ಯೋಹಾನ 4
4
ಯೇಸು ಪಿಂಞ ಸಮಾರಿಯ ಪಟ್ಟಣತ್‍ರ ಪೊಣ್ಣಾಳ್
1ಯೇಸು ಯೋಹಾನಕಿಂಜ ದುಂಬ ಶಿಷ್ಯಂಗಳ ಮಾಡಿಯಂಡ್, ದೀಕ್ಷಾಸ್ನಾನ ಕೊಡ್‍ತಂಡುಂಡ್‍ೕಂದ್ ಫರಿಸಾಯಂಗಕ್ ಗೊತ್ತಾಚೀಂದ್ ಯೇಸುಕ್ ಗೊತ್ತಾಚಿ. 2(ಯೇಸು ತಾನೆ ದೀಕ್ಷಾಸ್ನಾನ ಕೊಡ್‍ತಿತ್ತ್‌ಲ್ಲೆ, ಆಚೇಂಗಿ ಅಂವೊಂಡ ಶಿಷ್ಯಂಗ ಕೊಡ್‍ತಂಡಿಂಜತ್). 3ಆನಗುಂಡ್, ಯೇಸು ಯೂದಾಯ ಪ್ರಾಂತ್ಯತ್‍ನ ಬುಟ್ಟಿತ್ ಗಲಿಲಾಯ ಪ್ರಾಂತ್ಯಕ್ ಪುನಃ ಪೋಚಿ.
4ಅನ್ನನೆ ಪೋಪಕ ಅಯಿಂಗ ಸಮಾರ್ಯ ಪ್ರಾಂತ್ಯತ್‍ರ ಬಟ್ಟೇಲ್ ಪೋಪಕಾಚಿ. 5ಅನ್ನನೆ, ಸಮಾರ್ಯತ್‍ಲ್ ಸುಖರ್ ಎಣ್ಣುವ ಪಟ್ಟಣಕ್ ಬಾತ್. ಆ ಜಾಗ, ಯಾಕೋಬ ಅಂವೊಂಡ ಮೋಂವೊ ಯೋಸೇಫಂಗ್ ಕೊಡ್‍ತ ನೆಲವಾಯಿತ್ಂಜತ್. 6ಯಾಕೋಬಂಡ ಕಣತರೆ ಅಲ್ಲಿ ಇಂಜತ್; ಯೇಸು ಪ್ರಯಾಣತ್‍ರಗುಂಡ್ ದುಂಬ ತಳ್ಂದ್ ಪೋಯಿತ್ಂಜತ್, ಆನಗುಂಡ್, ಆ ಕಣತರೆರ ಪಕ್ಕ ಅಂವೊ ಅಳ್‌ತತ್. ಅಕ್ಕ ಮಜ್ಜಣ ಪನ್ನೆರಂಡ್ ಗಂಟೆ ಆಯಿತ್ಂಜತ್. 7ಆ ಸಮಯತ್‍ಲ್, ಸಮಾರ್ಯ ಪಟ್ಟಣಕ್ ಕೂಡ್‍ನ ಒರ್ ಪೊಣ್ಣಾಳ್, ನೀರ್ ಎಡ್‌ತ ಪೋಪಕಾಯಿತ್ ಅಲ್ಲಿಕ್ ಬಾತ್.
ಅವಡ ಪಕ್ಕ ಯೇಸು: ನಾಕ್ ಕುಡಿಪಕ್ ನೀರ್ ತಾಂದ್ ಕ್‍ೕಟತ್. 8ಅಂವೊಂಡ ಶಿಷ್ಯಂಗ ಆ ಸಮಯತ್‍ಲ್ ಕೂಳ್ ಎಡ್‌ತ ಬಪ್ಪಕ್ ಊರ್‌ರ ಒಳ್‍ಲ್ ಪೋಯಿತ್ಂಜತ್.
