Matiyò 8
8
Jisòs chwuk wùt wù kùhana
(Mâk 1.40-45; Lûk 5.12-16)
1À hì mô te Jisòs kaha chwo a kun, ghɨta nâ hidù hì gbê a wun yi bàm. 2Wùt lè kəta a kùh, bên tum sù ngwuk a wun ashyə̂ jis ha wun na, “Bâba, wò hi kôŋà wò chwuk mu.”
3Jisòs nâhì a wô kum wun jis na, “Mu kòŋàlò, tâ.” Kə wu yu, kùh atɨna mî a wun wu wùn. 4Jisòs ki jîs ha wun na, “Kə wò nè mômà hi fòktè gha ye yi gana ha wùt lè. Ndù chwuti kə ngɨŋ yâ ha ngàŋ à ndâ Fùyèn ma wò fo fo ye sak yi Musìs tì jìsa na wùt ki tâ te wò nì kùhà, wù folò shyəma ghɨta khɨli na wù ti tâ.”
To sù sojà ale chwûtì bimî wuni
(Lûk 7.1-10)
5À ndùku mô te Jisòs gbe lye yênà a yi tèk yi Kàbanùm to sù sojà ghɨt a Lûm ale ben chyati wun jis na wù gamti yi. 6Wù jis ha wun na, “Bâba, wùt à mù wù fèt mò a ndâ ma wù ti kə̂blì yena ngə̂k nâ haŋaŋ.”
7Jisòs jis ha wun na, “Mu nè bê chwukalò wûn.”
8To sù sojà ghe fî fîsì na, Bâba, mu kpene wi shyəma wò lye a mu ndâ. Jîsà kə yi jîs ma wùt à mù wù fèt ta. 9Mu jìsà ni beka mu boŋa fètà a ghɨta yi dèt kəta sojàsu a mu yi dèt. Mu jis ha wùna na, ‘Ndù,’ wù yen kə yi yên, mu jis ha wùlè na, ‘Bî,’ wù ben kə yi bên, mu jis ha wùt mù wù fèt na, “Nì ni wù ni kə yi nî.”
10Te Jisòs ywo gha ye wù jìsa ni, jwo yum wûn, wù jis ha ghɨt ghe ghɨ ndùku gbê a wu yi bàm ya na, “Mu jìsà ha ghàn hamok na, mu tà timi yen jə wùt wu kəta nki bimi yîn nâbi a Isalì. 11Mu jìsà ha ghàn na ghɨta bè fwolò dô kə ni ma ghɨ lo kə bûlà tu mbyi tu tù jɨ̀m ma ghɨ bê ndòko a wu luk wu yənu fə̀n wù Fùyènù ghê Ablàhâm nì Isìk nì Jakòb. 12Ghɨ bè bɨlà jûmà fihe wana toka ghe ghɨ kəta hi tè mò afû ma ghɨna fwo yen atɨ̂n à bɨn a finana ma hi luŋle jyê kuta a soŋ.” 13Jisòs jis ni ki jîs ha to sù sojà ghe na, “Wo kolo yênà. Mu ti nì gha ye wò bime na mu làhi nì ha wò.” Kə wu yu, wùt à wun wù fètana we tâ.
Jisòs chwuk ghɨta ghɨ dô kə ni
(Mâk 1.29-34; Lûk 4.38-41)
14Jisòs gbi lye a Bità ndâ, yen nè ywê Bità, mô wu khɨ̀, kəta a gut. 15Wù kum wûn, gut atɨna mi kə yi mî. Wù lôtì chyâhì mwə̀ mù yə̂ mù, Jisòs yə̂.
16À hì mô wu yu kolô, ghɨ ben nì ghɨta ha Jisòs ghɨ dô kə ni, ghɨ kəta yohnù be, wù jis kə yi jîs, yohnù be tɨnu fwu, wù fî chwuk ghɨt a yafana nâ jɨ̀m. 17Gha mɨ ghɨ̂n ndùku gânà ni hi lunhe gha ghe fòktì Ìsayà tì nyàka na, “Wù tì chwuk yaftu ghàhnà tù fî mihì yaftu a ghàhnà wu wùn.”
