ꠁꠘ꠆ꠎꠤꠟ ৩: ꠟꠥꠇ 12
12
ꠀꠈꠦꠞꠣꠔꠞ ꠍꠣꠝꠣꠘ ꠇꠣꠝꠣꠁ ꠇꠞꠅ
1ꠅꠃ ꠡꠝꠄ ꠀꠎꠣꠞ ꠀꠎꠣꠞ ꠝꠣꠘꠥꠡ ꠖꠟꠣ ꠅꠁꠉꠦꠟꠣ, ꠔꠣꠞꠣ ꠑꠦꠟꠣꠑꠦꠟꠤ ꠇꠞꠤ ꠄꠇꠦ-ꠅꠁꠘ꠆ꠘꠞ ꠃꠙꠞꠦ ꠙꠠꠟꠣ। ꠁꠍꠣꠄ ꠙꠄꠟꠣ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠚꠞꠤꠡꠤ ꠝꠎꠛꠞ ꠈꠣꠝꠤꠞ ꠕꠣꠇꠤ ꠢꠥꠡꠤꠀꠞ ꠞꠁꠅ, ꠅꠃ ꠈꠣꠝꠤꠞ ꠅꠁꠟ ꠔꠣꠞꠣꠞ ꠜꠘ꠆ꠒꠣꠝꠤ। 2ꠑꠤꠇ ꠅꠃ ꠈꠣꠝꠤꠞꠞ ꠟꠣꠈꠣꠘ, ꠁꠟꠣ ꠟꠥꠇꠣꠁꠟ ꠇꠥꠘ꠆ꠔꠣꠃ ꠘꠣꠁ, ꠎꠦꠔꠣ ꠎꠣꠁꠞ ꠅꠁꠔ ꠘꠣꠄ। ꠁꠟꠣ ꠉꠥꠙꠘ ꠇꠥꠘ꠆ꠔꠣꠃ ꠘꠣꠁ, ꠎꠦꠔꠣ ꠎꠣꠘꠣ ꠎꠣꠁꠔ ꠘꠣꠄ। 3ꠔꠥꠝꠞꠣ ꠀꠘ꠆ꠖꠣꠁꠞ ꠊꠞꠅ ꠎꠦꠔꠣ ꠝꠣꠔꠤꠍ, ꠝꠣꠘꠡꠦ ꠁꠔꠣ ꠚꠞꠞ ꠝꠣꠎꠦ ꠢꠥꠘꠛ। ꠊꠞꠞ ꠜꠤꠔꠞꠦ ꠇꠣꠘꠦ ꠇꠣꠘꠦ ꠎꠦꠔꠣ ꠇꠁꠍ, ꠁꠔꠣ ꠌꠣꠟꠞ ꠃꠙꠞꠦ ꠞꠐꠣꠁꠟ ꠅꠁꠛ।
4“ꠅ ꠀꠝꠣꠞ ꠖꠥꠡ꠆ꠔ ꠅꠇꠟ, ꠀꠝꠤ ꠔꠥꠝꠞꠣꠞꠦ ꠇꠁꠀꠞ, ꠎꠣꠞꠣ ꠈꠣꠟꠤ ꠡꠞꠤꠟꠞꠦ ꠛꠤꠘꠣꠡ ꠇꠞꠣ ꠍꠣꠠꠣ ꠀꠞ ꠇꠥꠘ꠆ꠔꠣꠃ ꠇꠞꠔ ꠙꠣꠞꠦ ꠘꠣ, ꠔꠣꠞꠣꠞꠦ ꠒꠞꠣꠁꠅ ꠘꠣ। 5ꠔꠦ ꠇꠣꠞꠦ ꠒꠞꠣꠁꠔꠣꠄ ꠄꠅꠈꠣꠘꠅ ꠇꠁꠞꠣꠝ, ꠝꠣꠞꠣꠞ ꠛꠣꠖꠦ ꠖꠥꠎꠈꠅ ꠢꠣꠞꠣꠘꠤꠞ ꠈꠦꠝꠔꠣꠅ ꠎꠣꠘ ꠀꠍꠦ, ꠈꠣꠟꠤ ꠔꠣꠘꠞꠦꠃ ꠒꠞꠣꠁꠅ। ꠀꠝꠤ ꠢꠤꠞꠛꠣꠞ ꠇꠁꠞꠣꠝ, ꠔꠥꠝꠞꠣ ꠈꠣꠟꠤ ꠔꠣꠘꠦꠃ ꠒꠞꠣꠁꠅ। 6ꠝꠣꠔ꠆ꠞ ꠖꠥꠁ ꠀꠘꠣꠄ ꠙꠣꠌꠉꠥ ꠌꠠꠣ ꠙꠣꠈꠤ ꠝꠤꠟꠦ ꠘꠣ ꠘꠤ? ꠀꠟ꠆ꠟꠣꠄ ꠔ ꠅꠃ ꠌꠠꠣꠞ ꠇꠕꠣꠅ ꠚꠣꠃꠞꠂꠘ ꠘꠣ। 7ꠀꠞ ꠇꠤꠔꠣ ꠇꠁꠔꠣꠝ, ꠔꠥꠝꠞꠣꠞ ꠝꠣꠕꠣꠞ ꠌꠥꠟꠞ ꠢꠤꠡꠣꠛꠅ ꠔꠣꠘ ꠉꠦꠍꠦ ꠀꠍꠦ। ꠔꠥꠝꠞꠣ ꠒꠞꠣꠁꠅ ꠘꠣ, ꠛꠃꠔ ꠌꠠꠣ ꠙꠣꠈꠤ ꠕꠘꠦꠅ ꠔꠥꠝꠞꠣꠞ ꠖꠣꠝ ꠔꠣꠘ ꠉꠦꠍꠦ ꠛꠦꠡꠤ।
8“ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠇꠛꠥꠟ ꠇꠞꠦ, ꠀꠝꠤ ꠛꠤꠘ-ꠀꠖꠝꠦꠅ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠔꠣꠞꠦ ꠇꠛꠥꠟ ꠇꠞꠝꠥ। 