ꠁꠘ꠆ꠎꠤꠟ ৩: ꠟꠥꠇ 13
13
ꠔꠃꠛꠣ ꠘꠣ ꠇꠞꠟꠦ ꠛꠤꠘꠣꠡ ꠅꠁꠛꠣꠄ
1ꠢꠎꠞꠔ ꠁꠍꠣꠄ ꠛꠄꠀꠘ ꠇꠞꠞꠣ, ꠅꠃ ꠡꠝꠄ ꠢꠘꠞ ꠇꠄꠎꠘ ꠝꠣꠘꠡꠦ ꠔꠣꠘꠞꠦ ꠇꠁꠟꠣ, “ꠢꠥꠎꠥꠞ, ꠉꠣꠟꠤꠟ ꠎꠤꠟꠣꠞ ꠇꠤꠍꠥ ꠝꠣꠘꠡꠦ ꠀꠟ꠆ꠟꠣꠞ ꠙꠣꠇ ꠎꠣꠉꠣꠔ ꠉꠤꠀ ꠙꠡꠥ ꠇꠥꠞꠛꠣꠘꠤ ꠖꠦꠅꠀꠔ ꠀꠍꠟꠣ, ꠅꠃ ꠡꠝꠄ ꠢꠣꠇꠤꠝ ꠙꠤꠟꠣꠔꠦ ꠔꠣꠞꠣꠞꠦ ꠢꠃ ꠙꠣꠇ ꠎꠣꠉꠣꠔ ꠎꠣꠘꠦ ꠝꠣꠞꠤꠀ, ꠔꠣꠞꠣꠞ ꠟꠃ ꠀꠞ ꠇꠥꠞꠛꠣꠘꠤꠞ ꠟꠃ ꠄꠇꠟꠉꠦ ꠝꠤꠡꠣꠁꠍꠂꠘ।” 2ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠅꠃ ꠇꠥꠞꠛꠣꠘꠤ ꠖꠦꠅꠞꠣꠞ ꠝꠃꠔ ꠅꠟꠣ ꠅꠀꠄ, ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠉꠣꠟꠤꠟꠞ ꠅꠁꠘ꠆ꠘ ꠝꠣꠘꠥꠡ ꠕꠣꠇꠤ ꠄꠞꠣ ꠛꠦꠡꠤ ꠉꠥꠘꠣꠉꠣꠞ ꠀꠍꠤꠟ? 3ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠘꠣ, ꠁꠟꠣ ꠘꠣꠄ, ꠅꠁꠟꠦ ꠔꠥꠝꠞꠣ ꠎꠥꠖꠤ ꠉꠥꠘꠣ ꠕꠣꠇꠤ ꠔꠃꠛꠣ ꠘꠣ ꠇꠞ, ꠔꠦ ꠔꠥꠝꠞꠣꠅ ꠅꠟꠣ ꠛꠤꠘꠣꠡ ꠅꠁꠛꠣꠄ। 4ꠢꠥꠘꠅ, ꠎꠦꠞꠥꠎꠣꠟꠦꠝꠞ ꠍꠤꠟꠥꠀ ꠄꠟꠣꠇꠣꠞ ꠢꠃ ꠃꠌꠣ ꠝꠤꠘꠣꠞꠣ ꠜꠣꠋꠉꠣꠄ ꠎꠦ ꠀꠑꠣꠞ ꠎꠘ ꠝꠣꠞꠣ ꠉꠦꠍꠤꠟ, ꠔꠣꠞꠣꠞ ꠛꠦꠙꠣꠞꠦ ꠇꠤꠔꠣ ꠝꠘꠅ ꠇꠞ? ꠎꠦꠞꠥꠎꠣꠟꠦꠝꠞ ꠛꠣꠇꠤ ꠝꠣꠘꠥꠡ ꠕꠣꠇꠤ ꠄꠞꠣ ꠛꠦꠡꠤ ꠉꠥꠘꠣꠉꠣꠞ ꠘꠤ? 5ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠘꠣ, ꠁꠈꠣꠘ ꠑꠤꠇ ꠘꠣꠄ, ꠅꠁꠟꠦ ꠔꠥꠝꠞꠣ ꠎꠥꠖꠤ ꠉꠥꠘꠣ ꠕꠣꠇꠤ ꠔꠃꠛꠣ ꠘꠣ ꠇꠞ, ꠔꠦ ꠔꠥꠝꠞꠣꠅ ꠅꠟꠣ ꠛꠤꠘꠣꠡ ꠅꠁꠛꠣꠄ।”
6ꠛꠣꠖꠦ ꠔꠣꠁꠘ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, “ꠄꠇ ꠉꠤꠞꠡ꠆ꠔꠦ ꠔꠣꠘ ꠛꠣꠉꠣꠘꠅ ꠒꠥꠝꠥꠞꠞ ꠄꠇꠐꠣ ꠉꠣꠍ ꠟꠣꠉꠣꠁꠟꠣ। ꠡꠝꠄ ꠀꠁꠟꠦ ꠄꠁꠘ ꠀꠁꠀ ꠉꠣꠍꠅ ꠚꠟ ꠔꠥꠇꠣꠁꠟꠣ, ꠅꠁꠟꠦ ꠇꠥꠘꠥ ꠚꠟ ꠙꠣꠁꠟꠣ ꠘꠣ। 7ꠘꠣ ꠙꠣꠁꠀ ꠛꠣꠉꠣꠘꠞ ꠝꠣꠟꠤꠞꠦ ꠇꠁꠟꠣ, ꠢꠥꠘꠅ, ꠀꠁꠎ ꠔꠤꠘ ꠛꠍꠞ ꠗꠞꠤ ꠅꠃ ꠒꠥꠝꠥꠞ ꠉꠣꠍꠅ ꠚꠟ ꠔꠥꠇꠣꠁꠞꠣꠝ, ꠅꠁꠟꠦ ꠇꠥꠘ꠆ꠔꠣꠃ ꠙꠣꠁꠞꠣꠝ ꠘꠣ। ꠔꠦ ꠔꠥꠝꠤ ꠉꠣꠍꠉꠥ ꠇꠣꠐꠤꠟꠣꠅ, ꠁꠉꠥꠄ ꠈꠣꠝꠈꠣ ꠎꠝꠤꠘꠞ ꠞꠡ ꠐꠣꠘꠦꠞ। 8ꠝꠣꠟꠤꠄ ꠇꠁꠟ, ꠍꠣꠛ, ꠁ ꠛꠍꠞꠈꠣꠘꠅ ꠕꠣꠇꠃꠇ। ꠀꠝꠤ ꠅꠉꠥꠞ ꠌꠣꠁꠞꠅ ꠉꠣꠟꠣꠞ ꠝꠣꠐꠤ ꠈꠥꠠꠤꠀ ꠡꠣꠞ ꠖꠤꠝꠥ। 9ꠍꠣꠝꠘꠞ ꠛꠍꠞ ꠎꠥꠖꠤ ꠚꠟ ꠗꠞꠤꠟꠣꠄ, ꠔꠦ ꠔ ꠜꠣꠟꠣ, ꠘꠣꠁꠟꠦ ꠇꠣꠐꠤꠟꠤꠝꠥ।”
ꠎꠥꠝ꠆ꠝꠣꠛꠣꠞꠦ ꠇꠦꠞꠣꠝꠔꠤ
