Luke 24
24
NAKATA 24
Jesus makittuk
(Mt. 28:1-10; Mk. 16:1-8; Jn. 20:1-10)
1Sundaymilu kalugaktillugu aavungaktun iluvgaanun tipigiktumik havakhimayumik natkakhutik. 2Aahin uyagak akhaluakhimayuk iluvium ukuanin tautuktaat, 3iluanunlu itegamik timaa katkangngitagaluangat. 4Aahin tapfuminga ihumalengmata naluvlutik, ilaa angutik annugakhimayuk kakuktanik kingnagnaktumiklu nangekatigiyain. 5Tapkualu ekhitakpiangmata ukuvlutik angutik tapkununga ukallaktuk, “Hug kenigiaktukkihi inuyumik tukungayuni? 6Itkaumaluhi ukautimahi Galileemiitillugu, 7Inum engniga tuniyauyukhauman huinekiyunun, kikiaktuktauluni uvlugli pingahuangni makiniaktugaluak.” 8Tapkualu ukauhiit itkaktain 9utiugamiglu iluvgaanin tamainik uniutiyain 11n allalu. 10Tapkua Mary Magdalamiutak, Joannalu, Marylu, Jamesim angnanga, angnallu allat uniuyyiyun Apostlenun. 11Tapkuali angnat unipkautain ukpegingitagaluangit.
12Peterli nangekhuni iluvegmungaktuk. Talva ukuvluni kungniaktuk tautukhugit tukungayun annugain kihimi. Aahin aiyuk kuglukpiakhuni takuyaminik.
Jesus hagyaektuk Emmausim apkutaani
(Mk. 16:12-13)
13Tapfumanilu malguk angilgaktuk iglukagluangitumun Emmausmik taiyauyumun, tamna Jerusalemin 7mailguyuk. 14Pihuktillugik ukakatigiktuk tapkuninga pivaktumik. 15Aahin taimaliuktillugit ukakatigikhutik, Jesusim anguyaik pihukatauvluni. 16Tapkuakli tautukaluaktillugik ilitagiyuitpiaktaak. 17Jesusim ukallautiyaik, “Kanuk ukakatigilekkitik pihuktillutik?” Tapkualu nutkaktuk kuviahugaektutun-ilivlutik. 18Talva aipata, atikaktum Cleopasmik, kiuyaa, “Jerusalemun akuihimayunin tamainin ilviinak tuhaangitpin tapkuninga inuit pivaktainik ikpakhani?” 19Tapfuma ukallautiyaik, “Humik?” Ukallautiyaak, “Ilaa Jesus Nazarethmiutakun nalautaiyiuyugaluak hakugikpiakhuni havaamigun ukauhimigunlu, Godim inuillu takuangni. 20Ataniptalu angayyuvikpagyuakut ataningatalu tukutakhautigigamitku kikiaktukpagaat. 21Uvagulli tamna Israelmiunun annauyyiunahugivaktagaluakput. Ilaa, talva taimaliukaaktillugit uvlut pingahut nunguyun. 22Aahin angat ilavut aglingnaktumik uniuyyivaktun uvaptingnun. Kilamik uvlaami iluvgaanungaktun, 23timaali katkangngitagaluangat. Utiuvaktunlu uniutivluta tautukpagamigit ihalgulgit hagyaekhimayun, tapkua ukautigiyaat Jesus makitpangmanguk. 24Ilavullu iluvgaanungaugamik ayyikiitumik tautuktun Jesusli tautugngitagaluangat.”
25Talva Jesusim ukallautiyaik, “Ilihimangngitutik ukpegluanginaptik nalautaiyit ukagiyautainik tamainik. 26Christ taimatun naglikhaktitauyukhaungilak innikhaminun tikituni?” 27Talva Jesusim Mosesim, nalautaiyillu Godim ukagiyautain inmigun kangekhipkaktain tapkununga.
28Iglukagluangitumun tikitakhaanun tikilektillugit Jesus kangiutinangniakhimayutun-iliyuk, 29tapkuak pitailiyagaluangak ukakhutik, “Uvaptingniitin taakhilengman uvluk nungulengmanlu.” Talva itekatigiyaik. 30Jesuslu neginahualegami mukpauyak tiguyaa, kuyakhugami, avguktaa tapfuminga tunivlugik. 31Tapkuaglu iyigik uititaulektutun-ilivutik ilitagingnaktaak, tayyainagli tapkunanga tamakpiaktuk. 32Ingmingnunlu ukallaktuk, “Tapfuma ukautimatiguk apkunmi umativuk unakhivangngilak kangekhipkaktimatiguklu Godim ukauhianik?”
33Tayyainak makinamik Jerusalemun utektuk, katkakhugit 11n maliktingillu takanani. 34Katimayun ukallaktun, “Atanek makittunektuk hagyaekhuni Simonmun” 35Talva tapkuak uniutiyain takuyamingnik tuhaayamingniglu apkunmi, aahin Jesus naunaekhimangman tapkununga mukpauyak avgugmagu.
Jesus hagyaektuk apostlenun
(Mt. 28:16-20; Mk. 16:14-18; Jn. 20:19-23)
36Taima ukaktillugit, Jesus inmi hagyaektuk akunganun nangekhuni. 37Tapkuali kuglukpiakhutik ekhitaktun tamna anengniunahugivlugu. 38Jesusimlu ukallautiyain “Hug ihumalukkihi umatipfingni nalulegapfi? 39Algakka itigakkalu takulekhigit uvangaugama, aktuinaglungalunin uvaptun anengnek timikangngiman haunikangngitkivlunilu. 40Taima ukaktuk takupkaktitugit tapkua algaminik itigaminiglu. 41Tapkualu ukpeglimaitutun-ililengmata kuviatakpallakhutik tapfuma ukallautiyain, “Nekiliuyuhi?” 42Tuniyaat navluagmik uhimayumik, 43tigugamiuk tamna negiyaa takuangni.
44Talva ukallautiyain, “Hapkua ukauhitka ukakhimayagaluatka ilipfingniitillunga, tamangmiglu tiitigakhimayun uvapkun Mosesim, nalautaiyillu, tiitigaini, psalmnilu ilumuktukhat.” 45Talva kangekhipkaktitain Godmin ukauhianik, 46ukautivlugit “Tiitigakhimavaktuk ilaa Christ naglikhaktitaukuvlugu uvluglu pingahuangni makititaukuvlugulu tukungayunin, 47nunakatigit tamangmik ilihauyyauyukhaumata ihumaliukikuvlugit ihumagiyauyunaekuvlugillu atkagun, Jerusalemiunilu hivullengmik. 48Ilipfilu ilihimayiuyuhi hapkuninga. 49Ilaa ilipfingnun tiliniagiga angutima ukagiyautaa, iglukagvingmiihimaluhi hakugiktitautinahi kingikiyauyumin.”
Jesus maiyuktuk
(Mk. 16:19-20)
50Talva Jesusim aullautiyait Bethanymun, ihakhuni naguguktitain. 51Taimalitillugu kimaktain. 52Tapkuali kuviatakpiakhutik utiuyun Jerusalemun 53naiyukhutik angayyuvikpagyuami kuyagivlugu God.
Àwon tá yàn lọ́wọ́lọ́wọ́ báyìí:
Luke 24: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society
