Jọn 6
6
Ẹghẹrẹ rẹ Ihwo Uriori Iyori
(Matiu 14.13-21; Mak 6.30-44; Luk 9.10-17)
1Rẹ ọnana vwọ wan nu Jesu da samu kpo abọ rivẹ rẹ Abadi ri Galili, kọye hẹ Abadi ri Taberas. 2Urogho de bru nene, fikiridie ayen mrẹ eka ro ruru kẹ ihwo re họnvwa. 3Jesu de yeri kpo obenu rẹ ugbenu na, ọ vẹ idibo rọye de tidia te otọ vwẹ etiyin. 4Asakiephana Ẹwanvrẹn na, rọ dia orẹ ri Ju na, si kẹre re. 5Rọ vwọ kpare ẹro rọye vwo ni, ọ da mrẹ urogho na ri bro cha, Jesu da ta kẹ Filip, Bro ikara avwanre sa dẹ, ro te ihwo nana re? 6Ọ ta ọnana vwọ davwọ ni, kidie ekpuyovwi rọye riẹn obọ ro che ruẹ. 7Filip da kpahe kẹ, Ikọba ujori ivẹ che te vwọ dẹ ikara ro te ihwo na re-e rẹ emerha de te ohwo ọvuọvo unu. 8Ọvo vwẹ idibo rọye na, Andru, oniọvo ri Saimọn Pita, da ta kẹ, 9Ọmọshare ọvo hẹ etinẹ ro vwo ọko rẹ ikara iyori kugbe imiyeri ivẹ; ẹkẹvuọvo kidie ena che te ihwo buebu na vwo ruẹ? 10Jesu da ta, Vwẹ ihwo na tidia tẹ otọ. Asakiephana odi phiẹphiẹphiẹ buebu vọn asan na; ọtiọye ihwo na de tidia te otọ, unu rayen uriori iyori. 11Jesu da reyọ ikara na, rọ vwọ kpẹvwẹ nu, ọ da gharọ kẹ ayen otu ri tidia na; ọtiọye je hẹ eri na, kirobo rẹ ayen guọnọre. 12Ọke rẹ ayen vwọ re evun vọn nu, ọ da ta kẹ idibọ roye, Ghwẹ ivwuvwu ri chekọ na koko, e jẹn emu ọvuọvo ghwrẹ-ẹ. 13Ọtiọye na ayen da ghwẹ ayen koko e da vọn ibere ihwivẹ rẹ ivwuvwu rẹ emu rẹ ayen re chekọ vwẹ ọko rẹ ekuoka iyọri na. 14Ọke rẹ ihwo na vwọ mrẹ oka nana rọ ruru, ayen da ta, Uyota ọnana gbine ọmraro na rọ cha akpọ na.
15Rọ vwọ riẹn nẹ ayen cha vwẹ ogangan reyọ vwo mu ovie, Jesu da rhoma sioma reyọ nẹ ohri rẹ ayen kpo obo vwo kpo obo igbenu na.
Jesu Yanre Vwẹ Enu rẹ Ame
(Matiu 14.22-33; Mak 6.45-52)
16Ọke rẹ ovwọnvwọn vwo te, idibo rọye de kpo obo abadi na, 17Ayen ro okọ, ayen da sa abadi na mu kpo Kepanọm. Yẹ ọke na kpore, yi Jesu ji bru ayen rhe-e. 18Abadi na kọ họnra fiki rẹ aphopho rode ro djuẹ. 19Ọke rẹ ayen vwo bi kerẹ emu rẹ uroko erha eyẹ ẹne re, ayen da mrẹ Jesu rọ yan vwẹ enu rẹ abadi ko siẹ kẹrẹ okọ na. Ayen de guegue, 20ẹkẹvuọvo ọ da ta kẹ ayen, Mẹvwẹ; wa djẹ oshọ-ọ. 21Etiyin oma da vwerhe ayen reyọ phihọ evun rẹ okọ na, siẹvuọvo na okọ na da ghwa vware otọ vwẹ asa rẹ ayen ra na.
Ihwo na Guọnọ Jesu
22Vwẹ ẹdẹ rivẹ ihwo re daji obo o vrẹn rẹ abadi na da mrẹ nẹ okọ ọvuọvo ri chekọ vwẹ etiyin, nẹ Jesu vẹ idibo rọye ro okọ na-a, ẹkẹvuọvo idibo rọye ọvo re yanran. 23Kọye, ekọ efa ri nẹ Taberas rhe de rhi bi kẹrẹ asan na rẹ ayen da re ikara na rẹ Ọrovwohwo vwọ kpẹvwẹ nu na. 24Ọtiọye na rẹ ihwo na vwọ mrẹ nẹ Jesu hẹ etiyi-in, eyẹ idibo rọye-e, ekpuyovwi rẹ ayen da ro ekọ na ayen de kpo Kepanọm, ra guọnọ Jesu.