10ꠄꠇ ꠎꠥꠝ꠆ꠝꠣꠛꠣꠞꠦ ꠁꠍꠣ ꠝꠍꠤꠖꠞ ꠜꠤꠔꠞꠦ ꠘꠍꠤꠅꠔ ꠇꠞꠣꠔ ꠀꠍꠟꠣ। 11ꠢꠘꠅ ꠄꠇ ꠛꠦꠐꠤ ꠝꠣꠘꠥꠡ ꠀꠍꠤꠟ, ꠁ ꠛꠦꠐꠤꠞ ꠃꠙꠞꠦ ꠀꠑꠣꠞ ꠛꠍꠞ ꠗꠞꠤ ꠀꠔꠡꠤ-ꠖꠦꠅꠄ ꠀꠍꠞ ꠇꠞꠍꠤꠟ। ꠖꠦꠅꠄ ꠛꠦꠐꠤꠞꠦ ꠉꠥꠎꠣ ꠛꠣꠘꠣꠁꠟꠤꠍꠤꠟ, ꠛꠦꠐꠤ ꠡꠤꠗꠣ ꠅꠁꠀ ꠃꠛꠣꠁꠔ ꠙꠣꠞꠔ ꠘꠣ। 12ꠁꠍꠣꠄ ꠛꠦꠐꠤꠞꠦ ꠒꠣꠇꠖꠤ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ, “ꠝꠣꠁ ꠉ, ꠔꠥꠝꠤ ꠅꠈꠘ ꠁ ꠛꠦꠝꠣꠞ ꠕꠣꠇꠤ ꠞꠦꠢꠣꠁ ꠙꠣꠁꠍ।” 13ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠐꠤꠞꠦ ꠀꠔꠣꠁ ꠖꠤꠟꠣ। ꠟꠉꠦ ꠟꠉꠦꠃ ꠛꠦꠐꠤ ꠡꠤꠗꠣ ꠅꠁꠀ ꠃꠛꠣꠁꠟ, ꠀꠞ ꠀꠟ꠆ꠟꠣꠞ ꠡꠥꠇꠥꠞ-ꠉꠥꠎꠣꠞ ꠇꠞꠟ।
14ꠅꠁꠟꠦ ꠎꠥꠝ꠆ꠝꠣꠞ ꠖꠤꠘ ꠔꠣꠁꠘ ꠁ ꠛꠦꠐꠤꠞꠦ ꠜꠣꠟꠣ ꠇꠞꠣꠄ, ꠝꠍꠤꠖꠞ ꠝꠔꠟ꠆ꠟꠤꠄ ꠉꠥꠍꠣ ꠇꠞꠤꠀ ꠇꠁꠟꠣ, “ꠇꠣꠝ ꠇꠞꠣꠞ ꠟꠣꠉꠤ ꠔ ꠛꠣꠇꠤ ꠍꠄꠖꠤꠘꠃ ꠀꠔꠅ ꠀꠍꠦ। ꠔꠥꠝꠞꠣ ꠎꠥꠝ꠆ꠝꠣꠞ ꠖꠤꠘ ꠘꠣ ꠀꠁꠀ ꠅꠁꠘ꠆ꠘ ꠎꠦꠇꠥꠘꠥ ꠖꠤꠘ ꠀꠁꠀ ꠜꠣꠟꠣ ꠅꠁꠅ।”
15ꠔꠦꠃ ꠁꠍꠣꠄ ꠢꠤ ꠝꠔꠟ꠆ꠟꠤꠞꠦ ꠇꠁꠟꠣ, “ꠅ ꠜꠘ꠆ꠒ ꠅꠇꠟ! ꠎꠥꠝ꠆ꠝꠣꠞ ꠖꠤꠘ ꠀꠙꠘꠣꠞꠣꠞ ꠉꠞꠥ-ꠉꠣꠗꠣꠞꠦ ꠉꠥꠀꠟꠣꠞ ꠛꠣꠞꠦ ꠘꠤꠀ ꠙꠣꠘꠤ ꠈꠣꠛꠣꠁꠘ ꠘꠣ ꠘꠤ? 16ꠀꠁꠎ ꠀꠑꠣꠞ ꠛꠍꠞ ꠗꠞꠤ ꠁꠛ꠆ꠞꠣꠢꠤꠝꠞ ꠅꠃ ꠀꠅꠟꠣꠖꠞꠦ ꠡꠄꠔꠣꠘꠦ ꠛꠣꠘ꠆ꠖꠤꠀ ꠞꠣꠈꠍꠤꠟ। ꠅꠈꠘ ꠎꠥꠝ꠆ꠝꠣꠛꠣꠞꠦ ꠁ ꠛꠦꠐꠤꠞꠦ ꠀꠎꠣꠖ ꠇꠞꠣ ꠎꠣꠁꠎ ꠅꠁꠍꠦ ꠘꠣ ꠘꠤ?”
