Luuk 22

1Ku jam tali ka maga ate Juuma tigi kpienni dii ate ba a wi ayen Gaambasika Tigini la danni a paari. Da dila danni ale ba piilim a ŋɔbi boroborok kuui ale kan ta dabinta ku po la.#22:1 Nyinika 12:1-20; Teerika 16:1-8 2Kaabteerɔ kpaŋŋa ale Sinsak sagrɔma a jam a gisi ka suik ayen ba ko Yeezu, alege ba an baga dii nyiŋla ba jam a chali ka yɔgsum ale nuruma.

3Sitaana a yaa jo Yeezu ŋaaŋviirɔma pi ale bayewa po wanyi. Wa yuei jam le Judas Iskariot. 4Judas yaa cheŋ kaabteerɔ kpaŋŋa ale Wen yenni limisidɔma jigi a nye nɔiyeŋ ale ba wa ale wa nye dii a yik Yeezu a te ba la. 5Ba sui a yaa jam peenti nna yegayega ate ba weeni ayen ba ale tuni wa ligra. 6Judas mɛ a yaa jam siak a deri piilim a gisi suik kuui ate ba le yik Yeezu diipo ate nuru boanni karo la.

7Tigini piilimka danni ate ba a ŋɔbi boroborok kuui ale kan ta dabinta la, ba a pai ka pabisa a nye kaabka a gomsi a magsi ayen ba dɛ Gaambasika Tigini ŋandiintaŋa. 8Da dila danni, Yeezu yaa tom Piita ale Jɔɔn ayen, <<Ni cheŋ a ga gomsi ti Gaambasika Tigini ŋandiintaŋa ate ti dɛ.>> 9Ba yaa bek wa ayen, <<Fi a yaali ayen ti cheŋ ka bɛ a ga gomsi magsi?>> 10Wa yaa tulisi ba ayen, <<Ni ale a cheŋ tɛŋka po la, ni ale nya nidoa ale wa ji nyiam ale samɔniŋ a jam tu ni. Ni maa va wa a ga jo yeri diipo ate wa a jo la. 11Ni dan ga jo, ni bek yenni nyɔnɔwa ayen, <Sagrɔwa a weeni ayen, fi dak nichamma dɔk kuui ate wa ale wa ŋaaŋviirɔma le jo kali dɛ Gaambasika Tigini ŋandiintaŋa la a sak ti?> 12Wa le dak ŋmazuk dɔk kpioŋ kunyi a ta ŋanta meena ku po a magsi. Ni gomsi a magsi ti dula jigini.>> 13Ba yaa cheŋ ga jo tɛŋka po a nya dii meena ate Yeezu a poom weeni ba la, ate ba yaa gomsi ba Gaambasika Tigini ŋandiintaŋa.

14Ku ale jam paari diipo ate ba ale dɛ la, Yeezu ale wa tuimtomdɔma a yaa maa chaab kali ayen ba dɛ.#22:14-23 Nya fotowa, Matiu 26:20-29. 15Wa yaa weeni ba ayen, <<M poom kasim a yaali kama ayen m kali a dɛ Gaambasika Tigini ŋandiintaŋa de ale nama abe m ge a nam. 16Mi a weeni ni kama ayen mi a kan ŋman dɛ ale ni, ka ku nin paari diipo ate Wen naamu a jam la.>> 17Yeezu yaa pai beerik ale daam a puusi a te Wen a nye Wen jiam ale ge a weeni ba ayen, <<Ni ŋoa a chari chaaba, 18mi a weeni ni, a nyini yɔgyɔgla de a cheŋ m kan ŋman nyu daamu de nin ka Wen naamu a nin jam.>> 19Wa yaa ŋman pai boroborok a puusi a nye Wen jiam, a yik ku a ŋmari a te ba ale weeni ba ayen, <<Ni ŋoa ŋɔbi, mi nyiŋka ale nna ate m pai a te ni. Ni nyiem kasim a nye nna ate ni a teeri m wari.>> 20Dila dekdega, ba ale ga dɛ nueri la, wa yaa weeni ba ayen, <<Beerika de ale daamu ale kpiiri a basi a te ni la ka mi nɔiyeŋ paalika#22:20 Jeremaya 31:31 ziimu. 21<<Alege nuru waai le wa ta mi a ga bobri a sak la, a maa kali ka dela ale mi a dɛ. 22Ka Wen ale poli ku ayen Mi Saalɔbiika a kpi alege nuru waai dek ale wa ta Mi Saalɔbiika a ga bobri sak la, ku le bie wa jigi.>> 23Wa ŋaaŋviirɔma yaa jam a bek badek ayen, <<Ka tama wana ale wa nye dila?>>