9ನಾನ್ ಸಮಾರ್ಯ#4.9 ಯೆಹೂದ್ಯಂಗ ಪಿಂಞ ಯೆಹೂದ್ಯಂಗಲ್ಲತಯಿಂಗಕ್ ಪುಟ್ಟ್‌ನ ಸಂತಾನಕಾರಂಗ. ಅದ್ಂಗಾಯಿತ್ ಯೆಹೂದ್ಯಂಗ ಈಂಗಳ ಪರಜಾತಿಯಾಯಿತ್ ನಡ್‍ತ್‍ಚಿ. ಈಂಗಳು ಯೆಹೂದ್ಯಂಗಡ ದೇವನ ಆರಾದನೆ ಮಾಡಿಯಂಡಿಂಜತ್. ಪೊಣ್ಣಾಳ್, ನೀನ್ ಯೆಹೂದ್ಯ ಮನುಷ್ಯ, ಅನ್ನನೆ ಇಪ್ಪಕ, ನೀನ್ ಎನ್ನನೆ ನಾಡ ಪಕ್ಕ ನೀರ್ ತಾಂದ್ ಕ್‍ೕಪಿಯಾಂದ್ ಅವ ಕ್‍ೕಟತ್. ಎನ್ನಂಗೆಣ್ಣ್‌ಚೇಂಗಿ, ಯೆಹೂದ್ಯಂಗ ಸಮಾರ್ಯಂಗಡ ಕೂಡೆ ಏದ್ ವಿಷಯತ್‍ಲು ಸಂಬಂದ ಬೆಪ್ಪುಲೆ.
10ಅಕ್ಕ ಯೇಸು ಅವಕ್: ದೇವಡ ದಾನ ನೀಕ್ ಗೊತ್ತಾಯಿತ್, ನಾಕ್ ಕುಡಿಪಕ್ ನೀರ್ ತಾಂದ್ ಕ್‍ೕಟಂವೊ ದಾರ್‍ೕಂದ್ ನೀಕ್ ಗೊತ್ತ್‌ಂಜತೇಂಗಿ, ನೀನೇ ಅಂವೊಂಡ ಪಕ್ಕ ಕ್‍ೕಟಿತ್‌ಪ್ಪಿಯ, ಅಂವೊ ನೀಕ್ ಜೀವತ್‍ರ ನೀರ್‌ನ ಕೊಡ್‍ತಿತ್‌ಪ್ಪಾಂದ್ ಎಣ್ಣ್‌ಚಿ.
11ಅದ್ಂಗ್ ಆ ಪೊಣ್ಣಾಳ್: ಒಡೆಯನೇ, ನೀರ್ ಬಲಿಪಕ್ ನೀಡ ಪಕ್ಕ ಒಂದು ಇಲ್ಲೆ, ಕಣತೆರೆಯು ದುಂಬ ಆಳವಾಯಿತ್ ಉಂಡಲ್ಲ, ಪಿಂಞ ಎಲ್ಲಿಂಜ, ನೀಕ್ ಜೀವತ್‍ರ ನೀರ್ ಕ್‍ಟ್ಟುವ? 12ಈ ಕಣತರೆನ ನಂಗಕ್ ದಾನಮಾಡ್‍ನ ನಂಗಡ ಮುತ್ತಜ್ಜನಾನ ಯಾಕೋಬಕಿಂಜ ನೀನ್ ಬಲ್ಯಂವೊನಾ? ಅಂವೊ, ಅಂವೊಂಡ ಮಕ್ಕ, ಅಂವೊ ಚಾಕಿಯಂಡ್ ಇಂಜ ಪ್ರಾಣಿಯ ಎಲ್ಲಾ ಇದೇ ಕಣತರೆರ ನೀರ್‌ನ ಕುಡಿಚತ್‍ೕಂದ್ ಎಣ್ಣ್‌ಚಿ.
13ಅಕ್ಕ ಯೇಸು: ಈ ನೀರ್‌ನ ಕುಡಿಪಯಿಂಗಕ್ ಪುನಃ ಬಾಯರಿಕೆ ಆಪ. 14ಆಚೇಂಗಿ, ನಾನ್ ತಪ್ಪ ನೀರ್‌ನ ಕುಡಿಪಯಿಂಗಕ್ ಒರ್‌ಕಾಲು ಬಾಯಾರಿಕೆ ಆಪುಲೆ; ನಾನ್ ಅಯಿಂಗಕ್ ಕೊಡ್‍ಪ ನೀರ್ ಅಯಿಂಗಡ ಹೃದಯತ್‍ಲ್ ನಿತ್ಯ ಜೀವಕಾಯಿತ್ ಉಕ್ಕಿ ಬಂದಂಡಿಪ್ಪ ಜಲವಾಯಿತ್‌ಪ್ಪಾಂದ್ ಎಣ್ಣ್‌ಚಿ.