17ꠁꠈꠣꠘ ꠢꠥꠘꠤꠀ ꠎꠦꠞꠣ ꠔꠣꠘ ꠛꠤꠙꠇ꠆ꠇꠦ ꠀꠍꠤꠟ ꠔꠣꠞꠣ ꠢꠇꠟꠦꠃ ꠡꠞꠝꠤꠘ꠆ꠖꠣ ꠅꠁꠟ। ꠅꠁꠟꠦ ꠛꠣꠇꠤ ꠝꠥꠍꠟ꠆ꠟꠤ ꠅꠇꠟꠦ ꠔꠣꠘ ꠢꠇꠟ ꠇꠦꠞꠣꠝꠔꠤ ꠖꠦꠈꠤꠀ ꠈꠥꠡꠤ ꠅꠁꠟꠣ।
ꠒꠦꠋꠉꠣ ꠛꠤꠌꠤ ꠀꠞ ꠈꠣꠝꠤꠞꠞ ꠇꠤꠌ꠆ꠍꠣ
18ꠛꠣꠖꠦ ꠁꠍꠣꠄ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞꠦ ꠀꠝꠤ ꠇꠤꠔꠣꠞ ꠟꠉꠦ ꠔꠥꠟꠘꠣ ꠇꠞꠔꠣꠝ? 19ꠝꠘꠅ ꠇꠞꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟꠉꠤ ꠄꠉꠥ ꠒꠦꠋꠉꠣ ꠛꠤꠌꠤꠞ ꠟꠣꠈꠣꠘ, ꠇꠥꠘꠥ ꠉꠤꠞꠡ꠆ꠔꠦ ꠔꠣꠞ ꠎꠝꠤꠘꠅ ꠘꠤꠀ ꠅꠃ ꠛꠤꠌꠤ ꠛꠣꠁꠘ ꠖꠤꠟ, ꠛꠣꠖꠦ ꠁꠐꠣ ꠛꠠ ꠅꠁꠀ ꠉꠣꠍ ꠅꠁꠉꠦꠟ, ꠀꠞ ꠙꠣꠈꠤꠘ꠆ꠔꠦ ꠀꠁꠀ ꠉꠣꠍꠞ ꠒꠣꠟꠅ ꠛꠣꠖꠣ ꠛꠣꠘꠣꠁꠟ।”
20ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠥꠟꠘꠣ ꠀꠝꠤ ꠇꠤꠔꠣꠞ ꠟꠉꠦ ꠇꠞꠔꠣꠝ? 21ꠗꠞꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠁꠟꠉꠤ ꠈꠣꠝꠤꠞꠞ ꠟꠣꠈꠣꠘ, ꠇꠥꠘꠥ ꠄꠇ ꠛꠦꠐꠤꠄ ꠕꠥꠠꠣ ꠈꠣꠝꠤꠞ ꠘꠤꠀ ꠄꠇ ꠝꠘ ꠝꠄꠖꠣꠞ ꠟꠉꠦ ꠝꠣꠈꠤꠟ, ꠀꠞ ꠈꠣꠝꠤꠞꠞ ꠚꠣꠚꠦ ꠢꠇꠟ ꠝꠄꠖꠣ ꠚꠥꠟꠤꠀ ꠃꠑꠤꠟ।”
ꠘꠣꠎꠣꠔꠞ ꠛꠦꠙꠣꠞꠦ ꠔꠣꠟꠤꠝ
22ꠢꠎꠞꠔ ꠁꠍꠣꠄ ꠀꠐꠤ ꠀꠐꠤ ꠉꠣꠃꠄ ꠉꠣꠃꠄ ꠀꠞ ꠐꠣꠃꠘꠦ ꠐꠣꠃꠘꠦ ꠉꠤꠀ ꠔꠛꠟꠤꠉ ꠇꠞꠤꠀ ꠎꠦꠞꠥꠎꠣꠟꠦꠝꠞ ꠛꠣꠄ ꠀꠉꠥꠀꠁꠟꠣ। 23ꠄꠞꠝꠣꠎꠦ ꠄꠇꠎꠘ ꠝꠣꠘꠡꠦ ꠔꠣꠘꠦ ꠎꠤꠇꠣꠁꠟ, “ꠢꠥꠎꠥꠞ, ꠎꠦꠞꠣ ꠘꠣꠎꠣꠔ ꠙꠣꠁꠛꠣ, ꠄꠞꠣ ꠙꠞꠤꠝꠣꠘꠦ ꠈꠥꠛ ꠇꠝ ꠘꠤ?”
