San Mateo 2
2
Ma̱gujat mingau mam Jesús
1Cuandu Jesús i-ijt en ayé nʉ'jcopac Belén Judeajway na̱s̈, ma̱gujat orienteway coygau Jerusalén, mit wejpu'n manda̱t rey Herodes, 2mit je'jat i-ucyo'tcau:
—¿Jʉm itsʉ̱na ayé jeme itway pa ijatwa'n judíujat irejyat? Ni'c tʉn-is̈cajau ima̱jts mam tʉtsʉ̱́ngaj oriente mit tʉmingau pa tʉs̈-adora̱tcawa'n.
3Iguimarajw we'n rey Herodes, je' pensa̱to'c mit we'ney nu'pʉjʉn jayajwat tsʉ̱ngapay Jerusalén. 4Mit ayé rey igui-apʉcmujcʉs̈ nu'pʉjʉn judíujat imʉjpa̱nijat mit jeme i-ajque's̈capay ley nʉ'jcopacni'c, i-ucyo'tcʉs̈ jʉm i-itwa'n Cristu.
5Mit je'jat inʉmgajau ni'c Cristu itáj nʉ'jcopac Belén Judeajway na̱s̈ ni'c we'n iguija'jy ayé profeta, inʉm:
6Ayé nʉ'jcopac Belén tsʉ̱napay Judeajway na̱s̈,
ayé tsʉ̱náj más mʉjninʉmic que japu̱t nʉ'jcopajcat mam itsʉ̱nga manda̱tpajyat Judeajway na̱s̈,
ni'c jem pichináj tu'c jeme más manda̱támpay,
mit je' imanda̱táj tʉnjayajwat Israejlatway.
7Cʉs̈ Herodes iya̱s̈cʉs̈ anu'mu ayé ma̱gujat, mit i-ucyo'tcʉs̈ oymanac mu̱tij ique's̈ta̱jc ayé ma̱jts. 8Mit je' i-ajyu'tcʉs̈ pa Belén, inʉm:
—Nʉ́s̈ca jem, che'nga oymanac ayé qui'chwáy. Mit is̈pa̱tcawa'n, is̈ajyu'tcajáj razón pa we'n tʉnʉs̈ámpey pa tʉs̈-adora̱twa'n.
9Iguimáraugaj ayé rey, pichingau jem. Mit ayé ma̱jts i-is̈caway oriente nʉcs̈ jʉpm de je'jat hasta icojy ayé lugar mam itsʉ̱na qui'chwáy, mit jem itentajn. 10Igui-ís̈caj ayé laj mam itentajn ayé ma̱jts, ji'cta̱jcau ijo̱jtat. 11Mit itʉ́gʉygaj tujugum, i-is̈cau ayé qui'chwáy mit ima̱m María, mit nicos̈atenda̱jcʉjʉu mit i-adora̱tcau je'. Igui-awá̱tscaj ayé caja itumuyo'ygaway regalu, iyajcajau regalu de oro, po̱m mit tu'c po't pa'cs̈u'cpay inʉ'jyway mirra. 12Mit Dios i-actujawigʉs̈ cucma'ni'c magajapítujca mam itsʉ̱na Herodes. Cʉs̈ je'jat pichingau pa jatu'c to̱u pa itʉcmayna̱s̈at.
Po'jcap pa Egiptojway na̱s̈
13Mit cʉs̈ inʉ́s̈canuj ayé ma̱gujat, el Señor i-ángel ique's̈ta̱jcau José cucma'ni'c mit inʉjmau:
—Ca's̈ʉ'c, munʉs̈cʉs̈ ayé qui'chwáy mit ima̱m, mit po'jca pa Egiptojway na̱s̈, mit tan jem hasta tʉnʉjmawa'n, ni'c Herodes iche'náj ayé qui'chwáy pa igui-ago'cwa'n.
14Mit cʉs̈ je' ca's̈ʉ'c mit imunʉs̈cʉs̈ tsu'm ayé qui'chwáy mit ima̱m pa Egiptojway na̱s̈, 15mit jem itángaj hasta i-o'jc Herodes. Ayʉ̱́j jat pa ma cumplia̱t lo que el Señor i-actunʉmway ayé profeta, inʉm: “Tʉnya̱s̈ tʉnwáy ma pichin de Egiptojway na̱s̈.”
Herodes i-ago'jcʉs̈ qui'chwájat
16Cʉs̈ Herodes igui-is̈ ni'c iguiwe̱jta̱jcau ayé ma̱gujat, je' awa'niu mʉgʉc, mit manda̱t ma ago'jca nu'pʉjʉn qui'chwájat tsʉ̱ngaway Belén mit nu'pʉjʉn tsʉ̱ngaway en ayé na̱s̈. I-ago'jcʉs̈ jeme itcʉjʉpay mechc s̈iwit o más yajwatnajway. Je' ipʉc ayé tiempu cuandu igui-ucyo'tcʉs̈ ayé ma̱gujat. 17Wenajpu'n icumplia̱jt lo que inʉmway ayé profeta Jeremías, inʉm:
18Namarap ijʉ́yga to's̈ajyat Ramájway na̱s̈,
mit jʉygap mʉgʉc ni'c tu'ngap ijo̱jtat,
Israelway to's̈ajyat inijʉygap iwajyat,
mit ca-oyap itsʉ̱nga consola̱tic ni'c togoybʉ'ngau iwajyat.
19Po i-o'jc Herodes, el Señor i-ángel ique's̈ta̱jcau José cucma'ni'c mam itsʉ̱na Egiptojway na̱s̈, 20inʉjmau:
—Ca's̈ʉ'c, munʉs̈cʉs̈nuatu ayé qui'chwáy mit ima̱m pa Israelway na̱s̈ ni'c o'jcaway ayé jeme iche'ngaway ayé qui'chwáy pa igui-ago'jcawa'n.
21Mit cʉs̈ je' ca's̈ʉ'c mit imunʉs̈cʉs̈ ayé qui'chwáy mit ima̱m pa Israelway na̱s̈. 22Po José iguimarajw ni'c Arquelao manda̱tp Judeajway na̱s̈ ilugarni'c ite̱t Herodes, je' pʉ̱t inʉs̈wa'n jem, mit i-actujawigawatu cucma'ni'c maganʉs̈wit jem, mit je' nʉcs̈ pa Galileajway na̱s̈. 23Mit icojy jem, tan en tu'c nʉ'jcopac inʉ'jyway Nazaret. Ayʉ̱́j jat pa ma cumplia̱t lo que inʉmgaway profetajat: Inʉmgáj ni'c Jesús Nazaretway.
Àwon tá yàn lọ́wọ́lọ́wọ́ báyìí:
San Mateo 2: PSNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nuevo Testamento en Popoluca de Sayula © Sociedad Bíblica de México, [1969].