9ꠅꠁꠟꠦ ꠎꠦ ꠝꠣꠘꠡꠦ ꠡꠝꠣꠎꠞ ꠍꠣꠝꠘꠦ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠛ, ꠀꠝꠤꠅ ꠔꠣꠞꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠅꠡ꠆ꠛꠤꠇꠣꠞ ꠇꠞꠝꠥ। 10ꠀꠝꠤ ꠛꠤꠘ-ꠀꠖꠝꠞ ꠛꠤꠞꠥꠖ꠆ꠖꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟꠦꠅ ꠝꠣꠚꠤ ꠙꠣꠁꠛ। ꠅꠁꠟꠦ ꠇꠦꠃ ꠎꠥꠖꠤ ꠙꠣꠇ ꠞꠥꠢꠥꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠇꠞꠦ, ꠔꠦ ꠔꠣꠞ ꠇꠥꠘꠥ ꠝꠣꠚꠤ ꠘꠣꠁ।
11“ꠝꠣꠘꠡꠦ ꠎꠦꠛꠟꠣ ꠔꠥꠝꠞꠣꠞꠦ ꠝꠍꠤꠖꠞ ꠙꠣꠁꠘ꠆ꠌꠣꠁꠔꠅ, ꠛꠤꠌꠣꠞꠤ ꠅꠇꠟꠞ ꠍꠣꠝꠘꠦ, ꠛꠣ ꠕꠣꠘꠣꠔ ꠘꠤꠛ, ꠅꠃ ꠡꠝꠄ ꠇꠤꠔꠣ ꠎꠥꠀꠙ ꠖꠤꠔꠣꠄ ꠛꠣ ꠇꠤꠔꠣ ꠇꠁꠔꠣꠄ, ꠁꠔꠣ ꠟꠁꠀ ꠇꠥꠘꠥ ꠌꠤꠘ꠆ꠔꠣ ꠇꠞꠤꠅ ꠘꠣ। 12ꠇꠤꠔꠣ ꠝꠣꠔꠤꠔꠣꠄ ꠁꠔꠣ ꠙꠣꠇ ꠞꠥꠢꠦ ꠔꠥꠝꠞꠣꠞꠦ ꠢꠃ ꠡꠝꠄ ꠛꠣꠔꠣꠁ ꠖꠤꠛꠣ।”
13ꠜꠤꠠꠞ ꠝꠣꠎ ꠕꠣꠇꠤ ꠄꠇꠎꠘꠦ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠀꠙꠘꠦ ꠀꠝꠣꠞ ꠜꠣꠁꠞꠦ ꠇꠃꠇ꠆ꠇꠣ, ꠀꠝꠣꠞ ꠛꠣꠛꠣꠄ ꠎꠦꠔꠣ ꠗꠘ-ꠍꠣꠝꠣꠘꠣ ꠕꠁꠀ ꠉꠦꠍꠂꠘ, ꠅꠔꠣ ꠛꠣꠐ-ꠛꠣꠐꠥꠞꠣ ꠇꠞꠤꠀ ꠖꠤꠔꠣ।” 14ꠁꠍꠣꠄ ꠔꠣꠞꠦ ꠇꠁꠟꠣ, “ꠅꠛꠣ, ꠔꠥꠝꠞꠣꠞ ꠛꠤꠌꠣꠞ ꠇꠞꠔꠣꠝ ꠀꠞ ꠗꠘ-ꠍꠣꠝꠣꠘꠣ ꠛꠣꠐꠤꠔꠣꠝ, ꠁꠔꠣ ꠄꠈꠔꠤꠀꠞ ꠀꠝꠣꠞꠦ ꠇꠦꠉꠥꠄ ꠖꠤꠍꠦ?” 15ꠔꠣꠁꠘ ꠝꠣꠘꠡꠞꠦ ꠇꠁꠟꠣ, “ꠈꠛꠞꠖꠣꠞ! ꠢꠇ꠆ꠇꠟ ꠘꠝꠥꠘꠣꠞ ꠟꠥꠜ-ꠟꠣꠟꠌ ꠕꠘꠦ ꠘꠤꠎꠞꠦ ꠛꠣꠌꠣꠅ। ꠇꠣꠞꠘ ꠗꠘ-ꠍꠣꠝꠣꠘꠣ ꠛꠣꠁꠀ ꠉꠦꠟꠦꠅ ꠁꠔꠣꠄ ꠝꠣꠘꠡꠞ ꠎꠣꠘ ꠛꠣꠌꠣꠄ ꠘꠣ।” 16ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, ꠇꠁꠟꠣ, “ꠄꠇ ꠗꠘꠤ ꠛꠦꠐꠣꠞ ꠎꠝꠤꠘꠅ ꠛꠃꠔ ꠗꠣꠘ ꠚꠟꠤꠍꠤꠟ। 17ꠗꠣꠘ ꠖꠦꠈꠤꠀ ꠢꠦ ꠝꠘꠦ ꠝꠘꠦ ꠇꠁꠟ, ꠅꠔ ꠗꠣꠘ ꠅꠈꠘ ꠇꠤꠔꠣ ꠇꠞꠔꠣꠝ? ꠀꠝꠣꠞ ꠔ ꠕꠁꠛꠣꠞꠃ ꠎꠣꠉꠣ ꠘꠣꠁ। 