Kucangtsi 2
2
Ricwunnkyi Wande na Apupwen ti Riben
1Uwog wune, wande na apupwen ti riben ti iken ti ta uwae-yi meme mamtag. 2Rimam nde tag wande-wu, ama pu unyang uwae usir ti itsongfaen. Awu nde-wu wande iki atang be. 3Rimam waefa usir ti itsongfaen, u sa wu tsi usir ti kuko, ikyaen ti, usir wu, awu nde-wu wande iki be. 4Ayine si kuci na fengo ti Rimam mam apupwen ti riben.
Rimam Kyae Unde
Kiye ti Yaweh Rimam mam apupwen ti riben, 5utense tsi ukaen. Kiye wu, irum ti afub tsoye-yi khika be, ikyaen ti, Yaweh Rimam sa upwen tsa-wu utense khika be, unde iki ama ta-wu ti u tom riben be. 6Amaa, ambyi ku kyeb tso riben, ku nda uwog meme pu iyim.
7Ama Yaweh Rimam pxag ariben, u kyae unde atang. Rimam jwu ufunn ana unyang sang unde wu ruwen, ama unde wu kafe unde ti site unyang. 8Yaweh Rimam kyae risaen kú uwae Eden ti ta uwe usir ti kiskinn, u sa unde ti awu kyae ka som atang. 9Yaweh Rimam nda itso kutuku txitxi mbug tsoye riben atang. Ituku yi nyang ti ti sae, u nyang ti ti ci ama. Yi kutampwa risaen wu, kutuku ana unyang, ti kutuku ana itinungye itinyang ti itibi tsi atang.
10Uyinn iki tsoye uwae Eden atang ku jwae risaen wu. Uyinn wu kata akyikya inje. 11Rinyi ti tawe si Pishon, ti sī tswa Havila uwog ti zinariya ta atang. 12Zinariya na uwog wu nyang timambe. Bedola ti onis ti si atxom tinyang#2:12 Ariki ku myae baa, bedola na si akang ituku ti ku nung kuyang. Ariki ama ku myae baa, ayi na si perali. ama, ta uwog wune. 13Ti ifaen si Gihon ti sī tswa riben ti Kushi. 14Ti ita ama si Tigrisi ti sī tsa usir ti kiskinn na Ashur. Ti inje ama si Yufiretis.
15Yaweh Rimam sa unde wu som uwae risaen ti Eden atang, ti awu na tom wu, ama na u nungkyi wu. 16Ama Yaweh Rimam nda unde wu unju baa, “Ci-fu awaen ituku ti ta risaen ike meme. 17Amaa, kutuku ti ku nda unde nungye itinyang ti itibi ti ta risaen ike, ci-fu awaen-wu be, ikyaen ti, usir ti afu a ci wu, afu u cwucwu.”
18Yaweh Rimam ri baa, “Ayi nyang-yi ti unde ā som kum awu amam be, ame u kyae na wu unde ti rukwer wu, ti u ndeya wu.” 19Tiri, Yaweh Rimam mam ibye kutur ti inung ti ku pinn apupwen meme te isa riben, u pu yi ba na unde wu ti wu na fa yi rinyi. Rinyi ti unde wu a fa ibye titini, ayi si kunn pu yi rinyi-wu. 20Ne si fengo ti unde wu fa meme asinn rinyi, tí inung ti apupwen tí ibye kutur meme. Amaa, unde wu ta-wu te unde iki ti rukwer wu, ti u ndeya wu be.
21Ikyaen yine, Yaweh Rimam nda unde wu sī kicwag burrr. Ama kiye ti unde wu ku cwag kicwag, Yaweh Rimam nwaen ra ukub ishi unde wu kinjo, u fxeb kyi uwog wu ti ibye ijwe, 22ama u sa ukub wu ti awu nwaen ru ye ijwe unde wu kyae unda atang, u pu unda wu ba na unde wu. 23Tiri unde wu ri baa,
“Awune si ukub na akub-m,
ti ibye na ibye rimenn-m.
Rinyi-wu u si unda,
ikyaen ti, a kyae wu ruye rimenn urom.”#2:23 Yi unju Mbaibrane a bae ike baa “A u kunn wu baa, ISHA ikyaen ti awu ru ye uwae ISH.”
24Nee iken ti nde unde ku ya itse-wu ti iya-wu ta, ku ba bae fa te uwa-wu, meme ifaen-ba u kafe ijwe rimenn kinjo.
25Unde wu ti uwa-wu tsi ribam, ama u wae-ba rukwae atso be.
Àwon tá yàn lọ́wọ́lọ́wọ́ báyìí:
Kucangtsi 2: kubNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Wycliffe Bible Translators, Inc. and
© The Nigeria Bible Translation Trust 1995, 2017