San Mateo 9
9
Jesús i-ac-oytamp tu'c paralíticu
1Itʉgʉjy Jesús ajni'c mit ipʉctampajyat, pitujcau pa tugalaguna-ájw mit mingau Jesús inʉ'jcopacni'c. 2Mit imumingajau tu'c paralíticu, ayé jeme cumʉgʉguipay, mit je' cʉmnap ito'cni'c, mit igui-is̈ Jesús ni'c cupʉjcap, inajau ayé paralíticu:
—Hijo, ma ji'c injo̱jt ni'c perdona̱tic itsʉ̱na nu'pʉjʉn mal inwatway.
3Mit jem itsʉ̱ngaj una̱c i-ajque's̈capay ley, inʉmgau je'jatu: “Ayʉ̱́j jayau itucotsp Dios.” 4Po Jesús ijawiu nat ipensá̱tca, inʉmgʉs̈au:
—¿Tini'c is̈pensá̱tca mal injo̱tni'jcat? 5¿Jʉmay más fácil tʉs̈nʉjmawa'n ayʉ̱́j jayau: “Perdona̱tic itsʉ̱na nu'pʉjʉn mal inwatway”, o tʉs̈nʉjmawa'n: “Ca's̈ʉ'c mit yo'y”? 6Po tʉ-actujawigʉs̈áj ni'c ʉ̱ jeme tʉjatway jayau tʉnaguep derechu en ayʉ̱́j mundu pa tʉs̈perdona̱twa'n ayé mal iwatcaway jayajwat.
Mit cʉs̈ inajau ayé paralíticu:
—Ca's̈ʉ'c, pʉc into'c mit nʉs̈ intʉcm.
7Mit cʉs̈ je' ca's̈ʉ'c jaran mit nʉcs̈nuw pa itʉcm. 8Mit ayé jayaujuc igui-ís̈caj lo que jatway, nigu-épigʉjʉu mit i-oyninʉmgau Dios ni'c je' imoy poder tu'c jayau ma wat milagrujat.
Jesús iya̱s̈p Mateo
9Ipichijn jem Jesús, i-is̈ tu'c jayau inʉ'jyway Mateo. Je' tsʉ̱nau mam iguique'chúmga tumi̱n impuestu. Mit Jesús inajau:
—Natspoguiyac.
Mit je' ca's̈ʉ'c, inatspoguiu.
10Mit después Jesús tsʉ̱nau me̱s̈ani'c tʉc Mateo mit mingau may que'chumpajyat mit maljayajwat, mit tsʉ̱ngawey tuwitic me̱s̈ani'c mit Jesús mit ipʉctampajyat. 11Mit igui-ís̈caj we'n fariseujat, inʉmgajau Jesús ipʉctampajyat:
—¿Tini'c in-amayipajyat iguimucaygʉs̈ jeme ique'chumgapay demás mit maljayajwat?
12Iguimarajw we'n Jesús, inʉmgʉs̈au ayé fariseujat:
—Jeme catsʉ̱ngapay tu'nij iganesita̱tcap doctor, po jeme tu'nijatway inesita̱tcap doctor. 13Nʉ́s̈ca mit pʉctánga ti inʉmpay Dios ilibruni'c mam iguinʉm: “Más tʉnwamp jayajwat ma ayo̱wis̈ca imupro̱wije̱wajyat mit caje' tʉs̈ago'jcajáj aníma̱jtat pa ʉ̱.”
Inʉm Jesús:
—Tʉgaminu tʉs̈che'ngʉs̈ jayajwat ni-oyninʉmgʉjʉpay, tʉmín tʉs̈che'ngʉs̈ maljayajwat ma cuyaguiga ima̱lway to̱jwat.
Nat oy na-ayuna̱twa'n
14Mit Juan ipʉctampajyat mingau mam itsʉ̱na Jesús mit inʉmgajau:
—¿Tini'c ʉjtsat mit fariseujat tʉ-ayuna̱tí̱jcap po impʉctampajyat ca-ayuna̱tcap?
15Mit Jesús inʉmgʉs̈au:
—¿Is̈jawiga oyap itsʉ̱nga triste jeme coygapay cʉ'pa'tni'c mientras ayé novio tsʉ̱nap mit je'jat? Po itáj s̈ʉjw cuandu novio igajatsʉ̱nawa'n mit je'jat. Wejpu'n ayuna̱tcájama.
16’Jesús inʉmgʉs̈au mechc ejemplujat pa ma jawiga ni'c magamotca ampay creencia mit ayé nam ama̱s̈an i-ajque's̈way Jesús, inʉm: Nepʉn igatunap nam jamuc tu'c ampay jamuc, ni'c ayé nap ina̱tpichimp ampaywayna' mit más mʉj ijotwa'n. 17Ne nagacomp nam vinu ampay pa̱gas̈-acbolsani'c. Te nawatp we'n, timamp ayé vinu mit i-acpʉjtugáj ayé ampay bolsa mit cumuchicada'gáj ayé vinu mit togoyáj ayé bolsa. Po nam vinu nacomp nam pa̱gas̈-acbolsani'c mit oyap nas̈guarda̱t inimechquij.
