Matiyò 9
9
Jisòs chwuk wùt wù kə̀blena
(Mâk 2.1-12; Lûk 5.17-26)
1Jisòs tì lye a ngwùk kaha daŋ a yi jin yi lwi kaha yen yi tèk afa wù ndùku chyə atɨ̂n 2Ghɨt ale ben nì wùt kə̀blena ha wûn, ma ghɨ ti nîŋhì a fughàm. Jisòs yen bimi ye ghɨna ndùku kəta jis ha wùt wù kə̀blena we na, “Wâ mù khɨti təm a ta. Mu ti lehìfo be sasu.”
3Chichàsu saksu lesu yu ni, hì jîsà ha ngɨŋsu ghɨna su na, “Wùt wunâ sùlè Yènfù.” 4Kə wu yu, Jisòs khɨli kwâktì ghɨna ki buf ha ghɨna na, “Ghàn kwàktè gha be ni njwô ghə? 5Yi bone hi jìs na, ‘Ghɨ ti lehìfo be sasu’, ma hi jìs na, ‘lòti, ma wò gbi’ agha?” 6Mu tê chwûtèlò ha ghàn chin n a Wâ Wùt kətalò jyaka a chyə afân hi lèhèfo besu ghɨ̂tsù. Wù jis ni, ki jîs ha wùt kə̀blena we na, “Lòti ma wò lyi shɨ̂ŋ fafu ma wò hi kolê.”
7Wù lôtì kə yâ kaha kolo lò. 8Ghɨt ghɨn yen ni hì fânà nâ haŋaŋ, hì kokhe Yènfù te fu fo nki jyak ghɨ̂n ha ghɨta.
Jisòs chwok Matiyò ha jùmtìbàm à wûn
(Mâk 2.13-17; Lûk 5.27-32)
9Te Jisòs lo afû hì yênà yen wùt yet yi wuni mô Matiyò, wu mô a wì afa ghɨ kâtà ŋwàklànà atɨ̂n jis ha wun na, “Jùmti mu.” Kə wu yu, Matiyò lôtì yen a wun a yi bàm.
10Jisòs yen ndokò wu lùk wu yənu a Matiyò a ndâ, ghɨt ghe ghɨ ndùku kâtà kəbi ŋwàklànà nì ghɨt a be ale ghɨ dô kə ni ben ndokò nì jùmtìbàmsù wunsu. 11Ghɨt a Falàsî ghɨ le yen ni ki buf ha jùmtìbàmsù Jisòs su nâ, “Njwô ghə te chichà wânù yə ghe ghɨt ghe ghɨ kâtà ŋwàklànà nì ghɨt a be ale agha?”
12Jisòs yu gha ye ghɨna jìsà kaha buf ha ghɨna na, “À jwof ndâ nde, ma wu nê hi khɨŋa wùt a fù agha? À yè khɨŋa kə ghɨt a yablena. 13Ghàn yê hi yike gha yinâ a Yènfù jìsa a wuna ŋwàklù na, gha ye mu khɨŋa mò na ghàn hi kwohi seni ha ghɨta, kə ghàn hi tuhe kə nyamsu ha mu. Mu tà che ben jə hi toŋa ghɨt ghe ghɨ mô chilichili, mu che ben hi toŋa ghɨt a be.”
Ghɨ buf ha Jisòs kum jwo bamini
(Mâk 2.18-22; Lûk 5.33-39)
14Jùmtìbàmsù Jon Fo Mòlû su lesu ben buf ha Jisòs na, “Njwô ghə te ghàh nì ghɨt a Falàsî bama jwo, jùmtìbàm sasu bama wi agha?”
15Jisòs buf ha ghɨna na, “A lɨm à wùt ywên ki lâkà ghɨta wu lùk wu malanu, ghɨ bên, ma ghɨ nê hi jyê wu baha mô kəbi afû agha? Ghɨna nè ni, tuku bè bê lò ma ghɨ bê lye lô nì lɨm à wùt a ghɨna fùtɨ̂n, shyəma ghɨna hi bama jwo.”
16Jisòs ki jîs na, “Wùt wi hi lyè bâh à sùnju a fe hi bàt à njusu mwusu atɨ̂n. Wù ki nî ni, ma bâh à sùnju fe ghê nê kah à chwoka, ma ghɨ nê shihi chwokâ ma ghakhi bûk ghe ghɨ bata yâ. 17Yi mô kəbi yi ghəl te ghɨ tà timi hì lêmà sìŋ à mù lùk atɨ̂n à sàlsu gwusu nyâmsù mwusu. Ghɨ ki nì yâ, ma sàlsù tɨnsu bati, ma ghɨ gha lùkû ma ghɨ gha sàlsù. Ghɨ bɨlà lêmà lô sìŋ à mù lùk a sàlsu fesu. Ghɨ ki ni yani, ma shyə tê ləhà.”#9.17 Sàlsu gwusu nyâmsù: À mò nki sàlsu mu lùk su lesu ma ghɨ fati nì gwusu nyâmsù.