15ಅಕ್ಕ ಆ ಪೊಣ್ಣಾಳ್: ಒಡೆಯನೇ, ನಾಕ್ ಬಾಯರಿಕೆ ಆಕತನೆಕೆ, ನೀರ್ ಎಡ್‌ತ ಪೋಪಕ್ ಇಚ್ಚಕ್ ದೂರ ಬರತನೆಕೆ, ಆ ನೀರ್‌ನ ನಾಕ್ ತರಂಡೂಂದ್ ಎಣ್ಣ್‌ಚಿ.
16ಅಕ್ಕ ಯೇಸು: ನೀಡ ವಡಿಯನ ಇಲ್ಲಿಕ್ ಕಾಕಿಯಂಡ್ ಬಾಂದ್ ಎಣ್ಣ್‌ಚಿ.
17ಅದ್ಂಗ್ ಅವ: ನಾಕ್ ವಡಿಯ ಇಲ್ಲೇಂದ್ ಎಣ್ಣ್‌ಚಿ.
ಅಕ್ಕ ಯೇಸು: ನೀಕ್ ವಡಿಯ ಇಲ್ಲೇಂದ್ ನಾಡ ಪಕ್ಕ ಎಣ್ಣ್‌ನದ್ ನೇರೇ. 18ಎನ್ನಂಗೆಣ್ಣ್‌ಚೇಂಗಿ, ನೀಕ್ ಅಂಜ್ ವಡಿಯಂಗ ಇಂಜತ್, ಆಚೇಂಗಿ ಇಕ್ಕ ನೀಡ ಕೂಡೆ ಉಳ್ಳಂವೊ ನೀಡ ವಡಿಯನಲ್ಲ, ನೀನ್ ಇಕ್ಕ ಸರಿಯಾಯಿತ್ ಎಣ್ಣಿಯಾಂದ್ ಎಣ್ಣ್‌ಚಿ.
19ಒಡೆಯನೇ, ನೀನ್ ಒರ್ ಪ್ರವಾದೀಂದ್ ನಾಕ್ ಗೊತ್ತಾಯಂಡುಂಡ್‍ೕಂದ್ ಆ ಪೊಣ್ಣಾಳ್ ಎಣ್ಣ್‌ಚಿ. 20ನಂಗಡ ಮುತ್ತಜ್ಜಂಗ ಇಲ್ಲಿ ಈ ಕುಂದ್‍ಲ್ ದೇವನ ಆರಾದನೆ ಮಾಡಿಯಂಡಿಂಜತ್. ಆಚೇಂಗಿ, ಯೆಹೂದ್ಯಂಗಳಾನ ನಿಂಗ ದೇವನ ಆರಾದನೆ ಮಾಡ್‌ವಕ್ ಯೆರೂಸಲೇಮ್ ಮಾತ್ರ ಸರಿಯಾನ ಜಾಗಾಂದ್ ಎಣ್ಣ್‌ವಿರಲ್ಲಾಂದ್ ಎಣ್ಣ್‌ಚಿ.
