LUK 23
23
Jisu Pilat Zulo
(Mt 27.1-2,11-14; Mk 15.1-5; Jn 18.28-38)
1Timi kumtsu puthugho luveno Jisu sasu Pilat zulo wuno 2pa nguku thu: “Timi hipauno ni-timiqo sakughuzu cheghike tsuqulue, ike ni-timiqo vilo Rom kukau Kaiser lau asuqha tsukevilopi piaghi eno pa likhi pano Alhou no Kishephe puwukeu Mesiya akukau lakhi kepi aghie.” 3Pilat no pa iniju, “Nono Judami kukau kesha?” Jisu no khochile, “Nono ti pianie.” 4Tile Pilat no kishekiphe achinemiqo eno aqo kitikhi vilo pi, “Timi hipau pithivekepu akiqi kumu phumlae.” 5Ikemu panonguno puzuu nguno alau shi tsatsai pi “Pa kukutsu pesu timiqo dolo kuqhu kidimokeu huthutsu anie! Galil lo pano huthu eno Judia kumtsu lo wue eno itehiye hilehi ghi ighi anie.”
6Kughou Pilat no hi chilukeno pano iniju, “Timi hipauye Galilmi kesha?” 7Jisu ye Herod no kachekeu yeghi bocho kudauno ighiepi chilukelo, pano Herod lau Jisu puwue kughengu Herod ghi tipa ghulokilo Jerusalem lo ighi ake. 8Herod no Jisu ithulukeulo ighono alokivi shive kughengu paye Jisu ghili chiluche eno ado kushuwa lono pa ithulu nishi ache. Paye Jisu no akumzapu hami shikeu ithulunike lakuju shiae. 9Tighenguno Herod no Jisu vilo kiuala kutomo iniju, ikemu Jisu ye atsa lakhimu khochilemo.
10Kishekiphe achinemiqo eno Ayezah kukutsumiqo no azuu wuno Jisu ngukukeu tsa pie. 11Herod eno pawu ghushimino Jisu thaqhi eno jumthiqhi ghi peitha. Panonguno aphi aghile lakhi pe pa pu-u eno Pilat lau saidewuvepe. 12Tipa tsalanino Herod ngo Pilat pama ashou shiluve, pama hipa zuuye aghumi shi acheke.
Jisu Pithive penike Xathave
(Mt 27.15-26; Mk 15.6-15; Jn 18.39—19.16)
13Pilat no kishekiphe achinemi ngo sakiphemi eno timiqo kukutsuno 14panongu vilo pi: “Nonguno timi hipau ilau saghino pikeuno pano timiqo sakughuzu cheghie pi! Itehi nongu zulono ino pa ghuke juvae, eno niye nonguno pa lhoksa ghili nguku akeu lakhimu pimi puaniepi phulumoe. 15Herod nomu pa kipimi phumlae, kughengu pa ghi ilau saide puwuveke. Timi hipauye thive kuzupu kiumu shi puamoe. 16Ino pa heveno puwuvenie.” 17Israilmino Ijip yeghi hechelukeu ghulhu atsutsulo Pilat ye akughumi lakhikhi timiqo lau phepuwu veche. 18Ikehu timi kumtsuno igha muku, “Pa yedavelo! eno Baraba nilau kuqhophevelo.” 19(Baraba ye aphughilo hekupusa eno ghiqhikeu ghenguno akughu kilo supe puake.) 20Pilat ye Jisu phepuwuve nishi akehu itaghi timiqo vilo pikithe. 21Ikemu timiqono ighachile pi, “Kros lo pa yedavelo, pa yedavelo.” 22Pilat no panongu vilo ghuthu akuthuu ghi pi, “Ike paye kiu lhoksapu shive kya? Pa pithive kuzupu niye kiumu phumlae Ino pa heveno phepuwuveni.” 23Ikemu panonguno Jisu ye kros lo yedavelopi ighamuku igha auve eno ashekhalo panongu ghughano toluve. 24Tileno Pilat no timiqono khuakeu kiqi lono Jisu pithive nikeu xakutha tsa piqhivetsu. 25Panonguno Baraba khuakeu hu Pilat no kuqho phepuwuve, khuu hekupusa eno ghikiqhi ghenguno akughu shiakeno, ikemu Jisu pesu timiqo pelo kiu shinishikeno shipe nike ikhiphepe tsuve.
Jisu Kros lo Yedave
(Mt 27.32-44; Mk 15.21-32; Jn 19.17-27)
26Timiqono Jisu sasu wuveno alalo chechekelo timi lakhi Kurinia noghami Simon ipikeu sholu, paye aphu lono aphughilo wucheghi ke. Panonguno Simon tsuquluve eno kros pesu pa shou betsu puzu pa pelo Jisu papeghi xapupe.
