Matthai 2
2
Ningchiy Luo Taata Mingsing Tie
1Herod siepahruo a cuo nguoluo-ning, Judea pe Bethlehem khy lie Zingsuv a puv khutaa khata ning-chiy luo taata mingsing tie#2:1 Or aasiy a mang thepa tie kha Jerusalem luo vya chiy yite, 2“Judah siepahruo, zaa puv thaapa haatiyta ca khaapaliema a aw? A aasiy aa luopa kha#2:2 Or ningchiy luo taata hmung pate na ama kha abie riypata ma vya chiy,” ama ta.
3Siepahruo Herod ta capa bie a thyi tiyta a thlaa zang laalaw te Jerusalem khy ming bangkhuo zaw ama thlaa a zangsa ra. 4Ama ta tluobyilepa tie hne phungbiesaya tie zaw kha pakiy yite, “Messiah ca khaapaliema a puv aa?” tapata a hiehriy yi.
5Iema ta, “Judea pe Bethlehem khy lie,” ama ta. “Profet ta a cape siypa ca:
6‘Judah ruo chunglie a awpa Bethlehem,
nama ca Judah pe khypuv zaw hrawlie hing
a cawcepa ta cuo changchiy vaciy.
Na chung taahingta luochiytuv pakha pya'a te
i cawsaa Israel ming kha luo a chiy'a#2:6 Or uv yi,’” a ta.
7Cacuonakaw Herod ta mingsing tie kha a paruvta tah ku yite khaapa cuo lie kha tama aasiy aa luo tapa kha a hiehriy yi. 8Cakhutaata Bethlehem luo kha pathlie yite, “Si ungla haatiy kha a phasa pata va huv tie ung, nama hmung pata a cuo kieca, vaa'a ang te i bie ra khu riypata, kama kha ina pachang sa pakhaa ungciy,” tapata bie a taa yi.
9Siepahruopa bie naa ama thlie khu taata amaa thu ca a kya luo ningta ama hmungpa aasiy ca haatiy awna hmang a dadaw lie a daa nate ta ama hmielie kha a sile. 10Aasiy a daapa ama hmung tiyta ama palung a tluo hringhruo. 11Ingchung luo kha amaa ngie ca haatiy kha a nung Mary hne ama hmung; ama pakhuv pane yite ama kha amaa bie. Ama suethiy thingkaw kha pahaw yite, ama lasaw: siyy, frankinsens ziyhmyi, hne mura ziyhmyi kha ama pi.
12Mingsing tie ca Herod'a luo kaa li riypata ama muo lie a raaring pina ama hmung nakawta luo hrang ziy yite ama ruo luo kha ama kaa.
Izipt Ruo Luo Amaa Ruo
13Iema ama si khu taata Abyipa avuoming pakha ca Josef muo lie kha a luo te, “Thu la haatiy hne a nung hing Izipt ruo luo a ruokhyi tie yi. Kama ta kaa riypata ica chang hluo li ama lie kha nama aw aa, tahematapakieca Herod na haatiypa hing thie riypata a huv aa,” a ta.
14Cakhutaata Josef ca thu te haatiy hne a nung kha Izipt ruo luo zuo ta a ruo khyi yite 15capa lieca Herod a thiy nate ama aw. Hingpa hing Abyipa ta profet pakaa taata, “I saacapaa ca Izipt ruo taa pya riypata i u,” a tapa bie tlingna riypatana a cuo.
Herod Ta Haatiy A Thie Yi
16Herod ta mingsing tie na naa dung yi tapa a pachang tiyta a hi a haa suesaa. Cacuonakawta mingsing tie'a taata a pachangpa cuo hne tuepuo pata Bethlehem hne a cahriy lie a awpa khy zaw taata haatiy kung hning raw bangkhuo kha thie riypata naw a pi yi.
17Cahaa cata profet Jeremiah ta a za ripa bie ca a vya tling. A ripa ca:
18“Ramah khy chunglie ueryi aa thyi.
Caana hne khi-una ueryi ta a cuo.
Rachel ta a saa zaw kha a caa yi.
Panguo khu cuo the vyi,
Tahematapakieca ama thiy diy nakaw,”
tapata a cuo.
Izipt Ruo Taata Kaanapa
19Herod a thiy khu taata Izipt ruo lieca Abyipa avuoming pakha Josef muo lie kha a luo te, 20“Thu la haatiy hne a nung kha la yi la Israel ruo luo si tie ung, tahematapakieca haatiy thie a tingpa tie kha ama thiy tli,” a ta. 21Cacuonakawta Josef ca thu te, haatiy hne a nung kha la yite Israel ruo luo ama si. 22Cuorasala Arkhelaus na a paa Herod kha a thle te Judea ruo lie siepahruo a cuo tapa kha Josef ta a thyi tiyta capa luo ca si nguo vyi. A muo lie bie ama changpa haata Galilee pe luo kha a si. 23Profet tie ta ama za ri ciepa, “Ama ca Nazarethpa tapata a cuo aa,” tapa bie a tling thena riypata Nazareth khy lie kha khy a sa.
Àwon tá yàn lọ́wọ́lọ́wọ́ báyìí:
Matthai 2: LNT1
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
New Testament in Chin Lautu © Bible Society of Myanmar, 2015.