18ꠔꠦ ꠀꠝꠤ ꠄꠇ ꠇꠣꠝ ꠇꠞꠤ, ꠀꠝꠣꠞ ꠃꠉꠣꠞ ꠜꠣꠋꠉꠤꠀ ꠛꠠ ꠇꠞꠤ ꠇꠄꠐꠣ ꠃꠉꠣꠞ ꠛꠣꠘꠣꠁꠟꠣꠁ। ꠔꠦꠃ ꠀꠝꠣꠞ ꠢꠇꠟ ꠗꠣꠘ ꠀꠞ ꠝꠣꠟ-ꠍꠣꠝꠣꠘꠣ ꠎꠣꠉꠣ ꠅꠁꠛ। 19ꠢꠦꠡꠦ ꠀꠝꠣꠞ ꠎꠣꠘꠞꠦ ꠇꠁꠝꠥ, ꠅ ꠎꠣꠘ, ꠛꠃꠔ ꠛꠍꠞꠞ ꠝꠣꠟ-ꠍꠣꠝꠣꠘꠣ ꠀꠞ ꠈꠣꠘꠤ-ꠈꠥꠞꠣꠇꠤꠞ ꠟꠣꠉꠤ ꠘꠤꠌꠤꠘ꠆ꠔꠣ ꠅꠁꠉꠦꠍ। ꠅꠈꠘ ꠀꠞꠣꠝ-ꠀꠄꠄꠡꠦ ꠔꠥꠝꠤ ꠈꠣꠁꠀ ꠚꠤꠘ꠆ꠖꠤꠀ ꠚꠥꠞ꠆ꠔꠤ ꠇꠞꠅ। 20ꠅꠁꠟꠦ ꠀꠟ꠆ꠟꠣꠄ ꠔꠣꠞꠦ ꠇꠁꠟꠣ, ꠅꠞꠦ ꠛꠦꠀꠈꠟ, ꠔꠞ ꠎꠣꠘ ꠔ ꠀꠁꠎ ꠞꠣꠁꠔꠃ ꠇꠛꠎ ꠇꠞꠣ ꠅꠁꠛ। ꠔꠦ ꠔꠥꠁ ꠎꠦꠔꠣ ꠎꠝꠣꠁꠍꠍ, ꠁꠔꠣ ꠇꠦꠉꠥꠄ ꠈꠣꠁꠛ?” 21ꠢꠦꠡꠦ ꠁꠍꠣꠄ ꠇꠁꠟꠣ, “ꠎꠦ ꠝꠣꠘꠡꠦ ꠈꠣꠟꠤ ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣ ꠖꠟꠣ ꠇꠞꠦ, ꠅꠁꠟꠦ ꠀꠈꠦꠞꠞ ꠗꠘ ꠘꠣ ꠎꠝꠣꠄ, ꠔꠣꠞ ꠢꠣꠟꠔ ꠅꠃꠟꠣꠃ ꠅꠄ।”
22ꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠄꠞꠖꠣꠄꠃ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠇꠤꠔꠣ ꠈꠣꠁꠀ ꠛꠣꠌꠔꠣꠝ, ꠀꠞ ꠇꠤꠔꠣ ꠚꠤꠘ꠆ꠖꠤꠔꠣꠝ, ꠁꠔꠣ ꠟꠁꠀ ꠔꠥꠝꠞꠣ ꠌꠤꠘ꠆ꠔꠣ ꠇꠞꠤꠅ ꠘꠣ। 23ꠎꠣꠘ ꠕꠣꠇꠤ ꠔ ꠈꠣꠘꠤ ꠛꠠ ꠘꠣꠄ, ꠀꠞ ꠡꠞꠤꠟ ꠕꠣꠇꠤ ꠇꠣꠙꠠ ꠛꠠ ꠘꠣꠄ। 24ꠅꠃ ꠇꠣꠃꠀꠉꠥꠁꠘ꠆ꠔꠞ ꠛꠣꠄ ꠈꠤꠀꠟ ꠇꠞꠅ, ꠔꠣꠞꠣ ꠔ ꠈꠦꠔꠅ ꠇꠞꠦ ꠘꠣ, ꠚꠡꠟꠅ ꠇꠣꠐꠦ ꠘꠣ। ꠔꠣꠞꠣꠞ ꠃꠉꠣꠞꠅ ꠘꠣꠁ, ꠜꠣꠘ꠆ꠒꠣꠞꠅ ꠘꠣꠁ। ꠀꠟ꠆ꠟꠣꠄ ꠔꠣꠞꠣꠞ ꠞꠤꠎꠦꠇ ꠎꠥꠉꠣꠁꠀ ꠖꠦꠁꠘ। ꠔꠦ ꠔꠥꠝꠞꠣ ꠔ ꠅꠃ ꠇꠣꠃꠀ ꠕꠣꠇꠤ ꠛꠃꠔ ꠖꠣꠝꠤ। 25ꠇꠅ ꠌꠣꠁꠘ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠌꠤꠘ꠆ꠔꠣ-ꠜꠣꠛꠘꠣ ꠇꠞꠤꠀ ꠔꠣꠞ ꠢꠣꠄꠀꠔꠤ ꠄꠇꠈꠣꠘ ꠊꠘ꠆ꠐꠣꠅ ꠛꠣꠠꠣꠁꠔ ꠙꠣꠞꠛ ꠘꠤ? 26ꠀꠞ ꠅꠃ ꠢꠥꠞꠥ ꠇꠣꠝꠈꠣꠘꠃ ꠎꠦꠛꠟꠣ ꠙꠣꠞ ꠘꠣ, ꠔꠦ ꠇꠦꠘꠦ ꠛꠣꠠꠔꠤ ꠌꠤꠘ꠆ꠔꠣ ꠇꠞ?
