Jọn 1
1
Ota na Rhoma Dia Ohwo
1Notọrhe ọye Ota na vwọ herọ, Ota na vẹ Ọghẹnẹ gba herọ, Ota na ye hẹ Ọghẹnẹ. 2Ọye ọvo vẹ Ọghẹnẹ gba herọ notọrhe; 3oma rọye a wan mama imu na ejobi, ọ gbe dia ọye-e emu ọvuọvo ra mare na a gbe mama-a. 4Oma rọye arhọ epha, arhọ na kọye hẹ urhukpẹ rẹ ihwo. 5Urhukpe ro lo vwẹ evun rẹ ebri, ebri na sa djẹ elo-o.
6Ohwo ọvo herọ rẹ Ọghẹnẹ ji rhe, odẹ rọye Jọn. 7Ọ rhere kerẹ oseri, rere o vwo se oseri kẹ urhukpẹ na, rere ihwo ejobi vwọ wan oma rọye segbuyota. 8Ọ dia ọye hẹ urhukpẹ na-a, ẹkẹvuọvo ọ rhere rhi se oseri kẹ urhukpẹ na.
9Urhukpẹ rẹ uyota rọ vwẹ elo kẹ ohwo kohwo rọ cha akpọ na. 10Ọ hẹ evun rẹ akpọ na, oma rọye a wan mama akpọ na, yẹ akpọ na riẹnrẹ-ẹ. 11Ọ rhe uwevwi robọ, rọye ihwo robọ rọye na reyerọ-ọ. 12Ẹkẹvuọvo vwọ kẹ ihwo re reyerọ ejobi, ri se odẹ rọye gbuyota, ọ kẹ ayen ogangan rere ayen rhe vwọ dia emọ rẹ Ọghẹnẹ. 13Ihwo re vwiẹri, ọ dia ọ rẹ obara-a eyẹ vwẹ ọhọre rẹ ugboma-a eyẹ ọhọre rẹ ohwo-o, ẹkẹvuọvo ọ rẹ Ọghẹnẹ.
14Ota na de rhi hirhe phihọ ohwo ọ da rhe dia ohri rẹ avwanre, ọ vọnre vẹ ẹserọphẹ vẹ uyota; avwanre da mrẹ urinrin rọye ọ tiẹ urinrin rẹ Ọmọ ọvuọvo na ro nẹ obọ rẹ Ọsẹ na rhe. 15Jọn de se oseri kẹ, ọ de kperi, Ọnana hẹ ọ re me tare nẹ, Ọ rọ cha vwẹ obuko mẹ na rhonọ ovwẹ, kidie ọ ka obaro kẹ vwẹ. 16Nẹ oma rẹ ọvọnvọn rọye avwanre ejobi, da mrẹ ẹserọphẹ kpahe ẹserọphẹ reyọ. 17Kidie oma ri Mosis a wan kẹ avwanre urhi na; ẹserọphẹ vẹ uyota kẹ oma ri Jesu Kristi ọ wan rhe. 18Ohwo ọvuọvo je mrẹ Ọghẹnẹ na dẹvo-o; Ọmọ ọvuọvo na, rọ hẹ agada rẹ Ọsẹ na, ọye re nẹrhẹ a riẹn.
Oseri ri Jọn ri Baptist
(Matiu 3.1-12; Mak 1.1-8; Luk 3.1-18)
19Ọnana kọye hẹ oseri ri Jọn, vwẹ ọke rẹ ihwo ri Ju vwo ji irherẹn kugbe ihwo ri Livae nẹ Jerusalẹm ra nọ, Wẹ ono? 20Ọ da rhọvwe, ọ phrorọ-ọ, ẹkẹvuọvo ọ da rhọvwe nẹ, Ọ dia omẹvwẹ hẹ Kristi na-a. 21Ayen da nọ, Kidie wọ epha? Wẹ hẹ Ilaija? Ọ da ta, Me dia ọye-e. Wẹ hẹ ọmraro na? Ọ da kpahe, Ẹjo. 22Etiyin ayen da ta kẹ, Kono wọ epha? Jẹn avwanre mrẹ obo rẹ avwanre kpahe kẹ otu ri ji avwanre rhe. Die wọ ta kpahe oma wẹn? 23Ọ da ta, Mẹvwẹ hẹ urhuru rẹ ohwo ọvo ro kperẹ vwẹ evun rẹ aghwa, Ru idjerhe rẹ Ọrovwohwo phiọn phiọn kirobo rẹ ọmraro Aizaya tare.
24Asakiephana Farisi yi ji ayen rhe. 25Ayen da nọ, Kidie wọ vwọ vwẹ ame kẹ ihwo, ye wọ dia Kristi, eyẹ Ilaija-a, eyẹ ọmraro na-a? 26Jọn da kpahe kẹ ayen, Ame me vwọ kẹ ihwo; ẹkẹvuọvo vwẹ ohri rẹ ovwan na ohwo ọvo mudia rẹ ovwan riẹnree, 27ọye dẹn ohwo rọ cha vwẹ obuko mẹ na, ifi rẹ isabato rọye mi fo ohwo rọ rha aye-en. 28Ọnana phiare vwi Betani vwẹ ovrẹn ri Jọdan, vwẹ asan ri Jọn da vwẹ ame kẹ ihwo na.
