Luke 22
22
NAKATA 22
Judas ihuitumik pinahualektuk
(Mt. 26:1-5, 14-16; Mk. 14:1-2, 10-11)
1Mukpauyam puvlaitum uvluangit tikilektun, taiyauyuk tamna Kangiutivigmik. 2Angayyuvikpagyuakut ataningit tiitigaktillu ihumakatigilektun tukutumavlugu Jesus ekhigigaluaktillugit inuit.
3Talva Satan itektuk Judasmun taiyauyumun Iscariotmik, tamna maligutainin 12nun ilauyuk. 4Tamnalu aavungaktuk ukakatigiyumavlugit angayyuvikpagyuakut ataningit, anguyaktilgillu niuvgutigikuvlugu Jesus tapkununga. 5Tapkualu kuviataktun ukagiakhutik akilekuvlugu manimik. 6Judaslu angekpiagami talvangaanin uktuinaktuk tunikuvlugu Jesus tapkununga inugiektumin aahiniitpan.
Upalungayaktun negikatigikuvlugit kingulengmik
(Mt. 26:17-19; Mk. 14:12-16)
7Talva Mukpauyam puvlaitum uvlua tikittuk Kangiutivium imnainga tukutauyukhauman. 8Jesusimlu Peter Johnlu tiliyaik ukallakhuni, “Takki aavungaugittik Kangiutikhamik upalungayakuvlutik uvaptingnun negikuvlugu uvagut.” 9Tapkuak ukallautiyaak, “Nani tapfuminga upalungayaktukhauvinuk?” 10Ukallautiyaik, “Ilaa iglukagvingmun tikikaalutik angutim imektautilgum paagniaktaatik. Malikhiuk iglumun tapfuma itegvigiyanganun, 11ukallautiyyavakhi iglum inua imaatun, 'Ilihauyyim apegiyaatin, Tuyugmiakagvik maligutiptalu atugniaktakkut Kangiutivikhamik negikuvluta nanitpa?' 12Tapfuma takupkaktiniaktaatik tapfuminga ihuakhimayumik, taikani upalungayakhiuk.” 13Aavungaugamik katkaktuk tamainik Jesusim ukautimagik, aahin Kangiutivikhamik upalungayaktun.
Kinguagun negikatigiktun
(Mt. 26:20-30; Mk. 14:22-26; I Cor. 11:23-25)
14Pivikhanga tikinman, Jesus apostleslu neginahualektun. 15Tapfuma ukallautiyain, “Naglikhaktitautinanga Kangiutivikhamik negikatauyumainakpaktunga ilipfingni 16ukautigapfili negikigunaektaga naunaektinagu ilumuktumik Godim atanguviani.” 17Talva kallun tiguyaa kuyakhukami ukallaktuk, “Una tiguhiuk avituakhiuk, 18ukautigapfi talvangaanin imekigunaektunga ahiam ipteganik Godim atanguvia tikitinagu 19Mukpauyamiglu tiguhiyuk kuyahukamilu avguktaa tunivlugit ukakhuni, “Una timigiyaga. tuniyaulluni pivluhi, imailivagluhilu itkaumakuvlunga. 20Negihuegmatalu kallumik tuniyain ukakhuni, “Una kallun naunaikutauyuk ukagiyautauhimayumik aumnik kuviyauyunik pivluhi.
21Ilaa inuk tunihiniaktuk uvamnik hamaniituk tayya uvamni. 22Inum engniga tukuniaktuk taima taimaliuktukhauman kapiahungniaktugli akhun tamna tunihigumi tapfuminga.” 23Tapkualu ingmingnik apekhuinahualektun ingmingnin kinaumangan taimaliniakka.
