ಅಪೊಸ್ತಲ 10
10
ಪೇತ್ರ ಪಿಂಞ ಕೊರ್ನೇಲ್ಯ
1ಇತಾಲ್ಯ ಪಟಾಲ ಎಣ್ಣುವ ಪಟಾಲತ್‌ಲ್ ನೂರ್ ಸಿಪಾಯಿಯಂಗಕ್ ಅದಿಪತಿಯಾಯಿತ್ಂಜ ಕೊರ್ನೇಲ್ಯ ಎಣ್ಣುವ ಪೆದ ಉಳ್ಳ ಒರ್ ಮನುಷ್ಯ ಕೈಸರೈ ಪಟ್ಟಣತ್‍ಲ್ ಇಂಜತ್. 2ಅಂವೊನು ಅಂವೊಂಡ ಮನೆಕಾರಳು ದೇವಡ ಬಕ್ತಿಲ್ ಪಿಂಞ ದೇವಕ್ ಬೊತ್ತಿತ್ ಬದ್‍ಕಿಯಂಡಿಂಜತ್. ಅಂವೊ ಗರೀಬಂಗಕ್ ದುಂಬ ದಾನ ಮಾಡ್‍ವಂವೊನಾಯಿತು ಎಕ್ಕಾಲು ಪ್ರಾರ್ಥನೆ ಮಾಡ್‍ವಂವೊನಾಯಿತು ಇಂಜತ್. 3ಒರ್ ದಿವಸ ಮಜ್ಜಣ, ಸುಮಾರ್ ಮೂಂದ್ ಗಂಟೆ ಸಮಯತ್‍ಲ್ ಅಂವೊ ಒರ್ ದರ್ಶನ ಕಂಡತ್. ದರ್ಶನತ್‍ಲ್ ಒರ್ ದೇವದೂತ ತಾಂಡ ಪಕ್ಕ ಬಂತ್: ಕೊರ್ನೇಲ್ಯನೇಂದ್ ಕಾಕ್‍ವಾನ ಕಂಡತ್.
4ಅಂವೊ ಆ ದೂತಂಡ ಮೂಡ್‍ನ ಪೋಡಿಲ್ ನೋಟಿತ್: ಎಂತಾ ಸ್ವಾಮೀಂದ್ ಕ್‍ೕಟತ್.
ಅದ್ಂಗ್ ದೇವದೂತ: ನೀಡ ಪ್ರಾರ್ಥನೆಲ್ ಪಿಂಞ ದಾನ ದರ್ಮತ್‍ಲ್ ದೇವ ಕುಶಿ ಪಟ್ಟಿತುಂಡ್. ನೀನ್ ಅಯಿಂಗಕ್ ಮಾಡ್‍ನಾನೆಲ್ಲ ದೇವ, ಅಂವೊಂಗ್ ಮಾಡ್‍ನ ಕಾಣಿಕೆರನೆಕೆ ಸ್ವೀಕಾರ ಮಾಡಿತುಂಡ್. 5ಇಕ್ಕ ನೀನ್ ಜನಳ ಯೊಪ್ಪ ಪಟ್ಟಣಕ್ ಅಯಿಚಿತ್ ಪೇತ್ರ ಎಣ್ಣುವ ಸೀಮೋನನ ಕಾಕ್‍ಚಿಡ್. 6ಅಂವೊ ಚರ್ಮಕಾರನಾನ ಸೀಮೋನಂಡ ಕೂಡೆ ಉಂಡ್; ಆ ಸೀಮೋನಂಡ ಮನೆ ಸಮುದ್ರರತ್‍ರ ಪಕ್ಕತ್‍ಲ್ ಉಂಡ್‍ೕಂದ್ ಎಣ್ಣ್‌ಚಿ.