21ಅಕ್ಕ ಯೇಸು: ಅವ್ವ, ನಾಡ ತಕ್ಕ್‌ನ ನೀನ್ ನಂಬ್. ನಿಂಗ ದೇವನ ಆರಾದನೆ ಮಾಡ್‌ವಕ್ ಈ ಕುಂದ್‌ಕ್ ಪೋಪದ್ ಬೋಂಡ, ಯೆರೂಸಲೇಮ್‌ಕ್ ಪೋಪದು ಬೋಂಡ. ಆಚೇಂಗಿ ಅಪ್ಪನಾನ ದೇವನ ಎಲ್ಲಾ ಜಾಗತ್‍ಲು ಆರಾದನೆ ಮಾಡ್‌ವ ಕಾಲ ಬಂದಂಡುಂಡ್. 22ಸಮಾರ್ಯ ಜನಳಾನ ನಿಂಗ ಗೊತ್ತಿಲ್ಲತದ್‍ನ ಆರಾದನೆ ಮಾಡ್‌ವಿರ; ಯೆಹೂದ್ಯಂಗಳಾನ ನಂಗ ಗೊತ್ತುಳ್ಳದ್‍ನ ಆರಾದನೆ ಮಾಡಿಯಂಡುಂಡ್. ಎನ್ನಂಗೆಣ್ಣ್‌ಚೇಂಗಿ, ದೇವಡ ರಕ್ಷಣೆ ಯೆಹೂದ್ಯಂಗಡ ಮೂಲಕ ಬಪ್ಪ. 23ನೇರಾಯಿತ್ ಆರಾದನೆ ಮಾಡ್‌ವಯಿಂಗ, ಅಪ್ಪನಾನ ದೇವನ ಆತ್ಮತ್‍ಲು ಸತ್ಯತ್‍ಲು ಆರಾದನೆ ಮಾಡ್‌ವ ಕಾಲ ಬಪ್ಪ, ಅದ್ ಇಕ್ಕಲೆ ಬಂದ್‌ರ್‌ತ್. ಅನ್ನನೆ ಆರಾದನೆ ಮಾಡ್‌ವಯಿಂಗಳ ದೇವ ತ್‍ೕಡಿಯಂಡುಂಡ್. 24ದೇವ ಆತ್ಮವಾಯಿತುಂಡ್, ಅಂವೊನ ಆರಾದನೆ ಮಾಡ್‌ವಯಿಂಗ ಅಂವೊನ ಆತ್ಮತ್‍ಲು ಸತ್ಯತ್‍ಲು ಆರಾದನೆ ಮಾಡಂಡೂಂದ್ ಎಣ್ಣ್‌ಚಿ.
25ಪಿಂಞ ಆ ಪೊಣ್ಣಾಳ್: ಕ್ರಿಸ್ತ ಎಣ್ಣುವ ಮೆಸ್ಸಿಯ ಬಪ್ಪಾಂದ್ ನಾಕ್ ಗೊತ್ತುಂಡ್. ಅಂವೊ ಬಪ್ಪಕ, ನಂಗಕ್ ಎಲ್ಲಾನ ಪಡಿಪ್‍ಚಿಡುವಾಂದ್ ಎಣ್ಣ್‌ಚಿ.
26ಅವಕ್ ಯೇಸು: ನೀಡ ಕೂಡೆ ತಕ್ಕ್ ಪರ್ಂದಂಡುಳ್ಳ ನಾನೇ ಅಂವೋಂದ್ ಎಣ್ಣ್‌ಚಿ.
27ಆ ಸಮಯತ್‍ಲ್ ಯೇಸುರ ಶಿಷ್ಯಂಗ ಬಾತ್. ಯೇಸು ಒರ್ ಪೊಣ್ಣಾಳ್‍ರ ಕೂಡೆ ತಕ್ಕ್ ಪರ್‌ದಂಡ್ ಉಳ್ಳದ್‍ನ ಕಂಡಿತ್ ಆಶ್ಚರ್ಯ ಪಟ್ಟತ್. ಆಚೇಂಗಿಯು, ದಾರೂ ಅಂವೊಂಡ ಪಕ್ಕ, ನೀಕ್ ಎಂತ ಬೋಂಡೂಂದ್, ಎನ್ನಂಗ್ ಒರ್ ಪೊಣ್ಣಾಳ್‍ರ ಕೂಡೆ ತಕ್ಕ್ ಪರ್‌ದಂಡ್ ಉಳ್ಳಿಯಾಂದು ಕ್‍ೕಟಿತ್‌ಲ್ಲೆ.
28ಅಕ್ಕ ಆ ಪೊಣ್ಣಾಲ್, ಅವಡ ಕುಡಿಕೆನ ಅಲ್ಲೇ ಬುಟ್ಟಿತ್ ಊರ್‌ರ ಒಳ್‍ಕ್ ಓಡಿ ಪೋಯಿತ್, ಅಲ್ಲಿಯತ್‍ರ ಜನಳ ನೋಟಿತ್: 29ಬಾರಿ, ಇಲ್ಲಿಕತ್ತನೆ ನಾನ್ ಮಾಡ್‌ನದ್‍ನೆಲ್ಲಾ ಒಬ್ಬ ನಾಕ್ ಎಣ್ಣ್‌ಚಿ. ನಿಂಗೆಲ್ಲಾರು ಬಂದಿತ್ ನೋಟಿ. ಇಂವೊ ಕ್ರಿಸ್ತನಾಯೀತಿಕ್ಕುವೋಂದ್ ಎಣ್ಣ್‌ಚಿ. 30ಅಕ್ಕ ಉರ್‍ೕಂಜ ಜನ ಎಲ್ಲಾರು ಯೇಸುನ ನೋಟ್‍ವಕ್ ಬಾತ್.
