Dzɔ̌n 13
13
Yɛso sùw fwee e tsə̀təndə̄ghā tə wə̄n
1À fə̀ êzəŋ doʼōdoʼō ko fə tsuʼ fə mɔ̀ʼ to ghe e zə zə kə̀ Zəŋso Naaŋ ko, à n lo mò Yɛso kwò ziī nû enyəa nəgha zəla e ki alezə̀ghàa mbī zən a te, e ndûw e ghee zo ebàm a vʉ̀a Tsele zə m kpē; a n lo ezə̂ mô ù ŋge ki eləgha a zəŋò fən a wə̄n gho fɛ am mbī, ù fə̀ ləghaa ghee ndùw tɛ̀ è nduw to mbī kê bughò mîaa.
2Aŋghəa Yɛso sô zəā kûun tò ghèe ghê tsə̀təndə̄ghā tə wə̄n to, a n lo êzə̀ mo Satàn n nyə̄ bonlo am fə̂ŋ è Dzudàs Eskàlìot, tɔɔŋ wɛ ù Sǎemòn enyəa ù ndùw fêe fughu Yɛso. 3Yɛso fə̀ kwo nû enyəa Tsele m fughu naŋa ghəa gho a dzə̀m aŋ ghu kə wə̄n asùghò enyəa ù mò nughuu wo a vʉ̀a Zə̀ kò, vʉ̀a ù ki sugho alendùw ebàm a vʉ̀a ghè kò. 4Ù m bughu naŋa tsughu ezə, ghàʼ nùghù è kɔʼ, tsɔ̀ʼ nùghù kɔ̂ʼ ndzʉ̄ tə wə̄n tə bee to, gaʼ naŋa è tsughu, kɔ̀n nyə̀ ndùw bàtɛ̀lɛ alo esā. 5Ù n daŋso tsòm dzə̀n tsughu mmughu an tùuw fə fəkàŋà, kàʼ ndùw alesùw fwe e tsə̀təndə̄ghā tə wə̄n a te; zèe tsùghu am bàtɛ̀lɛ zə̀a ù mò kɔlɔ̄ kele alo esā. 6A m bùghò Yɛso bùghò tɛ̂ wo a sə̀a Sǎemòn Pità, Pità m bvʉ â wə̄n enyəa, “Mughùbè, ghù so e sûw sughò fwee zaŋā a?”
7Yɛso n dzɛ̀ â wə̄n enyəa, “Fəgha kə̀là M̀ fwaʼà fɛ ghù kǎam kwo dzə yo, ghù lo ghùu kèle sùghò nù.” 8Pità n dzɛ̀ wə̄n enyəa, “Ghù kè sùw kòʼ yò fwee zaŋā zo.”
Yɛso n dzɛ̀ â wə̄n enyəa, “Abugho Ǹ tâʼkè sûw fwee zəghà, à fi lo mò ghàʼ à ghù kòom ki yo ghəa zo.”
9Pità ŋ kòom dzɛ̀ nduw â wə̄n enyəa, “Mughu ù te, abugho ghù so e sûw fwee zaŋā, sûuw sùghò ghu ghaŋa gho à tuw kaŋā ko.”
10Yɛso n dzɛ̀ â Pità enyəa, “Abugho ghùw lo mò u n ghue u wə̄n u sûw, ù ki ko alekɛ̀lɛ̀ kɔʼ efwee. Ghɛ̀ à dzə̀m, ghɛ̀ zɔlɔ nù, à gɔ̀ʼɔ̀ ko yo ghùw u mɔ̀ʼ am bvʉa zɛʼɛ̄.” 11Â Yɛso aledzàa səā wô enyəa, “A yo dzə̂ ghɛ̀ a dzə̀m ghɛ̀ zɔ̄lɔ̄.” À fə̀ lo bòʼ ù fə̀ kwò ziī nû ghùw wəla ù sò fêen fughuu wə̄n.
