Mat 10
10
Ghele ntum nə Jesus
(Mak 3.13-19; Luk 6.12-16)
1Jesus nɛy tooy ghon-ɛyfɛl nə wen ghɛ njio-sebaa ɛyvəm è fo əbtaawe se ghene ge ghene yɛ jume ɛyfim so, gese chuke tenkii teyaf tejim, nɛ̀ ɛynkii əbnəə wɛ əb fóon ngɛk se əbghune. 2Lɛɛ teghele ghɛ́ ntum nə Jesus ghɛ njio-sebaa ɛyvəm. Wɛ mbiy lu Simon wɛ ɛ́ toŋten ge Bita nɛ̀ wan-no ə wene Andole, nɛ̀ ghon ə Zebedee ghɛ Jɛms ghene Joon, 3nɛ̀ Filib ghene Baltolomew, nɛ̀ Ntomas ghene Matio wɛ wel ɛyfii shile, nɛ̀ Jɛms wɛ wán ə Alfaeus, nɛ̀ Taddaeus, 4nɛ̀ Simon wɛ əb nè luŋen nɛ̀ ketume, gese nɛ̀ Judas Iskaliot wɛ əb nè kalen əmnaŋ, ɛ́ koo Jesus.
Jesus tum ghɛ́ ntum ghɛ njio-sebaa ɛyvəm
(Mak 6.7-13; Luk 9.1-6)
5Jesus loo tume ghel ghɛ njio-sebaa ghin, è tef ghene ge: Ghàà ghɛn ndu se ɛylak nə əbtume, nɛ wel yɛ ke se ndu ɛ ntɛke Samalia. 6Ghɛn ndu nɛ lu se ghele Islaele, ghene lu ka bvəyse njiɛ sɛ se lɛyenmen. 7Ghɛne loo ndu, ghɛn yɛ fekte se ghele ge: Ɛysak ə Feyine shi ɛ nchiɛ ɛ nchiɛ. 8Ghɛn yɛ chuke ghel, lose ghel se ɛykuo, chuke ghel ɛyyafe kensaase, gese jume ɛyfim. Mɛ fó əbtaawe vin se ghɛn se lólò, ghɛn yɛ chuke ghel so se lólò. 9Ghɛne loo ndu ghàà wel liɛ əbkaa. 10Ghàà wel liɛ kebam se ɛyjɛl fɛn kene ndəy selee, kene guose ɛvəə selee, kene mbàŋ, bek ge ɛ́ lu se yɛ toknen nɛ̀ wel əbfɛlen.
11Ghɛne lii naa ɛ ntɛk ɛykɛ, ghɛn kɛŋ wel wɛ əb koŋen se fiisene ghɛn, è yɛ chii ghɛne ghene se chin se ka ghɛne nɛ̂y lòò se fo. 12Ghɛne ndu è lii ɛ ndaa, ghɛn suuy ge: Əmnyiaŋe yɛ lu se ghɛn. 13Ɛ́ fiisen ghɛn, ghɛn mak mbose se ndaa fo, yɛ lu wɛ ge ɛ́ jia fiisen ghɛn, ghɛn vəse é mbose yɛn gok se ghɛn. 14Ke gan ge ɛ́ jia fiisen ghɛn ɛ kelik, è jia yio kenəə kɛ ghɛne suuyen, ghɛne loo lòò se fo, ghɛn tɛte kebvəle kɛ foo se ghɛn ə ɛvəə. 15Mɛ suuye əbluuy se ghɛn ge: Kɛ Sodom ghene Gomolla yî yɛ ghoblen ɛ kechii nsak, chia kɛ ntɛk nɛ̂ ghane.
