Lûk 24
24
Yɛso kɔʼ sə alo evʉ
(Mat 28:1-10; Mâk 16:18; Dzn 20:1-10)
1Ghəa ghe zʉ̂ʉn zee tsughu ghue zo tsuʼ è fì, a ŋ kuuwn bùghò an tsuʼ u sûesʉ wo alo ewə̄n, ghe n chì kɔ̀ʼ utsuʼ, nùghù ndùw fughu alo eshìa, à fə̀ghà n lə̌əm mì. 2Ghe n ndùw fìi ndùw ko mo ghe n tia e bəŋso nùghù a fù u eshìa. 3Ghe mo e kôom nyə̌a ndùw nù, kè kôom kôʼ gwən e Mughu ù te. 4A m bùghò tuw kə sô naām kpuūw ghee aŋ ghə̀a ghə̀ è ghə̀n, ghe m fìi kɔ̀ʼ ayînû a bəghà, an ndzʉ̄ tə̀ nyəghaan to ghe ti a vʉ̀a ghee. 5Ghəa ghe ti fuʼū kum naŋā tsughu tuw wo a ghueetsə̄ am fə̀ŋ tə̀ tsəəŋ to, ghî yî m bvʉ â ghee enyəa, “À lǒ kwò ghɛ̀ sô dzə̂ən wô ghì a sə̀ à tughu gho am bvʉ e ghî a kpuuwn gho a?” 6#Mat 16:21; 17:22, 23; 20:18, 19; Mâk 8:31; 9:31; 10:33, 34; Lûk 9:22; 18:31-33(Ù kòom yò fɛ, ù n zòo nùghù kɔ̀ʼ alo evʉ̄). Mòʼn wò nlò ghəa ù fə kəa â ghɛ̀ aŋ Galèlîi. 7Ghəa ù fə̀ dzɛ̂ enyəa Wɛ ù Ghùw lo nyəa tsughuu aŋ ghu kə ghì à biigh gho, ghe lo təghàa wə̄n, ù lo kɔʼɔ səā kɔʼ alo abugho tsuʼu n kê kpe tsughu n təgha.
8Ghe n daŋso tɛ̀ mòʼn wò shwaʼ u wə̄n. 9A m bùghò ghe nughù wo fughu alo eshìa, ghe n nì kɔ̀ʼ ghəa ghən, buʼ tsughu kpe â tsoʼ tì to èghəm à ghè zò è mɔ̀ʼ, àsùghò â tsə̀təndə̄ghā tə̀ loʼ tì tə̀ dzə̀m. 10Yîzən ghəla ghe mò bughò naʼà wô ghəa gho â tum ti to, fə̀ lo ghê Mèle Màʼdàlêen ghèe Dzwǎnà àsùghò Mèle tɔɔŋ zə̂ Dzɛ̂ms, à yìzən à li gho. 11Shwaʼ wən wə ŋ kuūwn bə̀n lǒ â ghee tò ghəa à bughoon gho, ghe ŋ kè naŋa kə̀tuŋlō a te. 12Pità n tsò kǔuwn nùghù ghàʼ nùghù kɔʼ ko nù sə̀ kə̀m ndùw ko fughu alo eshìa. Ghəa ù ndùw ghaā tsughu, ù ŋ kòʼ nyə̀ ndùw kô gbà u kəmbəghalaŋ, u tsô maʼà doʼō fughu. Ù ŋ kòom wò ebàm, kwə̀ən kə̀ ŋ kɔʼɔ wò wə̄n enyəa à è yia kûm kwò?
