JOHAN 8
8
Totimi Salha aghike Kughalu
53Panongu kumtsu pututa kilo wove, 1ikemu Jisu ye oliv subo akeu toghilo wuve. 2Thanau inaqhe itheno paye achinekilo ideghi. Timi aqokitikhino pa suhope kumqo ighive, ike pano iqave puzu panoqo kutsu ae. 3Ikelo ayezah kutsuchekemi ngo Farisimino totimi lakhi salha aghike lono kughalukeu sasu ighi puzu panongu mtalo qhino 4Jisu vilo ishipi, “Kutsuchekeu, totimi hipauye salha aghike lono loyi kughaluve. 5Ni yezahlo totimi hikithipuye atu pesu veqhi pithivelopi Muse no ahza tsupuani. Ike noye kiu pi nani kya?” #Achine 20.10; Zaki 22.22-24 6Panonguno pa vilo hipatsa pikeuye pa ghukeju puzu akipimi pa shou betsuniyeke. Ikemu Jisu no pishiqho pesu pa-u loti pesu ayeghilo yepukua. 7Ike panonguno pa inijukichichi auvekehu pano muzuchoi ngove puzu panongu vilo pi, “Nongu gholo khuuno axine shipuamokeno pa paghino li shou atu vepukulo.” 8Tishi piveno pano itaghi pishiqholuve puzu pa-u loti pesu ayeghilo yepukuae. 9Ikemu kughou panonguno hipatsa chilukeno panongu gholo amuchou shiakeuno atughiu shi puzu lakhikhino wokhaveno Jisu likhive eno atotiu huye pa zulo puthugho pesu aghi. 10Jisu no muzuchoi ngove puzu li vilo pi, “Totimi, panonguye khila wu khave akya? akipimi otsunikeu khumu kuhave kesha?” 11“Akijeu, khumu kuhavae” ipi lino khochile. Tileno Jisu no pi, “Imaye nighi akipimi otsumoe. Wovelo eno axine shikithe kevilo.”
Jisu ye Ayeghiqha Kuvue
12Jisu no itaghi timiqo vilo pi, “Niye ayeghilomi kuvue. Timi khuuno ipapeni keno akuzulo chechemo nani ikemu akuxupu kuvu anani.” #Mt 5.14; Jn 9.5 13Tile Farisimino pa vilo pi, “Noye olikhi oshepe shi auvae, oshepe tiye kuchou kumoe.” #Jn 5.31 14Jisu no panongu khochile, “Ino ilikhi ighenguno ashepe shi ani kemu ishepeye kuchouke, kughengu niye khilano ighi eno niye khila wucheni keno ino ithi ani. Niye khilano ighi momu niye khila wucheni keno nonguye mthae. 15Nonguye timi lhoaye kiqi lono kugha kutha shi cheni, niye khuu shoumu kughatha chemoe. 16Ikemu ino kughakutha shikepu shive aye ino kughakutha shi keuye achipiu shi nani, kughengu tiye ilikhino kughatha chemoe, ikemu ni eno Apu ipuwukeu huno igholo ani. 17No yezahlo yepuakeuno mikinino thopiu shivekeuye kuchoue. 18Ino ilikhi ishepe shi ani eno Apu ipuwukeu ghi ishepe shitsu anie.” 19Panonguno pa vilo iniju, “Opu ye khile ani kya?” Tile Jisu no khochile, “Nonguye ni mu mtha momu iPu mu mthae. Nonguno ni ithike aye nonguye iPuh ghi ithini cheke.”
20Jisu no hipaqo kumtsu pesu kutsu, tiye Achinekilo akumllagho pekutsu chekeu-aloke. Tilehi khunomu pa kughalu vemoe kughengu pa kughalukepu tuqhudo ighimokehu.
Ino Wu keulo Nonguye Wumlae
21Jisu no itaghi panoqo vilo pi, “Niye wuve nani eno nonguye iphuju nani, ikemu nonguye nongu xinelo thianani. Ino khila wucheni keno nonguye ighimlae.” 22Ikehu Judamino ishipi, “Pano, ‘Ino khila wucheni keno nonguye ighimlae’ ipikeke paye pa likhi pa pithiveni cheni kesha?” 23Tile Jisu no panoqo vilo pi, “Nonguye hila aqhouno ighie, ikemu niye kunguuno ighie. Nonguye hipa yeghi lono ighie ikemu niye hipa yeghi lono ighimoe. 24Tishikehu ino nongu vilo pikeuno nonguye nongu xinelo thinanie. Kughengu ‘Niye nike’ pikeu nonguno pululumo aye nonguye nongu xinelo thiani.” 25“Noye khu kya?” ipi panonguno pa vilo iniju kelo, Jisu no pi, “Inahu abothu lono nongu vilo pivekeu huke. 26Niye nongu shou pikepu eno kughakepu thime kutomo anie, tishiepimu khuno ipuwukeno paye kuchouke, eno pa launo kiu chilu keno tipaqo likhi pesu ayeghiqha vilo ino picheni.”
27Pano Apu ghili pesu panoqo vilo hi piakeu panonguye ithikuthumoe. 28Ikehu Jisu no pi, “Kughou nonguno ni Timi Nu ikhiqheni keno nonguno ‘Niye nike’ ipikeu ithi nani; eno niye kiumu ikutoshino shichemo puzu Apuh no kiu ishika keno tipau likhi pichekeu nonguno ithi nani. 29Khuuno ipuwu keno pano igholo ani, paye ilikhi qhivemoke kughengu ino pulhapuju pa lokiqipu shi cheni.” 30Jisu no hipaqo thime pikeu chilukemi kutomono pa shou pulukeu ave.