7ಕೊರ್ನೇಲ್ಯ ತಾಂಡಕೂಡೆ ತಕ್ಕ್ ಪರ್ಂದ ದೇವದೂತ ಪೋನ ಪಿಂಞ ತಾಂಡ ಮನೆಲ್ ಕೆಲಸ ಮಾಡ್‌ವ ದಂಡ್ ಆಳ್‍ವಳ ಪಿಂಞ ತಾಂಡ ಪಕ್ಕ ಸೇವೆ ಮಾಡ್‌ವ ದೇವಡ ಬಕ್ತಿಯುಳ್ಳ ಒರ್ ಸಿಪಾಯಿನ ಕಾಕಿತ್, 8ಅಯಿಂಗಕ್ ಎಲ್ಲಾ ವಿಷಯತ್‍ನ ವಿವರಿಚಿಟ್ಟಿತ್, ಅಯಿಂಗಳ ಯೊಪ್ಪ ಪಟ್ಟಣಕ್ ಅಯಿಚತ್.
9ಪಿತ್ಯಾಂದ್ ಸುಮಾರ್ ಮಜ್ಜಣ ನೇರತ್ ಅಯಿಂಗ ಪ್ರಯಾಣ ಮಾಡಿತ್ ಆ ಊರ್‌ರ ಪಕ್ಕ ಬಪ್ಪಕ, ಪೇತ್ರ ಪ್ರಾರ್ಥನೆ ಮಾಡ್‌ವಕಾಯಿತ್ ಮನೆರ ಕೊಡಿಕ್ ಪೋಚಿ. 10ಪೇತ್ರಂಗ್ ದುಂಬ ಕೆಲ ಪಯಿಚತ್. ಅಯಿಂಗ ಉಂಬಕ್ ತಯಾರ್ ಮಾಡಿಯಂಡಿಪ್ಪ ಸಮಯತ್‍ಲ್, ಅಂವೊ ಒರ್ ದರ್ಶನ ಕಂಡತ್. 11ಆ ದರ್ಶನತ್‍ಲ್, ಬಾನ ತೊರ್‌ಂದದ್‍ನ ಪಿಂಞ ಒರ್ ಬಲ್ಯ ಕಂಬಳಿರನೆಕೆ ಒರ್ ಬಲ್ಯ ಬಟ್ಟೇನ ನಾಲ್ ಮೂಲೆಲ್ ಕೆಟ್ಟಿತ್ ಬೂಮಿರ ಮೇಲೆ ಇಳಿಯುವನಕೆ ಕಂಡತ್. 12ಆ ಕಂಬಳಿಲ್ ನಾಲ್ ಕಾಲ್ ಉಳ್ಳ ಎಲ್ಲಾ ತರತ್‍ರ ಪ್ರಾಣಿಯ, ಬೂಮಿರ ಮೇಲೆ ಪರ್‌ಪ ಪ್ರಾಣಿಯ, ಬಾನತ್‍ಲ್ ಪಾರುವ ಪಕ್ಷಿಯಳು ಇಂಜತ್. 13ಅಕ್ಕ ಪೇತ್ರನೇ, ಏಳ್, ಕೊಂದಿತ್ ತಿನ್ನ್ಂದ್ ಒರ್ ವಾಣಿ ಎಣ್ಣುವಾನ ಕ್‍ೕಟತ್.
14ಅದ್ಂಗ್ ಪೇತ್ರ: ಬೋಂಡವೇ ಬೋಂಡ ಸ್ವಾಮೀ, ಅಸಹ್ಯವಾನದ್‍ನ ಪಿಂಞ ಅಶುದ್ದವಾನದ್‍ನ ನಾನ್ ಒರ್ ಕುರಿ ಸಹ ತಿಂದಂವೊನಲ್ಲಾಂದ್ ಎಣ್ಣ್‌ಚಿ.
15ಅದ್ಂಗ್: ದೇವ ಶುದ್ದಮಾಡ್‍ನಾನ ನೀನ್ ಅಸಹ್ಯಾಂದ್ ಗೇನ ಮಾಡ್‌ವಕ್ಕಾಗಾಂದ್ ದಂಡನೆ ಕುರಿ ಅಂವೊಂಗ್ ಆ ವಾಣಿ ಕ್‍ೕಟತ್. 16ಇನ್ನನೆ ಮೂಂದ್ ಕುರಿ ಆಚಿ. ಒಮ್ಮಕೆ ಆ ಕಂಬಳಿ ಬಾನತ್‍ರ ಒಳ್‍ಕ್ ಕೂಡಿಯಂಡತ್.
