Matìo 4
4
Vʉatsə̄a a tsoom Yɛso
(Mâk 1:12-13; Lûk 4:1-13)
1 #
Hib 2:18; 4:15 Zuʼ tə̀ Zɔlɔ tə te tə n daŋso nì sòʼ â Yɛso, aŋ ŋgwən enyəa vʉatsə̄a a ndûw tsoom wə̄n fughu. 2Ù n dòʼò fùghù êzə̀ alo ntsuʼu ŋghəm n chìakò, zee ndùw bùghò bwîi ndùw mò zə̌a yo fəgha kə̀ li ko a fùghù êzə̀. Dzə̀ŋ n daŋso bùghò zà tsughu wə̄n aŋghəa tsuʼu n te n tsəghà tsughu. 3Vʉatsə̄a yi n daŋso ndùw è bugho, dzɛ̀ â wən enyəa, “Aŋghəa e lô enyəa ghù lǒ Wɛ ù Kə̀zə̀, dzàa tsughu enyəa tia zən fə̀là kɔʼ ufʉghàzəa.” 4#Lwa 8:3 Yɛso ŋ kuuwn dzɛ̀ â wən enyəa,
“Ghe tɔm naŋa am mwàʼsò kə Kəzə̀ enyəa,
‘Ghùw yò dzə̂ alekaā mughùu ko alo ufʉ̀ghàzəa,
to ù laām mughùu aŋ ghəa zəla Zə̀ kə̀ dzɛ̂ sə wo.’ ”
5Vʉatsə̄a yi ghə n daŋso nì nùghù ndùw wən an Yɛ̀lusalɛ̀m, Naʼ è Zɔlɔ zo, kɔʼ naŋa kɔʼ wə̄n an ndɔ̀ŋɔ̀ndɔ̀ŋɔ̀ fə gɔ̀ŋ kə ndughu è Kə̀zə̀ e ne, 6#Sms 91:11, 12 dzɛ̀ â wə̄n enyəa, “Abugho ghù lǒ wɛ̀ ù Kə̀zə̀, tǎa sə tsùghù ndùw fɛ, nu ghe tɔm naŋa am Mwàʼsò kə Kəzə̀ enyəa,
‘Zə̀ kə̀ lo tsə̀ghàsò tsùghuu kə̀làŋ â tsə̀təndə̄ghā tə wə̄n to, tə e lɛnlo â ghù,
bɔɔm sùghò ghù
enyəa e kwo ko ghù lò tsɔ̂ɔ taʼn ghuw ko alo etīa.’ ”
7 #
Lwa 6:16
Yɛso n dzɛ̀ â wə̄n enyəa, “Ghe tɔm naŋa kpeʼe sùghò enyəa, ‘Kà mɔ̂m kòʼ Mughùbè wʉ̂a, Kə̀zə̀.’ ” 8Vʉatsə̄a yi ghə n naām nì nùghù kpèʼe ndùw wə̄n aŋ kwàʼ ù də̀ghàadə̀ghàa ù li wo, dè tsùghù wò wə̄n â nàʼà tə mbī to tə dzə̀m, ghəa tə ghaʼa a te; 9daŋso dzɛ̀ â wə̄n enyəa, “Naʼà tə̀n tə̀ dzə̀m ènyə, M̀ fughuu nù â ghù abugho ghù təm wo ŋguʼ to a tsəlà mùghò.” 10#Lwa 6:13 Yɛso n daŋso dzɛ̀ â wə̄n enyəa, “Nùghù fɛ a Satàn wə̄n! Tɔŋlo enyəa ghe tɔm naŋa enyəa,
‘E kɔʼso kɔ Mughu ù te, Zə̀ kə̀a,
ghù è tele fwaʼā ko â wə̄n.’ ”
11Vʉatsə̄a yi ghə n daŋso zə̀ghà tsùghu wə̄n, tsə̀ndə̄ghā è Kə̀zə̀ m bùghò yòsò kɔʼ wə̄n.
Yɛso də̀ghàan fwàʼ kə wə̄n aŋ Galèlîi
12 #
Mat 14:3; Mâk 6:17; Lûk 3:19, 20 Êzə̄ŋ, ghəa Yɛso zuw tsughu enyəa ghe n Dzɔ̀n kwu, ù n nùghù ndùw aŋ Galèlîi. 13#Dzn 2:12 Aŋ Galèlîi, ù ndùw an naʼ e Nazalɛ̀t, ù n zə̀ghàa tsughu Nazalɛ̀t, ù n ndùw mùghùu ndùw aŋ Kàpɛnòm a ŋgùŋ è dzùghùntsòʼ, am mbùʼ è Zɛbulùn àsùghò Naftalè, 14alebɔɔ̄m luesō tsughu lâŋ kə fəgha kəla ghùwshʉ̀ghà Èzayà fə̀ dzɛ̂ naŋa enyəa,
15 #
Èzy 9:1, 2 “Ghî a Zɛbūlùn ghò, ghî a Naftalì ghò;
an dzì è dzùghùntsòʼ, a ŋgùŋùtsə kə Dzudà, Galèlîi naʼ zə Etòʼò;
16tɔɔŋ ghɛ̀ ghəla ghɛ̀ mò naām mughù alo kələ̄m,
n tsə̀ è tùghuu kôʼ.