31ಇದ್ಂಡ ಮದ್ಯತ್‍ಲ್, ಅಂವೊಂಡ ಶಿಷ್ಯಂಗ: ಉಪಾದ್ಯನೇ, ನೀನ್ ಉಣ್ಣ್‌ಂದ್ ಅಂವೊನ ಬೋಡಿಯಂಡತ್.
32ಆಚೇಂಗಿ ಯೇಸು: ನಾನ್ ತಿಂಬಕ್, ನಿಂಗಕ್ ಗೊತ್ತಿಲ್ಲತ ಆಹಾರ ನಾಡ ಪಕ್ಕ ಉಂಡ್‍ೕಂದ್ ಎಣ್ಣ್‌ಚಿ.
33ಅಕ್ಕ, ಅಂವೊಂಡ ಶಿಷ್ಯಂಗ ಒಬ್ಬನ ಒಬ್ಬ ನೋಟಿತ್: ಇಂವೊಂಗ್ ದಾರೇಂಗಿ ಉಂಬಕ್ ಕೂಳ್ ಎಡ್‌ತ ಬಂತ್ ಕೊಡ್‌ತತಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.
34ಅಯಿಂಗಕ್ ಯೇಸು: ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡಿತ್, ಅಂವೊಂಡ ಕ್ರಿಯೇನ ನೆರೆವೇರಿಚಿಡುವದೇ ನಾಡ ಆಹಾರಾಂದ್ ಎಣ್ಣ್‌ಚಿ. 35ಕೊಯ್ಯುವ ಸಮಯ ಇಂಞು ನಾಲ್ ತಿಂಗತ್‌ಲ್ ಬಪ್ಪಾಂದ್ ನಿಂಗ ಎಣ್ಣುವಿರಲ್ಲ? ಆಚೇಂಗಿ ಇಕ್ಕಲೆ ಬೇಲ್‌ಲ್ ಬೊಳೆ ಕೊಯ್ಯುವಕ್ ತಯಾರಾಯಿತುಂಡ್‍ೕಂದ್ ಉಳ್ಳಾನ ಚಾಯಿತೆ ನೋಟೀಂದ್ ನಾನ್ ನಿಂಗಕ್ ಎಣ್ಣ್‌ವಿ. 36ಕೊಯ್ಯುವಂವೊ ಇಕ್ಕಲೆ ಅಂವೊಂಡ ಕೂಲಿನ ಎಡ್‍ತಂಡ್ ನಿತ್ಯ ಜೀವಕಾಯಿತ್ ಬೊಳೆನ ಇಕ್ಕಲೆ ಕೂಟ್‌ವ; ಅನ್ನನೆ ಕುರು ಬಿತ್ತ್‌ವಂವೊನು ಬೊಳೆನ ಕೊಯ್ಯುವಂವೊನು ಒಂದಾಯಿತ್ ಕುಶಿ ಪಡುವ. 37ಒಬ್ಬ ಕುರು ಬಿತ್ತುವ, ಇಂಞೊಬ್ಬ ಬೊಳೆನ ಕೊಯ್ಯುವಾಂದ್ ಉಳ್ಳದ್ ಸತ್ಯವಾನ ಸಂಗತಿ. 38ನಿಂಗ ಕಷ್ಟಪಟ್ಟಿತ್ ಕೆಲಸ ಮಾಡತೆ, ಬೊಳೆನ ಕೊಯ್ಯುವಕ್ ನಾನ್ ನಿಂಗಳ ಅಯಿಚಿಯೆ, ಬೋರೆಯಿಂಗ ಕೆಲಸ ಮಾಡ್‍ಚಿ, ಅಯಿಂಗಡ ಕೆಲಸತ್‌ರ ಫಲ ನಿಂಗಕ್ ಕ್‍ಟ್ಟ್‌ಚಿ.