17ಪೇತ್ರ ತಾನ್ ಕಂಡ ದರ್ಶನತ್‍ರ ಅರ್ಥ ಎಂತಾಯಿತಿಕ್ಕೂಂದ್ ಗೇನ ಮಾಡಿಯಂಡಿಪ್ಪಕಲೆ, ಕೊರ್ನೇಲ್ಯ ಅಯಿಚ ಆ ಮನುಷ್ಯಂಗ ಸೀಮೋನಂಡ ಮನೆ ಎಲ್ಲೀಂದ್ ಕ್‍ೕಟಂಡ್, ಆ ಮನೆರ ಪಡಿರ ಮಿಂಞ ಬಂತ್ ನಿಂದಿತ್ಂಜತ್. 18ಪೇತ್ರ ಎಣ್ಣ್‌ವ ಸೀಮೋನ ಇಲ್ಲಿ ಉಂಡಾಂದ್ ಜೋರಾಯಿತ್ ಕ್‍ೕಟತ್.
19ಪೇತ್ರ ಆ ದರ್ಶನತ್‍ರ ವಿಷಯತ್‍ನ ಗೇನ ಮಾಡಿಯಂಡ್ ಇಪ್ಪಕ ಪವಿತ್ರಾತ್ಮ ಅಂವೊಂಗ್: ಈ ಮೂಂದ್ ಮನುಷ್ಯಂಗ ನಿನ್ನ ತ್‍ೕಡಿಯಂಡುಂಡ್. 20ನೀನ್ ಎದ್ದಿತ್, ಇಳಿಂಜಿತ್, ಅನುಮಾನ ಇಲ್ಲತೆ ಅಯಿಂಗಡ ಕೂಡೆ ಪೋ. ನಾನೇ ಅಯಿಂಗಳ ಅಯಿಚಿಯೇಂದ್ ಎಣ್ಣ್‌ಚಿ.
21ಪೇತ್ರ ಕ್‍ೕದಕ್ ಇಳಿಂಜಿ ಬಂತ್, ಕೊರ್ನೇಲ್ಯ ಅಯಿಚ ಆ ಮನುಷ್ಯಂಗಡ ಪಕ್ಕ ಪೋಯಿತ್: ಇದಾ, ನಿಂಗ ತ್‍ೕಡಿಯಂಡುಳ್ಳ ಮನುಷ್ಯ ನಾನೇ; ನಿಂಗ ಬಂದ ಕಾರಣ ಎಂತ್‍ೕಂದ್ ಕ್‍ೕಟತ್.
22ಅದ್ಂಗ್ ಅಯಿಂಗ: ಕೊರ್ನೇಲ್ಯ ಎಣ್ಣಿತ್ ನೂರ್ ಸಿಪಾಯಿಯಂಗಕ್ ಅದಿಪತಿಯಾನ ಒಬ್ಬ ಉಂಡ್. ಅಂವೊ ನೀತಿವಂತವೊನು ದೇವಡ ಬಕ್ತಿ ಉಳ್ಳಂವೊನು ಯೆಹೂದ್ಯ ಜನಾಂಗಡಡೆಲ್ ನಲ್ಲರಿಕೆ ಪಡ್ಂದಂವೊನು ಆಯಿತುಂಡ್. ನಿನ್ನ ಅಂವೊಂಡ ಮನೆಕ್ ಕಾಕಿತ್, ನೀನ್ ಎಣ್ಣುವ ಬೋದನೆನ ಅಂವೊ ಕ್‍ೕಕಂಡೂಂದ್ ಒರ್ ದೇವದೂತಡಿಂಜ ಅಂವೊ ಅಪ್ಪಣೆ ಪಡ್ಂದತ್. 23ಪೇತ್ರ ಇದ್‍ನ ಕ್‍ೕಟಿತ್ ಅಯಿಂಗಳ ಒಳ್‍ಕ್ ಕಾಕಿತ್ ಊಟೋಪಚಾರ ಮಾಡಿತ್, ಪಿತ್ಯಾಂದ್ ಅಯಿಂಗಡ ಕೂಡೆ ಪೊರಟತ್; ಯೊಪ್ಪ ಪಟ್ಟಣತ್‍ಲ್ ಇಂಜ ಚೆನ್ನ ಯೇಸುನ ನಂಬ್‍ನ ಅಣ್ಣತಮ್ಮಣಂಗಳು ಅಂವೊಂಡ ಕೂಡೆ ಪೋಚಿ.