Nalliat ataniukiyaumangata
24Maligutaillu kangutiyun ingmingnik kina akungnimingni ataniukiuyaumangan. 25Jesusim ukallautiyain, “Jewmiungitun atanekpait atannektuiyumainaktun tapkununga, ataningillu taiyauyun ikayuktinik. 26Taimaliuktukhaungitpiaktugli ilipfingni, ilipfingnili ataniukiak nukakhektun-itli, hivulliyuglu kivgaktuktun-itli. 27Nalliak ataniukiak, tamna negiyuk tamnalunin kivgaktuktuk? Negiyuk ingivluni tamnaungilak? Uvangali akunipfingniitkaluaktunga kivgaktun.
28“Ilipfili ilagivaktapfinga aiyukalegaluaktillunga, 29Angutima atannektuikumanga atanguvimni, uvanga pitkuyapfi 30atanguvimnilu negikataukuvluhi imekatauluhilu, ikhivautaini itkuvluhilu uktugiaktukuvlugit Israelmiut kitungait 12guyun.
Peterm Jesus ikutiginiangmagu ukautigiyauyuk
(Mt. 26:31-35; Mk. 14:27-31; Jn. 13:36-38)
31“Simon Simon, ilaa Sataum aagiyumainaktaahi tamapfi havakuvluhi nauttiviliktun, avitinmagit naguyun nagungitunin mukpauyakhait. 32Uvangali kengautiyagaluapkin ukpegnit tamakunagu, utiukaalutin uvamnun katangutitin hakugiktilugit. 33Peterm ukallautiyaa, “Atanek, upalungayaktunga malikuvlutin itektauvingmun tukutaukatigikuvlutinlunin.” 34Ukallaktuk, “Ukautigipkin, Peter, ilvit unukpan ikutigitinanga pingahuektuglutin ilitagiyumangngitkangma tingmiak nipyagunaituk.”
35Jesusimlu ukallautiyain, “Uvanga tilivagapfi manikagviitumik, pukhaitumiglu kamikiungituniglu ihagiahukpakpihi?” Kiuyun, “Imanak” 36Ukallagmiyuk, “Tayyali inuk manikagvigmik, pugmiglunin pikakgumi natkagli tapkuninga. Inuglu havikpakangngitkumi atigin niuvgutigiguk havikpakhivakuvlugu. 37Ukautigapfi, ukua ukauhit uvapkun ilumuktukhaumata, 'Tamna ilagiyauhimayuk huinekiyuni', tapkua tiitigakhimayun uvapkun ilumuktun.” 38Tapkualu ukaktun, “Atanek, taku, havikpagliuyugut malgunik.” Ukallautiyait, 'Naamayuk tapkuak'.
Jesus Gethsemaniituk
(Mt. 26:36-46; Mk. 14:32-42)
39Talva anigami aavungaktuk taimaligami manilgulmun Olivesmik taiyauyumun, maligutaitalu maliktaat. 40Tikinami ukallautiyain, “Kengagitti uktuktaukunahi.” 41Tapkunangali aavungaktuk kanitumun millutim tulviatun-itumun hitkukhuni kengaktuk, 42“Angutiga piyumaguvin una kallun piekli uvamnin, uvangali ihumamniungitumik ihumangnik kihimi.” 43Talva ihalgulik hagyaektuk kilangmin tapfumunga hakugiktitugu. 44Aahin Jesus piekkaiyakhuni kengakluaktuk aumaalekhunilu auktun-itumik kuvivluni nunamun.
45Kengaguegami makittuk upakhugit maligutini tautuktain hiniktillugit unagukpallaagamik kuvianaitumik. 46Ukallautiyain, “Hug hinilekkihi? Makittitti kengakpagluhilu uktuktaunakhavuhi.”