27Timi aqokitikhino Jisu papeche eno tipaqo gholo totimi khamino pa ghenguno qah che. 28Jisu no panongu lau tsughu ighieno pi: “Jerusalem totimiqo! Ighenguno qah kevilo, ikemu nolikhi nongu eno notianuli ghenguno qah alo. 29Atsala wocheni kughou timiqono pi nani, ‘Totimi khunoqono ati anuli kuha, anga xapu kepu shimo, tuchomujo kepu kuha keno panoqoye kiutoi angukivi kela!’ 30Tipa tsalalo timino naghuto vilo pi nani, ‘Ni veqaluvelo!’ eno atoghi vilo pi nani, ‘Ni kughutsuvelo’. #Hosi 10.8; Piye 6.16 31Kughengu asuno akuxu aphilo papu hikithipu shiaye kughono asuno qhaive aye kiu shive nani kya?”
32Panonguno alhoksa kumlami mikini ghi Jisu gholo pithi nike sawue. 33Kughou panonguno Judami tsauno a-a lakhi “Aboghe” ipikeu tokeno, panonguno Jisu Kros lo yedave eno alhoksa kumlami pama ghi lakhino Jisu ajeu kudau eno lakhino piyiu kudau shighi yedape qhi. 34Jisu no pi: “Ipuo, panongu kipimi qhivetsulo! Panonguye kiu shi ani kela mtha aphie.” Panonguno asaqhi puzu pa phimini panongu dolono kije luve. #Leshe 22.18 35Timiqoye puthughono jukuto ae, ikelo Judami sakiphemiqoye pa junuqhi ghi pi, “Paye kutami xalu cheni Alhou no kishephepuwu eno Alhou no pa puwu puani aye pa likhi pa xaluju pelo.” #Leshe 22.7 36Ghushimi ghi pa thaigha eno pa phivilo ighieno akiqhizu pe pa tsuno #Leshe 69.21 37pi, “Olikhi oxaluvelo, noye Judami Kukau kena piaye!” 38Jisu kutsu sholo atsa hitoi yepe pua: “Hipauno Judami Kukaue.”
39Alhoksa kumlami lakhiye tuthu-iju apulaghi Jisu thaighakeu pithu: “Noye Alhou no Kishephe puwukeu ke kumo? Olikhi oxaluveno nighi xalulo!” 40Ikemu lakhiuno pa lomi pighi pi: “Noye Alhou msa mokeo? Ningu kumtsu aphiphi ghime qholo akenoku! 41Tinguno alauno nikujoye nino mlakeu qhemi aghime ithulu kuzue, ikemu paye kiumu pimi puamoe.” 42Pano Jisu vilo pi: “Jisu, kughono nono Akukau shi ighinikeno Ikumsululo!” 43Jisu no pa vilo pi: “Ino ovilo hi piani, ishi tsala lono noye igholo kungughalo aniae.”
Jisu Kithi
(Mt 27.45-56; Mk 15.33-41; Jn 19.28-30)
44Puchomughu shi akelo ghi tsukinheno yepuvu move eno akuzuno aghakhu kumtsu ayi kuthu kihe kutolo zumoive. 45Eno Judami chinekilo kokutha phi amta lono ixu kututa shive. #Ipe 26.31-33 46Jisu no ighono ighae, “Ipuo! o-ulo ighungu kulhuqhi vetsuae.” Pano hi pieno pa kuxu sutha huve. #Leshe 31.5 47Ghushimi 100 shou akijeu ghi hi kumtsu ithulua eno pano Alhou sheqhe pi: “Mutsuqheino timi hipauye akivimie.” 48Khijehi kumqono kheju akeno kiu shiakeno ithulu puzu panongu mla kukhu akilo idewove. 49Jisu kusami eno totimi khunoqo Galil lono pa gholo kumtsa ighikeqo kumtsu putouno puthughoghi chejuae. #Lk 8.2-3
Jisu Qhovekeu
(Mt 27.57-61; Mk 15.42-47; Jn 19.38-42)
50Judami phu Arimathia ipikeulo Josef ache. Paye kivimi eno kutamino gihukemi lakhi eno Alhou kukaqha ighinikeu khekulhoshi ache. 51Pa ghi Judami Hoho lo ampemi lakhi shianamu panongu tsa kughakutha eno kughuqhi keulo pulosu mono ache. 52Pano Pilat lau wuno Jisu sukumo lunikeu khuwue. 53Tithiu pano kros lono akumo peqhi pesu aphi kimiye lakhino kuzuve puzu atuqu chhupho ilo akumoki shikeulo puzuve — hipau kumokiye akithe eno puzuu ye khilemu peitha mphikeu lakhike. 54Tipa tsalaye mucholani shia eno Sabat tsala huthuve nikeu do shive.
55Totimi khijeno Galil lono Jisu pape ighikeno Josef sasu wue eno akumoki ngo Jisu kumo kishi qhipe puavekeno juluve. 56Panonguye asukumo ghenguno axokutsungu eno nupeqhikepu kutonike akilo wove. Tupulani loye Ayezah lono Sabat pinilo pipuakeu toi panonguye akulhoqhie. #Ipe 20.10; Zaki 5.14
Àwon tá yàn lọ́wọ́lọ́wọ́ báyìí:
LUK 23: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