Yɛso an dziī è Emà
(Mâk 16:12-13)
13Tsuʼ fə̀ mɔʼɔ̄ fia yîzən yi ndûw kôʼ ghəa yì, tsə̀təndə̄ghā tə Yɛso li tə n tsughuu ndùw an nàʼà fə Emà ghee a bə̀ghà, fə naʼà mò a buu tsughuu tə̀bəghaa sə̀ghàmbəgha alenùghù tsughu an Yɛ̀lusalɛ̀m ndùw tɛ̀ fùghù. 14Ghəa ghe bwîi tsughuu nduw, ghe ŋ kə̂aa tsùghuu ndùw lee tə aghəa tən tə̀ dzə̀m tə tsəghà kəŋo. 15Ghəa ghe kə̂aa tsughuu ndûw ghəa gho dzîidziī, ghuūghùe u Yɛso wə̀ ŋ kwuun wò ghee, dzeŋe nùghù ndùw ghèe ghee. 16Ghe ŋ kuūwn nùghù fə̀ŋ dòʼò è tsughu, ghe n yo alekòʼòkɛlɛ wə̄n.
17Ù m bvʉ â ghee enyəa, “Ghɛ̀ dzughu a biso pfʉ̄a wò aŋ kwò?”
Ghe n daŋso temē è tsughu, alo emūŋē, ghe lo. 18Tsə̀ndə̄ghā e mɔ̀ʼ, tɔɔŋ Kə̀lopàs, n daŋso bɛ̀lɛ̀ tsùghu wə̄n enyəa, “Ghù kùʼù bwìin nyə̀ wò nù an naʼ e Yɛ̀lusalɛ̀m à, ghù sò məghāa ghəa ghəla a tsəghà kəŋo fughu an tsùʼù mən a?” 19“Ghəa à ghɛ gho?” Ù nùghù bvʉ tsughu. Ghe mo enyəa, “Ghəa a Yɛso, ghùw Nazalɛ̀t wəla ù mò lo tùghùtùghù kə ghùwshʉ̀gha kò aŋ ghəa a wə̄n à ghəəŋ gho, àsùghò aŋ ghəa a wə̄n à kəaa gho a vʉ̀a Zə̀ kò, àsùghò an sə kə ghì ghə̀n à dzə̀m. 20Àsùghò ghəa tuw u tə fɔ̀e, ghèe ghê ghì ghəla ghe lɛɛn naʼ zo fə̀ nî kɔʼ wə̄n, fùghù sə̀ ndùw enyəa ghe nîi wi, àsùghò ghəa ghe mò nî təghàa kɔʼ wə̄n. 21À bùʼ kà yò ko êzə̀, a mò tso kuuwn kwo enyəa Zə̀ kə̌ fə̌ wə̄n tum enyəa ù bùghò bəghāa sə Ezə̀lɛ̂, a fɛ kòom lǒ, tsùʼu mə̀ m kpe n təgha aŋghəa ghəa a te a fə̀ sə. 22Yîzən ghaʼa à li gho ghe mô gbə̀n lǒ fughu alo eshìa, ghe yia a fəghaan bùghò fwə̂n maʼà wô sughò tɔ waʼā wo. 23Ghe yia a bughò dzɛ̂ wô enyəa ghe kâ gwən e wə̄n e kôʼ, fughu kpeʼe wò sùgho làbəlà enyəa ghe mô kòʼ tsə̀təndə̄ghā tə Kəzə̀ tə bə̀ghà a fughu tò ghəa a udzǒo, tia tə dzɛ̂ â ghee enyəa, Yɛso lò â sə à tughu gho. 24Ghî ghaʼa à li gho ghàʼ à ghee mô dzeŋe lo a dzə̀m, ghe yia a nduw fughu alo eshìa bɔɔm ndùw kòʼ ndùw ko aŋ ghəa yia yîzən yi mô bughò naʼà wo, kè kôʼò sughò Yɛso.” 25Yɛso fi nughù dzɛ̀ nù â ghee enyəa, “Chisɛɛ̂, làʼsò tə aghì tən, mo e tughuu tsə̀ghà kwò â ghɛ̀ alebôo shwaʼ u ghùwshʉ̀gha wəla ù fə̀ dzɛ̂ naŋā. 26E fə̀ mgbaŋ yo enyəa Kə̀lestò ù te kê bùʼù fǎan tsughu dzə̀ nù sěe ù sò zəā Fɔ̂e u wə̄n wo a?” 27Ù n daŋso zìi tsùghù am mwàʼsò kə Musî, teso kɔ̀ʼ ndùw ghəa a ghùe a wə̄n â ghee, kɔ̀ʼ kùm ndùw am mwàʼsò u ghîishʉ̀gha à li ghə̀n à dzə̀m. 28A m bùghò ghe kuʼso ndûw naʼà fia ghe mò nduūw fughu, Yɛso m fòʼsò tsùghu tò ù so e tsəghàa daŋso. 