Dzɔ̌n 12
12
1À fə̀ bugho tsuʼu n doʼòdoʼò ko tǔu to ghe e bughò zə zə kə̀ Zəŋso naaŋ ko, Yɛso n nùghù ndùw am Bɛtānì, an ndughu lô ghe Lazalùs wəla Yɛso fə̀ zôm nughù kɔʼ alo evʉ̄. 2Ghəa ghe tsughu doʼò tsughu alezə̄ təkùnlò ghèe ghê Yɛso, Màta n dzughùu wò ùfʉ̀ghàzəa, Lazalùs ŋ kuuwn dòʼ dzəəŋ ghèe Yɛso. 3#Lûk 7:37, 38Mèle n nì kɔ̌ʼ vʉ n lə̌əm mò alo fətôo, mo ghe fênlò am wə̄n e səŋò zò, mo ghe mvʉ n te m fəghaŋlo am fəgha kə̀ li ko ghe tɔŋlo enyəa à lò Nâd, tsoʼsō tsughu ghuw a Yɛso a te, nì zè kɔʼ an nyùŋ tə kətūw tə wə̄n, luʼū tə n lə̂əm tə̀la ko zùʼù fə mvʉ fə te fo. 4Dzudàs Eskàlìot wəla ù fə̀ lo tsə̀ndə̄ghā è Yɛso, wəla ù lo fêen fughu Yɛso n dzɛ̀ enyəa, 5“Ghe mô yô alefèe vʉ mən a aŋ wən èsəŋò zò, ghe fughu kua u te wo â ghì à laa gho a?” 6Ù ka fə ghəa ghən kə̂a tsughu dzə̀ bòʼ ù fə̀ ŋgeē ləghaa aleyòsò ghì à laa gho, ù fə̀ êzə kəa tsughu bòʼ ù fə̀ lo ghùwtsɔ̀ŋɔ, à n naaŋ tsə̀ghà sùghò wə̄n kə̌aa kə kua u kədzeŋe u ghee wo, ù n tsoo nyɛʼɛ nìi sə̌aa tsə̀ghà sùghò ùkua a te. 7Yɛso ŋ kuuwn dzɛ̀ enyəa, “Zə̀ghaa nlô wìzən vʉ̀, ù ghəa ghən fɛ ghəŋ tsughu alebiaan naŋā mùghò aŋ ghəa ghəla ghe kê tsəə̄n mugho a te. 8#Lwa 15:11Ghɛ̀ à ghê ghì à laa gho kê lò tsəgha ko fɛ nəgha tə dzə̀m; yia būghò mugho, Ŋ̀ kê yò zee tsəgha dzə̂ fɛ sɛ̀.”
9A m bùghò ndə̀m è Tə̀dzûu zuw tsughu enyəa Yɛso lo am Bɛtanì, ghe n lue wò fughu alebùghò koʼò daŋà tsəghà sughò Lazalùs wəla Yɛso fə̀ zôm nughù kɔʼ alo evʉ̄. 10Tuw u təfɔ̀e ghèe ghê ghì a Falasîi a fi kaʼ tsughu nǔ alekə̄ŋ dzì alekôom wiī maʼà sughò Lazalùs, 11nu ndə̀mà tə aghì tə mò êzəŋ boom fughuu nduw ko â Yɛso, kòom zǔuw yo â ghee bòʼ fwàʼ kela Yɛso fə̀ fwâʼ tsughu a zəŋò Lazalùs.
