Matiu 2
2
Ira Atat Mataisaoga Ram mai be Ramen Gita Jisas
1Jisas uhu nu vora Betlehem lol vanua Judia la mahavana be Herod nu vora lavoa. Ataguna gea, atat mataisaoga huri visiu ram mai vai Jerusalem, kera uhu ram mai nin vanua la tanon al tavwaga, 2i ram hudaligi be, “Naturigi behe be mwa bora gi ratahigi lavoa non ira Jius? Gam ḡita non dovon̄a la visiu i gam mai be gamen gogonainia.”
3La mahavana be Herod mwa ron̄ avoana gea maira sinombu ata Jerusalem, lolora mwa hav tavuha te ginia. 4Haḡe Herod mwa uloi ḡoḡo non ira muai tataroi i ira vagahin Silo be rav mai vai abena. Haḡe kea mwa hudalinira be, “Naturigi uhu gabe Kraes vi vora halabehe?”
5Haḡe kera ram bwaliua be, “Betlehem lol vanua Judia. Huri be atatun vevsera nu rav avoana non God amua, mwa bevea be:
6‘Kimiu ata Betlehem lol vanuan Juda,
kimiu gim do tirigi nin ira lavoa ḡoro tanon Juda.
Huri lavoa vwate vi mwalue nin varamiu,
i kea haḡea vi tomuai noḡu sinombu ira Israel.’”
7Haḡe lavoa Herod mwa uloi dalevainira atat mataisao vai abena, i mwa hudalinira be, “La mahavana kun hanigi be visiu gea nu visirai?” 8Haḡe mwa bevea abera be, “Giv vano i giv hiḡe tavuhai naturigi gea. La mahavana be giv habwea, ita giv hora roroi vi votuiau mulei, i nai vano ba ḡogonainia.” Haḡe mwa siv horara vai Betlehem.
9La mahavana be ira atat mataisaoga ram ron̄ vuvuri avoana non Herod, ram mwalue nin ute gea. Ram bano la hala ram ḡita mulei visiu gea be ran gitae amua la tanon al tavwaga. Haḡe ram huri visiu gea mwa domuainira vai votui ute gabe naturigi mwa eno aia. I ram ḡita visiu gea mwa dogo haḡea batoi ute gea. 10La mahavana be ram ḡita dum visiu be mwa dogo la ulura, ram samsamwara maragai huria. 11Haḡe ram haroro la imwa ram ḡita naturigi mwa eno mai ratahina Mere. I kera ram hivbwaubwau abena i ram ḡogonainia. Haḡe ram rarau lol nora tan̄a, ram lai lua nora tabeana be nu loliana gin vatlegiga, i ginau bonboni be ihana vrankinsens, mee i ram laia gi tabeana lalainia.
12La mahavana be ira atat mataisaoga uhu ram maturu, God mwa avo lalainira lol maturubore, mwa bevea be, “Gitol si hav tabagilu te mulei vai aben lavoa Herod.” Haḡe ram dol dabagilu mulei la hala dolua.
Josep mwa Lai Naturigi mai Ratahina Vai Ijip
13La mahavana be ira atat mataisaoga ram mwalue, enjel vwate mwa mai aben Josep bon̄i lol maturubore, mwa bevea be, “Gov tomare, gov lai naturigi mai ratahina i gitol vi mwalue vai Ijip. Gitol vi togo aia vai votu gabe nai vev muleinia abemwa be gitol vi tabagilu mulei. Huri be lavoa Herod mwa hiḡehiḡe be vi wehi naturigi uhu.”
14Haḡe Josep mwa domare nin maturuva, mwa lai naturigi mai ratahina lol bon̄i gea, ram dol mwalue vai Ijip. 15Josep mai naturigi i ratahina ram dol dogo Ijip vai votu lavoa Herod mwa mate. Ginau geki mwa lol seserai hano Ratahigi nu vev daua lalai atatun vevsera tuai be, “Nam uloi lua mulei Nituku nin Ijip.”
Atatun Bwaloana non Lavoa Herod Ram Wehi Naturirigi
16Mahavana be lavoa Herod mwa iloe be ira atat mataisaoga uhu ram saruruhia, lolona mwa horo maragai. Kunia mwa hora non atatun bwaloana be rav wehi kaburai naturirigi atamwani la vanua Betlehem i vanua duluai ram dogo dalisia, kera gabe taulura gairua huba sage atena. Mwa dovoi mahavana gea alun roroi gabe nu ron̄oe nin ira atat mataisaoga kera geki, be ran vevea lalainia hurin mahavana visiu nu visirae kunia amua.
17Ginau duluai geki mwa lol bisirai avoana duluai gabe atatun vevsera Jeremaia nu vevea tuai be:
18“Kera ata Rama ram ron̄ silo be mwa dei,
mwa dalan̄lan̄a maragai.
Kea Rejel mwa dan̄ihi ira nituna
i rasav lol te dum mahuri lolona,
bwatuna be ira nituna ran mate n̄oto.”
Josep mai Jisas i Ratahina Ram Dabagilu nin Ijip Vai Nasaret
19Ataguna be lavoa Herod mwa mate vuvuri, enjel non God mwa mai aben Josep mahavana kera radu Ijip, mwa avo maia la maturubore, 20mwa bevea lalainia be, “Gov tomare ba lai naturigi mai ratahina, ba gitol vi tabagilu mulei vai la vanua Israel, bwatuna be kera gea be amua ran doron be rav wehi naturigi geki ran mate huba.” 21Haḡe Josep mwa domare, mwa lai naturigi mai ratahina, ram dol dabagilu vai la vanua Israel.
22Take mahavana be Josep mwa ron̄oe be Akeleas mwa lai tanon tamana Herod, mwa bora lavoa Judia, Josep mwa matagu be men tabagilu mulei vai Judia. Kadogaha God mwa avo mulei lol maturubore, i mwa bano vai lol vanua dolua, ihana Kalili, 23mwa dogo la bwatutun vanua mwa uloinia be Nasaret. Mwa lol ginau geki be men lol seserai hano ira atatun vevsera ran vevea tuai be, “Rav uloinia be ‘Kea ata Nasaret vwate.’ ”
Àwon tá yàn lọ́wọ́lọ́wọ́ báyìí:
Matiu 2: HNB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Society of the South Pacific
