यहून्ना 17
17
यीसू रा आपु कठे प्रार्थना करणा
1यीसूए ये सारी गल्ला चेलेया किन्हें बोली होर तेता रे बाद स्वर्गा वखा जो देखी किन्हें बोल्या, “हे बापू, से घड़ी आई पुजीरी, आपणे मह्ठे री महिमा कर कि, मह्ठा भी तेरी महिमा करहे। 2क्यूंकि तैं तेस जो सभी लोका पर हक दितिरा, ताकि से तिन्हा सभी जो अनंत जिन्दगी दे। 3होर अनंत जिन्दगी येई कि, स्यों तुजो एकमात्र सच्चे परमेसरे होर यीसू मसीहा जो जाणी सको, जेस जो तैं भेजिरा। 4जो काम तैं मुंजो करणे रे कठे दितिरा था, तेस जो पूरा करी किन्हें मैं धरतिया पर तेरी महिमा कितिरी। 5होर ऐबे, हे बापू, जो महिमा मेरी तुस्सा साउगी संसारा रे रचणे ले पैहले थी, तेस महिमा ले आपणे साउगी मेरी महिमा करहा।”
यीसू रा आपणे चेले रे कठे प्रार्थना करणा
6“मैं तुजो तिन्हा माह्णुंआं पर जाहिर कितेया जो तैं संसारा मन्झा ले मुंजो दिते। स्यों तेरे थे होर तैं स्यों मुंजो दिते, होर तिन्हें तेरा बचन मनी लया। 7ऐबे स्यों जाणी गईरे कि, जो कुछ तैं मुंजो दितिरा, से सब तेरी तरफा ले आ। 8क्यूंकि जो गल्ला तैं मेरे वाले पूजाईरी, मैं तिन्हा जो भी पुजाई दिती। होर तिन्हें स्यों गल्ला मनी लई, होर सच्च जाणी लया कि, हांऊँ तेरी तरफा ले आईरा, होर तिन्हें विस्वास करी लया कि तैं ईं हांऊँ भेजिरा।”
9“हांऊँ तिन्हारे कठे प्रार्थना करहा। हांऊँ संसारा रे लोका रे कठे प्रार्थना नी करदा, पर तिन्हारे कठे जो तैं मुंजो दितिरे, क्यूंकि स्यों तेरे ऐं। 10होर जो कुछ मेरा आ से सब तेरा आ, होर जो कुछ तेरा आ से मेरा आ, होर मैं तिन्हारे जरिये महिमा पाई। 11ऐबे मां संसारा मन्झ नी रैंह्णां, पर इन्हा लोका संसारा मन्झ रैंह्णां, होर हांऊँ तेरे वाले आहूँआं। हे पवित्र बापू, आपणी सामर्था ले जो तैं मुंजो दितिरा, तिन्हारी हिफाजत कर कि, स्यों आस्सा साहीं एकता मन्झ हो। 12जेबे हांऊँ तिन्हा साउगी था, ता मैं तेरे तेस सामर्था ले, जो तैं मुंजो दितिरा, मैं तिन्हारी हिफाजत किती। मैं तिन्हारी रखवाली किती। होर विनासा रे मह्ठे जो छाडी किन्हें तिन्हा मन्झा ले कोई भी नास नी हुएआ, इधी कठे कि पवित्र सास्त्रा री गल्ला पूरी हो।”
13“पर ऐबे मैं तेरे वाले आहूँआं, होर ये गल्ला संसारा मन्झ रही किन्हें बोल्हा कि, स्यों मेरी भरपूर खुसी आपणे आपा मन्झ पाए। 14मैं तेरा बचन तिन्हा वाले पुजाई दितिरा, होर संसारा रे लोके तिन्हा किन्हें नफरत किती, क्यूंकि जिहां-हांऊँ संसारा रा नी आ, तिहां ईं स्यों भी संसारा रे नी ऐं। 15हांऊँ ऐं प्रार्थना नी करदा कि, तू तिन्हा जो संसारा ले लग करी दे, पर ये भी कि तू तिन्हा जो तेस दुस्ट सैताना ले तिन्हारी हिफाजत कर। 16जिहां-हांऊँ संसारा रा नी आ, तिहां ईं स्यों भी संसारा रे नी ऐं। 17सच्चा रे ज्रीए तिन्हा जो लग ठैहराया, तेरा बचन सच्चा आ। 18जिहां तैं हांऊँ संसारा मन्झ भेजिरा, तिहां ईं मैं स्यों संसारा मन्झ भेजीरे। 19होर तिन्हारे कठे हांऊँ आपणे आपा जो लग ठैहराया ताकि स्यों भी सच्चा रे ज्रीए लग ठैहराये जाए।”
यीसू रा सभ विस्वासी लोका रे कठे प्रार्थना करणा
20“हांऊँ सिर्फ इन्हा चेले रे कठे ई प्रार्थना नी करदा, पर तिन्हारे कठे भी जिन्हा इन्हा बचना रे ज्रीए मेरे पर विस्वास करणा, ताकि स्यों सब एक हो। 21जिहां बापू मेरे मन्झ वास करहा, होर हांऊँ तेरे मन्झ वास करहा, तिहां ईं स्यों भी आस्सा मन्झ वास करहे; ताकि संसार रे लोक विस्वास करहे कि, तुस्से ई हांऊँ भेजिरा। 22होर से महिमा जो तैं मुंजो दितीरी, मैं तिन्हा जो दितीरी ताकि स्यों तिहां ईं एक हो जिहां आस्से एक ऐं। 23हांऊँ तिन्हा मन्झ होर तू मेरे मन्झ ताकि स्यों पक्के हुई किन्हें एक हुई जाए, होर संसार जाणे कि तैं ईं हांऊँ भेजिरा, होर जिहां तैं मेरे किन्हें प्यार रख्या, तिहां ईं तिन्हा किन्हें प्यार रख्या। 24हे बापू, हांऊँ चाहां कि जेह्ड़े लोक तैं मुंजो दितिरे, जेथी हांऊँ आं, तेथी स्यों भी मेरे साउगी हो कि स्यों मेरी तेस महिमा जो देखी सके जो तैं मुन्जो दितीरी, क्यूंकि तैं संसारा रे रचणे ले पैहले ले ई मेरे किन्हें प्यार रख्या।”
25“हे धर्मी बापू, संसार रे लोके हांऊँ नी जाणी सकेया, पर मैं तू जाणेया होर इन्हें चेले भी जाणेया कि तैं ईं हांऊँ भेजिरा। 26होर मैं तू तिन्हा लोका पर जाहिर कितेया होर जाहिर करदे रैंह्णां ताकि जो प्यार तुस्सा जो मेरे किन्हें था, से तिन्हा मन्झ रहे होर हांऊँ भी तिन्हा मन्झ बणया रहूं।”
Àwon tá yàn lọ́wọ́lọ́wọ́ báyìí:
यहून्ना 17: MJLNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
This work is licensed under Creative Commons Attribution-ShareAlike 4.0 License.