Jesu hẹ Ikara rẹ Arhọ na
25Ọke rẹ ayen vwọ mrẹ vwẹ obo o vrẹn rẹ abadi na, ayen da ta kẹ, Rabbi, Ọkevọ wọ vwọ rhe obonẹ? 26Jesu da kpahe kẹ ayen, Uyota, uyota, me ta kẹ ovwan, wa guọnọ ovwẹ, ọ dia fiki rẹ eka rẹ ovwan mrẹre-e, ẹkẹvuọvo fiki rẹ ikara rẹ ovwan rere rẹ evun da vọn ovwan na. 27Ovwan wian owian fiki rẹ emuọre rọ ghwọrọ-ọ; ẹkẹvuọvo fiki rẹ emuọre rọ tọn re te arhọ ri bẹdẹ, rẹ Ọmọ rẹ ohwo cha vwọ kẹ ovwan; kidie enu rọye ọye Ọghẹnẹ Ọsẹ na ka oka rọye phihọ. 28Etiyin ayen da ta kẹ, Kidie avwanre ru, re vwo ru iruo rẹ Ọghẹnẹ? 29Jesu da kpahe kẹ ayen, Ọnana hẹ iruo rẹ Ọghẹnẹ, rere we vwo se ọ ro ji vwe rhe na gbuyota. 30Ọtiọye na ayen da ta kẹ, Ọ da dia ọtiọye ki didi oka wo se ru, rere avwanre mrẹ, vwo se we gbuyota? Didi iruo wo ruẹ? 31Esẹ rẹ avwanre re mana vwẹ aton; kirobo re siro, Ọ vwẹ ikara nẹ odjuvwn rhe kẹ ayen re. 32Jesu da ta kẹ ayen, Uyota, uyota, me ta kẹ ovwan, ọ dia Mosis re vwẹ ikara nẹ odjuvwu rhe ovwa-an; Ọsẹ mẹ re vwẹ ikara rẹ uyota na nẹ odjuvwu rhe kẹ ovwan. 33Kidie ikara rẹ Ọghẹnẹ na hẹ ohwo rọ nẹ obo odjuvwu rhe, ọ da vwẹ arhọ kẹ akpọ na. 34Ayen da ta kẹ, Ọrovwohwo, gba kẹ avwanre ikara nana kọke kọke.
35Jesu da ta kẹ ayen, Mẹvwẹ hẹ ikara rẹ arhọ na; ohwo ro bru uvwe rhe owẹvwe gbi hwe-e, ohwo ro se vwe gbuyota urhuru rẹ ame gbi hwe bẹdẹ-ẹ. 36Ẹkẹvuọvo me ta kẹ ovwan nẹ ovwan mrẹ vwẹ yẹ ovwan segbuyota-a. 37E rẹ Ọsẹ mẹ vwọ kẹ vwẹ ejobi che bru uvwe rhe, ọ ro bru uvwe rhe nu me sa djẹ kufia-a. 38Kidie mi nẹ obo odjuvwu rhe, rhi ru ọhọre mẹ-ẹ, ẹkẹvuọvo ọhọre rẹ ọ ro ji vwe rhe; 39ọnana hẹ ọhọre rẹ ọ ro ji vwe rhe na, nẹ ọvuọvo rọ vwọ kẹ vwẹ na va vwẹ abọ ghwrẹ-ẹ, ẹkẹvuọvo re me kparọ vrẹn vwẹ ẹdẹ rẹ oba na. 40Kidie ọnana hẹ ọhọre rẹ Ọsẹ mẹ na, nẹ ohwo kohwo rọ mrẹ Ọmọ na nu ro de segbuyota ko vwo arhọ ri bẹdẹ; ke me kparọ vrẹn vwẹ ẹdẹ rẹ oba na.
41Ihwo ri Ju na ki guo, fikiridie ọ tare, Mẹvwẹ hẹ ikara ro nẹ obo odjuvwu rhe. 42Ayen da ta, Ọnana dia Jesu, rẹ ọmọ ri Josẹf, rẹ avwanre riẹn ọsẹ vẹ oni rọye na? Mavọ ọ rha vwọ ta vwẹ asakiephana nẹ, Mi nẹ obo odjuvwu rhe? 43Jesu da kpahe kẹ ayen, We guẹ vwẹ omoma rẹ ovwa-an. 44Ohwo ọvuọvo se bru uvwe rhe-e jokpa nẹ Ọsẹ na ro ji vwe na siro toma; ke me kparọ vrẹn vwẹ ẹdẹ rẹ oba na. 45E siro phihọ ọbe rẹ emraro na nẹ, Ọghẹnẹ ọvo ko che yono ayen ejobi. Kohwo kohwo ro nyori ro de yono mie Ọsẹ na ko bru uvwe rhe. 46Ọ dianẹ kẹ ohwo ọvo mrẹ Ọsẹ na-a jokpa rẹ ọ ro nẹ obọ rẹ Ọghẹnẹ rhe; ọye re mrẹ Ọsẹ na. 47Uyota, uyota, me ta kẹ owẹ, ohwo ro segbuyota o vwo arhọ ri bẹdẹ. 48Mẹvwẹ hẹ ikara rẹ arhọ na. 49Esẹ rẹ ovwan re mana vwẹ evun rẹ aghwa, ayen de ghwu. 50Ọnana hẹ ikara ro nẹ obo odjuvwu rhe, rẹ ohwo da riọ nu o gbi ghwẹ-ẹ. 51Mẹvwẹ hẹ Ikara ro je ghwo na ro nẹ obo odjuvwu rhe na; ohwo da re ikara nana nu, kọ rhọ bẹdẹ; ikara na re me cha kẹ fiki rẹ arhọ rẹ akpọ na ọye hẹ uvwo rẹ oma mẹ.