Yɛso nyə̀ an Yɛ̀lusalɛ̀m tò Kədə̀ŋ
12A m bùghò tsʉtsʉ vʉ̀, ndə̀mà tə aghì təla tə fə̀ bugho alebùghò zə Zə̄ kə̀ Zəŋso naaŋ ko an Yɛ̀lusalɛ̀m n zuw tsughu enyəa Yɛso bùghò sùghò fughu. 13#Sms 118:25, 26 Ghe n chwɛɛn kɔʼ uchʉghā, nùghù ndùw alendùw kpeē nî Yɛso; dzàa tsùghu enyəa “Hòsanà! Kɔʼso n lo â ghùw wəla ù bùghòo an zən e Mughu ù te, Kɔʼso n lo â Də̀ŋ kə Ezə̀lɛ̂ kò.” 14Yɛso ŋ kəŋ tsughu tsʉa u fə ndzàkâs, kɔ̀ʼ dòʼò kɔ̂ʼ a te. Ghəa ghən fə̀ bɔɔm sə kùu ndùw Shwaʼ u Kəzə̀ wəla ghiīshʉ̀ghà à Kəzə̀ a fə̀ tɔm naŋā enyəa,
15 #
Zâk 9:9
“Kà nlo tsəŋ dzə̀ ghəa è li zo ghî ghə Ezə̀lɛ̂ ghò,
bòʼ də̀ŋ kɛʼɛ chia kə bughōo,
mò ù ŋ kɔʼ dòʼò kɔʼ an tsʉa u fəndzàkâs.”
16Tsə̀təndə̄ghā tə wə̄n tə ka fə bûʼ kǎam zuwkɛ̄lɛ̄ dzə̀ ghəa ghən gho sûesʉ. À fə̀ gɔʼɔ ko an nə̀ghà zəla Yɛso bùghò kpuw tsughu a te, zòo nughu kɔʼ ndùw alo kəwālā. Ghe n daŋso tɛ̀ mòʼn wò ghəa ghəla ghe fə̀ tɔm naŋā kùu ndùw Yɛso, àsùghò enyəa ghən lò ghəa a te gho ghî a mò ghəŋlo a zəŋò wə̄n. 17Nɔ̂e kə aghì kəla kə fə̀ lo ghèe ghê Yɛso an nə̀gha zəla ù fə̀ tɔŋɔ nughù sə wo Lazalù alo èshìaa, zòm nùghù kɔ̌ʼ wə̄n alo evʉ̄, mò lo ghî ghəla ghe teso dzâa wo ghəa ghəla ghe mò koʼ, àsùghò ghəla ghe mò zuw. 18Soo kə eghəa kəla ndə̀m è aghî fə̀ lue nduw a te a vʉ̀a Yɛso fə̀ lo aŋghəa ghe zuw tsughu enyəa ù zòom nùghù wò ghùw alo evʉ̀. 19Ghî a Falasîi ghə̀ n daŋso nùghù dzɛ̀ tsughu aŋ ghùe e ghee enyəa, “Sɛ̀ kôom tsò yò aleghə̂əŋ ghəa è li zo. Kòʼô, aghî a dzə̀m êzə̄ŋ tsə̀ghà tə̀ŋò ndùw ko a bàâ wə̄n.”
Ghî ghə Etòʼò à li a Yɛso
20Ghî à li a fə̀ lo dzəəŋ sugho ghèe ghê ghî ghəla ghe fə̀ kɔʼ wô alebùghò zə zə kə̀ Zəŋso naaŋ ko an Yɛ̀lusalɛ̀m. 21Ghî ghə e Tòʼò a te ghə m bùghò kòʼ wò ghùw ù Bɛ̀dsǎedà ù lì, ù sə aŋ Galèlîi ghe fə̀ tɔŋlo enyəa à lò Felèp, dzɛ̀ â wə̄n enyəa “Mughùbè, ghàʼ mô lə̀ghaa alekòʼ Yɛso.” 22Felèp n ndùw nì kɔ̂ʼ Andùlù, ghèe wə̄n n ndùw dzɛ̀ ndùw shwaʼ u te wo â Yɛso. 23Yɛso n dzɛ̀ â ghee enyəa, “Nəgha zə e mô êzəŋ e kpe tò Wɛ ù Ghùw è nughù ebàm alo nsə̄ghānyə̄ghā. 24Alekùu nîi tsughu, à gɔ̀ʼɔ̀ ko mo sə zə esò e nyə tsughu alo təzu, zə mò è fia, abugho e naām lô ko aŋ ghu zə n naam lò ko sə zə esò; a mò è bùghò e fîaa tsughu, zə m fùuw è kɔʼ, noo bɔŋ tsughu ndə̀m è àsò. 25#Mat 10:39; 16:25; Mâk 8:35; Lûk 9:24; 17:33Ghùw wəla ù ləghaa ghue u wə̄n wo yò alemùghù; a ŋ kuuwn bùghò wəla ù nì tsughu ghue u wə̄n wo enyəa e yo dzə̂ kəfəgha ko fɛ am mbī, ù ŋ kelê mùghù è doʼn təla zo. 26Ghùw wəla ù lighāa alefwaʼā â mùghò ki alebwiī ghàʼ à wə̄n kə ghuw kə̀ mɔ̀ʼ, bòʼ enyəa luʼū kəlāa Ǹ lo a te, ghî a kəfwàʼ ghaŋa ghə n lo sugho fughu èzə̀. A bugho ghuw fwàʼa â mùghò, Tsele waŋa n namso ghùw ù te. 27Mùghò êzəŋ lo am bàŋ kə fə̂ŋ. Ǹ so e êzəŋ e kôom dzɛ̂ èndùghō? Mùghò e yia dzɛ̂ enyəa, ‘Tsele waŋā bəghasə̄ mugho êzə̄ŋ â?’ Ɛ̂ŋgaŋ dzə̂, zə lo e ghee mùghò mò bugho fɛ am mbī, enyəa M̀ bùgho fala an nə̀gha zən. 28Tsele, děe tsughu daʼa kə̂a kò.”