27“ꠔꠥꠝꠞꠣ ꠅꠃ ꠎꠋꠟꠤ ꠚꠥꠟꠞ ꠛꠣꠄ ꠌꠣꠅ, ꠁꠔꠣ ꠇꠔ ꠡꠥꠘ꠆ꠖꠞ! ꠁꠔꠣꠄ ꠔ ꠘꠤꠎꠞ ꠡꠥꠘ꠆ꠖꠞꠞ ꠟꠣꠉꠤ ꠇꠥꠘ꠆ꠔꠣꠃ ꠇꠞꠦ ꠘꠣ, ꠇꠥꠘꠥ ꠞꠋ ꠡꠤꠟꠣꠁꠅ ꠇꠞꠦ ꠘꠣ, ꠛꠣꠁꠘꠅ ꠇꠞꠦ ꠘꠣ, ꠄꠝꠘꠦꠃ ꠅꠄ। ꠔꠦ ꠀꠝꠤ ꠇꠁꠀꠞ, ꠛꠣꠖꠡꠣ ꠍꠥꠟꠣꠁꠝꠣꠘ ꠅꠔ ꠎꠣꠇ-ꠎꠝꠇꠞ ꠝꠣꠎꠦ ꠞꠁꠟꠦꠅ ꠔꠣꠘ ꠟꠦꠛꠣꠍ ꠔ ꠅꠔꠣ ꠄꠉꠥ ꠎꠋꠟꠤ ꠚꠥꠟꠞ ꠟꠣꠈꠣꠘꠅ ꠡꠥꠘ꠆ꠖꠞ ꠀꠍꠤꠟ ꠘꠣ। 28ꠖꠦꠈꠞꠣꠄ ꠘꠤ, ꠎꠋꠉꠟꠞ ꠝꠣꠎꠦ ꠅꠃ ꠎꠔ ꠡꠥꠘ꠆ꠖꠞ ꠚꠥꠟ ꠅꠈꠘ ꠀꠍꠦ, ꠇꠣꠁꠟ ꠅꠁꠟꠦꠃ ꠝꠣꠘꠡꠦ ꠁꠔꠣ ꠖꠣꠞꠥ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁꠛ। ꠀꠟ꠆ꠟꠣꠄ ꠎꠥꠖꠤ ꠅꠃ ꠎꠋꠉꠟꠞꠦ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠍꠂꠘ, ꠔꠦ ꠅ ꠇꠝꠎꠥꠞ ꠁꠝꠣꠘꠖꠣꠞ ꠅꠇꠟ, ꠔꠥꠝꠞꠣꠞꠦꠅ ꠔꠣꠁꠘ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠔꠣ ꠘꠣꠄ ꠘꠤ? 29ꠔꠦ ꠇꠤꠟꠣ ꠈꠣꠁꠔꠣꠝ, ꠇꠤꠟꠣ ꠌꠟꠔꠣꠝ, ꠁꠔꠣ ꠛꠦꠙꠣꠞꠦ ꠌꠤꠘ꠆ꠔꠣ ꠇꠞꠤꠅ ꠘꠣ, ꠛꠣ ꠅꠡ꠆ꠕꠤꠞ ꠅꠁꠅ ꠘꠣ। 30ꠁ ꠖꠥꠘꠤꠀꠞ ꠝꠣꠘꠡꠦ ꠈꠣꠟꠤ ꠅꠔꠣ ꠟꠁꠀꠃ ꠗꠣꠘ꠆ꠖꠣ ꠇꠞꠦ। ꠅꠁꠟꠦ ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠦ ꠔ ꠄꠝꠘꠦꠃ ꠎꠣꠘꠂꠘ, ꠔꠥꠝꠞꠣꠞ ꠇꠤꠔꠣ ꠇꠤꠔꠣ ꠟꠣꠉꠛ। 31ꠄꠞꠖꠣꠄꠃ ꠔꠥꠝꠞꠣ ꠁꠔꠣ ꠛꠣꠖ ꠖꠤꠀ, ꠈꠣꠟꠤ ꠀꠟ꠆ꠟꠣꠞ ꠛꠣꠖꠡꠣꠁꠞ ꠗꠣꠘ꠆ꠖꠣꠔ ꠞꠅ, ꠔꠦꠃ ꠁꠔꠣ ꠢꠇ꠆ꠇꠟꠔꠣꠃ ꠔꠣꠁꠘ ꠎꠥꠉꠣꠁꠛꠣ।