29Ghe n tɔ̀ʼ bùʼ kəghu â wə̄n enyəa, “Bwii dòʼò fɛ sɛ̀, nu zuw e sô sàaŋ ndùw nù; nəgha zə n ndùw.” Ù m bə̀ŋ ndùw sùghò alenyəa gaʼā bwiī tsughu ghèe ghee. 30A m bùghò ù tsughu doʼò tsughu zə zo ghèe ghee, ù n nì kɔ̀ʼ kəbɛ, gɔ̀ɔŋ tsùghù a te, boʼn fughu tsughu â ghee. 31Tɔ u ghee wə n daŋso kwə̀n nyə̀ è wo, ghe n nùghù kòʼkɛ̀lɛ kɔʼ wə̄n; ù n daŋso saŋ tsughu fughu an sə kə ghee. 32Ghe mo aŋ ghue e ghee enyəa, “Nyuūm kə mô mgbàŋa kɔʼɔ yo sɛ̀ aŋghəa ù mò bwîi kə̂aa wô shwaʼ u Kəzə̀ wò sɛ̀ à ghee an dziī a?” 33Ghe n nùghù kɔ̀ʼ an nə̀gha e te zo, daŋso nùghù ndùw ebàm an Yɛ̀lusalɛ̀m, ndùw kòʼ ndùw tsoʼ tə̀ li tì èghəm à ghè zò e mɔ̀ʼ, àsùghò ghì à li yia ghèe ghee mò dzeŋe lo a dzə̀m. 34Ghe n dzɛ̀ â ghì yì a bə̀ghà enyəa, “Mughùbè ŋ kùm zòo alo evʉ, vʉ̀ ù ndùw dê ghue wo â Sǎemòn!” 35Tsə̀təndə̄ghā tì tə̀ bə̀ghà n dzɛ̀ ndùw sùghò fəgha kəla kə mô sə an dziī a zəŋò ghee, dzɛ̀ sùghò aŋghəa ghe mô nughù kôʼkɛlɛ̄ kɔʼ wə̄n ghəa ù boʼn fughu tsughu ghee â bɛ ko.
Yɛso gbə̀n sə kɔʼ a vʉ̀a Tsə̀təndə̄ghā tə wə̄n to
(Mat 28:16-20; Mâk 16:14-18; Dzn 20:19-23; Kfw 1:6-8)
36Ghəa ghe kə̂aa ghəa yì èzə̀, ghuūghùe u Yɛso wə̀ m fùw sə kɔʼ fughu an saʼ kə ghee, dzɛ̀ â ghee enyəa, “Ghɛ̀ kele bughuso zo fɛ.” 37Ghe n tɛ̀ è tsəŋ, enyəa ghe wɛɛ kòʼ kəzəŋso. 38Yɛso n dzɛ̀ â ghee enyəa, “À ghɛ̀ fəmsô kwò, tuw kə ghɛ kpuūw aŋ kwò? 39Kòʼ nlò ghu ghaŋa gho àsùghò ghuw ghaŋa gho a, wən kùm lò mugho, mɔ̌ɔ zuw tsughu nlò mugho aŋ ghu; nu zəŋsō kə ghûw kə̀ ki yo gho wo àsùghò nyòm è ùghùe tò aŋghəa Ŋ̀ ki fɛ. 40A m bùghò ù dzɛ̀ tsughu êzə̀, ù n dè ndùw ghu a wə̄n, à ghuw a wə̄n gho â ghee.” 41Ghe mô e duʼnlo, zə n tughuu ghaʼa â ghee aleboo, dzughu e màʼa fə̀ naam zuū ghee, Yɛso m bvʉ tsughu â ghee enyəa, “Ghɛ̀ kpaʼ ki nû fəghàzəa ko fɛ a?” 42Ghe n dzə̀ fùghù ndùw wə̄n â tɔ̀ŋ kə etsə̄ghā kə̀ nyɔʼɔ̄ ko, 43ù n nì pfʉ kɔʼ fughu an sə kə ghee.