Ɛ́ nɛ̂y nəkse ghon-ɛyfɛl nə Jesus
(Mak 13.9-13; Luk 21.12-17)
16Yɛn-a! Mɛ tume ghɛn ka bvəyse njiɛ ɛ məme baase. Ke me se lu ge ghɛn yɛ feesen ka yiose dî, gese loole ge wɛ̀ɛ̀ ka əbnlal dì. 17Ghɛn yɛ toknen bek ge ghele nɛ̂y koo ghɛn è ndu so se ndaa nsak, è yɛ lu se gese se tɛle ghɛn ɛ ghene ngayse ɛyjem. 18Ɛ́ nɛ̂y guf ghɛn è ndu so se ɛyshiɛ nə ghɛ ɛ́ saken, nɛ̀ tefone bek mɛ é ghɛn fekte kenəə ə Feyin se ghene gese nɛ̀ se əbtume. 19Ɛ́ koo ghɛn è loo sak, ghàà wel yɛ kán ge yi sɛ nɛ̂y suŋnen lɛɛy-a, gese nɛ̀ ge yi sɛ suuy gee ghɛ-a, bek ge Feyine nɛ̂y fo kii dii kɛ wɛ̀ suuy kɛn əbliy fo. 20Giɛ sɛ se nɛ̂y yɛ fəy ɛ ghɛn ɛychio jia nɛ̂y yɛ lu sɛne, se nɛ̂y lòò se Keyioy kɛ luun kɛ Ba ə wɛn wɛ əb suŋnen ɛ məm nə ghɛn.
21Ɛ nɛ̂y loo lu əbliy fo, é wel yɛ kal əmnaŋ kum wán-nyii ge ɛ́ yuy, nɛ ɛbaye kale əmnaŋ ge ɛ́ yuy ghon ə ghen, nɛ ghone bo fəye wiy fô ghene ɛbaa ə ghene nɛ̀ ɛnoo ghene, dî kale əmnaŋ ge ɛ́ yuy ghene. 22Ghel ɛjime nɛ̂y yɛ bane ghɛn bek ka ghɛn luun ghel ə ghom, dî nɛ naa ndɛ wɛ əb nɛy teem ketaan se chin se kenləysen naa boy. 23Ɛ́ nɛ̂y loo nəkse ghɛn ɛ ntɛk, ghɛn nyiŋ è ndu se ntɛk ɛylee. Mɛ suuy əbluuy se ghɛn ge ghɛne jia nɛ̂y jɛl ntɛke sɛ Islaele sejim nɛ Wanwele báà gwiy.
24Wan-ɛyfɛle báà se chia ba-ɛyfɛl nə wen, nɛ kekose chia wiy ba-ɛyfɛl nə wen. 25Wan-ɛyfɛl lu se yɛ saŋle se yɛ lu ka ba-ɛyfɛl nə wen, nɛ kekose saŋle se yɛ lu ka ba-ɛyfɛl nə wen. Ɛ́ lɛ toŋte ba-ɛykfəə ge Beelzebul, é ɛ́ jia toŋte ghel ə wen ɛ teghel tɛ te befen chia ɛyghene-a?
Ghàà fan wel, fane nɛ lu Feyin
(Luk 12.2-7)
26Ke me se lu ge ghàà ghɛn yɛ fane ghel. Ghɛn yɛ ke ge chəm wiy yɛ ɛy yî buu ghàà bvəsen, nɛ̀ kenəə kenlete wiy kɛ ɛ́ yî buu ghàà yɛ ke. 27Kenəə kɛ me suuyen se ghɛn ɛ nfiine lu nɛ ghɛn lu se yɛ suuy ɛ chuy ɛybanen, nɛ kɛ ɛ́ chəmten chəmten se ghɛn lu nɛ ke nɛ̂y fəy ɛ əbkwak. 28Ghàà ghɛn yɛ fane ghel ghɛ lòó ghene yuy kɛn kechak əbghun è jia yuy keyioy. Ghɛn yɛ fan nɛ lu Feyin. Lu wen wɛ lòó əb yuy wel, è bese keyioy ə wen ɛ kemboo əbvəs. 29Lòó wel yun əmnjoŋtekule əmbua se əbkaa nɛ kechine tene wiy, dî nɛ chèmè lòó femoke jia fəy se ntiɛ nɛ Feyine maa. 30Chèmè lu nəŋ sɛ se luun ɛ wɛ̀ ketuu fene Feyine ko ke ka se luun. 31Ke me se lu ge ghàà ghɛn yɛ fan bek ge ghɛne chia əmnjoŋtekule naa se ɛydio.