39ನಾನ್ ಇಲ್ಲಿಕತ್ತನೆ ಮಾಡ್‌ನದ್‍ನೆಲ್ಲಾ ಅಂವೊ ಎಣ್ಣ್‌ಚೀಂದ್ ಆ ಪೊಣ್ಣಾಳ್ ಎಣ್ಣ್‌ನಗುಂಡ್ ಸಮಾರ್ಯ ಪಟ್ಟಣತ್‍ರ ದುಂಬ ಜನ ಯೇಸುನ ನಂಬ್‍ಚಿ. 40ಆನಗುಂಡ್, ಸಮಾರ್ಯ ಪಟ್ಟಣತ್‍ರ ಜನ, ಯೇಸುರ ಪಕ್ಕ ಬಂದಿತ್, ನಂಗಡ ಕೂಡೆ ಇಕ್ಕಂಡೂಂದ್ ಬೋಡಿಯಂಡತ್, ಅಕ್ಕ ಯೇಸು ಅಲ್ಲಿ ದಂಡ್ ದಿನ ಒಳಿಂಜತ್. 41ಅಲ್ಲಿ ಅಂವೊ ಇಪ್ಪಕ, ಅಂವೊ ಮಾಡ್‍ನ ಬೋದನೆರ ಮೂಲಕ ಇಂಞು ದುಂಬ ಜನ ನಂಬಿಕೆ ಬೆಚ್ಚತ್. 42ಅಯಿಂಗ ಆ ಪೊಣ್ಣಾಳ್‌ಕ್, ಇಕ್ಕ ನಂಗ ನೀಡ ತಕ್ಕ್‌ನ ಕ್‍ೕಟಿತ್ ಇಂವೊನ ನಂಬಿತ್‌ಲ್ಲೆ, ನಂಗಳೇ ಅಂವೊಂಡ ತಕ್ಕ್‌ನ ಕ್‍ೕಟಿತ್, ನೇರಾಯಿತು ಇಂವೊನೇ ಈ ಲೋಕತ್‍ನ ಕಾಪಾಡ್‌ವ ರಕ್ಷಕನಾನ ಕ್ರಿಸ್ತಾಂದ್ ಗೊತ್ತಾನಗುಂಡ್ ನಂಬುವಾಂದ್ ಎಣ್ಣ್‌ಚಿ.
43ದಂಡ್ ದಿವಸ ಕಯಿಂಜ ಪಿಂಞ ಯೇಸು ಅಲ್ಲಿಂಜ ಗಲಿಲಾಯಕ್ ಪೋಚಿ. 44ಏದ್ ಪ್ರವಾದಿಕು, ಅಂವೊಂಡ ಸ್ವಂತ ಊರ್‌ಲ್ ಮರ್ಯಾದೆ ಕ್‍ಟ್ಟ್‌ಲೇಂದ್ ಯೇಸು ಮಿಂಞಲೇ ಎಣ್ಣಿತ್ಂಜತ್. 45ಅಂವೊ ಗಲಿಲಾಯಕ್ ಬಪ್ಪಕ, ಯೆರೂಸಲೇಮ್ ನಮ್ಮೆಲ್ ಅಂವೊ ಮಾಡ್‍ನ ಎಲ್ಲಾ ಕಾರ್ಯತ್‍ನ ನೋಟಿತ್ಂಜ, ಗಲಿಲಾಯತ್‍ರ ಜನ ಅಂವೊನ ಚಾಯಿತೆ ಸ್ವೀಕಾರ ಮಾಡ್‍ಚಿ. ಅಯಿಂಗಳು ನಮ್ಮೆಕ್ ಪೋಯಿತ್ಂಜತ್.
