Burqesun 5
5
Adamaxun bakiyorox
(1 Hadis. 1:1-4)
1Moval Adamaxun bakit'oğoy siyəyi.
Buxačuğon amdara yaratmişat'an şot'o İçu oşq'are yaratmişi. 2Buxačuğon ham işq'ar, ham çuuxe yaratmişi, şot'oğo xeyir-bərəkət tadi içoğoy s'iya yaratmişi ğinaxun "amdare" laxi. #5:1-2 Burq. 1:27-28; Mat'. 19:4-5; Mrk'. 10:6
3Adami sabaç̌ otuz yəş bakat'an şot'ay sa ğare baki. Me ğar içu sa ěša p'ə̌ ganu cöybi k'inək' oşq'arey. Adamen şot'ay s'iya Şet'e laxi. 4Şet' bakit'uxun oşa Adam hələ sa muğbaç̌ usenal yəşəyinşebi, şot'ay q'erəzəl ğarmux, xuyərmuxe baki. 5Adam biyat'an izi düz vuybaç̌ otuz yəşe buy.
6Şet'e sabaç̌ qo yəş bakat'an iz ğar Enoşe baki. 7Enoş bakit'uxun oşa Şet' hələ sa muğbaç̌ vǔğ usenal yəşəyinşebi, şot'ay q'erəzəl ğarmux, xuyərmuxe baki. 8Şet' biyat'an izi düz vuybaç̌ p'as's'e yəşe buy.
9Enoşi doxsan yəş bakat'an iz ğar Kenane baki. 10Kenan bakit'uxun oşa Enoş hələ sa muğbaç̌ qos's'e usenal yəşəyinşebi, şot'ay q'erəzəl ğarmux, xuyərmuxe baki. 11Enoş biyat'an izi düz vuybaç̌ qo yəşe buy.
12Kenani yetmiş yəş bakat'an iz ğar Mahalalele baki. 13Mahalalel bakit'uxun oşa Kenan hələ sa muğbaç̌ q'ırx usenal yəşəyinşebi, şot'ay q'erəzəl ğarmux, xuyərmuxe baki. 14Kenan biyat'an izi düz vuybaç̌ vis' yəşe buy.
15Mahalaleli altmış qo yəş bakat'an iz ğar Yerede baki. 16Yered bakit'uxun oşa Mahalalel hələ sa muğbaç̌ otuz usenal yəşəyinşebi, şot'ay q'erəzəl ğarmux, xuyərmuxe baki. 17Mahalalel biyat'an izi düz muğbaç̌ doxsan qo yəşe buy.
18Yeredi sabaç̌ altmış p'ə̌ yəş bakat'an iz ğar Xanok'e baki. 19Xanok' bakit'uxun oşa Yered hələ sa muğbaç̌ usenal yəşəyinşebi, şot'ay q'erəzəl ğarmux, xuyərmuxe baki. 20Yered biyat'an izi düz vuybaç̌ altmış p'ə̌ yəşe buy.
21Xanok'i altmış qo yəş bakat'an iz ğar Met'uşelaxe baki. 22Met'uşelax bakit'uxun oşa Xanok' hələ sa xibbaç̌ usenal yəşəyinşebi. Şo Buxačuğo çalxi Şot'in içu pi k'inək' yəşəyinşalt'oğoxuney. Xanok'i q'erəzəl ğarmux, xuyərmuxe baki. 23Xanok' xibbaç̌ altmış qo usen yəşəyinşebi. 24Xanok' Buxačuğoy s'iya duği Şot'in içu pi k'inək' yəşəyinşalt'oğoxuney, sa ğiyal şo hat'etər aneç̌i, şot'aynak' ki, Buxačuğon şot'o me dünyənexun bisuni k'ə baksuna avabakinut ext'i İz t'ǒğǒle taşeri. #5:21-24 Əbr. 11:5; İud. 14-15
25Met'uşelaxi sabaç̌ səksən vǔğ yəş bakat'an iz ğar Lemek'e baki. 26Lemek' bakit'uxun oşa Met'uşelax hələ sa vǔğbaç̌ səksən p'ə̌ usenal yəşəyinşebi, şot'ay q'erəzəl ğarmux q'a xuyərmuxe baki. 27Met'uşelax biyat'an izi düz vuybaç̌ altmış vuy yəşe buy.
28Lemek'i sabaç̌ səksən p'ə̌ yəş bakat'an şot'ay sa ğare baki. 29Lemek'en ğare s'iya Noy #5:29 Noy - əbrani muzin "noy" əyit "ük' tast'un" əyitəne oşq'ar laxi pine: «Me ğaren yax ük' tadale, Q'ončuğon İz q'arğişp'i me oç̌ali loxol əzyət zapi ap' śipsuni əvəzə tadale». #5:29 Burq. 8:21 30Noy bakit'uxun oşa Lemek' hələ sa qobaç̌ doxsan qo usenal yəşəyinşebi, şot'ay q'erəzəl ğarmux, xuyərmuxe baki. 31Lemek' biyat'an izi düz vǔğbaç̌ yetmiş vǔğ yəşe buy.
32Noye qobaç̌ yəş bakat'an şot'ay me ğarmuxe baki: Şem, Xam saal Yafet'.
Àwon tá yàn lọ́wọ́lọ́wọ́ báyìí:
Burqesun 5: udi
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Translation Services International Ltd.