Ruth 2
2
Nakata
Ruth havaktuk Boasim Nautiviani
1-3Tapfumani Ruthium Naomi ukautiyaa, “Aavungauyyavunga nautivingnun katitekuvlunga mukpauyakhanik ilakuinik katahimayunik katitegunin. Havakuyauniagunakhiyungalunin kimunlikiak.” Naomi angengman Ruth taavungauyuk katitivakhuni ilakuinik havaktit tunuangni. Talva tamna nautivik Ruthium havagivaga nanminigiyauyuk Boasmin. Boas ilaa inungni ataniuyuk manigiekhuni ilauhimayuglu Naomium uigiyagaluangata ilagingnun Elimelekunun.
4Kinguagun Boas kaiyuk Bethlehemin havaktit haluhugit ukangman, “Atangum ilagiluhi”, kiuyaat “Atangum naguguktitpayyavaatinlu.”
5Boasim talva atanguyauyuk apegiyaa, “Angnak tamayya kinauva?”
6Tapfuma kiuyaa, “Hamaningmiutaungitugaluak Moabmiun nunaanin tikitpagami malikhugu Naomi. 7Apegivagaminga katitikuyaukuvlunga mukpauyakhanik maliglugit havaktit, uvlugaaluk havainakpaktuk, tayyanuak nutkaktainakhuni unanguekhekkafukuvlunga.”
8Talva Boas Ruthmun ukaktuk, “Tuhaayyavangma uvanga. Katititailutin mukpauyakhanik aahini nautivimni kihimi, angnangni uvaniituni havakatauvaglutin. 9Tapkua malilengmatigik havaktit kipluitillugit nauthimayun pitkugapkit kivgatka pitailikunagit ilingnik. Imekigaiguvinlu imegin imektautainin imektuktauyunin.”
10Ruthium ukuvigiyaa aktukhugu nuna niakuminun, Boas apegivlugu, “Hug hugilekinga naguyumik hamanimiutaungitgaluakhunga?”
11Boas kiuyugaluak, “Uin tukukaatillugu hakian munagingnakpagangni naguyumik tuhaayunga. Ilihimagaluaktunga ilvin kimakpagapkit angayukatin nunallu naiyukuvlutin inungni allauyuni. 12Atangum akilekpaglutin naguyumik pivagavin. Ilaa akilektauyyavutin amigaitumik Atanekun Israelmiun Godingagun tamna kaiyyutigigangni munagiyauyumavlutin.”
13Talva Ruth kiuyuk, “Nagutpiaktutin uvamnun kivgaktitunilingitkaluaktunga ukagvigiyagaluangma naguyumik.”
14Negingnakhingman Boasim Ruth ukautiyaa, “Mukpauyaktugin mihuglugulu ukhungmik.” Ingitillugulu Ruth havaktini Baosim negitimani mukpauyakhanik utakhimayunik akiatukpaktuk nungungitagaluanga neki. 15-16Katitegilengmingman aahin Boasim havaktini pitkuyain Ruth havainakuvlugu mukpauyakhaini kilekhimayuni akungani tapkunangalu ungavaglugit ilangit katakuvlugit angnaum katititkuvlugit katahimayun.
17Ruthlu katitivaktuk taakhilektinagu kektukhugit mukpauyakhainak puktaukuvlugit. Taimaliungman punga tatahimayuk 25 paumik, 18tigumiakhugu angilgaktuk takupkaktitugu hakiani katitektaminik, tunivlugulu ilakuinik nekimi. 19Naomium Ruth apegiyaa, “Nani katitivakpin ukuninga tamainik uvlumi? Kia nautiviani havakpakpin? Godim naguguktiliuk inuk tapfuma ikayungmatin.”
Talva Ruthium Naomi uniutiyaa havaaminik Boasim nautiviani.
20Naomi ukaktuk. “Atangum Boas naguguktiliuk Atangum ukagiyaminik inungnun tukungayununlu puiguyuitpaktuk.” Ukangmiyuk, “Tapfuma angutim ilaguhegiyaatigut kanitumik aahin tamnaugami munagiyakhagiyaatigutauk.”
21Talva Ruth ukaktuk, “Hulitauk Boasim havakatauhimalekuyagaluanga havaktini tapkua havaguektinagit katitigvingnik tamainik.”
22Naomium Ruth ukautiyaa, Ilaa nagutkiyak angnani Boasim nautivianituni havakatauguvin aahini pitailiyaunakhaavutin. 23Talva Ruth havakatauvaktuk tapkunani katitivit nungutitauniagutainun tapfumanilu naiyugaaningnaktugaluak hakiamini.
Àwon tá yàn lọ́wọ́lọ́wọ́ báyìí:
Ruth 2: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society