Genese 3
3
1E e khana he ka bibihwakeoin hnen on, hon ta je menoiny hnyot hia, I hnö Iehova Khong hna op. Haba e ame I ha ka momo ka habe. Hawa, a um dö ha Khong, ka habe, Öbu ma ca he ka han ûnyi hnyi ta je ûö hia thithö hnyi hnyei? 2Ke haingen momo ka on, ka habe, Adre hna köhmu he ka han wan ta je ûö hnyi hnyei: 3ke so bi haba wan ûö waleji hnyi wanben hnyei, a hia but ha Khong, ka habe, Ca he öbu ka han wan, ke haba khaca, ca he öbu ka kâlâ, wâ öbu nye mokcu. 4Ke haba on ame ha ka momo, ka habe, Öbu me ca he ka wen mokcu: 5anyin ae khana Khong a haba hnyi bong öbu ma han hnyin, wale ame he ka metâ but li emaköbu, mʼ öbu me he ka helâ but me Khong, ka wâhmakhmeto so me kong. 6Ke a wâ but momo ûö, a e so hnân han, me hmanenang at ka wâ, me ûö ae ûnyi hnathu, me hnân ometâ at, me haba momo ame tau wan, me han; kʼ ame ham minya ka âiân a tha e mē, me e ame munyi han.
7Me ame metâ but li emaködru, me me khanʼ ödru thö a ödru me he thu; me ödru me ûtibetköuâ ta je lan meta, me hnân bnamejidru. 8Ke ödru me löng hwo Iehova Khong ame ngeno hnyei, hnyi ke hnyi bân bong ae menyik: ke haba Adamu me âiân ödru me lubaduöng ge hnyimakö Iehova Khong hnyi ta je ûö hnyi hnyei. 9Ke Iehova Khong ame hawo Adamu, me ha, ka habe, U a? 10Ke haingen, ka habe, Oge löng ut hwâm hnyi hnyei, ke oge ot, anyin oge me he thu; me inya oge me lubaduöng. 11Me e ame ha, ka habe, Ia thumetu u mʼ u me he thu? Hawa, u je hia but han ûnyi hnyi ûö waleji oge me hûna köu, a u ma ca he ka han? 12Haingö Adamu, ka habe, Haba momo u je hna könya me me tha e mönya, e ame ham könya ûnyi hnyi ûö, me oge me hnyi han. 13Haba Iehova Khong ame ha ka momo, ka habe, Ie ûnyi ang u je ânyâ? Haingen momo, ka habe, hnen on hna iyawö nya, mʼ oge me han. 14Ke Iehova Khong ame ha ka on, ka habe, u je hnaûhangö but hon ta je meno a vak can hia thithö, me hon ta je menoiny hnyot hia thithö, anyin a u je ânyâ helâe; u ma he ka iyâûâ hnyekom, me an sesâiny kânâ hnyi ta je bong hia bonginy ânyâm möt: 15ke oge me he ka oiwahnaihmiönyi u me momo, me mâtrânâm me mâtrâniny momo: e ame he ka kot bâm, ke u me he ka kot ohmâiny can. 16Ke e ame ha ka momo, ka habe, Oge me he ka osehia ânyâm vec u ka erkin; u ma he ka hnokoâ hnyi vec; ke u me he ka wem bi hmelen âiâm, ke e ame he ka musi u. 17Ke e ame ha kö Adamu, ka habe. Anyin a u je hia but löng hoton hwan âiâm, me han ûnyi hnyi ûö waleji oge me nyibu u gan, me ha ka habe, Ca he ka han ûnyi hnyin; awe hnaûhangö but kânâ ûnyi gam; ke u ma he ka han ûnyi hnyin hnyi vec hnyi ta je bonginy ânyâm möt hia; 18kʼ ame he ka okûâ köu ta je ûö ae ûdedö me watetaföcö; ke u me he ka han je ûö ae ometu hnyi ta hnyei; 19ke u me he ka han ûnyi ge khuniny hnyimâkâm, ke ne o but ûen u me he ka hmetu ka hnyi kânâ; anyin adre hum u ûnyi hnyin e; anyin a u sesâiny kânâ, ke u me he ka hmetu hmetu ka knyi sesâiny kânâ. 20Haba Adamu ame hwenyi ien âiân, me, Eva; anyin a e hinyen tavat ae möt hia thithö. 21Ke haba Iehova Khong ame ânyâ li ûkhaû a unen meno hobi kö Adamu me âiân, me okhavʼ ödru.
22Haba Iehova Khong ame ha, ka habe, Wa bi, e ûcû but at mötin, ame wâhmakhmeto so me kong; ke haba walang ang, wâ e nye hinôbeny me hom minya ûnyi hnyi ûö hnân melen, me han, me möt bi nyiele balua: 23anyin a wale Iehova Khong ame obâ but e ûnyi hnyi hnyei Edena, me me belökâ kânâ waleji adre hia but hom e ûnyi hnyin. 24Waleling e ame obö Adamu but; ke e ame ip eiö hnyi hnyei Edena ta je Kerubi, me hele vat ae ubâhlâ ame wiwia ka hnyi je ke keihen hnyei hia, me hnân tuö gethen ka hnyi ûö hnân melen.
Àwon tá yàn lọ́wọ́lọ́wọ́ báyìí:
Genese 3: IAAI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
maintained by the British and Foreign Bible Society