Wel beeme Jesus é Jesus bééme wen
(Luk 12.8-9)
32Naa ndɛ wɛ əb beemen ɛ ɛyshiɛ nə ghele ge yi lu wel ə wom, lu nɛ Wanwel yî beeme wen sɛy ɛ ɛyshiɛ nə Ba ə wom ɛ ɛyyio. 33Dî nɛ naa ndɛ wɛ əb maan mɛ ɛyshiɛ nə ghele lu nɛ mɛ yî maa sɛy wen ɛ ɛyshiɛ nə Ba ə wom ɛ ɛyyio.
Jesus gwiy nɛ̀ əbngiabsene
(Luk 12.51-53; 14.26-27)
34Ghàà ghɛn yɛ kwaate ge mɛ nè gwiy nɛ̀ əmnyiaŋe se ketuu ntiɛ. Mɛ nè báà gwiy nɛ̀ əmnyiaŋe; mɛ nè gwiy nɛ̀ əbngiabsene. 35Mɛ nè gwiy se nɛɛy ge ghon ɛluumene jia yɛ fəy fo ghene ɛbaa ɛ ghene, é ghon ɛkiye jia yɛ fəy fo ghene ɛnoo ə ghene, é əbkiy ə ghone jia yɛ fəy fo ghene ɛnoo lum nə ghene. 36Wel əbbaanese nə wel əbtaa nɛ̂y yɛ lu wel ɛykfəə nə ghen.
37Naa ndɛ wɛ əb koŋen ba ə wen kene no ə wen chia ka əb koŋen mɛ báà kwɛnten se yɛ lu wel ə wom, nɛ naa ndɛ wɛ əb koŋen wán ə wen əbluumen kene əbkiy chia ka əb koŋen mɛ báà kwɛnten se yɛ lu wel ə wom. 38Naa ndɛ wɛ əb báà bɛɛy kentam ə wen è yɛ jɛl so ɛ mɛ ɛybam báà se lu kekwɛnten se yɛ lu wel ə wom. 39Naa ndɛ wɛ əb luŋen se babte ɛychii ə wen náà lɛɛy ɛyghene, nɛ naa ndɛ wɛ əb lɛyen ɛychii ə wen bek mɛ náà kiile ɛychii.
Feyine nɛ̂y bose wel əbjuŋ
(Mak 9.41)
40Naa ndɛ wɛ əb fiisen ghɛn, fiisen nɛ lu mɛ, nɛ naa ndɛ wɛ əb fiisen mɛ, fiisen wel vi wɛ əb nè tumen mɛ. 41Naa ndɛ wɛ əb fiisen wele ntum nə Feyine bek ka luun wele ntum nə Feyine nɛ̂y kiile əbmakte wɛ luun wɛ wele ntum nə Feyine. Wel fiisen wel wɛ əb nɛɛyen kenəə kɛ Feyine koŋen bek ka luun wel əbjuŋ, é Feyine nɛ̂y fo əbmakte se wen ka wɛ əb fóon se ghel ɛjuŋe. 42Naa ndɛ wɛ əb foon chèmè kɛn əbbome moo əmsanen se wele wɛ̂ nchɛke nchɛk ɛ məme ghon-ɛyfɛl nə mɛ bek ka luun wán-ɛyfɛl nə mɛ, jia náà buu se kiile əbmakte ə wen.
Àwon tá yàn lọ́wọ́lọ́wọ́ báyìí:
Mat 10: oku
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©CABTAL, 2012