32“ꠔꠥꠝꠞꠣꠃ ꠀꠝꠣꠞ ꠝꠦꠠꠣꠞ ꠙꠣꠟ, ꠔꠥꠝꠞꠣꠞ ꠖꠟ ꠢꠥꠞꠥ-ꠝꠥꠞꠥ ꠅꠁꠟꠦꠅ ꠒꠞꠣꠁꠅ ꠘꠣ, ꠔꠥꠝꠞꠣꠞ ꠛꠣꠔꠥꠘꠤ ꠛꠣꠚꠞ ꠝꠞ꠆ꠎꠤ ꠅꠁꠟ, ꠔꠥꠝꠞꠣ ꠔꠣꠘ ꠛꠣꠖꠡꠣꠁꠞ ꠜꠤꠔꠞꠅ ꠢꠣꠝꠣꠅ। 33ꠔꠥꠝꠞꠣꠞ ꠎꠔꠔꠣ ꠀꠍꠦ, ꠢꠇ꠆ꠇꠟꠔꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅ, ꠀꠞ ꠘꠤꠎꠞ ꠟꠣꠉꠤ ꠈꠣꠟꠤ ꠅꠃꠟꠣ ꠄꠇ ꠇꠥꠕꠤ-ꠛꠦꠉ ꠔꠤꠀꠞ ꠇꠞꠅ, ꠎꠦ ꠇꠥꠕꠤ ꠇꠥꠘꠥꠖꠤꠘ ꠙꠥꠞꠣꠘ ꠅꠄ ꠘꠣ। ꠅꠃ ꠛꠦꠢꠦꠡ꠆ꠔꠅ ꠍꠣꠝꠣꠘꠣ ꠎꠝꠣ ꠇꠞꠅ, ꠎꠦꠈꠣꠘꠅ ꠍꠣꠝꠣꠘꠣ ꠇ꠆ꠇꠄ ꠅꠄ ꠘꠣ, ꠌꠥꠞꠦꠅ ꠘꠦꠄ ꠘꠣ, ꠙꠥꠇꠦꠅ ꠈꠣꠄ ꠘꠣ। 34ꠇꠣꠞꠘ ꠔꠥꠝꠞꠣꠞ ꠗꠘ ꠎꠦꠘꠅ ꠞꠄ, ꠝꠘꠅ ꠢꠘꠅ ꠞꠁꠛ।
ꠢꠣꠝꠦꠡꠣ ꠔꠤꠀꠞ ꠞꠁꠅ
35“ꠔꠥꠝꠞꠣ ꠇꠣꠙꠠ-ꠌꠥꠙꠠ ꠚꠤꠘ꠆ꠖꠤꠀ ꠀꠞ ꠛꠣꠔ꠆ꠔꠤ ꠎꠣꠟꠣꠁꠀ ꠔꠤꠀꠞ ꠞꠁꠅ। 36ꠔꠥꠝꠞꠣ ꠅꠃ ꠎꠣꠔ ꠇꠣꠝꠟꠣꠞ ꠟꠣꠈꠣꠘ ꠅꠅ, ꠎꠣꠞꠣ ꠔꠣꠞꠣꠞ ꠝꠥꠘꠤꠛꠞ ꠟꠣꠉꠤ ꠛꠣꠞ ꠌꠣꠄ, ꠔꠣꠁꠘ ꠛꠤꠀꠞ ꠖꠣꠅꠔ ꠕꠣꠇꠤ ꠚꠤꠞꠔ ꠀꠁꠀ ꠖꠥꠀꠞꠅ ꠑꠥꠇꠣ ꠖꠤꠟꠦꠃ, ꠟꠉꠦ ꠟꠉꠦ ꠖꠥꠀꠞ ꠈꠥꠟꠔ ꠙꠣꠞꠦ। 37ꠢꠃ ꠉꠥꠟꠣꠝ ꠅꠇꠟꠃ ꠇꠙꠣꠟꠤ, ꠎꠦꠞꠣꠞꠦ ꠔꠣꠞꠣꠞ ꠝꠥꠘꠤꠛꠦ ꠀꠁꠀ ꠢꠎꠣꠉ ꠙꠣꠁꠛꠣ। ꠀꠝꠤ ꠢꠣꠍꠣ ꠇꠕꠣ ꠇꠁꠞꠣꠝ, ꠝꠥꠘꠤꠛꠦ ꠀꠁꠀ ꠢꠣꠞꠤ ꠔꠣꠘ ꠘꠤꠎꠞ ꠇꠝꠞꠅ ꠉꠣꠝꠍꠣ ꠛꠣꠘ꠆ꠖꠤꠀ ꠔꠣꠞꠣꠞꠦ ꠈꠣꠘꠤꠔ ꠛꠅꠀꠁꠛꠣ, ꠀꠞ ꠘꠤꠎꠞ ꠀꠔꠦ ꠛꠣꠠꠤꠀ ꠈꠣꠅꠀꠁꠛꠣ। 38ꠔꠣꠞꠣꠃ ꠛꠠ ꠇꠙꠣꠟꠤ, ꠎꠦꠞꠣꠞꠦ ꠔꠣꠞꠣꠞ ꠝꠥꠘꠤꠛꠦ ꠀꠗꠣ ꠞꠣꠁꠔ ꠛꠣ ꠢꠦꠡ ꠞꠣꠁꠔꠦ ꠀꠁꠀ ꠒꠣꠇ ꠖꠤꠟꠦꠃ ꠢꠎꠣꠉ ꠙꠣꠁꠛꠣ। 