24ಪಿತ್ಯಾಂದ್ ಅಂವೊ ಕೈಸರೈ ಪಟ್ಟಣಕ್ ಎತ್ತ್‌ಚಿ. ಕೊರ್ನೇಲ್ಯ ತಾಂಡ ಬೆಂದ್‍ವಳ ಪಿಂಞ ತಾಂಡ ಪ್ರಾಣ ಸ್ನೇಹಿತಂಗಳ ಕಾಕಿತ್ ಅಯಿಂಗಕಾಯಿತ್ ಪಾರಕಾಂತಂಡಿಂಜತ್. 25ಪೇತ್ರ ಒಳ್‍ಕ್ ಬಪ್ಪಕಲೆ, ಕೊರ್ನೇಲ್ಯ ಅಂವೊಂಡ ಮಿಂಞಕ್ ಪೋಯಿತ್ ಅಂವೊಂಡ ಕಾಲ್‌ಕ್ ಬುದ್ದಿತ್, ಅಂವೊನ ಕೊಂಡಾಡ್‍ಚಿ.
26ಆಚೇಂಗಿ ಪೇತ್ರ: ಏಳ್, ನಾನ್ ಸಹ ಒರ್ ಮನುಷ್ಯಾಂದ್ ಎಣ್ಣ್‌ಚಿ. 27ಅಂವೊಂಡ ಕೂಡೆ ತಕ್ಕ್ ಪರ್‍ದಂಡೇ ಒಳ್‍ಕ್ ಪೋಪಕ, ಅಲ್ಲಿ ದುಂಬ ಜನ ಕೂಡಿ ಬಂದಿತುಳ್ಳದ್‍ನ ಕಂಡತ್.
28ಪೇತ್ರ ಅಯಿಂಗಕ್: ಯೆಹೂದ್ಯರಲ್ಲತ ಬೋರೆ ಜನಡ ಕೂಡೆ ಐಕ್ಯತ್‍ಲ್ ಇಪ್ಪದ್‍ನ, ಯೆಹೂದ್ಯಂಗಡ ನ್ಯಾಯಪ್ರಮಾಣ ಅನುಮತಿ ಕೊಡ್‍ಪ್‍ಲೇಂದ್ ನಿಂಗಕ್ ಗೊತ್ತುಂಡ್. ಆಚೇಂಗಿ, ಏದ್ ಒರ್ ಮನುಷ್ಯನು, ಅಂವೊ ಅಶುದ್ದವಾನಂವೋಂದು, ಅಸಹ್ಯವಾನಂವೋಂದು ಎಣ್ಣ್‌ವಕ್ಕಾಗಾಂದ್ ದೇವ ನಾಕ್ ಕಾಟಿಕೊಡ್‍ತಿತುಂಡ್‍ೕಂದ್ ಎಣ್ಣ್‌ಚಿ. 29ಆನಗುಂಡ್ ನಿಂಗ ನನ್ನ ಕಾಕಿತ್ ಅಯಿಪಕ ನಾನ್ ಒರ್ ತಕ್ಕು ಪರಿಯತೆ ಬಂದಿಯೆ. ಇಕ್ಕ ನಿಂಗ ನನ್ನ ಎನ್ನಂಗಾಯಿತ್ ಕಾಕಿರಾಂದ್ ಕ್‍ೕಪೀಂದ್ ಎಣ್ಣ್‌ಚಿ.