24Wa ŋaaŋviirɔma a yaa jam a nak nanpaga a bek chaab ayen, <<Ka tama po wana dek ate nuruba a poli ayen wa ka nuru kpioŋ a gaam ti meena?>> 25Yeezu yaa weeni ba ayen, <<Tɛŋzuk de nalimaŋa ta pagrim ka nna yegayega a gaamu ba nuru baai zuk ate ba a nya la. Nuruma ka wari a maari a biisi. Ba a wi ba nalimaŋa ayen ka ba Maarɔba. 26Alege nama jigi ku be daa dila, ku a fɛ kama ayen waai ale chim nuru kpioŋ ni meena po la, a pai wadek a chim ni meena baaŋ, waai mɛ ale chim ni niŋdeerɔ la, chim ni tomteerɔ. 27Nuruma de bayewa, ka ba wana ale gaam wa choa, waai ale kali tɛŋ a dɛ ŋandiintaŋa la yaa waai ale nye ŋandiintaŋa a te waai ale kali tɛŋka a dɛ la? Daa waai ale kali tɛŋka a dɛ la ale gaam waai ale a te wa la? Alege mi bo ni po ase ka nuru waai ale ka tomteerɔ la.

28<<Nama kasim bo ale mi m ninammu meena po kama. 29Ase mi kowa ale pai wa naamu a nyo mi nisima po diila, mi mɛ ase m Kowa ale nye diila, a te ni ka suik 30ate ni a dɛ abe ni a nyu m naamu po, abe ni kali zukpagliksa zuima a bo Izirali buuni pi ale buyewa meena buusa.

31<<Simon, Simon, nya de Sitaana a juisi ka suik ayen wa chamsi fu nya, a yali fu a basi ase vɔtta la, 32alege, mi puusi a te fi Simon kama ayen fi kan basi fi siaka. Fi dan tagri be maari fi suataŋa ate ba zaani nalimnyiini.>> 33Simon Piita yaa tulisi wa ayen, <<M Nyɔnɔ Yeezu Kirisita, mi gomsi magsi kama ayen m maa va fu a cheŋ likka dɔk abe m kpi ale fu.>> 34Yeezu yaa weeni wa ayen, <<Mi ale a weeni fi Piita ayen, fi ale pagsi ku nɔi buta ayen fi zɛ mi, alege ate kpadiaka a kum.>>

35Yeezu yaa bek ba ayen, <<Diipo ate mi jam tom ni ate ni cheŋ alege ka ligra fook, yaase foruk, yaase nuensa la, ni jam jɔk jaaboa?>> Ba yaa tulisi wa ayen, <<Aaya, ti an jam jɔk jaab jaaboa.>> 36Yeezu yaa weeni ba ayen, <<Alege yɔgyɔgla de ate mi a weeni ni ayen waai a dan ta ligra fook, yaase foruk wa pai. Waai abe dan kan ta gebik woŋ ku a fɛ kama mɛ ayen wa pai wa kasaauk a da a yaa pai ligraŋa a da gebi kala choawa. 37Mi a weeni ni ayen, ba ale ŋmarisi Wen Gbaŋka po dii ayen, <Ba maa chiini wa a gum nye kaasirɔma po.> (Azaya 53:12) a chim wensie mi jigi. Dii nyiŋla, ba ale ŋmarisi dii dipo a magsi chaab ale mi la, a boro a chim ka wensie.>> 38Ba yaa tulisi wa ayen, <<Ti Nyɔnɔ Yeezu Kirisita, nya gebisa siye ale nna.>> Yeezu yaa tulisi ba ayen, <<Dila magsi kama.>>

39Yeezu ale wa ŋaaŋviirɔma yaa basi dula jigini ale ge cheŋ Olivi Guuku ase wa nyiem ale a nye diila. 40Wa ale jam paari dula jigini la, wa yaa weeni ba ayen, <<Ni a puusi ate ni kan jo nyenyaka po.>> 41Wa yaa poori wadek a taam nakpiak a kpi duna tɛŋ a puusi Wen ayen, 42<<M Koa, ku dan ka fi yaalika, yeeri ninammu de m jigi a basi, alege nye fidek ale a yaali diila, daa mi ale a yaali diila.>> 43Wen maarɔma yaa jam wa jigi a te wa pagrim. 44Ase wa ale jam a yiili wa ninammu wie la, wa yaa ŋman puusi Wen a gum du ate wulum a kasim jam a zi nna ase ziim la. 45Wa ale ga puusi Wen nueri la, wa yaa yiri ŋman pilim jam wa ŋaaŋviirɔma jigi a paari ale ba dua a goa dii nyiŋla ba sue ale jam kaasi 46ate wa yaa bek ba ayen, <<Ka boa ate ni dua a goa? Ni yiti a puusi ate ni kan jo nyenyaka po.>>

