Lûk 14
14
Yɛso bǎaŋ ghùw Tsuʼntsə̄ u Tə̀dzûu
1A fə̀ bugho Yɛso nyəā ndûw alendùw zə Tsuʼntsə̄ an ndughu lô də̀ŋ kə tə̀ Falàsîi kə̀ li ko, ghe n tɔʼɔ̀ tsêe ndùw ko wə̄n kuʼkuʼ. 2Yɛso fi kôʼ kɔ̀ʼ nû ghùw ù lì an sə kə wə̄n mò ù dzàŋà dzàŋ è muūwn zo. 3Ù n dzɛ̀ â ghê dèekə̀làŋ àsùghò Falàsîi tò enyəa, “À lò kəlâŋ alebaŋlo àghì an Tsuʼntsə̄ ŋkāa à yò kəlaŋ a?” 4Ghe ŋ kè kuūwn bɛlɛ̀. Yɛso fi nî bǎaŋ tsughu nû tûwbʉ̀ghà vʉ̀, zə̀ghà ndùw wə̄n. 5#Mat 12:11 Ù n daŋso dzɛ̀ â ghee enyəa, “À lò ndugho fɛ aŋ ghɛ̀ ghən a, wɛ ŋkāa mbɔ̀ŋ è wə̄n lô alebvʉ̀a nyəā tsughu alo kəbùʼ Tsuʼntsə̄ a, ù dòʼŋkè kwuūn ndûw sêe nughù səā kɔʼɔ̄ wo a?” 6Ghe ŋ kè bɛlɛ̀ zən.
7Ghəa Yɛso kòʼ aŋghəa ghî yia ghe fə naʼā fughu shîaa doʼò kaāŋ nduw am gbə̄lā ù ne wo, ù ŋ kwə̀ən kə̀a ndùw ghee â shwaʼ wən wo enyəa, 8#Utɔ 25:6, 7 “Abugho ghùw nàʼà tsughu ghû an lʉ̀ ŋ wì, e kwo ghù lò ndûw nyaʼn kɔʼɔ̄ am bəla è ghûw ù nē, à làʼà lo mò ghe ŋ ghùw wəla ù tsə̀ghà sə ghû nàʼà sùghò; 9Ghùw wəla ù nàʼà ghɛ vʉ̀a ù bùghò dzɛ̀ â ghù enyəa, ‘Fughu tsughu ndàŋ â ghùw wə̄n,’ ghù koom doʼō tsughu tsughu am bəla kəla kə lwənsō tsə̀ghàtàʼà gbəla wo u dzə̀m an tuw kə̀ dəla ko. 10Abugho ghe laam naʼà tsughu ghû èzə̀, ndǔw dòʼo tsughu am bəla e ghì a lwə̄n, enyəa mò ghùw wəla ù nàʼà ghɛ bughò nù, ù ŋ kuuwn lò aledzàa wô â ghù enyəa, ‘Fə̄n waŋā, kɔʼ dòʼo ndùw fî.’ Ghî yìa ghɛ̀ à ghee doʼ sə̀ kɔʼso ghù. 11#Mat 23:12; Lûk 18:14 Nu ghî ghəla ghe kɔʼsō ghue zo, ghe lo lwənso naaŋ nǔ ghee a dzə̀m, ghəla ghe zumso tsughu ghue zo, ghe lo laam kɔʼso ghee.”
12Yɛso n dzɛ̀ ndùw sùghò â ghùw vʉ̀a ù nàʼa wə̄n enyəa, “Abugho ghù sə zɔ̂ʼ àghì, kà naʼà fən ghə̂a ghò ŋkāa waazughù ŋkāa tom ghə̀a ŋkāa ghî a kɔ̄n ghə̂a à kuu gho, e kwo ghe lô se kôom nùghù nàʼn wò sùghò ghù, e doʼò tsughu enyəa ghe ŋ ghù tsə tsə̀ghà wò ebàm. 13Abugho ghù se kuuwn naʼà àghì, ghù n laam nàʼà tsughu ghî à laa gho, ubvuʼ, ghî à foō gho àsùghò ùŋgwûundughu, 14Zə̀ kə̀ kê bughuso ghù, tɔŋlo enyəa ghe kê yò aletsəā tsə̄ghàa wô ghù ebàm. Zə̀ kə̀ kê ghù tsəa tsə̀ghàsò wò bugho ghî ghəla ghe lô tsəghatsəgha kê kɔʼɔ̄ səā alo evʉ.”
Kwə̀ən kə ushwāʼ kə zɔʼɔ ù ne wo
15A m bùghò ghùw u mɔ̀ʼ aŋ ghì yia ghèe ghee fə̀ zəā, zuw tsughu ghəa yì, ù mo â wə̄n enyəa, “Dzɔ̀ lǒ ghùw wəla ù kè zəā bɛ ko am fɔ̀e ù Kəzə̀!” 16Yɛso fi dzɛ̂ nù â wə̄n enyəa, “Ghùw ù lì fə̀ naʼā tsughu nāʼ fə aghì an zə è ne zo tsuʼ ù li wo; 17ghəa nəgha e kpe tsughu, ù n tum tsughu kɔ̂ɔ fə wə̄n enyəa, fə ndûw tɔŋɔ̂ ghì ghəla ù fə̀ naʼà enyəa, ‘Bùgho ko nlò nû; tɔŋlo enyəa a ŋ ghəa a bian naŋa mɛʼɛ̀.’ 18Ghee a dzə̀m m buʼ kaaŋ ndùw ko kə̀ghu. Ù sûesʉ n dzɛ̀ â wə̄n enyəa, ‘A so Ǹ zue naŋa kə̀luʼū ma, kee â ghù, zyəən zə̀gha kɔʼ mugho, Ǹ so n ndûw koʼò tsughu luʼu kə te ko.’ 19Ù lì mo enyəa, ‘A soō mùgho mò zue tsughu mbɔ̀ŋ tə̀ gwəə̄n to eghə̄m, M̀ fɛ so n soʼō mɔ̂ɔ kôʼ, kee â ghù, zyəən zə̀ghaa kɔʼ mugho.’ 20Ù lì mo enyəa, ‘A so Ŋ̀ kuʼù nì tsùghu wi, Ǹ yo aledɔ̀ɔm bughò.’