ꠅꠃ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, 24“ꠌꠤꠙꠣ ꠖꠥꠀꠞꠦꠖꠤ ꠢꠣꠝꠣꠘꠤꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠚꠤꠇꠤꠞ ꠇꠞꠅ। ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠛꠃꠔ ꠎꠘ ꠁꠘꠅ ꠢꠣꠝꠣꠁꠔꠦ ꠌꠣꠁꠟꠦꠅ, ꠢꠣꠝꠣꠁꠔ ꠙꠣꠞꠔ ꠘꠣꠄ। 25ꠊꠞꠞ ꠝꠣꠟꠤꠇꠦ ꠎꠦꠛꠟꠣ ꠖꠥꠀꠞ ꠛꠘ꠆ꠖ ꠇꠞꠤꠟꠤꠛꠣ, ꠔꠥꠝꠞꠣ ꠛꠣꠞꠦ ꠃꠛꠣꠁꠀ ꠖꠥꠀꠞꠅ ꠑꠥꠇꠣꠁꠔꠦ ꠑꠥꠇꠣꠁꠔꠦ ꠇꠁꠛꠣꠄ, ‘ꠢꠥꠎꠥꠞ, ꠀꠝꠞꠣꠞꠦ ꠖꠥꠀꠞꠈꠣꠘ ꠈꠥꠟꠤꠀ ꠖꠦꠃꠇ꠆ꠇꠣ।’ ꠅꠁꠟꠦ ꠔꠣꠁꠘ ꠎꠥꠀꠙ ꠖꠤꠛꠣ, ‘ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ, ꠀꠝꠤ ꠔ ꠌꠤꠘꠤꠃ ꠘꠣ।’ 26ꠔꠦꠃ ꠔꠥꠝꠞꠣ ꠇꠁꠛꠣꠄ, ‘ꠀꠝꠞꠣ ꠀꠙꠘꠣꠞ ꠟꠉꠦ ꠈꠣꠁꠍꠤ-ꠛꠁꠍꠤ, ꠀꠙꠘꠦ ꠔ ꠀꠝꠞꠣꠞ ꠙꠕꠅ-ꠊꠣꠐꠅ ꠀꠁꠀ ꠀꠝꠞꠣꠞꠦ ꠘꠍꠤꠅꠔ ꠇꠞꠔꠣ।’ 27ꠅꠁꠟꠦ ꠔꠣꠁꠘ ꠇꠁꠛꠣ, ‘ꠢꠣꠄꠞꠦ ꠘꠣꠚꠞꠝꠣꠘ ꠅꠇꠟ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉꠅ। ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ, ꠀꠝꠤ ꠔ ꠌꠤꠘꠤꠃ ꠘꠣ।’
28“ꠔꠥꠝꠞꠣ ꠖꠦꠈꠛꠣꠄ ꠁꠛ꠆ꠞꠣꠢꠤꠝ, ꠁꠍꠢꠣꠇ, ꠁꠀꠇꠥꠛ ꠀꠞ ꠔꠣꠝꠣꠝ ꠘꠛꠤ ꠅꠇꠟ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠍꠂꠘ, ꠅꠁꠟꠦ ꠔꠥꠝꠞꠣꠞꠦ ꠢꠞꠣꠁꠀ ꠚꠣꠟꠣꠘꠤ ꠅꠁꠍꠦ। ꠔꠥꠝꠞꠣꠞ ꠝꠣꠎꠦ ꠇꠦꠃ ꠇꠣꠘ꠆ꠖꠣ-ꠇꠣꠐꠤ ꠇꠞꠛꠣꠄ ꠀꠞ ꠇꠦꠃ ꠖꠣꠔ ꠇꠤꠠꠤꠝꠤꠠꠤ ꠈꠣꠁꠛꠣꠄ। 29ꠀꠞꠅ ꠖꠦꠈꠛꠣꠄ, ꠖꠥꠘꠤꠀꠞ ꠌꠣꠁꠞꠅꠛꠣꠄ ꠕꠣꠇꠤ ꠝꠣꠘꠥꠡ ꠀꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠁꠀ ꠈꠣꠘꠣ-ꠖꠣꠘꠣ ꠈꠣꠁꠞꠣ। 30ꠔꠦ ꠎꠦꠞꠣ ꠅꠈꠘ ꠈꠞꠞ ꠇꠣꠔꠣꠞꠅ ꠀꠍꠦ, ꠔꠣꠞꠣ ꠇꠦꠃ ꠇꠦꠃ ꠀꠉꠦ ꠀꠁꠛ, ꠅꠁꠟꠦ ꠅꠈꠘ ꠎꠦꠞꠣ ꠀꠉꠞ ꠇꠣꠔꠣꠞꠅ ꠀꠍꠦ ꠔꠣꠞꠣ ꠇꠦꠃ ꠇꠦꠃ ꠈꠞꠦ ꠎꠣꠁꠛꠉꠤ।”
