Agege 4
4
Kain kede Abel
1Adam rik te ŋeye gin kede dako mere Kawa, te yac nywalo Kain kun kobo ni, “Rwot okonya omio anwoŋo atin ico.” 2Dok te nywalo ominnere Abel. Abel te bedo akwarommi, Kain apur-poto. 3A doŋ otyeko kare, Kain okelo cammogo ame ocek i poto mere, omio baŋ Rwot. 4#Eb. 11.4Abel te kelo mege itino rommi me kao kede dwolgi. 5Rwot te neno Abel kede mottere i yomcuny. Cuny Kain te waŋ atek, waŋe te bale oko. 6Rwot te penyo Kain ni, “Cunyi owaŋ piŋo? Dok waŋi oballe piŋo? 7Ka ce itimo ber, mom obino pwoyi? Ka ce mom itimo ber, bal buta i doggola, cunye pyepyeta i komi, cite myero iloe.”
8 #
Mat. 23.35; Luk. 11.51; 1 Lak. 3.12 Kain te kobbi ominnere Abel ni, “Owot i poto.” Ame doŋ gin tye i poto, Kain ocako romo ominnere, te neko oko. 9Obaŋa te kobbi Kain ni “Kara Abel tye kwene?” En te gamo ni, “Pe aŋeo; an abedo agwok ominna bo?” 10#Eb. 12.24Obaŋa te kobbi Kain ni, “Ŋo ame itimo? Nen, remo ominni ame oony tye a koko i lobo kun winyere baŋa. Aman doŋ oceni oko 11i lobo ame oŋamo doge te gamo remo ominni ame yin ionyo. 12Lobo mom dok bino cekki cam ka ipuro; ibino bedo aloŋ-piny kun iwowota atata i wi lobo.” 13Kain te kobbi Rwot ni, “Can ame imia pek meicel ame mom aromo yeyo. 14Nen tin doŋ iryema oko i poto, mom abino dok nen i nyimi; abino bedo aloŋpiny kun awowota atata i lobo, ame ŋattoro keken ka onwoŋa bino neka oko.” 15Rwot te dok kobbe ni, “Mom amannono gire! Ka ŋattoro oneko Kain, abino culo kwor i kome tyen abiro. Rwot te keto anen i kom Kain, me ŋattoro ka onwoŋe kur neke.” 16Kain te ya oko i nyim Rwot, te wot bedo i lobo Nod, tuŋ kide me Eden.
Ikwae a Kain
17Kain rik te ŋeye gin kede dako mere; oyac te nywalo Enoka. Te gero boma, te cako nyiŋ boma-nono ni Enoka bala nyiŋ wode. 18Enoka te nywalo Irad; Irad te nywalo Mekujael; Mekujael te nywalo Metucael; Metucael te nywalo Lamek. 19Lamek te nyomo mon aryo; acel nyiŋe Ada, acel nyiŋe Jilla. 20Ada onywalo Jabal ame rik obedo kwaro a jo ducu ame bedo i kema, kun okwao lim. 21Ominnere nyiŋe Jubal, ame rik obedo kwaro a jo ducu ame goo naŋa opuk kede ame kuto nyamulere. 22Jilla daŋ te nywalo Jubal-kain, atet jami tic ducu me mola kede nyonyo. Amin a Tubal-kain obedo Naama,
23Lamek te kobbi monnere ni,
“Yin Ada kede Jilla winy wunu koppa;
wun mon a Lamek cik yitwu i gin ame akobo.
Pien aneko dano pi waŋa, acobo awobi ame ogoa,
24 #
Mat. 18.22
Ka ce obino culo kwor a Kain tyen abiro,
Lamek obino culo kworrere tyen pyerabiro wie abiro twal.”
Ikwae a Ceji
25Adam rik dok te ŋeye gin kede dako mere, eka dako te nywalo awobi, te cako nyiŋe Ceji, pien okobo ni. “Obaŋa doŋ oye miya atin okene me leyo ka Abel ame Kain oneko.” 26Ceji daŋ te nywalo atin awobi, ote cako nyiŋe Enoci. I karenono jo te cako lwoŋo nyiŋ Rwot.
Àwon tá yàn lọ́wọ́lọ́wọ́ báyìí:
Agege 4: Lango
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Lango Bible © United Bible Societies, 1978, 2019.