊँआं मन्झ पूजणे ही वाल़े थे ता तेस जो दस कोढ़ी मिले। 13होर तिन्हें कोढ़ीए दूर खड़ी किन्हें#17:13 लैव्य 13:45-46, गिनती 5:2 कोढ़ी लोका जो मूसा री व्यवस्था रे मताबक लोका किन्हें दूर रैहणे होर तिन्हा जो नी छुणे रा हुक्म था, उची अवाजा मन्झ बोल्या, “हे यीसू, हे माल्का, आस्सा पर दया कर!” 14तिन्हें तिन्हा जो देखी किन्हें बोल्या, “यरुस्लेम सैहरा मन्झ जाऊआ होर मन्दरा मन्झ आपणे आपा जो याजका जो दस, ताकि से तुस्सो देखे कि तू कोढ़ा ले ठीक हुई या नी।” होर जांदे-जांदे स्यों ठीक हुई गये। 15तेबे तिन्हा मन्झा ले एकिये ये देखी किन्हें कि हांऊँ ठीक हुई गया, जोरा-जोरा किन्हें परमेसरा री बड़ाई करदा हुआ यीसू वाले वापस आया। 16होर से मुंहा रे भारे तेसरे पैरा पई किन्हें, तेसरा धन्यावाद करदा लग्या, होर से माह्णुं सामरी ईलाके रा था। 17एता पर यीसूए बोल्या, “क्या दसा रे दस माह्णुं ठीक नी हुए ता फेरी स्यों नौ केथी ऐं? 18क्या एस गैर-यहूदी जो छाडी किन्हें होर कोई भी वापस नी आया, जो परमेसरा री बड़ाई करदा?” 19तेबे यीसूए तेस किन्हें बोल्या, “उठी किन्हें चली जा, क्यूंकि तैं विस्वास कितेया इधी कठे तू ठीक हुआ।”
परमेसरा रे राज्या रा आऊंणा
(मत्ती 24:23-28,37-41)
20जेबे फरीसी लोके यीसूए ले पूछेया कि, परमेसरा रा राज कधी आऊंणा? ता यीसूए तेस जो जवाब दितेया कि, “परमेसरा रा राज एह्ड़ा नी आ जेस जो तुस्से देखी सके। 21होर लोक ये नी बोली सकदे कि, देखा, परमेसरा रा राज एथी आ, या परमेसरा रा राज तेथी आ। क्यूंकि देखा, परमेसरा रा राज तुस्सा रे बिचा मन्झ आ।”
22होर यीसूए चेले किन्हें बोल्या, “स्यों ध्याड़े आऊणें, जिन्हा मन्झ तुस्सा हांऊँ माह्णुं रे मह्ठे रे राज्या रा एक ध्याड़ा देखणा चाहणा, पर तुस्सा ये नी देखी पाणा। 23लोका तुस्सा किन्हें बोलणा, देखा, ‘मसीहा तेथी आ, या मसीहा एथी आ!’ ये सुणी किन्हें तुस्से चली मत जांदे होर ना तिन्हारे पीछे जाणा। 24क्यूंकि जिहां बिजली आसमाना रे एक तरफा ले चमकी किन्हें आसमाना रे दूजी तरफा जो चमक्हा ई, होर सभ लोक तेता जो देख्हा ऐं, तिहां ईं मां माह्णुं रे मह्ठे भी दबारा आऊंणा होर सभिया हांऊँ देखणा। 25पर पैहले जरूरी आ कि, हांऊँ बौह्त दु:ख उठाऊँ, होर एस जमाने रे लोका मेरी बेज्जती करणी।”
26“जेह्ड़ा नूहा रे ध्याड़े मन्झ हुएया था, तेह्ड़ा ई मां माह्णुं रे मह्ठे रे ध्याड़े मन्झ भी हूंणां। 27जेस ध्याड़े तक नूह जहाजा पर नी चढ़ेया, तेस ध्याड़े तक लोक खांदे पींदे रहे, होर तिन्हा मन्झ ब्याह हुन्दे रहे; तेबे जल प्रलय हुएया होर तिन्हा सभिरा नास करी दितेया।
28होर जेह्ड़ा आस्सा रे बापदादे लूता रे टैमा मन्झ हुएया था जेह्ड़ा स्दोमा मन्झ रैंहयां था, होर तेथी लोक खांदे पींदे, लेण देण करदे, डाल लगान्दे होर घर बणान्दे रैहे। 29पर जेस ध्याड़े लूत सदोम सैहरा ले निकल्या, तेस ध्याड़े आग होर गन्धक स्वर्गा ले बरसी होर सैहरा रे सभ लोका जो नास करी दितेया। 30हांऊँ माह्णुं रे मह्ठे रे जाहिर हूंणे रे टैमा भी लोका त्यार हुई किन्हें नी रैंह्णां।”
31“तेस ध्याड़े जो घरा री छता पर हो, होर तेसरा समान घरा मन्झ हो, से तेस जो लैणे रे कठे हेठ नी आये, होर तिहां ईं जो लोक डोहर्रिया मन्झ हो, स्यों आपणा समान लेणे रे कठे वापस नी आये। 32याद रखा कि लूता री लाड़ी किन्हें क्या हुआ।#17:32 तेस्से वापस मुड़ी किन्हें देखेया होर परमेसरा रे हुक्मा जो टाल्ली दितेया होर लूणा रा खम्बा बणी गई 33जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई आपणी जान गुआई देह्न्गा, तेस हमेसा री जिन्दगी पाणी। 34हांऊँ तुस्सा किन्हें बोल्हा, तेस राती एक मांजे प्रयाल्हे दो माह्णुं हूंणे, एक लई लैणा होर दूजा छाडी दितेया जाणा। 35दो ज्नाने एक साउगी चकी पिसदी लगिरी हूणीं, एक लई जाणी, होर दूजी छाडी दिती जाणी। 36दो जण डोहर्रिया मन्झ हूंणे एक लई जाणा दूजा छाडी दितेया जाणा।”
37ये सुणी किन्हें तिन्हें यीसू ले पूछेया, “हे प्रभु ये केथी हूंणां?” यीसूए तिन्हा किन्हें बोल्या, “सभी जो पता लगणा कि ये केथी हूणा, क्यूंकि जेह्ड़ा सभ जाणहां ऐं कि जेथी ईल्लण कठ्ठा हुएं तेथी ल्हास हूणीं।”
Àwon tá yàn lọ́wọ́lọ́wọ́ báyìí:
लूका 17: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