Jesus tiguyauyuk
(Mt. 26:47-56; Mk. 14:43-50; Jn. 18:2-11)
47Taima Jesus ukaktillugu inuit amihut tikittun 12n ilangata atikaktuk Judasmik hivulliugmatik. Tapfuma upagahualektaa Jesus kunikuvlugu, 48Jesusimli ukallautiyagaluanga “Judas, naunaekkiuk Inum engninga kunikhugu?” 49Jesusim maligutait takugamik inuit piniaktainik, ukallaktun, “Atanek anguyaktukhauvita havikpakun?” 50Tapkualu ilangata angayyuvikpagyuakut ataningata kivganga hugiyukamiuk hiutaektaa talikpianik. 51Jesus ukaktugaluak, “Taimak”, talva aktugamiuk kivgam hiutaa naguhipkaktaa.
52Aahin Jesus ukallaktuk angayyuvikpagyuakut ataningingnun, inuin atanekpainunlu, anguyaktilingnunlu kaityyutigimayyuk, “Kenigiaktukpihinga natkagluhi havikpainik, aiyaupianiglu inuaktutun-inahugigapfinga? 53Uvluk taman angayyuvikpagyuamiitpaktunga akunipfingni tigungitpiaktagaluapfinga. Tayyali pivikhaki tikittunektuk, taagnium hakugignigalu mihinaktuk.”
Peterm Jesus ikutigiyaa
(Mt. 26:57-58, 69-75; Mk. 14:53-54, 66-72; Jn. 18:12-18, 25-27)
54Talva tigugamitku agitiyaat angayyuvikpagyuakut ataningata igluanun. Peterm kanitpallaangitumik maliktagaluanga. 55Aahin inuit avalutim iluata kitkani ingnegvik ikitaat, ingivlutik, Peterlu tapkunani ikhivainaktuk. 56Angnaguheglu tapfuminga takugami ukallaktuk, ingnegvium hanianitillugu Peter, iigivlugu, “Tamnatauk inuk tapfumunga ilauvaktuk”. 57Imanakpaktugaluak ukakhuni, “Angak ilihimangnginapku”. 58Uatiagungumanlu angutim tautukamiuk ukallaktuk, “Ilvillu ilauvaktutin tapkununga”, Peter kiuyugaluak, “Inuk ilagingitpiaktatka tapkua.” 59Aahintauk ikangnek atauhek nunguman allatauk ukainaktuk, “Ilaa uma ilagivagaa tamna Galileemiutaugami.” 60Peterli ukallaktuk, “Angut ukaktan naluyaga uvanga.” Tayyainaglu taima ukaktillugu tingmiak nipyaktuk. 61Atangum kiviakhuni iigiyaa Peter. Petermlu Atangum ukauhia itkaktaa ukautimani, “Uvlumi tingmiak nipyaktinagu ikutiginiaktanga pingahunik.” 62Talva anigakuk kiavluni akhun.
Jesus mitautigiyauyuk kektuktauvluni
(Mt. 26:67-68; Mk. 14:65)
63Angutillu tigugamitku Jesus mitautigiyaat kektukhugu, 64akuliangalu ulikamitku apekhuktaat, “Ukagiagin takki kia tiglukpatin?” 65Aahintauk amigaitumik ukautigiyaat ukanilutigivlugu.
Jesus apegiyauyuk angayyuvikpagyuakut ataningaanin
(Mt. 26:59-66; Mk. 14:55-64; Jn. 18:19-24)
66Talva kaulgagman, inuit ataningit, angayyuvikpagyuakut ataningillu tiitigaktillu katimavaktun katimavimingnungaktitugu ukautivlugu, 67“Christiuguvin ukautitigut.” Ukallautiyagaluangit, “Ukautigupfili ukpegunaitkaluaktuhi 68apegigupfilu kiuyunaituhi. 69Talvagaaninli Inum engniga inginiaktuk Godim hakugigningata talikpiani.” 70Tamangmik ukallaktun, “Talva Godim engnigipatin?” Tapfuma ukallautiyain, “Taima ukakkuhi.” 71Tamangmiglu ukaktun, “Ilihimayimin allamin tuhaayunaitugut, kanianin uma tuhaagaptigu.”
Àwon tá yàn lọ́wọ́lọ́wọ́ báyìí:
Luke 22: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society