39ꠝꠘꠅ ꠞꠣꠈꠤꠅ, ꠌꠥꠞ ꠇꠥꠘ ꠡꠝꠄ ꠀꠁꠛ, ꠉꠤꠞꠡ꠆ꠔꠦ ꠁꠈꠣꠘ ꠎꠣꠘꠟꠦ ꠔ ꠢꠦ ꠢꠎꠣꠉ ꠞꠁꠟ ꠅꠘꠦ, ꠔꠣꠞ ꠊꠞꠅ ꠢꠤꠋ ꠇꠣꠐꠔꠦ ꠖꠤꠟ ꠘꠣ ꠅꠘꠦ। 40ꠔꠥꠝꠞꠣꠅ ꠅꠟꠣ ꠔꠤꠀꠞ ꠞꠁꠅ, ꠇꠣꠞꠘ ꠎꠦ ꠅꠇ꠆ꠔꠞ ꠇꠕꠣ ꠔꠥꠝꠞꠣ ꠌꠤꠘ꠆ꠔꠣꠃ ꠇꠞꠔꠣꠄ ꠘꠣꠄ, ꠢꠃ ꠡꠝꠄꠃ ꠛꠤꠘ-ꠀꠖꠝꠦ ꠔꠡꠞꠤꠚ ꠀꠘꠛꠣ।”
41ꠔꠦꠃ ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠁ ꠘꠍꠤꠅꠔ ꠈꠣꠟꠤ ꠀꠝꠞꠣꠞ ꠟꠣꠉꠤ, ꠘꠣ ꠢꠇꠟ ꠝꠣꠘꠡꠞ ꠟꠣꠉꠤ?” 42ꠢꠥꠎꠥꠞꠦ ꠎꠥꠀꠙ ꠖꠤꠟꠣ, “ꠀꠈꠟꠖꠣꠞ ꠀꠞ ꠢꠇ-ꠢꠣꠟꠣꠟꠤ ꠅꠃ ꠎꠘ ꠇꠦ, ꠎꠣꠞ ꠀꠔꠅ ꠝꠣꠟꠤꠇꠦ ꠔꠣꠘ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠛꠣ, ꠢꠦ ꠅꠇ꠆ꠔꠞ ꠇꠣꠟꠅ ꠔꠣꠞꠣꠞ ꠈꠣꠘꠤ ꠛꠣꠐꠤꠀ ꠖꠤꠛ? 43ꠢꠃ ꠉꠥꠟꠣꠝꠃ ꠇꠙꠣꠟꠤ, ꠎꠣꠞꠦ ꠔꠣꠞ ꠝꠥꠘꠤꠛꠦ ꠀꠁꠀ ꠅꠃ ꠟꠣꠈꠣꠘ ꠇꠣꠝ ꠇꠞꠣꠔ ꠖꠦꠈꠛꠣ। 44ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠢꠃ ꠝꠥꠘꠤꠛꠦ ꠔꠣꠞꠦ ꠔꠣꠘ ꠘꠤꠎꠞ ꠢꠇꠟ ꠗꠘ-ꠍꠣꠝꠣꠘꠣ ꠔꠖꠣꠞꠇꠤꠞ ꠄꠈꠔꠤꠀꠞ ꠖꠤꠛꠣ। 45ꠅꠁꠟꠦ ꠗꠞꠤꠟꠣꠅ, ꠢꠃ ꠉꠥꠟꠣꠝꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠝꠥꠘꠤꠛ ꠀꠁꠔꠦ ꠔ ꠛꠃꠔ ꠖꠦꠞꠤ ꠀꠍꠦ, ꠀꠞ ꠅꠃ ꠚꠣꠇꠦ ꠢꠦ ꠢꠇ꠆ꠇꠟ ꠛꠣꠘ꠆ꠖꠤ-ꠉꠥꠟꠣꠝꠞꠦ ꠝꠣꠁꠞ-ꠗꠁꠞ ꠇꠞꠟ, ꠈꠣꠁꠀ-ꠖꠣꠁꠀ ꠚꠥꠞ꠆ꠔꠤ ꠇꠞꠤꠀ, ꠝꠖ ꠈꠣꠁꠀ ꠐꠣꠟ ꠅꠁꠀ ꠙꠠꠤ ꠞꠁꠟ। 46ꠛꠣꠖꠦ ꠎꠦ ꠖꠤꠘ ꠀꠞ ꠎꠦ ꠅꠇ꠆ꠔꠞ ꠇꠕꠣ ꠢꠦ ꠌꠤꠘ꠆ꠔꠣꠃ ꠇꠞꠔ ꠘꠣꠄ, ꠢꠃ ꠖꠤꠘ ꠀꠞ ꠢꠃ ꠅꠇ꠆ꠔꠅ ꠔꠣꠞ ꠝꠥꠘꠤꠛ ꠀꠁꠀ ꠀꠎꠤꠞ ꠅꠁꠛꠣ। ꠔꠣꠁꠘ ꠔꠣꠞꠦ ꠄꠇ ꠍꠦꠖꠦ ꠖꠥꠁ ꠐꠥꠇꠞꠣ ꠇꠞꠤꠀ ꠘꠣꠚꠞꠝꠣꠘ ꠅꠇꠟꠞ ꠇꠣꠔꠣꠞꠅ ꠝꠤꠡꠣꠁꠛꠣ।
