HEBERU 1
1
Ọlọrun Sọ̀rọ̀ nípasẹ̀ Ọmọ Rẹ̀
1Ní ìgbà àtijọ́, oríṣìíríṣìí ọ̀nà ni Ọlọrun fi ń bá àwọn baba wa sọ̀rọ̀ láti ẹnu àwọn wolii rẹ̀. 2Ní àkókò ìkẹyìn yìí, ó wá bá wa sọ̀rọ̀ nípasẹ̀ Ọmọ rẹ̀, ẹni tí ó fi ṣe àrólé ohun gbogbo, nípasẹ̀ ẹni tí ó dá ayé.#Ọgb 7:22 3Ọmọ yìí jẹ́ ẹni tí ògo Ọlọrun hàn lára rẹ̀, ó sì jẹ́ àwòrán bí Ọlọrun ti rí gan-an. Òun ni ó mú kí gbogbo nǹkan dúró nípa agbára ọ̀rọ̀ rẹ̀. Lẹ́yìn tí ó ti wẹ ẹ̀ṣẹ̀ eniyan nù tán, ó wá jókòó ní ọwọ́ ọ̀tún Ọ̀gá Ògo ní ibi tí ó ga jùlọ.#Ọgb 7:25-26; 8:1
Ọmọ Ọlọrun Ju Àwọn Angẹli Lọ
4Ó ní ipò tí ó ga ju ti àwọn angẹli lọ, gẹ́gẹ́ bí ó ti ní orúkọ tí ó ju tiwọn lọ. 5Nítorí èwo ninu àwọn angẹli ni ó fi ìgbà kan sọ fún pé,
“Ìwọ ni ọmọ mi,
lónìí ni mo bí ọ?”
Tabi tí ó sọ fún pé,
“Èmi yóo jẹ́ baba fún un,
òun náà yóo sì jẹ́ ọmọ fún mi?”#(a) O. Daf 2:7; (b) 2 Sam 7:14; 1Kron 17:13
6Ṣugbọn nígbà tí ó mú àkọ́bí rẹ̀ wọ inú ayé, ohun tí ó sọ ni pé,
“Kí gbogbo àwọn angẹli
Ọlọrun foríbalẹ̀ fún un.”#Diut 32:43
7Ohun tí ó sọ nípa àwọn angẹli ni pé,
“Ẹni tí ó ṣe àwọn angẹli rẹ̀ ní ẹ̀fúùfù,
tí ó ṣe àwọn òjíṣẹ́ rẹ̀ ní ọwọ́ iná.”#O. Daf 104:4
8Ṣugbọn ohun tí ó sọ fún Ọmọ náà ni pé,
“Ìfẹ́ rẹ wà títí laelae, Ọlọrun,
ọ̀pá òtítọ́ ni ọ̀pá ìjọba rẹ.#O. Daf 45:6-7
9O fẹ́ràn òdodo, o kórìíra ẹ̀ṣẹ̀.
Nítorí èyí, Ọlọrun, àní Ọlọrun rẹ, fi òróró yàn ọ́
láti gbé ọ ga ju àwọn ẹgbẹ́ rẹ lọ.”
10Ó tún sọ pé,
“O ti wà láti ìṣẹ̀dálẹ̀ ayé, Oluwa,
ìwọ ni o fi ìpìlẹ̀ ayé lélẹ̀.
Iṣẹ́ ọwọ́ rẹ ni àwọn ọ̀run.#O. Daf 102:25-27
11Wọn óo parẹ́ ṣugbọn ìwọ óo wà títí.
Gbogbo wọn óo gbó bí aṣọ.
12Gẹ́gẹ́ bí eniyan tií ká aṣọ ni ìwọ óo ká wọn.
Gẹ́gẹ́ bí aṣọ, a óo pààrọ̀ wọn.
Ṣugbọn ní tìrẹ, bákan náà ni o wà.
Kò sí òpin sí iye ọdún rẹ.”
13Èwo ninu àwọn angẹli ni ó fi ìgbà kan sọ fún pé,
“Jókòó ní ọwọ́ ọ̀tún mi,
títí n óo fi ṣe àwọn ọ̀tá rẹ ní àpótí ìtìsẹ̀ rẹ?”#O. Daf 110:1
14Ṣebí ẹ̀mí tí ó jẹ́ iranṣẹ ni gbogbo àwọn angẹli. A rán wọn láti ṣiṣẹ́ nítorí àwọn tí yóo jogún ìgbàlà.#Tob 12:14-15
Àwon tá yàn lọ́wọ́lọ́wọ́ báyìí:
HEBERU 1: YCE
Ìsàmì-sí
Pín
Daako
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fyo.png&w=128&q=75)
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible Society of Nigeria © 1900/2010