Jọn 3
3
Jesu vẹ Nikodimọs
1Asakiephana ọshare ọvo herọ ohwo ri Farisi, re se odẹ rọye Nikodimọs, osun ri Ju. 2Ọhwo nana de bru Jesu rhe vwẹ ason ọ da ta kẹ, Rabbi, avwanre riẹnre nẹ wọwẹ oyono ro nẹ obọ rẹ Ọghẹnẹ rhe; kidie ohwo ọvuọvo ro se ru eka nana ru wo ruẹ na herọ-ọ, jokpa nẹ Ọghẹnẹ vwọ ba. 3Jesu da kpahe kẹ, Uyota, uyota, me ta kẹ wẹ, jokpa nẹ e rhivwi vwiẹ ohwo-o, o sa mrẹ Ọghẹnẹ-ẹ. 4Nikodimọs da ta kẹ, Mavọ e rhivwi vwiẹ ohwo wan rọ da ghwo nu? Ko se rhivwi ro evun rẹ oni rọye ra da rhoma vwiẹ? 5Jesu da kpahe, Uyota, uyota, me ta kẹ owẹ, jokpa nẹ e rhivwi vwiẹ ohwo vwẹ ame kugbe Erhi-i, ọ sa ro uvie rẹ Ọghẹnẹ-ẹ. 6Ọ re vwiẹri vwẹ ugboma yẹ ọye ọ rẹ ugboma, ọ re vwiẹri vwẹ Erhi yẹ ọye ọ rẹ erhi. 7Wo jẹ obo me ta kẹ owẹ na gbe we unu-u, e rhivwi vwiẹ wẹ ọkpokpọ. 8Aphopho djuẹ kpo asan ro jere, wo nyo umri rọye, ẹkẹvuọvo wọ riẹn asan ro nẹ cha-a eyẹ asan rọ ra-a; ọtiọye ọ epha kẹ ohwo kohwo rẹ Erhi vwiẹri. 9Nikodimọs da ta kẹ, Komavọ ọnana cha dia? 10Jesu da kpahe kẹ, Wọ dia oyono rẹ Izrẹl, yi wo vwo ẹruọ rẹ imu nana-a? 11Uyota, uyota, me ta kẹ owẹ, avwanre ta ota rẹ obo rẹ avwanre riẹnre ji se oseri rẹ obo rẹ avwanre mrẹre; ẹkẹvuọvo wa reyọ iseri rẹ avwanre-e. 12Mi de gbe ikun rẹ akpọ na kẹ ovwan yẹ ovwan sere gbuyota-a, komavọ ovwan se segbuyota mi de gbe ikun rẹ obo odjuvwu kẹ ovwan? 13Ohwo ọvuọvo ji yeri kpo obo odjuvwu dẹvo-o ẹkẹvuọvo ọ ro wotọ nẹ obo odjuvwu rhe na, ọye hẹ Ọmọ rẹ ohwo na. 14Kirobo ri Mosis kpare ọrọdekọ kpenu vwo vi vwẹ evun rẹ aghwa na, ọtiọye a je cha kpare Ọmọ rẹ ohwo kpenu, 15nẹ ohwo kohwo ro sere gbuyota se vwo vwo arhọ ri bẹdẹ.
16Kidie ọtiọye Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo je ẹghwọrọ ẹkẹvuọvo ko vwo arhọ ri bẹdẹ. 17Kidie Ọghẹnẹ ji Ọmọ na rhe akpọ na, ri brorhiẹ hwe akpọ na-a, ẹkẹvuọvo re akpọ na vwọ sa wan oma rọye rhọ. 18Ohwo ro sere gbuyota e se bru hwe-e; ohwo ro sere gbuyota-a ye bru hwe nure, fikiridie o se odẹ rẹ Ọmọ rẹ Ọghẹnẹ ọvuọvo na gbuyota-a. 19Ọnana hẹ obruhwe na, nẹ urhukpe na rhe akpọ na nure, ihwo da guọnọ ebri jẹ urhukpe na vwo, fikiridie uruemu rayen ọbrabra. 20Kidie kohwo kohwo ro ruẹ umwemwu urhukpe tuoma, ọ kpo asan rẹ urhukpẹ epha-a, a da rha vwẹ uruemu rọye phia. 21Ẹkẹvuọvo ohwo ro ruẹ emu rẹ uyota kpo asan rẹ urhukpe epha, rere a vwọ mrẹ iruo rọye vughe nẹ o ruẹ ọhọre rẹ Ọghẹnẹ.
