Cakirok 3
3
Podho pa nyatoro
1 #
Meny 12:9; 20:2 Onyo thwol am'oyido obedo ogwaŋ mariek swa kwoŋ ogwaŋe madudi je ma Were oyido ocweyo. Openjo dhako ni, “Were bende adieri owaco ni wikiri wicam olemo ma yen ma ndelo?”
2Aka dhako odwoko ni, “Wanyalo camo olemo ma yath moro je i ndelo, 3kwanyo woko yath manitie i dier ndelo. Were owaco ni wakiri wacam olemo ma yath no kosa kada geyo; ka wanotim, wabino tho.”
4To thwol waco ri dhako ni, “Wi k'otho. 5Kole Were oŋeyo ni ka winocam waŋ win bino yawere, aka wibino cale Were, ma wiŋeyo bero gi raco.”
6Ameno dhako oneno nger ma yath no oyido ber'iye, kodi nger mar'olemo mere oyido ber acama; aka oparo nger ma ber'iye lokirok mariek. Kenyo go okwanyo olemo to camo, aka omiyo cwore bende ni wocam. 7Tekin jotieko camo ama, waŋ gin oyawere aka joniaŋ ni oyido jonitie kinyoro; aka jokwoyo boke makuyu kanyacel to joumere gine.
8Othieno no jowinjo mayindo pa Rwoth Were wotho i ndelo, aka jopondo kwoŋ yen. 9To Rwoth Were lwoŋo jacwo, “Initie kune?”
10Go odwoko ni, “Awinjo mayindo perin i ndelo, aka lworo omakan rupiri anitie kinyoro t'apondo.”
11Were openjo go ni, “Ŋa m'owaco rin nike initie kinyoro? Icamo yath m'amiyin cik ni ikir'icam?”
12Jacwo odwoko ni, “Dhako m'imiyan me am'omiyan t'acamo.”
13 #
2 Kor 11:3; 1 Tim 2:14 Kenyo Rwoth Were openjo dhako ni, “Me aŋo m'itimo?”
Dhako odwoko ni, “Thwol am'owondan t'acamo.”
Were miyo gir'acula
14Kenyo Rwoth Were owaco ri thwol ni,
“Rupiri itimo gime,
Akwoŋin kwoŋ ogwaŋe je;
aka kwoŋ ogwaŋe madudi je
wok pama ibino mol gi iyin,
aka ilacamo fukefuke
i kwo perin je.
15 #
Meny 12:17
Abino ketho kwor i dier in gi dhako,
aka i dier nyithindhin gi nyithindho pere.
Nyithindho pa dhako jobino ŋinyo wiyin,
aka ibino toŋo fundi jo.”
16Aka ri dhako owaco ni,
“Abino medo litho perin i ŋedi,
aka i litho ibino nywolo nyithindho.
Aka kucel ibino bedo g'awanya ri cworin,
aka go bino dhumin.”
17 #
Ebu 6:8
Aka ri jacwo owaco ni,
“Rupiri iwinjo dwondi dhako perin,
t'icamo olemo ma yath
m'amiyin cik
ni ikir'icam kwoŋe,
akwoŋo lowo ro in.
I kwok perin ibino cemo i kwo perin je.
18Lowo bino nywolo kudhin gi doy,
aka ibino camo ranyak madudi.
19I kwok perin
ibino camo mugat cuka inogiki i lowo; rupiri ocweyin wok i lowo, aka doko ibino lokere lowo.”
20Adam ocwoko nyingi dhako pere ni Eva rupiri go obedo yok ji je. 21Aka Rwoth Were okwoyo ri Adam gi cege nangin wok kwoŋ pien ogwaŋ to ruko jo.
Were riemo woko Adam gi Eva wok i ndelo
22 #
Meny 22:14
Kenyo Rwoth Were owaco ni, “Neni, jacwo onyo olokere acel kwoŋ wan, m'oŋeyo bero gi raco. Go nyalo camo wok kwoŋ yath ma kwo to kwo cil gi cil.” 23Riameno Rwoth Were oriemo go wok i ndelo Eden to miyo go furo lowo m'ocwey gine go. 24Were oriemo woko jacwo, aka yuwok ceŋ ma ndelo oketho cwec ma jobwombi gin m'ilwoŋo ni kerubim, kodi abor maliel mac m'oŋiyo kisi thenge. Me ma geŋo nyatoro moro je kwoŋ corok cegin gi yath ma miyo kwo.
Àwon tá yàn lọ́wọ́lọ́wọ́ báyìí:
Cakirok 3: DHOCDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dhopadhola DC Bible © Bible Society of Uganda, 2018.