Ghɛ̀ ghəla ghɛ̌ fə̀ lo fughu am mbù è te, mò à lə̀mà kɔ̀ʼɔ ko èvʉ fughu,
tsuʼ wə n zuw an tuw wɛʼɛ.”
17 #
Mat 3:2
Yɛso fə̌ tsə̀ndə̄ghā è Kə̀zə̀ kaʼ nughu wo alenàʼà an tì kə te ko enyəa, “Ti màʼa nlò ghəa ghɛʼɛ à biigh gho, tɔŋlo enyəa fɔ̂e u kəwālā wə n su.”
Yɛso tɔ̀ŋɔ̂ Tsə̀təndə̄ghā tə sûesʉ to
18Aŋghəa Yɛso tsə̀ghaa a ŋgùŋ è dzùghùntsòʼ è Galèlîi, ù ŋ kòʼ tsùghù ghî à li gho a bə̀gha mo ghe lo waazə̂, Sǎemòn wəla ghe tɔŋlo enyəa à lò Pìtà, ghèe wàazə̀, Andùlù, mo ghe maʼnlò èghuūw fughu an dzùghùntsòʼ; ghe fə̀ lo tsəgha ghî à kwuu a tətsəghaa gho. 19Ù n dzɛ̀ â ghee enyəa, “Bùghò nlò a bàâ mùghò, Ǹ lo ghəə̄ŋ tsughu ghɛ̀ è kwuu ghî ghò tò tətsəghaa.” 20Ghe n daŋso zə̀ghà tsughu ghuūw e ghee, nùghù ndùw a bàâ Yɛso. 21Yɛso mo e kôom səā kəŋo ndûw â sə ko, ù ŋ kòʼ kpèʼe tsughu waazə̂ à li gho a bə̀ghà, Dzɛ̂ms ghèe Dzɔ̌n, wɛ a Zɛbɛ̀dîi. Ghe n lo alo kəkwə̀n ghèe ghê tsele tɔɔŋ Zɛbɛ̀dîi, mo ghe yia fəghaan ghuūw e ghee zo alemàʼà nyəā tsughu, ù n tɔŋɔ tsughu ghee. 22Wɛ yi ghə n daŋso zə̀ghàa tàʼà tsùghu tsēlē alo kəkwə̀n, nùghù ndùw a bàâ wə̄n.
Yɛso nàʼn ndùw tsə̀ndə̄ghā è Kə̀zə̀, baaŋ ndùw sùghò à ghì à dzaŋā gho
23 #
Mat 9:35; Mâk 1:39 Yɛso m bwìi ŋgəa tsughu Galèlîi e dzə̀m, zoʼn ndùw ghee an Ndughu tə Tə̀dzûu tə̀ ne to, nàʼn ndùw Làbəlà è te kùu ndùw Fɔ̀e u Kəwālā, baaŋ ndùw ghì ghəla ghe mò dzaŋā ŋgòʼ è dzàŋà tə̀n tə dzə̀m. 24Zwɔ̂ŋ u wə̄n wə m fuŋ ŋgəa tsughu naʼ e Silìa e dzə̀m, ghî ghə̀ n nîi wò mbī tə aghì tə̀ dzaŋā ten tə̀ dzə̀m; ghəla ghe dzaŋā ŋgòʼ e dzàŋà tə̀n tə̀ dzə̀m àsùghò luʼū tə eghùe tò, ghəla ghe ki zʉ̀ ù biigh wo, ghəla ghe bvʉā bvʉ̀ kò, à ghəla ghe kpuw doʼō â luʼū tə ghùe tò, ù m baaŋ kɔʼɔ ghee. 25Nê kə aghì kə̀ n tə̂əŋ bwìi kǎaŋ ko a bàâ wə̄n, ghe nughù sə kaāŋ wo am mbùʼ è Galèlîi àsùghò an Nàʼà mən Eghəm#4:25 Ghe fə̀ tɔŋlo an Gə̀lêʼ enyəa à lǒ Dìkapōlès mo e moʼò enyəa “Kɔlɔ tə tənàʼà eghə̄m”. an Yɛ̀lusalɛ̀m, an Dzùdîa àsùghò a ŋgùŋ è tsə kə Dzodàn.
Àwon tá yàn lọ́wọ́lọ́wọ́ báyìí:
Matìo 4: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