Xaphevekemi eno Aquaxemi
31Ikehu Judami khunoqono pa shou pululuve keno tipaqo vilo Jisu no pi, “Nonguno ino pikeu tsa papelu aye nonguye kuchouno ino kutsuluvekemi qoe; 32nonguno kuchou ithi nani eno kuchouno nongu xaphe nani.” 33Panonguno khochile, “Ninguye Abraham laghami eno ninguye timi khuno quaxemi mu shimphi. Ike noye kishi puzu, ‘Nongu xapheve nanie’ ipi piani kya?” #Mt 3.9; Lk 3.8 34Jisu no panoqo vilo pi, “Kuchouno ino nongu vilo pini, khuuno axine shini keno paye axine quaxemi lakhi. 35Aquaxemi lakhiye pulhapuju akibolomi shi ngochemoe ikemu anu lakhiye pulhapuju abolomi shi achenie. 36Anuno nongu xaphetsu aye kuchouno nonguye xapheve nani. 37Nonguye Abraham laghami kepi ino ithi ani, ikeghi nonguye ipithiveniye iphue, kughengu nonguno ino pikeu tsa nongu lolo ilopenishimoe. 38IPu no kiu ipiye keno tipau ino pitsu cheni ikemu nongu papuh no nongu vilo kiu pinikeno nonguye tipau shi cheni.”
39Panonguno pa khochile, “Ningu papuh ye Abraham ke.” Ikelo Jisu no panoqo vilo pi, “Nonguye Abraham tianuli keaye pano mlakeu kumla nongu ghi mlani cheke. 40Alhou launo kiu chilukeno kuchouno ino tipau likhi pesu nongu vilo pipuani, ikelauye nonguye ipithive niye kutoveke; ikemu Abraham ye hikithipu shipuamoe! 41Nonguye nongu papuh no shikeu shianie.” Panonguno khochile, “Ninguye tuqhanu kumoe. Ninguye Apu lakhi likhi ani, ike tiye Alhou ke.” 42Jisu no panoqo vilo pi, “Alhou no nongu pa puh keaye nonguye ikupuni cheke kughengu niye Alhou launo ipeghi puzu hi ighi. Niye ikutoshino ighike kumoe ikemu pano ipuwuke. 43Nonguye kushiye ino pikeu ithikuthumla kya? Hiye kutau ghenguno kumono nonguno ino pikeu tsa ininishimoe. 44Nonguye nongu papuh tughami tianuliqoke eno nongu pulouye nongu papuh ghoapulou shinishie. Inahu abothu lono paye ghikiqhiu ke. Paye khilemu kuchou kudau ajumphie, kughengu pa lolo kuchou kuhae. Kughou pano akimkitsa pinikeno pa lhoaye lono kiu keno tipau shi anike ghenguno paye akimkiuke eno akimki jeli kumtsu papuh ke. 45Ikemu ino kuchou hu picheni, tishikehu nonguye ipulumoe. 46Nongu gholo khuuno niye axine shi aniepi akipimi itsulu nani kya? Ino nongu vilo kuchou tsa pike nonguye kushiye ipulumo kya? 47Khuuno Alhou laumi keno pano Alhou tsa initsu cheni. Nonguno initsumokeu kiqiye nonguye Alhou laumi kumoe.”
Jisu ngo Abraham
48Judamino Jisu khochile pi, “Noye Samariami lakhie eno tughami lakhi ololo anike pi pikeu ninguye achipike kumo kesha?” 49Jisu no khochile, “Ilolo tughami kuhae, ikemu iPuh gihu cheni eno nonguno igihumoe. 50Niye ilikhi ijekipipu phuchemoe. Tipau phuchekemi lakhi ani eno pano kughathani keuke. 51Kuchouno ino nongu vilo pini, timi khunono itsa peluni keno paye khilemu thimo nani.” 52Judami qono pa vilo pi, “Itehino ninguno mtsuqheyi ithiveake noye tughami ololo aniputsae. Abraham ye thivae, eno tungkupumi qoye thivae, ikeghi nono pikeuno, ‘Timi khunono itsa peluni keno paye khilemu thimo nani’ ipike. 53Nisu Abraham akithiu nguno nouno akijeu kepi ani kesha? tungkupumi ghi thivae. Noye okughape kiu kepi kumsu ani kya?” 54Jisu no khochile, “Ino ilikhi ijekipipu tsa piaye ijekipiye kiumu kuhae, iPuh no ijekipipu shichenie, paye nongu Lhou kepi nonguno pichekeu hu panoke. 55Nonguye khilemu pa mtha aphie ikemu niye pa ithi anie. Tsala ino niye pa mthae ipiaye niye nongu hutoi kimkimi lakhiae. 56Nongu papuh Abraham ye itsala ithuluni cheni kepi alokivishi cheke, eno pano tipau ithulu puzu alokivishie.” 57Tileno Judami qono pa vilo pi, “Opunu mipeye lhopungu ghi kumphie ikeghi noye Abraham ithulua kesha?” 58Jisu no pi, “Kuchouno ino nongu vilo pini, Abraham zuuno niye aighivae.” 59Ikelo panonguye atu ikhipesu pa veqhiniye shi, ikemu Jisu no itshuluve eno achineki lono khalau ipeve.
Àwon tá yàn lọ́wọ́lọ́wọ́ báyìí:
JOHAN 8: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