30ಅದ್ಂಗ್ ಕೊರ್ನೇಲ್ಯ: ನಾನ್ ನಾಲ್ ದಿವಸಕ್ ಬಯ್ಯ ಈ ಸಮಯತ್‍ಲ್ ಸುಮಾರ್ ಮೂಂದ್ ಗಂಟೆಕ್ ನಾಡ ಮನೆಲ್ ಪ್ರಾರ್ಥನೆ ಮಾಡಿಯಂಡಿಂಜ್. ಮಿನ್ನುವಂತ ವಸ್ತ್ರ ಇಟ್ಟಿತ್ಂಜ ಒರ್ ಮನುಷ್ಯ ನಾಡ ಮಿಂಞತ್ ನಿಂದಂಡ್: 31ಕೊರ್ನೇಲ್ಯನೇ, ನೀಡ ಪ್ರಾರ್ಥನೆ ಪಿಂಞ ಗರೀಬಂಗಕ್ ಮಾಡ್‍ನ ದಾನ ದರ್ಮತ್‍ನ ದೇವ ಕಂಡಿತುಂಡ್. 32ಇಕ್ಕ ನೀನ್ ಜನಳ ಯೊಪ್ಪ ಪಟ್ಟಣಕ್ ಅಯಿಚಿತ್ ಪೇತ್ರ ಎಣ್ಣುವ ಸೀಮೋನನ ಕಾಕ್‍ಚಿಡ್. ಅಂವೊ ಸಮುದ್ರತ್‍ರ ಪಕ್ಕತ್‍ಲ್ ಚರ್ಮಕಾರನಾನ ಸೀಮೋನಂಡ ಮನೆಲ್ ಉಂಡ್; ಅಂವೊ ಬಂತ್ ನೀಡ ಕೂಡೆ ತಕ್ಕ್ ಪರಿವಾಂದ್ ಎಣ್ಣ್‌ಚಿ. 33ಅನ್ನನೆ ತಡೆಮಾಡತೆ ನಾನ್ ನೀಡ ಪಕ್ಕ ಅಯಿಚಿಯೆ. ನೀನ್ ಬಪ್ಪಕ್ ಮನಸ್ಸ್ ಮಾಡ್‍ನದ್ ನಲ್ಲದಾಚಿ. ಇನ್ನನೆ ಇಪ್ಪಕ, ನಂಗಕ್ ಎಂತ ಎಣ್ಣಂಡೂಂದ್ ಒಡೆಯ ನೀಕ್ ಅಪ್ಪಣೆ ತಂದತೋ ಅದ್‍ನೆಲ್ಲಾನ ಕ್‍ೕಪಕಾಯಿತ್ ಇಲ್ಲಿ ದೇವಡ ಪ್ರಸನ್ನತ್‌ಲ್ ನಂಗೆಲ್ಲಾ ಕೂಡಿತುಂಡ್‍ೕಂದ್ ಎಣ್ಣ್‌ಚಿ.
ಯೆಹೂದ್ಯರಲ್ಲತ ಬೋರೆ ಜಾತಿಯ ಜನ ನಲ್ಲ ಸುದ್ದಿನ ಕ್‍ೕಪದ್
34ಅಕ್ಕ ಪೇತ್ರ ತಕ್ಕ್ ಪರಿಯುವಕ್ ಸುರು ಮಾಡಿತ್, ದೇವ ಪಕ್ಷಪಾತ ಮಾಡುಲೇಂದ್ ಇಕ್ಕ ನಾಕ್ ಅರ್ಥ ಆಚಿ. 35ಅಯಿಂಗ ಏದ್ ದೇಶತ್‍ರ ಜನವಾಯಿತ್ಂಜತೇಂಗಿಯು ಆಡ್, ಆಚೇಂಗಿ ಅಯಿಂಗ ದೇವಕ್ ಬೊತ್ತಿತ್, ನೀತಿರ ಬಟ್ಟೇಲ್ ನಡ್ಂದತೇಂಗಿ ಅಂವೊ ಸ್ವೀಕಾರ ಮಾಡ್‌ವ. 36ಎಲ್ಲಾ ಜನಕು ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ದೇವಡ ಕೂಡೆ ಸಮಾದಾನ ಉಂಡ್‍ೕಂದ್ ಉಳ್ಳ ಸುದ್ದಿನ ಇಸ್ರಾಯೇಲ್ ಜನಕ್ ದೇವ ಅರಿಚಿಟ್ಟ ನಲ್ಲ ಸುದ್ದಿ ನಿಂಗಕ್ ಗೊತ್ತುಂಡ್. 