Jisòs lôhì wan wù ywên a yi kpû fi chwuk wùt ywên wùlè
(Mâk 5.21-43; Lûk 8.40-56)
18Te Jisòs ndùku baha jîsà, wùt wu sakana a ghɨt a Jûs wùlè ben tum sù ngwuk a Jisòs ashyə̂ jis na, “Wâ mù ti kpû kə chin ni mu khɨŋa na wò bê kumà kə yi kûm wûn ma wù kahà lòti.”
19Jisòs lôtì nì jùmtìbàmsu wunsu hì yênà a wùt àtɨ̂n yi bàm.
20Kə ni, wùt ywên wùlè ben lumu a Jisòs yì bàm ma wù ndùku motè kə ni yena yu wunu, ma yafi tɨni ti fo ngə̂k ha wûn ha wu lɨ̀m njwòsù bà, kum soŋi sùnju Jisòs. 21Wù tì kum ni ma wù ti bimi na yi ki ba kə njusu wunsu ma yi ta.
22Jisòs kaha bɨ̂nhì wu wun yen wûn jis na, “Wâ mù khɨti təm a ta. Bimi ya ti nî na wò ta.” Kə wu yu, wùt ywên atɨ̂n tâ.
23Te Jisòs tì ye tana a wùt wù sakana we ndâ yen ghɨta ghɨ dô kə ni, ghɨta buka a mwə, ghɨ le chînà wamle jyê kə ni. 24Wù jis ha ghɨna na, “Ghàn fwu, wan wun tà kpu jə̂, wù bwune yi bwunî.” Ghɨna hì chyəka wûn. 25À hì mô te ghɨta fwo a bɨn, wù lyi yen a ndâ yen khɨti wo wan àtɨ̂n a kə wu yu, wù lôtì. 26Gha yin waŋ luk tù jɨ̀m a bàh a lak afû.
Jisòs nî, ghɨta fefana à bà kahi hì yenâ
27Ni te Jisòs tì lo hì fwo yênà, ghɨt a fefana ale à bà lo hì yênà a wun a yi bàm toŋte jîsà na, “Wâ fə̀n Defìt kwohi seni ha ghàh!”
28Wù yen lye a ndâ, ghɨt a fefana atɨna bên kwoti wûn afû. Wù buf ha ghɨna na, “Ghàn bimelò hamok na mu làhi nì ma ghàn kaha yen luktu?”
Ghɨna fîsì na, “Ghàh bimelò a Bâba.”
29Jisòs kum a se ghɨna jis na, “Yènfù ni, ma ghàn kahè hi yena kə yi ghəl te ghàn bime.” 30Ghɨna kahi hì yena tu luk. Jisòs chîhì ha ghɨna na, Kə wùt nè ywo.
31Biyani, ghɨna lô afû hì fôktè yênà nì gha tɨni kum Jisòs a yi lak afû yì jɨ̀m.
Jisòs nî à kwùk ghɨ jîs
32Ghɨt ghe Jisòs tì chwuka yâ shihi lò ghɨ fî ben nì wùt ha Jisòs wu kəta yohnà be, fê jîsà wi. 33Jisòs hì jûmà fihe bê kə ni yohnà be ghɨna ni, wùt àtɨ̂n jîs. Nôn à ghɨt ghe hì mo nì kani jis na, “Ghàhnà tà ye timi yen nki gha yina yi lak yi Isalì afân.”
34Biyani ghɨt a Falàsî hì jîsà yênà na, “À fo fə̀n wù yohnù be jyaka na wù hi jûmà fihe yohnù be wûn.”
Jisòs hì kwohi yi sen ha ghɨta
35Jisòs hì gbê lye tèktu chiktu nì tu teta tu, yike a ghɨna ndasu yuŋtesu fôktè tum yì jùŋ kum fə̂n wù Fùyènù, fè chwuka tu yaf nâ tù jɨ̀m. 36À hì mô te wù yena nôn à ghɨ̂tà ghɨ fwo bênà, seni kwo wûn ha ghɨna beka ghɨna ndùku kəta fumhìnù gàmtì bu, mô kə te sù njyə̀ chìn bu. 37Wù ki jîs ha jùmtìbàmsu wunsu na, “Mwə̀ mù yə̂mù ti kpen hi kpì dô kə ni biyani ghɨt a kpena dô wi. 38Ghàn jəm lê ha Yèn fe fu mô Bè fùk na wù chinhè kpenhi ghɨt a fetana ma ghɨ shik à kpê kolo nì ghɨna.”
Àwon tá yàn lọ́wọ́lọ́wọ́ báyìí:
Matiyò 9: bmv
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Wycliffe Bible Translators, Inc.