Dzə̀ n daŋso sə̀ tsùghù wò alo kəwālā, dzàa tsùghu wò enyəa, “Mùghò n dè, Ǹ naam ki nû aledèe kpeʼe.” 29Nɔ̂e kə aghì kəla kə fə̀ ti fughu n zuw dzə̀ è te, ghe n nùghù dzɛ̀ tsùghù enyəa, “À kə̀m èghuuw.” À li ghə n dzɛ̀ enyəa, “Tsəntə̄ghā e Kə̀zə̀ kə̀a ndùw àghəa â wə̄n.” 30Yɛso m bɛ̀lɛ̀ ndùw ghee enyəa, “Dzə̀ zən kâ sə̀ tsùghù wò dzə̀ bòʼ mùghò; è sə̀ tsughu wò bò ghɛ̀. 31Nəghā zə m kpē, zəla ghe lo saʼa mbī a te àsùghò aŋghəa ghe lo dzûu maʼn səā Satàn a te. 32Abugho ghe lo tɔ̂ʼ kɔʼso kɔʼ mugho edzuŋ, aghî a dzə̀m lo daŋso boō fughuu wô â mùghò.” 33Ù fə̀ enyə kə̀a tsughu aledèe fughu ŋgòʼ è èvʉ zəla ù lo kpuūw ghè zò. 34#Sms 110:4; Èzy 9:7; Ɛ̀zi 37:25; Dan 7:14Nɔ̂e kə aghì chi kə ŋ kòom bɛ̀lɛ̀ ndùw wə̄n enyəa, “Ghàʼ zoʼn kele kɔʼ alo kəlàŋ enyəa, Kə̀lestò lo dòʼn tə̀la nû. Ghɛ̀ sô lò ênzə̂n alekòom dzâa wô â ghàʼ enyəa, ghe ki alekɔʼsō kɔʼ Wɛ ù Ghù edzūŋ a? Wɛ ù Ghùw bûʼ lò ndughoo a?” 35Yɛso n dzɛ̀ â ghee enyəa, “Tsə̀ è te naam lò kəŋo nduw nu ghɛ̀ à ghee aŋ kə̀mà fə kə̄ghā. À fi lo enyəa e bwiī nlò am tsə̂, e kwo ko nlò ləm kə lô so e kuūwn koom bvʉ̀a a zəŋò ghɛ̀. Ghùw wəla ù bwìi alo kələm kwo yo luʼu kəla ù ndûuw a te. 36Aŋghəa ghɛ̀ ki tsə̀, ghɛ̀ boo fùghù nduw nlò â ghè zò, tò ghɛ̀ ke doʼō ghî ghəla ghe mughu an tsə̂ è te.” A m bùghò Yɛso kə̀a tsughu ghəa ghən gho, ù n zə̀ghàa tàʼà tsughu ghee, ndùw nàn dòʼò è nduw.