37ದೀಕ್ಷಾಸ್ನಾನತ್‍ರ ವಿಷಯತ್‍ನ ಯೋಹಾನ ಬೋದನೆ ಮಾಡ್‌ವಕ್ ಸುರ್ ಮಾಡ್‍ನ ಪಿಂಞ ಗಲಿಲಾಯತ್ಂಜ ಸುರು ಮಾಡಿತ್ ಯೂದಾಯತ್‍ರ ಪ್ರಾಂತ್ಯತ್‍ಲ್ ಎಲ್ಲಾ ಎಂತ ಆಚೀಂದ್ ನಿಂಗಕ್ ಗೊತ್ತುಂಡ್. 38ದೇವ ನಜರೇತ್‍ರ ಯೇಸುನ ಪವಿತ್ರತ್ಮಾತ್ಂಜಲು ಶಕ್ತಿಯಿಂಜಲು ಅಬಿಷೇಕ ಮಾಡ್‍ಚಿ. ದೇವ ಅಂವೊಂಡ ಕೂಡೆ ಇಂಜಗುಂಡ್ ಅಂವೊ ನಲ್ಲದ್ ಮಾಡಿಯಂಡ್ ಸೈತಾನಂಡ ಶಕ್ತಿಲ್ ಚಿಕ್ಕಿತ್ ಪೋಯಿತ್ಂಜ ಎಲ್ಲಾರ್‍ನೂ ವಾಸಿಮಾಡಿಯಂಡ್ ಎಲ್ಲಾ ಜಾಗಕು ಪೋಯಂಡಿಂಜತ್.
39ಯೆಹೂದ್ಯಂಗಡ ದೇಶತ್‍ಲು ಯೆರೂಸಲೇಮ್‍ಲು ಮಾಡ್‍ನ ಎಲ್ಲಾ ಕಾರ್ಯಕ್ ಅಪೊಸ್ತಲಂಗಳಾನ ನಂಗ ಸಾಕ್ಷಿಯಾಯಿತುಂಡ್. ಪಿಂಞ ಅಂವೊನ ಶಿಲುಬೇಲ್ ಇಟ್ಟಿತ್ ತೂಕಿತ್ ಕೊಂದತ್. 40ಆಚೇಂಗಿ ದೇವ ಅಂವೊನ ಮೂಂದನೆ ದಿವಸತ್‍ಲ್ ಜೀವವಾಯಿತ್ ಎಪ್ಪಿತ್ ಅಂವೊನ ಕಾಂಬನೆಕೆ ಮಾಡ್‍ಚಿ 41ಆಚೇಂಗಿ, ಎಲ್ಲಾರು ಅಂವೊನ ಕಾಂಬನೆಕೆ ಮಾಡತೆ, ಯೇಸು ಚತ್ತಯಿಂಗ ಮದ್ಯತ್ಂಜ ಜೀವವಾಯಿತ್ ಬಂದ ಪಿಂಞ, ಅಂವೊಂಡ ಕೂಡೆ ಉಂಡಯಿಂಗಳು, ಕುಡಿಚಯಿಂಗಳು ಪಿಂಞ ಮಿಂಞಲೇ ಆಯ್ಕೆ ಮಾಡಿತ್ಂಜ ಸಾಕ್ಷಿಯಂಗಳಾನ ನಂಗಕ್ ಪ್ರತ್ಯಕ್ಷ ಆಯಿತ್ ನಂಗ ಕಾಂಬನೆಕೆ ಮಾಡ್‍ಚಿ. 42ಅಂವೊನೇ ಜೀವವಾಯಿತುಳ್ಳಯಿಂಗಕು, ಚತ್ತಯಿಂಗಕು ದೇವ ನೇಮಿಚಿಟ್ಟ ನ್ಯಾಯಾದಿಪತಿಯಾಯಿತುಂಡ್‍ೕಂದ್ ಜನಕ್ ಪ್ರಸಂಗ ಮಾಡ್‌ವಕು, ಸಾಕ್ಷಿಯಾಯಿತ್ ಎಣ್ಣ್‌ವಕು, ಅಂವೊ ನಂಗಕ್ ಆಜ್ಞೆ ಕೊಡ್‌ತಿತುಂಡ್. 43ಅಂವೊಂಡ ಮೇಲೆ ನಂಬಿಕೆ ಇಡ್‍ವಯಿಂಗಕ್ ಅಂವೊಂಡ ಪೆದತ್‍ರ ಶಕ್ತಿಯಿಂಜ ಅಯಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ವಾಂದ್ ಎಲ್ಲಾ ಪ್ರವಾದಿಯಂಗಳು ಅಂವೊಂಡ ವಿಷಯತ್‍ನೇ ಎಣ್ಣ್‌ಚಿ.
