JOHAN Kilethitsa
Kilethitsa
Johan no Yekeu Atsakiviu lo Jisu ye lhokta lo Alhou Tsa achekeu, paye “timi lhoxu lakhi shiveno ningu gholo xu ache.” Kakulo pikeu toi, Atsakiviu hipau yekeuye philukemi pelo Jisu ye Alhou Nu piqhipua keu Xakuluu kepi pululu penike eno pa pululu keu vechewo panoqo pelo akuxu alupeniyeke (20.31).
Jisu ye lhokta lo Alhou tsa hukepi kilethisuve puzu Atsakiviu lo atughiu muqolo akumzapu kumla yesupe puani, tino Jisu ye Alhou Nu piqhipua keu Xakuluu piyeniye ke. Tipa shelo akumzapu kumlalo kiu piye ani keno hephopiye keu tsa yesutsu. Hipa muqolo Jisu pululuve kemino pa papewuve eno pa mujochile kemiye pa pulutsumo keu yepuani. Akiyedo 13.17 lo Jisu no pa kughaluni ke jilo pano kutsuluvekemi sasu thebei kuposhu keu eno pa yedani kichelo panoqo pelo kutoluve eno shikumto keu tsa yekithi puani. Ashekha lau akiyedoqo lo Jisu kughalu keu, atsa kugha keu, yedave keu, xuchilethughive keu eno pano kutsuluvekemi lau ipe piyekeu pipuani.
Totimi salha aghi kelono kughalu keu (8.1-11) ye bokuthalo supe puani kughengu akiyepa kutomolo eno pekidesu keu jeli atughiu qoloye tipau qhive aghi eno kutau khami loye a-a kutaulo supuaghike.
Johan no akhoto shi pikeuno Khristo vechewo kumsagho lhokta kuxu akeu eno tiye khunoqono Jisu ye alaghi, kuchou eno akuxupi kepi puluni keno itehino tipau kuxu aluve keu ani. Johan no tsalakipe kuxulo thime nhemgha peitha chekeqo pesu aghungulo kuchou ghili kichephe piye keu shi, tiye azu, asho, akuvu, bheri, bherikheu eno atsayibo ngo atsaithi.
Supuakeu Xuagha
Atughulo tsa 1.1-18
Johan Baptist eno Jisu no kutsukulumi atughumi
Jisu no aqha zulo mlakeu 2.1—12.50
Jerusalem lo eno tipau kupunulo pa kuxu shekha lau puwokeu 13.1— 19.42
Ampeu xuchilethughi eno ipeghi piyekeu 20.1-31
Ashekha tsa: Galil lo ipeghi piyekeu lakhi 21.1-25
Àwon tá yàn lọ́wọ́lọ́wọ́ báyìí:
JOHAN Kilethitsa: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.