37Aŋghəa Yɛso fə̀ bûʼ tso dê ko ndə̀mà tə nsə̀ghàa tò an sə kə ghee, ghe ŋ kè sô kuūwn boō fughu â wə̄n. 38#Èzy 53:1E fə̀ enyə lo aleluesō tsughu shwaʼ u Kəzə̀ wəla ghùwshʉ̀ghà tɔɔŋ, Èzayà fə̀ tɔm naŋā, enyəa,
“À shwaʼ waʼa ù boo ndùghò a Mughu ù te,
à lò â ndùghò Mughu ù te dê tsughu daʼa kə wə̄n ko a?
39Zə lo e ghee ghe fə̀ yo alebôo shwaʼ u te wo, tɔŋlo enyəa ghùwshʉ̀ghà Èzayà ma fə dzɛ̀ naŋa kpeʼe wò sùghò enyəa,
40 #
Èzy 6:10
Zə̀ kə̀ mâa fosò nàŋa sə a ghee gho,
tughu sə naŋa sùghò fə̀ŋ tə ghee
enyəa mò ghe lɛnlo èghəa, ghe e koʼòkɛlɛ yo,
ghe n yo sugho alezuūwkɛlɛ̄ am fə̀ŋ tə ghee,
yò aletiī kôom wô a vʉ̀a mùghò tò Ǹ bâaŋ dzaŋà tə ghee.”
41Èzayà fə̀ è ènyə kəa sə wo bòʼ ù fə̀ koʼ ziī nduw daʼa kə Yɛso, ù ŋ kə̀a wò aghəa kùʼù ndùw wə̄n.
42Ghî à ne a Tə̀dzûu ghə̀ m boo fùghù ndùw â wə̄n, ghe n sô kǔuwn tsəŋo aledzàa səā wô an ndɛ enyəa ghî a Falàsîi à lô dzûu səā ghee an Ndùghène è Tə̀dzûu. 43Ghe fə̀ tsəŋo bòʼ ghe fə̀ ləghaa alekelê kɔʼso məla ghî a mbī a fughu tsə̀ghàtàʼà məla à fughuu Zə̀ kò.
Ghe lo saʼa mbī am bàm e Yɛso
44Yɛso ŋ kòom dzɛ̀ sə̀ wò an dzə̂ è tughu enyəa, “Ghùw wəla ù boō fughu â mùghò kà ka boo ko â mùghò, ù bǒo fùghù sùghò â ghùw wəla ù tum wô mugho. 45Ghùw wəla ù kòʼò mugho, kòʼò sùghò nǔ ghùw wəla ù tum wô mugho. 46M̀ fɛ am mbī nyə wò tô tsə̀, enyəa mò ghùw bǒo fùghù dzə̀ â mùghò, ù n yò alemùghù doʼò alo kələ̄m. 47Ghùw wəla u zuuw shwaʼ waŋa wo, vʉ̀a ù tue alenìi naŋa, Ǹ yò tò mùghò e saʼ wə̄n, nu Ŋ̀ ka mo fɛ mbī nyə wò dzə̀ alebùghò saʼ aghî; mùgho mò laam nyə wo alebùghò bəghāsə̄ ghî a mbī ghò. 48Ghùw wəla ù kòʼò lʉghāa mugho, buw alenìi naŋâ shwaʼ waŋā ki tən nû ghùw wəla ù lo saʼā wə̄n; tɔŋlo enyəa à kè lò shwaʼ wəla u sə wo an dzughu zāŋā an tsuʼ wəla mbī kê mìanlo a te. 49Nu Ŋ̀ kâ ghəa ghən kəā sə̀ wò dzə̀ aŋ ŋgə̄ŋ zaŋā; à lò ghuūghùe Tsele waŋā wəla ù tum sə wô mugho ù fughu mugho â daʼa ko am fəgha kəla Ŋ̀ ki aledzɛ̀ ghè kò àsùghò dzì zəla Ŋ̀ ki alekə̀a a te. 50Lò êzə̀ mo Ŋ̀ kwo nû enyəa shwaʼ u wə̄n u lo mùghù è doʼn təla zo. Fəgha kə̀là Ŋ̀ kəā, M̀ bɔɔm kə̀aa ko aŋghəa bəghà mò naʼà wo â mùghò.”
Àwon tá yàn lọ́wọ́lọ́wọ́ báyìí:
Dzɔ̌n 12: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