44Ù daŋso dzɛ̀ â ghee enyəa, “Wən lò shwaʼ waŋa wəla mùgho fə dzɛ̂ â ghɛ̀ ghəa mùgho fə̀ naam lo sɛ̀, enyəa ghəa ghə̀n à dzə̀m ghe tɔm naŋā am mwàʼsò kə Musî, àsùghò am mwàʼsò wəla ghiīshʉ̀ghà à fə̀ tɔm naŋā, àsùghò mwàʼsò kə Sâams kò kùu wo mùghò, a ki alenì kəbəla.” 45Ù fi daŋso tsʉ kɔʼ nû tɔ u ghee wo alezuūwkɛlɛ̄ tsughu shwaʼ u Kəzə̀, 46ù n dzɛ̀ â ghee enyəa, “Ghe tɔm naŋa enyəa, Kə̀lestò ù te ki alefala tsughuu dzə̂ sěe ù kè kɔʼɔ səā alo evʉ̄ abugho tsuʼu m kpe tsughu n təgha. 47Àsùghò enyəa, ghe kê kì alenaʼn nduūŋ nduw an zən e wə̄n, â nàʼà tə̀n tə̀ dzə̀m alenìi nughù tsughu an Yɛ̀lusalɛ̀m, enyəa ghî à tiī kuwnlo am bòo tə ghee, tò Zə̀ kə̀ ghuūw maʼà bòo tə̀ ghee. 48Ghɛ̀ ŋ ghəa ghən kôʼ, ghɛ̀ lo e teso dzâa ndûw â ghì ghò. 49#Kfw 1:4 Kòʼo sùghô, Ǹ tuu wò nù to kəla Bəghà fə̀ to naŋā â ghɛ̀, kuuwn bɔ̄ɔm dòʼo tsughu ko nlò fɛ, ghɛ̀ ni kɔʼ dzə daʼa ko aŋ ghùu Zə̀ kò.”
Yɛso kɔ̀ʼ alo Kəwālā
(Mâk 16:19-20; Kfw 1:9-11)
50 #
Kfw 1:9-11
Yɛso n daŋso lɔ̄ʼsō sè nùghù ndùw tsə̀təndə̄ghā tə wə̄n êzə̄ŋ aŋ kàlà tə Bɛtānì, kele kɔʼ aghu edzuŋ, bughuso tsughu ghee. 51A m bùghò ù naam fughuu ghee â ghu kə̀ saa ko êzə̀, Zə̀ kə̀ n nì nùghù kɔ̀ʼ ndùw wə̄n alo kəwālā. 52Ghe ŋ kɔʼso wə̄n, kòom nùghù nyə̀ wò èbàm an Yɛ̀lusalɛ̀m tsoʼnlo etsoʼnlo. 53Ghe m mughu zēe tsəgha ko am be kə̀ ne ko, ghe ndûw kɔʼso Zə̀ kò.
Àwon tá yàn lọ́wọ́lọ́wọ́ báyìí:
Lûk 24: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