ꠎꠦꠞꠥꠎꠣꠟꠦꠝꠞ ꠟꠣꠉꠤ ꠀꠚꠍꠥꠍ
31ꠔꠣꠁꠘ ꠅꠔꠣ ꠝꠣꠔꠤꠞꠣ, ꠄꠞꠝꠣꠎꠦ ꠀꠈꠔꠣꠃ ꠚꠞꠤꠡꠤ ꠖꠟꠞ ꠇꠄꠎꠘ ꠀꠁꠀ ꠁꠍꠣꠞꠦ ꠇꠁꠟꠣ, “ꠀꠙꠘꠦ ꠁꠘ ꠕꠣꠇꠤ ꠢꠞꠤꠀ ꠎꠣꠁꠘꠉꠤ, ꠇꠣꠞꠘ ꠞꠣꠎꠣ ꠢꠦꠞꠥꠖꠦ ꠀꠙꠘꠣꠞꠦ ꠝꠣꠞꠤꠟꠤꠔꠣ ꠌꠣꠁꠞꠣ।” 32ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠉꠤꠀ ꠢꠃ ꠢꠤꠀꠟꠞ ꠍꠣꠅꠞꠦ ꠇꠃꠇ꠆ꠇꠣ, ꠀꠁꠎ ꠀꠞ ꠇꠣꠁꠟ ꠀꠝꠤ ꠎꠤꠘ꠆ꠘꠣꠔ ꠍꠣꠠꠣꠁꠝꠥ, ꠛꠦꠝꠣꠞꠤ ꠅꠇꠟꠞ ꠡꠤꠚꠣ ꠇꠞꠝꠥ, ꠙꠞꠥ ꠖꠤꠘ ꠀꠝꠣꠞ ꠇꠣꠝ ꠡꠦꠡ ꠅꠁꠛ। 33ꠔꠦ ꠎꠦꠟꠣꠃ ꠅꠃꠇ, ꠀꠁꠎ, ꠇꠣꠁꠟ ꠀꠞ ꠙꠞꠥ, ꠅꠃ ꠔꠤꠘ ꠖꠤꠘ ꠀꠝꠣꠞ ꠌꠟꠣꠃ ꠟꠣꠉꠛ। ꠀꠝꠤ ꠔ ꠎꠣꠘꠤꠃ, ꠎꠦꠞꠥꠎꠣꠟꠦꠝꠞ ꠛꠣꠞꠦ ꠇꠥꠘꠥ ꠘꠛꠤꠞꠦ ꠎꠣꠘꠦ ꠝꠣꠞꠣ ꠅꠄ ꠘꠣ।
34“ꠎꠦꠞꠥꠎꠣꠟꠦꠝ! ꠢꠣꠄꠞꠦ ꠎꠦꠞꠥꠎꠣꠟꠦꠝ! ꠔꠥꠝꠤ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞ। ꠔꠥꠝꠣꠞ ꠉꠦꠍꠦ ꠎꠣꠞꠣꠞꠦ ꠛꠦꠎꠣ ꠅꠁꠍꠦ, ꠔꠥꠝꠤ ꠔꠣꠞꠣꠞꠦ ꠙꠣꠔ꠆ꠔꠞ ꠝꠣꠞꠍ। ꠝꠥꠞꠉꠤꠄ ꠎꠦꠟꠣ ꠔꠣꠁꠞ ꠍꠣꠅꠞꠦ ꠒꠣꠈꠘꠣꠞ ꠔꠟꠦ ꠀꠡꠞꠄ ꠖꠦꠄ, ꠀꠝꠤ ꠅꠃꠟꠣ ꠔꠥꠝꠣꠞ ꠝꠣꠘꠡꠞꠦ ꠀꠡꠞꠄ ꠖꠤꠔꠣꠝ ꠌꠣꠁꠍꠤ, ꠅꠁꠟꠦ ꠔꠥꠝꠤ ꠞꠣꠎꠤ ꠅꠁꠟꠣꠄ ꠘꠣ। 35ꠔꠦ ꠢꠥꠘꠅ, ꠔꠥꠝꠣꠞ ꠛꠣꠠꠤ ꠈꠣꠟꠤ-ꠛꠣꠠꠤ ꠅꠁꠛ। ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠔꠖꠤꠘ ꠔꠥꠝꠞꠣ ꠘꠣ ꠇꠁꠛꠣꠄ, ꠀꠟ꠆ꠟꠣꠞ ꠘꠣꠝ ꠟꠁꠀ ꠎꠦꠁꠘ ꠀꠁꠞꠣ ꠔꠣꠁꠘꠃ ꠝꠥꠛꠣꠞꠇ, ꠅꠔ ꠖꠤꠘ ꠔꠥꠝꠞꠣ ꠀꠞ ꠀꠝꠣꠞꠦ ꠖꠦꠈꠔꠣꠄ ꠘꠣꠄ।”
Àwon tá yàn lọ́wọ́lọ́wọ́ báyìí:
ꠁꠘ꠆ꠎꠤꠟ ৩: ꠟꠥꠇ 13: sylN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Ahle Kitab Society. All rights reserved.