52Ihwo ri Ju ke phra vwẹ omoma rẹ ayen, tanẹ, Komavo ohwo nana vwọ vwẹ uvwo rẹ oma rọye kẹ avwanre re? 53Ọtiọye na Jesu da ta kẹ ayen, Uyota, uyota, me ta kẹ owẹ, jokpa nẹ wọ re uvwo rẹ oma rẹ Ọmọ rẹ ohwo re wọ da da obara rọye-e, ovwan se vwo arhọ vwẹ oma rẹ ovwa-an; 54ohwo ro re uvwo rẹ oma mẹ rọ da da ọbara mẹ ko vwo arhọ ri bẹdẹ, ke me kparọ vrẹn vwẹ ẹdẹ rẹ oba na. 55Kidie uvwo mẹ ghine hẹ emuọre dẹn, ọbara mẹ gbine hẹ udi dẹn. 56Ohwo rọ re uvwo mẹ rọ da da ọbara mẹ kọ dia vwẹ evun mẹ, ke me je dia evun rọye. 57Kirobo rẹ Ọsẹ ro je ghwo na ju vwe na, re me da rhọ fiki rẹ Ọsẹ na, ọtiọye ohwo rọ re vwe nu je rhọ fiki mẹ. 58Ọnana hẹ ikara ro nẹ obo odjuvwu rhe na, ọ dia oghẹre rẹ esẹ na rere ri de ghwu-u; ohwo rọ re ikara nana kọ rhọ bẹdẹ. 59Ọnana ọ tare vwẹ evun ri sinegọg, ro vwo yono vwi Kepanọm.
Eta rẹ Arhọ ri Bẹdẹ na
60Ọke rẹ idibo rọye buebu, vwo nyo, e da ta, Ọnana ota ọgangan; kono sa kerhọn rọye? 61Ẹkẹvuọvo Jesu, vwọ riẹn vwẹ oma rọye nẹ idibo na guo, ọ da ta kẹ ayen, Ke ophu muẹ ovwan vwẹ ọnana? 62Komavọ ọ dia rẹ ovwan da mrẹ Ọmọ rẹ ohwo ro yere kpenu vwẹ asan rọ epha jovwo? 63Erhi na re kẹ arhọ, uvwo fi erere ọvuọvoo; eta na re me ta kẹ ovwan na eye hẹ erhi kugbe arhọ. 64Ẹkẹvuọvo evo vwẹ ohri rẹ ovwan na segbuyota-a. Kidie Jesu riẹnre nẹ ẹsosuọ rhe ayen otu ri jiro esegbuyota, kugbe ohwo rọ je cha shẹ na. 65Ọ da ta, Ọnana re sorọ re me vwọ ta kẹ ovwan nẹ ohwo ọvuọvo se bru uvwe rhe-e jokpa nẹ Ọsẹ na rhọvwe phihọ.
66Rẹ ọnana vwọ wan nu idibo rọye buebu de sihọ uko ayen gbi nene yan ọfa-a. 67Jesu da ta kẹ ihwivẹ na, Ovwan je yanran rhe? 68Saimọn Pita da kpahe kẹ, Ọrovwohwo, kono mi bru ra? Wẹ ri vwo eta rẹ arhọ ri bẹdẹ na; 69avwanre ji segbuyota, avwanre je rhe riẹn nẹ, wẹ hẹ Ọfuanfon Ọvuọvo rẹ Ọghẹnẹ. 70Jesu da kpahe kẹ ayen, Ọ dia ihwivẹ rẹ ovwan me sanọre-e, ọvo vwẹ usun rẹ ovwan na kẹ idẹbono? 71Ọ ta ota kpahe Judas ọmọ ri Saimọn Iskariọt, kidie ọye, ọvo vwẹ ihwivẹ na, rọ cha shẹ.
Àwon tá yàn lọ́wọ́lọ́wọ́ báyìí:
Jọn 6: UBV77
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible in Urhobo © United Bible Societies, 1977.