21Kɔ̂ɔ fi m bùghò dzɛ̀ wò sùghò ghəa yì â mughùbè ù wə̄n. Nʉghà wə̀ m pfʉ kɔʼ mughùndughu vʉ̀, ù n dzɛ̀ â kɔ̀ɔ fə wə̄n fo enyəa, ‘Kwuun nùghu tsughu ko êzə̄ŋ enyə, ghù sə tɔɔŋ kaaŋ wo ghî à laa gho, à bvuʼ wo, à ghì foō gho àsùghò ùŋgwûundughu enyəa ghe bughò.’ 22Kɔ̂ɔ fi fə n ndùw bùghò ebàm bùghò dzɛ̀ â wə̄n enyəa, ‘Mughùbè, mùghò m fwàʼ ghəa ghə̀là ghù mò tum mugho a te, bûʼ chia kə naam lo.’ 23Mughùbè vʉ̀ n dzɛ̀ â wən enyəa, ‘Ŋgəa nyə̀ ndùw ghɔ̀ɔŋ wə enaʼ wo, lùʼu mən an dziī à məla n sɔʼ doʼò nduw n dzə̀m, ghù è tɔɔŋ wo ghî ghò, to ndughu zaŋā luū tsughu. 24Naʼàghəa, ghùw sə̀ tso kɔʼ nəgha yo ghu ko fɛ an ndughu, aŋ ghì ghəla a mò naʼā.’”
Ghəa zəla è kwuu â ghùw aledòʼò Tsə̀ndə̄ghā è Yɛso
(Mat 10:37-38)
25Êzə̄ŋ, ghəa ghî à ŋgeē tə̂əŋ nduw a bàâ Yɛso, ù m fə̀n tsughu ughue dzɛ̀ â ghee enyəa, 26#Mat 10:37 “Abugho ghùw so e nî ghuw kaŋa, mò ù kà tsele bɛ̂ ghèe zə̀, bɛ̀ wì, bɛ̀ wɛ a wə̄n, bɛ̀ sùghò waazə̂, bɛ̀ dàŋso sùghò à ghue u wə̄n wo, M̀ fɛ kùum dzɛ̀ nù, ù kà kɔ̀ʼ kpè tò ù è doʼò tsə̀ndə̄ghā zaŋa. 27#Mat 10:38; 16:24; Mâk 8:34; Lûk 9:23 Abugho ghùw tàʼkè nɔɔ̄ tsughu aghəa, nùghù wò à bàâ mùghò, ù kà kɔ̀ʼ kpè aledòʼò tsə̀ndə̄ghā zaŋa. 28À lò ndugho fɛ ù tsə̀m tsughu alebəgha ŋgɔ̀ʼɔ̀ kə ndughu lo a, vʉ̀a ù dòʼŋkè buʼù doʼò tsughu, taŋso tsùghù dzə̀ enyəa ndùghù è te lo alekwū kwǒ a, to e koʼò tsughu enyəa e ki kpeen to nû kua wo alebəghāa mɛʼɛ̀ ndùghù è te a tè à? 29Abugho ù tsò fûw kaʼ tsughu ko bəghàan kò, vʉ̀a ù də̀m kê tsughu alemìasò, ghî ghə̀ è ke e bugho shwəla daŋā tsəgha wə̄n, 30enyəa ‘Tûw wən fə̀ bɔŋ kaʼ tsughu to fɛ enyəa e so e bə̄ghā ndughu, ghà kè tsughu alemìasò.’ 31Kàa à lǒ də̀ŋ kə̀ ghɛ ko kə so e naʼà tsàm a, kè buʼù doʼò tsughuu dzə̂ enyəa e taŋsō kɔʼ enyəa kam tə təsùghugòʼ tə̀n èghəm, to tə n yia a bu bàan to ŋgè kò ghèe ghê kam tə təsùghugòʼ tə də̀ŋ kə̀ li kə chiā, ŋghəm m bə̀ghà a? 32Abugho ù kòʼ tsughu enyəa è kâ buʼ e tsam e tɔ̂ʼ kɔ̀lɔ, ù ŋ kwuun tum zìi ndùw tum â də̀ŋ loʼ kə chî, mo kə nāam lò alo kədɛ̀, enyəa, to ghe mô bianlo. 33E fi lo enyəa, ghùw wəla ù yò alezə̀ghàa taʼà fʉgha wəla ù ki u dzə̀m, ù yò aledòʼò tsə̀ndə̄ghā.”
Tsòʼ məla n tɔ tsəghà tsughu
34“Tsòʼ n dzɔ̂ɔ nù a bugho m kpə̀ŋò dzə, abugho ŋ kòom kpəŋò yo, a lo alekòom kpə̂ŋsò naŋa ênzə̂n? 35Mə̀ n tsən kòom yǒ tò ghùw è ghəŋlo èghəa à tè, à m bɔɔm lò ko fəgha kə̀ kwəlā maʼn ko. Ghùw wəla ù ki tuūŋ ko, ù zuw.”
Àwon tá yàn lọ́wọ́lọ́wọ́ báyìí:
Lûk 14: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