Omogegede rẹ Ọghẹnẹ
29Vwẹ ẹdẹ rivẹ ọ da mrẹ Jesu rọ yan bro cha, ọ da ta, Nighe, Omogegede rẹ Ọghẹnẹ, rọ ghwa imwemwu rẹ akpọ na nu! 30Ọnana hẹ ohwo re me tare, nẹ ọ cha vwẹ obuko mẹ rọ rhonọ ovwẹ, kidie ọ ka obaro kẹ vwẹ. 31Ekpuyovwi mẹ riẹnrẹ jovwo-o, ẹkẹvuọvo fiki rẹ ọnana me vwọ rhe rhe vwẹ ame kẹ ihwo rere a mrasan vwọ phia kẹ Izrẹl. 32Jọn da dia oseri rọye, Me mrẹ Erhi na ro wotọ rhe kerẹ ilekukn nẹ odjuvwu cha, o de she muo. 33Ekpuyovwi mẹ riẹnrẹ jovwo-o; ẹkẹvuọvo ọ ro ji vwe nẹ me rhe vwẹ ame kẹ ihwo na re ta kẹ vwẹ, nẹ ọ ru wọ mrẹ Erhi na ro wotọ rhe ro de she muo, ọnana hẹ ọ rọ vwẹ Erhi Ọfuanfon na vwọ kẹ ihwo. 34Me mrẹrẹ me dia oseri rọye nẹ ọnana hẹ Ọmọ rẹ Ọghẹnẹ na.
Idibo Rẹsosuọ
35Ẹdẹ rivẹ Jọn vẹ idibo rọye ivẹ de mudia; 36ọ da mrẹ Jesu rọ wan vrẹn, ọ da ta, Nighe, Omogegede rẹ Ọghẹnẹ na! 37Idibo ivẹ na de nyo rọ vwọ ta ọnana, ayen de nene Jesu. 38Jesu de kuoma rhẹriẹ, ọ da mrẹ ayen ri nene, ọ da ta kẹ ayen, Die wa guọnọ? Ayen da ta kẹ, Rabbi (otọ rọye Oyono), tivọ wọ dia? 39Ọ da ta kẹ ayen, Yanrhe wọ ra mrẹ. Ayen da rhe ayen da mrẹ asan rọ dia; ayen vẹ ọye da dia etiyin vwẹ ẹdẹ yena, kidie yẹ ọke na te unọke ihwe re. 40Ọvo vwẹ usun rẹ ivẹ na ro nyo Jọn rọ vwọ ta ota na, ro de nene na, kẹ Andru, oniọvo ri Saimọn Pita. 41Ọye ka mrẹ oniọvo rọye Saimọn, ọ da ta kẹ, Avwanre mrẹ Mesaya na re (otọ rọye Kristi). 42Ọ da reyọ vwo rhe Jesu. Jesu de no, ọ da ta, Wẹ hẹ Saimọn na ọmọ ri Jọn? E che se we Kifas (otọ rọye oragha).
Jesu se Filip vẹ Nataniẹl
43Vwẹ ẹdẹ rivẹ Jesu ko kpo Galili. Ọ da mrẹ Filip ọ da ta kẹ, Nene uvwe. 44Asakiephana Filip Bẹtsaida o nurhe, orere rẹ Andru kugbe Pita. 45Filip da mrẹ Nataniẹl, ọ da ta kẹ, Avwanre mrẹ ohwo na ri Mosis djeri vwẹ evun rẹ urhi na rẹ emraro na si kpahe, Jesu ri Nazarẹt, ọmọ ri Josẹf. 46Nataniẹl da ta kẹ, Kẹ emu esiri se nẹ Nazarẹt rhe? Filip da ra kẹ, Mọ wọ ra mrẹ. 47Jesu vwọ mrẹ Nataniẹl ro bro cha, ọ da ta kẹ, Nighe, ohwo rẹ Izrẹl rẹ uyota, ra mrẹ abe vwẹ obọ rọye-e! 48Nataniẹl da ta kẹ, Mavọ wo ru riẹn vwẹ? Jesu da kpahe kẹ, Tavwe ri Filip ki se we, vwẹ okẹ wọ vwọ hẹ otọ rẹ owe na, me mrẹ wẹ. 49Nataniẹl da kpahe kẹ, Rabbi, Wẹ hẹ Ọmọ rẹ Ọghẹnẹ na! Wẹ hẹ Ovie ri Ju na! 50Jesu da kpahe kẹ, Fikiridie me ta kẹ owẹ nẹ, Me mrẹ wẹ vwẹ otọ rẹ owe na, ku wo segbuyota? Wo cha mrẹ imu re rhonọ enana. 51Ọ da ta kẹ, Uyota, uyota, me ta kẹ owẹ, wọ cha mrẹ odjuvwu ro rhie phihọ, rẹ emakashe rẹ Ọghẹnẹ de kpenu ri de wotọ rhe vwẹ enu rẹ Ọmọ rẹ ohwo.
Àwon tá yàn lọ́wọ́lọ́wọ́ báyìí:
Jọn 1: UBV77
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible in Urhobo © United Bible Societies, 1977.