46ಪಿಂಞ ಯೇಸು ನೀರ್‌ನ ದ್ರಾಕ್ಷಿ ರಸವಾಯಿತ್ ಬದ್‍ಲ್ ಮಾಡ್‍ನ ಗಲಿಲಾಯತ್‍ಲ್ ಉಳ್ಳ ಕಾನಾ ಊರ್‌ಕ್ ಪುನಃ ಬಾತ್. ಅಕ್ಕ ಕಪೆರ್ನೌಮ್ ಪಟ್ಟಣತ್‍ಲ್ ಉಳ್ಳ ರಾಜಂಡ ಒರ್ ಬಲ್ಯ ಅದಿಕಾರಿಯಡ ಮೋಂವೊ ಕಾಯಿಲೆಲ್ ಇಂಜತ್. 47ಯೇಸು ಯೂದಾಯ ಪ್ರಾಂತ್ಯತ್ಂಜ ಗಲಿಲಾಯಕ್ ಬಾತ್‍ೕಂದ್ ಕ್‍ೕಟಿತ್, ಅಂವೊ, ಯೇಸುರ ಪಕ್ಕ ಬಂದಿತ್, ಚಾವನೆಕೆ ಉಳ್ಳ ನಾಡ ಮೋಂವೊನ ನೀನ್ ಬಂದಿತ್ ವಾಸಿ ಮಾಡಂಡೂಂದ್ ಕ್‍ೕಟಂಡತ್.
48ಅಕ್ಕ ಯೇಸು: ನಿಂಗ ಗುರ್‌ತ್ ಪಿಂಞ ಆಶ್ಚರ್ಯ ಕಾರ್ಯತ್‍ನ ಕಾಂಗತೆ ಪೋಚೇಂಗಿ ನಿಂಗ ದಾರೂ ನನ್ನ ನಂಬುಲೇಂದ್ ಎಣ್ಣ್‌ಚಿ.
49ಒಡೆಯನೇ, ನಾಡ ಕುಂಞಿ ಚಾವಕ್ ಮಿಂಞ ನಾಡ ಕೂಡೆ ಬಾಂದ್ ಆ ಅದಿಕಾರಿ ದುಂಬ ಬೋಡಿಯಂಡತ್.
50ಅದ್ಂಗ್ ಯೇಸು: ನೀನ್ ಪೋ, ನೀಡ ಮೋಂವೊ ಬದ್‌ಕ್‌ವಾಂದ್ ಎಣ್ಣ್‌ಚಿ. ಆ ಮನುಷ್ಯ ಯೇಸು ಎಣ್ಣ್‌ನದ್‍ನ ಅನ್ನನೆ ನಂಬಿತ್, ವಾಪಸ್ ಪೋಚಿ. 51ಅಂವೊ ಪೋಯಂಡ್ ಇಪ್ಪಕ,
ಅಂವೊಂಡ ಆಳ್‍ವ ಅಂವೊನ ಕಂಡಿತ್: ನೀಡ ಮೋಂವೊ ಬದ್‌ಕ್‍ಚೀಂದ್ ಎಣ್ಣ್‌ಚಿ. 52ಏದ್ ಸಮಯತ್‍ಲ್ ಕುಂಞಿ ಚಾಯಾಚೀಂದ್ ಅಯಿಂಗಳ ಕ್‍ೕಟತ್. ಅದ್ಂಗ್ ಅಯಿಂಗ: ನಿನ್ನಾಂದ್ ಒರ್ ಗಂಟೆಕ್ ಪನಿ ಬುಟ್ಟತ್‍ೕಂದ್ ಎಣ್ಣ್‌ಚಿ. 53ಅಕ್ಕ, ನೀಡ ಮೋಂವೊ ಚಾಯಾಪಾಂದ್ ಯೇಸು ಎಣ್ಣ್‌ನದ್ ಅದೇ ಸಮಯವಾಯಿತ್ಂಜತ್‍ೕಂದ್ ಗೊತ್ತಾಯಿತ್ ಅಂವೊನು ಪಿಂಞ ಅಂವೊಂಡ ಮನೆಕಾರಂಗಳು ಯೇಸುನ ನಂಬ್‍ಚಿ. 54ಯೂದಾಯತ್ಂಜ ಗಲಿಲಾಯಕ್ ಬಂದ ಪಿಂಞ ಇದ್ ಯೇಸು ಮಾಡ್‍ನ ದಂಡನೆ ಅದ್ಬುತ ಕಾರ್ಯವಾಯಿತ್ಂಜತ್.
Àwon tá yàn lọ́wọ́lọ́wọ́ báyìí:
ಯೋಹಾನ 4: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)