47Wa ale jam diem boro a biisi la, nuruba yegayega ale Judas waai ale jam ka wa ŋaaŋviirɔma po pi ale bayewa po la a yaa dɛ ba niŋ a cheena. Wa yaa forisi paari Yeezu a puusi wa. 48Alege Yeezu yaa weeni Judas ayen, <<Judas, fi a dak Mi Saalɔbiika a sak ale ka puusa?>> 49Yeezu ŋaaŋviirɔma baai ale jam maa bo ale Yeezu ale ga nya dii ale di nye la, a yaa bek Yeezu ayen, <<Nyɔnɔ Yeezu Kirisita, ti pai ti gebik woŋsaŋa a chubi ba?>> 50Ba wanyi a yaa che kaabteerɔ kpioŋku tomteerɔma po wanyi juga turi. 51Yeezu yaa weeni ba ayen, <<Dila magsi kama.>> Wa yaa tiri nuruwa tunni ate di deri nueri. 52Yeezu yaa bek kaabteerɔ kpaŋŋa ale Wen yenni limisidɔma ale nisɔmma baai meena ale jam nyini jam ayen ba yik wa la, ayen, << Mi ka zue ate nama ta gebik woŋta ale dua a jam ayen ni yik mu? 53Daa meena mi kasim bo ale nama kama Wen yenni po a sak nuruba alege nama an jam pai nisa a tiri mu, ka nama mɛ danni ale nna, di be ka da dii mɛ ate jabioku ta suik pai wa pagrimu a tom tuima la.>>

54Ba yaa yik wa a ta wa cheŋ kaabteerɔ kpioŋku yenni. Piita yaa wari ŋaaŋ a cheŋ a vi. 55Ba ale jam toati bolim yenni dabiaka po a maa chaab a kali la, Piita jam maa bo ba po kama. 56Nipokbili wanyi ale jam boro, wa jam ka pɔkdɔklie a nya ale Piita kala bolimu niŋ, wa yaa nya wa nna ziin, a weeni ayen, <<Nuruwa de a poom bo ale wa kama.>> 57Piita yaa pagsi ayen, <<Nipokbiliga, mi zɛ wa.>> 58Ku an bula beniya ale ge ate nuru wa choa a ŋman nya wa a weeni ayen, <<Fi mɛ ka ba po wanyi.>> Alege Piita ŋman weeni ayen, <<Nidoa, mi maa daa ba po.>> 59Ku ale ŋman ga beni magadek la, nuru wa choa a ŋman weeni ale nin muna ayen, <<Mi seba chak kama ayen nuruwa de a jam maa bo ale wa kama, dii nyiŋla, nuruwa de ka Galili tɛŋka denɔ.>> 60Alege Piita ŋman weeni ayen, <<Nidoa, mi zɛ fi ale a biisi diila.>> Wa ale diem boro a biisi dila la, kpadiaka yaa kum 61ate Nyɔnɔwa Yeezu Kirisita yaa, viriŋ nya Piita ate Piita yaa teeri Nyɔnɔwa Yeezu Kirisita ale poom weeni wa dii ayen, <<Fi le pagsi kama ku nɔi buta ayen fi zɛ mu ale ge ate kpadiaka kum yokku de.>> 62Piita ale ga teeri dila la, wa yaa nyini peelim kum nna yegayega.

63Nuru baai ale jam ta Yeezu la, a yaa nye wa a la ale a nak wa, 64a yaa pai ŋanta a bobi lik wa ninaŋa mɛ a yaa bek wa ayen, <<Weeni a sak ti waai ale nak fu la.>> 65Ba jam biisi ka wie ŋa chaab nna yegayega a lɛ wa.

66Vari ale ga veenti la, nisɔmma a yaa jam tu chaab. Ba gela a jam ka kaabteerɔ kpaŋŋa ale Sinsak sagrɔba. Nuru baai ale jam ta Yeezu la a yaa ta wa a cheŋ ba jigi ate ba yaa bek wa ayen, 67<<Fi dan ka Kirisitawa, be weeni ti.>> Alege wa yaa tulisi ba ayen, <<M dan weeni a sak ni, ni kan ta siaka. 68M be dan bek ni bega ni kan tulisi mu. 69Alege a zaani jinla a ta a cheŋ, Mi Saalɔbiika ale kali ka Pagrɔwa Wen juga geŋ.>>#22:69 Yiila 110:1 70Ba meena a yaa ŋman bek wa ayen, <<Fi abe ka Wen Nidoabinni?>> Yeezu ŋman tulisi ba ayen, <<Nama ale weeni.>> 71Ba yaa bek chaab ayen, <<Ka boan jaab wari ate ti ŋman a yaali ayen ti wom a magsi chaab ale nuruwa de dii nyiŋla, ti wom ku kama a ta nyini wadek nɔi po ayen ti an velim ya.>>

Àwon tá yàn lọ́wọ́lọ́wọ́ báyìí:

Luuk 22: BWU

Ìsàmì-sí

Pín

Daako