47“ꠀꠞ ꠎꠦ ꠉꠥꠟꠣꠝꠦ ꠔꠣꠞ ꠝꠥꠘꠤꠛꠞ ꠝꠞ꠆ꠎꠤꠞꠦ ꠛꠥꠎꠤꠀꠅ ꠔꠤꠀꠞ ꠅꠁꠍꠦ ꠘꠣ, ꠔꠣꠘ ꠢꠥꠇꠥꠝ ꠝꠣꠚꠤꠇ ꠇꠣꠝ ꠇꠞꠍꠦ ꠘꠣ, ꠔꠣꠞꠦ ꠛꠦꠎꠥꠁꠔꠣ ꠝꠣꠁꠞ ꠝꠣꠞꠣ ꠅꠁꠛ। 48ꠅꠁꠟꠦ ꠘꠣ ꠎꠣꠘꠤꠀ ꠎꠥꠖꠤ ꠢꠦ ꠡꠣꠎꠣ ꠙꠣꠁꠛꠣꠞ ꠇꠣꠝ ꠇꠞꠤꠟꠣꠄ, ꠔꠦ ꠔꠣꠞ ꠡꠣꠎꠣ ꠇꠝ ꠅꠁꠛ। ꠎꠣꠞꠦ ꠛꠦꠡꠤ ꠖꠦꠅꠀ ꠅꠁꠍꠦ, ꠔꠣꠞ ꠉꠦꠍ ꠕꠘꠦ ꠛꠦꠡꠤ ꠌꠣꠅꠀ ꠅꠁꠛ, ꠀꠞ ꠎꠣꠞ ꠉꠦꠍꠦ ꠛꠦꠡꠤ ꠙꠞꠤꠝꠣꠘꠦ ꠕꠅꠀ ꠅꠁꠍꠦ, ꠔꠣꠞ ꠉꠦꠍꠦꠃ ꠛꠦꠡꠤ ꠖꠣꠛꠤ ꠇꠞꠣ ꠅꠁꠛ।
49“ꠀꠝꠤ ꠔ ꠖꠥꠘꠤꠀꠔ ꠀꠉꠥꠁꠘ ꠟꠣꠉꠣꠘꠤꠔ ꠀꠁꠍꠤ। ꠅꠈꠘ ꠎꠥꠖꠤ ꠁ ꠀꠉꠥꠁꠘꠈꠣꠘ ꠎꠟꠤꠎꠤꠔ, ꠔꠦ ꠛꠠ ꠜꠣꠟꠣ ꠅꠁꠟ ꠅꠘꠦ। 50ꠀꠝꠤ ꠔ ꠄꠇ ꠈꠣꠍ ꠉꠥꠍꠟ ꠇꠞꠣꠃ ꠟꠣꠉꠛ। ꠔꠦ ꠀꠝꠣꠞ ꠖꠥꠈ-ꠇꠡ꠆ꠐꠞ ꠁ ꠉꠥꠍꠟ ꠎꠔꠖꠤꠘ ꠘꠣ ꠅꠁꠍꠦ, ꠅꠔ ꠖꠤꠘ ꠀꠝꠣꠞ ꠙꠦꠞꠦꠡꠣꠘꠤꠞ ꠇꠥꠘꠥ ꠡꠤꠝꠣ ꠘꠣꠁ। 51ꠔꠥꠝꠞꠣ ꠝꠘꠅ ꠇꠞꠞꠣꠄ ꠘꠤ, ꠀꠝꠤ ꠖꠥꠘꠤꠀꠔ ꠡꠣꠘ꠆ꠔꠤ ꠖꠤꠔꠣꠝ ꠀꠁꠍꠤ? ꠘꠣ, ꠝꠥꠐꠦꠃ ꠘꠣꠄ, ꠀꠝꠤ ꠇꠁꠞꠣꠝ, ꠀꠝꠤ ꠔ ꠖꠥꠘꠤꠀꠔ ꠄꠇ ꠝꠔꠜꠦꠖ ꠟꠣꠉꠣꠘꠤꠔ ꠀꠁꠍꠤ। 52ꠅꠈꠘ ꠕꠣꠇꠤ ꠄꠇ ꠊꠞꠞ ꠙꠣꠌꠎꠘ ꠎꠣꠞꠎꠤꠞ ꠀꠟꠉ ꠅꠁꠎꠤꠛ। ꠔꠤꠘꠎꠘ ꠖꠥꠁꠎꠘꠞ ꠛꠤꠙꠇ꠆ꠇꠦ, ꠀꠞ ꠖꠥꠁꠎꠘ ꠔꠤꠘꠎꠘꠞ ꠛꠤꠙꠇ꠆ꠇꠦ ꠟꠣꠉꠛ। 53ꠛꠣꠚꠦ ꠙꠥꠀꠞ ꠛꠤꠙꠇ꠆ꠇꠦ ꠀꠞ ꠙꠥꠀ ꠛꠣꠚꠞ ꠛꠤꠙꠇ꠆ꠇꠦ। ꠝꠣ ꠙꠥꠠꠤꠞ ꠛꠤꠙꠇ꠆ꠇꠦ ꠀꠞ ꠙꠥꠠꠤꠄ ꠝꠣʼꠞ ꠛꠤꠙꠇ꠆ꠇꠦ। ꠢꠠꠤ ꠛꠃꠞ ꠛꠤꠙꠇ꠆ꠇꠦ ꠀꠞ ꠛꠃꠄ ꠢꠠꠤꠞ ꠛꠤꠙꠇ꠆ꠇꠦ ꠟꠣꠉꠛ।”
54ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠥꠝꠞꠣ ꠔ ꠙꠁꠌꠝꠦꠖꠤ ꠇꠣꠟꠘꠤ ꠖꠦꠈꠟꠦꠃ ꠇꠅ, ꠝꠦꠊ ꠀꠁꠅꠞ। ꠀꠞ ꠢꠣꠍꠣꠃ ꠝꠦꠊ ꠀꠄ। 55ꠢꠤꠞꠛꠣꠞ ꠖꠇ꠆ꠇꠤꠘꠣ ꠛꠣꠔꠣꠡ ꠌꠣꠟꠥ ꠅꠁꠟꠦ ꠔꠥꠝꠞꠣ ꠇꠅ, ꠈꠞꠣ ꠅꠁꠛ, ꠀꠞ ꠅꠟꠣꠃ ꠅꠄ। 56ꠅ ꠜꠘ꠆ꠒ ꠅꠇꠟ! ꠔꠥꠝꠞꠣ ꠀꠍꠝꠣꠘ ꠀꠞ ꠎꠝꠤꠘꠞ ꠍꠥꠞꠔ ꠛꠥꠎꠔꠣꠄ ꠙꠣꠞ, ꠔꠦ ꠀꠈꠦꠞꠤ ꠎꠝꠣꠘꠣꠞ ꠢꠣꠟ-ꠢꠇꠤꠇꠔ ꠇꠦꠘꠦ ꠛꠥꠎ ꠘꠣ?
57“ꠇꠥꠘꠈꠣꠘ ꠑꠤꠇ, ꠁꠔꠣ ꠔꠥꠝꠞꠣ ꠘꠤꠎꠦ ꠘꠤꠎꠦꠃ ꠛꠤꠌꠣꠞ ꠇꠞ ꠘꠣ ꠇꠦꠘꠦ? 58ꠇꠥꠘꠥ ꠘꠣꠟꠤꠡ ꠟꠁꠀ ꠢꠣꠇꠤꠝꠞ ꠍꠣꠝꠘꠦ ꠎꠣꠁꠛꠣꠞ ꠀꠉꠦ, ꠛꠤꠙꠇ꠆ꠇꠞ ꠟꠉꠦ ꠙꠕꠅ ꠛꠁꠀꠃ ꠝꠤꠐ-ꠝꠣꠐ ꠇꠞꠣꠞ ꠌꠦꠡ꠆ꠐꠣ ꠇꠞꠤꠅ। ꠀꠞꠘꠣꠄ ꠢꠦ ꠔꠥꠝꠣꠞꠦ ꠗꠞꠤꠀ ꠢꠣꠇꠤꠝꠞ ꠍꠣꠝꠘꠦ ꠘꠤꠛ, ꠢꠣꠇꠤꠝꠦ ꠙꠥꠟꠤꠡꠞ ꠀꠔꠅ ꠖꠤꠛ, ꠀꠞ ꠙꠥꠟꠤꠡꠦ ꠘꠤꠀ ꠎꠦꠟꠅ ꠢꠣꠞꠣꠁꠛ। 59ꠢꠦꠡꠦ ꠡꠦꠡ ꠙꠄꠡꠣꠐꠣ ꠀꠖꠣꠄ ꠘꠣ ꠇꠞꠣ ꠙꠞ꠆ꠎꠘ꠆ꠔ, ꠇꠥꠘꠥꠝꠘ꠆ꠔꠦꠃ ꠎꠦꠟ ꠕꠣꠇꠤ ꠍꠣꠠꠣ ꠙꠣꠁꠔꠣꠄ ꠘꠣꠄ, ꠁꠔꠣ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।”
Àwon tá yàn lọ́wọ́lọ́wọ́ báyìí:
ꠁꠘ꠆ꠎꠤꠟ ৩: ꠟꠥꠇ 12: sylN
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Ahle Kitab Society. All rights reserved.