12 #
Lûk 22:27
A m bùghò Yɛso sùw mɛʼɛ̀ tsughu fwee e tsə̀təndə̄ghā tə wə̄n zo, ù nì dzəlà kɔ̂ʼ dzʉ tə wə̄n ebàm, ù m bvʉ â ghee enyəa, “Ghɛ̀ ŋ kòʼkɛ̀lɛ to ghəa ghə̀là Ŋ̀ ghəə̄ŋ tsughu fɛ a zəŋò ghɛ̀ à? 13Ghɛ̀ mugho tɔŋlo enyəa à lǒ Wàdè asùghò Mughu ù te; à lǒ èsəŋò, ghɛ̀ lo tsəghatsəgha; tɔŋlo enyəa Ŋ̀ kûm lò nû. 14Abugho mùghò wəla Ǹ lo Mughùbè wɛʼɛ àsùghò wàdè wɛʼɛ lò alesùw fwee zɛʼɛ̄, à fi lo enyəa ghɛ̀ ki alesuūw sugho fwee e ghî à li gho sughò. 15Nu fwàʼ kə̀là M̀ fwâʼ tsughu â ghɛ̀ lǒ tsə̌a am fəgha kəla ghɛ̀ ki alefwaʼā ghè kò. 16#Mat 10:24; Lûk 6:40; Dzn 15:20 M̀ fɛ kùum dzàa wò nù â ghɛ̀, kɔ̂ɔ fə̀ li fə̀ tsəghàsə̌a yo mughùbè ù wə̄n, ŋkāa tum yo aletsə̀ghàasə ghùw wəla ù tum wə̄n. 17Êzə̄ŋ wəla ghɛ̀ kwo səŋò zən zo, Zə̀ kə̀ lo fughuu ghɛ̀ â bughun zo abugho ghɛ̀ dêe ndûw səŋò e te zo am fwàʼ kɛʼɛ.”
18 #
Sms 41:9
Yɛso n dzɛ̀ kpèʼe ndùw â tsə̀təndə̄ghā tə wə̄n to enyəa, “À yò dzə̂ â ghɛ̀ a dzə̀m Ŋ̀ kə̂aa wô ghəa ghən gho, bòʼ enyəa Ŋ̀ kwo nû tsə̀təndə̄ghā taŋā təla Ǹ tsɔʼ sə wo. Shwaʼ u Kəzə̀ ù ki alebùghò sə êsəŋò enyəa, ‘Ghùw zə̀ fʉghàzəa waŋa kòom fə̀n tsughu mbə̀ghà a zəŋò mùghò.’ 19M̀ fɛ dzɛ̀ nàŋa zìi wò dzə̀ ghəa ghən gho â ghɛ̀, to abugho ghəa a te a lo bughò sə kɔʼ, ghɛ̀ ke boo fughu enyəa Ǹ lo Mɛ̀zayà ù te. 20#Mat 10:40; Mâk 9:37; Lûk 9:48; 10:16 M̀ fɛ kùum dzàa wò nù â ghɛ̀, Ghùw wəla ù nì naŋā ghùw wəla Ǹ tum wo fi nî nàŋa sùghò mùghò; àsùghò enyəa ghùw wəla ù nì naŋā mugho fi nî nàŋa sùghò wə̄n wəla ù tum wô mugho.”
Yɛso kèle zìi enyəa ghe lo fèen fùghu wə̄n
(Mat 26:20-25; Mâk 14:17-21; Lûk 22:21-23)
21Ghəa Yɛso kə̀a mɛʼɛ̀ tsughu ghəa ghən gho, ghəa a te ghə ŋ ŋge fəmso wə̄n am fə̂ŋ, ù n daŋso dzɛ̀ sə̀ wò an dzughu e tugho zo enyəa “Ghùw wɛʼɛ u mɔ̀ʼ lo fèen fùghu nù mugho.” 22Tsə̀təndə̄ghā tə wə̄n tə n təm lɛɛn kaaŋ ndùw ghue e ghee, tuw kə sô kpuūw ghee enyəa Yɛso sò yia moʼò ndùghò. 23Tsə̀ndə̄ghā zəla Yɛso fə̀ ŋgeē ləghaa, n doʼ am bughuu e wə̄n. 24Sǎemòn Pità m fòʼn ndùw aghu â tsə̀ndə̄ghā è te enyəa è bvʉā ndûw â Yɛso enyəa Yɛso dzàa wô ghùw wəla ù mòʼo ghè wò.
25Tsə̀ndə̄ghā è te n səəŋ kəŋo ndùw a vʉ̀a Yɛso, bvʉ â wə̄n enyəa, “Mughùbè, alo ndughoo a, ù so e fêe fughu ghû a?”