Jesu vẹ Jọn ri Baptist
22Rẹ ọnana vwọ wan nu Jesu vẹ idibo rọye de kpo otọ ri Judia; kẹ oboyi ọ vẹ ayen diare da vwẹ ame kẹ ihwo. 23Yi Jọn je vwẹ ame kẹ ihwo vwẹ Anọn rọ kẹrẹ Salim, fikiridie ame buebu hẹ etiyin; ihwo de bro rhe ọ da vwẹ ame kẹ ayen. 24Kidie ye ji mu Jọn phihọ uwodi-i.
25Asakiephana aphro da rhe dia vwẹ uvwre rẹ idibo ri Jọn vẹ ihwo ri Ju vwẹ oma rẹ orufọn. 26Ayen de bru Jọn rhe, ayen da ra kẹ, Rabbi rọ vẹ owẹ gba herọ vwẹ obo ovrẹn ri Jọdan na, ọ ro wọ dia oseri kẹ na, ọ hẹ etinẹ, ọ vwẹ ame kẹ ihwo, ihwo ejobi re bro ra. 27Jọn da kpahe, Ohwo sa reyọ emuọvo jokpa nẹ a vwe rọ kẹ nẹ odjuvwu rhe. 28Ekpuyovwi rẹ ovwan je dia oseri kẹ vwẹ, nẹ me tare nẹ, Mẹvwẹ hẹ Kristi na-a, ẹkẹvuọvo e ji vwe karo kẹ. 29Ọ rọ yanvwe ọpha ọye hẹ ọshare rẹ ọpha; ugbeyan rẹ ọshare rẹ ọpha na, ro mudia kẹrẹ ro nyo ota rọye, oma ra vwerhọn vwẹ urhuru rẹ ọpha na ro nyo; vwẹ ọtiọye na aghọghọ mẹ na kẹ ọvọnvọn. 30Ọ rho, ẹkẹvuọvo ke me hanvwe.
Ohwo Ro Nẹ Odjuvwu rho
31Ọ ro nẹ obenu rhe ọye ri kpenu ejobi; ọ rọ dia ọ rẹ akpọ na ọye hẹ ọ rẹ akpọ na, ota rẹ akpọ na kọye ọ ta; ọ ro nẹ obo odjuvwu rhe na ọye ri kpenu ejobi. 32Ọye ri se oseri rẹ obo rọ mrẹre kugbe ọ ro nyori, yẹ ohwo ọvuọvo reyọ iseri rọye-e; 33ohwo rọ reyọ iseri rọye ka oka phihọ ọnana nẹ, Ọghẹnẹ hẹ uyota. 34Kidie ohwo rẹ Ọghẹnẹ jiri ta ota rẹ Ọghẹnẹ, kidie Ọghẹnẹ vwanvwẹ Erhi na vwọ kẹ; 35Ọsẹ na guọnọ Ọmọ na, o de phi emu na ejobi phihọ obọ. 36Ọ ro se Ọmọ na gbuyota vwo arhọ ri bẹdẹ na; ọ ro rhe mu ọghọ kẹ Ọmọ na-a sa mrẹ arhọ-ọ, ẹkẹvuọvo ophu rẹ Ọghẹnẹ dia uyovwi rọye.
Àwon tá yàn lọ́wọ́lọ́wọ́ báyìí:
Jọn 3: UBV77
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible in Urhobo © United Bible Societies, 1977.