Jairo ito'chwáy
18Jesús imucotscʉs̈pnajate wename, coy tu'c jayau encarga̱ticway mam judíujat, mit nicos̈atenda̱jcʉu ita'ná̱m Jesús, mit inajau:
—Cʉs̈o'cpnaj i-o'c tʉnto'chwáy, po te mi̱ minʉs̈p mit inyajcap incʉ', jutucta'gáj.
19Mit ica's̈ʉ'jc Jesús mit ipʉctampajyat, nʉs̈cau mit je'. 20Mit miney imugus̈á̱m tu'c to's̈ay jeme tu'nijtsʉ̱naway doce s̈iwitanu mit nipinméj, mit itsʉjcau Jesús ijamuc-au-á̱m. 21Ni'c ayé to's̈ay ipensa̱t: “Te tʉntsʉjcapu ijamuc, tʉ-oytanáj.” 22Mit Jesús i-e'jpitujc, i-is̈ mit inajau:
—Hija, ma ji'c injo̱jt, mi-oytanway ni'c ʉ̱ is̈cupʉcp.
Mit oytan jaran ayé to's̈ay.
23Icojy Jesús itʉcm ayé encarga̱ticway, i-is̈cʉs̈ ayé s̈u̱s̈payna'jat mit jeme bullawatcapay. 24Jesús inʉmgʉs̈au:
—Píchinga ni'c ayé to'chwáy ca-o'guic, ma̱pujyu.
Mit ayé jayaujuc iguitus̈i̱jcau. 25Mit igui-acpichingʉs̈ ayé jayaujuc, je' tʉgʉy mit i-actajnau icʉ' ayé to'chwáy, mit ca's̈ʉ'c jaran. 26Mit jʉmgapa'tu en ayé na̱s̈ inʉmdacyo'ygau lo que iwatway Jesús.
Mechc winchat e'pta̱jcap
27Ipichijn Jesús, mechc winchat iguinatspoguigau mit ya̱s̈cau, inʉmgau:
—Mi̱ mipichin David ifamiliani'c pa is̈salva̱tcáj, ayo̱wis̈cac.
28Mit icojy en tu'c tʉjc mam itsʉ̱na, coygau mam je' ayé winchat, mit Jesús inʉmgʉs̈au:
—¿Incupʉjcap ni'c oyap tʉ-ac-oytangʉs̈?
Mit iguinʉmgajau:
—Jo̱, Señor.
29Cʉs̈ itsʉjcʉs̈au iwijnat, inʉm:
—As̈am incupʉ́jca, wename-ey tʉwatcʉ́s̈a.
30Mit e'pta̱jcau jaran. Mit Jesús imucotscʉs̈ mʉgʉc maga-actujawiga nepʉn.
31Po je'jat ipíchingaj, inʉmdacyo'ygau jʉmgapa'tu en ayé na̱s̈ lo que iguiwatcajaway Jesús.
Tu'c u̱m cotsta̱c
32Ipíchingaj ayé winchat, imumingajau tu'c u̱m ijtʉpay demo̱nyu. 33Mit igui-acpíchijnaj ayé demo̱nyu, cotsta̱c jaran ayé u̱m. Mit nigu-épigʉjʉu ayé jayaujuc, inʉmgau:
—Nunca nagani-e'pcap tu'c cosa as̈amay ayʉ̱́j Israelway na̱s̈.
34Po inʉmgau fariseujat: Je' i-acpichingʉs̈p demo̱nyujat ni'c iguimoyp poder ayé jeme imanda̱tpay demo̱nyujat.
Jesús i-ayo̱wis̈cʉs̈p jayajwat
35Mit Jesús ituyo'y nu'pʉjʉn ciudajat mit nu'pʉjʉn nʉ'jcopajcat. Mit i-ajque's̈ mam judíujat i-adora̱tca mit inʉmdacyo'y ayé oyway noticia ni'c Dios manda̱táj, mit i-ac-oytan nu'pʉjʉn jayajwat jeme tsʉ̱ngaway tu'nij en ayé nʉ'jcopajcat. 36Igui-is̈ ayé jayaujuc, i-ayo̱wis̈cʉs̈ ni'c yo'ygap as̈am togoyijcat mit s̈is̈cada'guijcat as̈am borregujat ca-itcʉjʉpay aquepmucpay. 37Cʉs̈ Jesús inʉmgʉs̈au ipʉctampajyat:
—E'pca ayé jayaujuc as̈am tu'c cosecha na-ajca's̈ʉ'gámpay, po camajyatu jeme nas̈majyigámpay pa nas̈actugupʉjcawa'n. 38Jemni'c yo'tcaja Dios ma ajyu'tcʉs̈ yos̈watpajyat pa ma ajca's̈ʉ'jcaja icosecha, ni'c je' ayé i-actampay ayé cosecha.
Àwon tá yàn lọ́wọ́lọ́wọ́ báyìí:
San Mateo 9: PSNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nuevo Testamento en Popoluca de Sayula © Sociedad Bíblica de México, [1969].