26Yɛso n dzɛ̀ enyəa, “À lǒ ghùw wəla M̀ fughu ndûw fəghàzəa kən ko â wə̄n abugho Ǹ tsû kɔʼ nuum ko a te.” Ù n daŋso nì kɔ̀ʼ boʼò fə fəbàa, tsù kɔ̀ʼ alo kənumlo fùghù ndùw a Dzudàs Eskāliyɔ̀t, tɔɔŋ wɛ ù Sǎemòn Eskāliyɔ̀t. 27Ghəa Dzudàs zə kɔʼ bàa fə tə fo, zə̀a fə̀ biigh fə nyəən tsughu wə̄n. Yɛso n daŋso dzɛ̀ â wə̄n enyəa, “Ghəa zə̀a ghù so e ghəŋlo, zàŋso ghəəŋ ndùw.” 28Ghùw u mɔ̂ʼ fughu an chìndùghu ŋ kè tsoō zuūwkɛ̄lɛ̄ ghəa zəla Yɛso dzɛ̀ nduw â Dzudàs. 29Aŋghəa Dzudàs màʼa fə̀ lo ghùw wəla ù n naaŋ kə̀a kə kua ko, tsə̀təndə̄ghā tə wə̄n tə li tə m mòʼn ndùw enyəa Yɛso fi wɛɛ dzɛ̀ enyəa ù ndùw zuū wo fəgha kə li ko alezə̄ kəzə a te; ŋkāa enyəa ù fughuu ndûw fəgha kə li ko â ghì à laa gho. 30Aŋghəa Dzudàs daŋso nì zə ndûw bòʼò fə fəbàa fə te fo, n nughù sə̀ è nduw, mo tsuʼ wə n dzə̄.
Yɛso fùghù lâŋ kə̀ fughu ko
31A m bùghò Dzudàs nùghù sə nduw, Yɛso n dzɛ̀ tsughu enyəa, “Nəghā zə m kpē â ghee alefughu ŋkɔʼso â Wɛ ù Ghùw, àsùghò â Zə̀ kò alekele ŋkɔʼso bò wə̄n. 32Abugho Zə̀ kə̀ lo alekele ŋkɔʼso bòʼ Wɛ, à fi lo enyəa ù lo daŋso fughuu sùghò nû Wɛ â kɔʼso məla n doʼò tən, Zə kə lo daŋso ghəŋlo ù kele ŋkɔʼso an nə̀gha e te zo. 33#Dzn 7:34 Wɛ a fə̀ŋ ghaŋa gho, Ŋ̀ kôom ŋge ki yo nəgha zo sɛ̀, ghɛ̀ lô mughò kəŋo wò nù. Ghəa mugho mô dzɛ̀ â tsoʼ tə Tə̀dzûu tò, M̀ bɔɔm dzàa wò sùghò ghəa è mɔʼɔ zo â ghɛ̀ enyəa, ‘Luʼu kəla Ǹ nduūw a te, ghùw wɛʼɛ yo alebùghò fùghù.’ 34#Dzn 15:12, 17; 1Dz 3:23; 2Dz 1:5 Lâŋ kə̀ fughu kə̀là M̀ fughu wo â ghɛ̀ lò enyəa, ‘E dèe ləgha zo aŋ ghue zɛʼɛ̄ tò aŋghəa Ǹ ləghaa ghɛ a te. Chìa ki aleləghā sugho wàazə̀.’ 35A abugho ghɛ̀ ki ləgha zo aŋ ghùe zɛʼɛ, aghî a dzə̀m lo daŋso koʼòkɛlɛ wô enyəa ghɛ̀ lo tsə̀təndə̄ghā taŋā.” 36Sǎemòn Pità m bvʉ â wə̄n enyəa, “Mughùbè ghùw so e ndûw ghɛ̀?”
Yɛso n dzɛ̀ â wə̄n enyəa, “Luʼu kəla Ǹ nduūw a te, ghù yò alebùghò êzə̄ŋ a bàâ mùghò. Ghù lo mùghò ghûu dzùum wò nù.” 37Pità m bvʉ â wə̄n enyəa, “Mughùbè, mùghò m boo enyəa abugho à lò ko evʉ, Ǹ lo nû alekpūw ghàʼ à ghù, à sò kǔuwn lǒ kwò Ǹ yo alebùghò èzə̀ŋ a bâa ghǔ a?” 38Yɛso m bvʉ â wə̄n enyəa, “Ghù kùm lò nû alekpuūw fughu vʉ zaŋa? Kòʼo, M̀ fɛ kuūw dzàa nû â ghù, nùu mbvʉ sô gbə̀la tɔŋɔ mò ghù m mùghò tue màʼà tə nəgha tə təgha.”
Àwon tá yàn lọ́wọ́lọ́wọ́ báyìí:
Dzɔ̌n 13: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