Ghɨt ghe ghɨ kpene hi jùmtè Jisòs
(Lûk 9.57-62)
18Jisòs yen nôn à ghɨt ghe ghɨ ndùku mô a wun a ngwùŋ ki jîs ha jùmtìbàmsu wunsu na ghɨna daŋ à yen a yi jin yi lwi Galìlî fokô. 19Kə ni chichà sak wùlè fwu ben toŋti wun jis na, “Chichà, mu tê jûmtèlò wò nâbi afa wò yènà.”
20Jisòs fîsì ha wun na, “Sòŋàtù kətalò bûkù ghɨna, nyɨ̀mû kəta sù ndâ, biyani Wâ Wùt kəta wi luku hi nìŋhe tô wuna atɨ̂n hi yùtì.”
21Jùmtìbàm à wûn yìlè ben jis ha wun na, “Bâ, de ma mu kolò ye gùma bôm shyəma mu bê hi jûmtè wò.”
22Biyani, Jisòs jis ha wun na, “Bi ma ghɨ lo, wò de ma ghɨt ghe ghɨ mô te ghɨt a kputena hi gûmà ghɨt a ghɨna ghɨ kputena.”
Jisòs nî fufa ta tenâ
(Mâk 4.35-41; Lûk 8.22-25)
23Ni te Jisòs jìsa ya, lye a ngwùk, jùmtìbàmsu wunsu boŋ lye a ngwùk hì daŋà. 24Kə ni, fufa ta shɨŋ yìmì hì chyâlà bəmâ, hì shikà jwò mòlû kwoka lye a ngwùk, a mô ni Jisòs bwunê. 25Jùmtìbàmsù wunsu yen shik yemhì wûn jyana, “Yèmâ a Bâba ma wò bonhi ghàh, ghàh ti kputelò!”
26Wù buf ha ghɨna na, “Ghàn fànà ghə ni? Bimi yani tobte kə ni.” Te wù jìsa ni lôtì kântì fufa nì jwò, luktu china kə ni moŋ.
27Ghɨt atɨna hì mô nì kani buf nâ, “À mò wùni wùt ni, nâbi fufa nì jwò ywo wun agha?”
Jisòs jum yohnù be
(Mâk 5.1-20; Lûk 8.26-39)
28À hì mô te ghɨna daŋa lwî we yen tan a bàh a lak afa ghɨ ndùku toŋte na Gàdàlà, ghɨna kwônà ghê ghɨt ale, ghɨ fwo bênà a gùma à bà, kəta yohnù be, ma wu ti nì ghɨna hì chyəfa nâ be, ghɨta teta kə yi têt ghɨna. 29Ghɨna yen ben nì Jisòs ni bwat buf na, “Wò khɨŋa ghə ha ghàh a Wâ Fùyèn wunâ? Wò ben hi fo ngək ha ghàh shyəma tuk wahu wu ngəku bè kpen ma?”
30À ndùku mô ni, kùnduku wule yə bakhe afû dô kə ni. 31Yohnù be we chyati Jisòs jis na, “Wò jum fihi ghàh, wò tum ghàh a kùnduku woko fùtɨ̂n.”
32Jisòs jis ha yohnù be tɨnu na, “Ghàn yen”. Kə wu yu, wu fwu yen lye atɨn à wù kùnduk afa, wu shɨŋ nì nyɨŋi yen tan a bàh yi bi lwi, chemle a jwô kputilò.
33Ghɨt ghe ghɨ ndùku chînà kùnduku tɨnu tet lò yen tan atɨ̂n à yì tèk fôktì gha ye yi gana nâ yì jɨ̀m nì gha ye yi gana ha ghɨt a yohnù be we. 34Ghɨta fwu yi tèk afû kə à jɨ̀m yen yen Jisòs chyati wun na wu lo chya a ghɨna yi lak afû.
Àwon tá yàn lọ́wọ́lọ́wọ́ báyìí:
Matiyò 8: bmv
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Wycliffe Bible Translators, Inc.