ಯೆಹೂದ್ಯರಲ್ಲತ ಬೋರೆ ಜಾತಿಯಂಗಕ್ ಪವಿತ್ರಾತ್ಮ ಕ್‍ಟ್ಟ್‌ನದ್
44ಪೇತ್ರ ಇದ್‍ನ ಎಣ್ಣಿಯಂಡಿಪ್ಪಕಲೇ, ಅಂವೊಂಡ ಬೋದನೆ ಕ್‍ೕಟಂಡಿಂಜ ಎಲ್ಲಾಡ ಮೇಲೆ ಪವಿತ್ರಾತ್ಮ ಇಳಿಂಜಿ ಬಾತ್. 45ಯೊಪ್ಪ ಪಟ್ಟಣತ್ಂಜ ಪೇತ್ರಂಡ ಕೂಡೆ ಬಂದಿತ್ಂಜ ಸುನ್ನತಿ ಮಾಡ್‍ನ ಯೇಸುನ ನಂಬ್‍ನ ಯೆಹೂದ್ಯಂಗ, ಯೆಹೂದ್ಯಂಗ ಅಲ್ಲತಯಿಂಗಡ ಮೇಲೆ ಸಹ ದೇವ, ಪವಿತ್ರಾತ್ಮಂಡ ವರತ್‍ನ ಕೊಡ್‍ತಿತ್ತುಂಡ್‍ೕಂದ್ ಕಂಡಿತ್ ಆಶ್ಚರ್ಯ ಪಟ್ಟತ್. 46ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಬೋರೆ ಬೋರೆ ತಕ್ಕ್‌ಲ್ ಪರ್ಂದಂಡ್ ದೇವನ ಕೊಂಡಾಡುವಾನ ಕ್‍ೕಟತ್.
ಅಕ್ಕ ಪೇತ್ರ: 47ಈ ಜನಳು ನಂಗಡನೆಕೆ ಪವಿತ್ರಾತ್ಮಂಡ ವರತ್‍ನ ಪಡ್ಂದಿತುಂಡ್. ಅನ್ನನೆ ಇಪ್ಪಕ, ಅಯಿಂಗ ನೀರ್‌ಲ್ ದೀಕ್ಷಾಸ್ನಾನ ಎಡ್‍ಪಕ್ ದಾರ್‌ಕ್ ತಡೆ ಮಾಡ್‌ವಕ್ ಕಯ್ಯೂಂದ್ ಎಣ್ಣಿತ್ 48ಅಯಿಂಗಕ್ ಯೇಸು ಕ್ರಿಸ್ತಂಡ ಪೆದತ್‍ಲ್ ದೀಕ್ಷಾಸ್ನಾನ ಕೊಡ್‍ಪಕ್ ಆಜ್ಞೆ ಕೊಡ್‍ತತ್. ಅಕ್ಕ ಚೆನ್ನ ದಿವಸ ಅಂವೊ ಅಲ್ಲೇ ಇರಂಡೂಂದ್ ಅಯಿಂಗ ಬೋಡಿಯಂಡತ್.
Àwon tá yàn lọ́wọ́lọ́wọ́ báyìí:
ಅಪೊಸ್ತಲ 10: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)