JOHAN 6
6
Jisu no 5000 Loji
(Mt 14.13-21; Mk 6.30-44; Lk 9.10-17)
1Hipathiu Jisu ye Galil zughi,( Tiberiya zughi) tuxau wuve. 2Timi aqokitikhino pa pape che kughengu pano akumzapu lono kusukinimi shipivikeu panonguno ithulu puake. 3Jisu no ato lakhilo iqho eno pa khopemi sasu iqa. 4Judamino Hechekulu Ghulhu shichekeu huye kupunuve. 5Timi aqokitikhino pa lau chekeu pishipuwo ithulu puzu Jisu no Filip vilo pi, “Timi hipaqono chupenike ninguye achuqupu khilehino qhulu nani kya?” 6(Jisu ye pa ampino kiu shikepukeno ithi pulaghi Filip peju ghi hipatsa pike.) 7Filip no khochile, “Ghuka 1000 no asho qhu namu timi hujejehi gholoye atachumu tsuwo toluni chemoe.” 8Pa khopemi gholo Pitor thikuzuu Andrew no Jisu vilo pi, 9“Hilau itimi lakhino athikishino shikeu shopa pungu eno akha kini ani, ikemu timi hijejehi gholo tino kiu shiluni kya?” 10Jisu no panoqo vilo pi, “Timiqo iqave pelo!” Tipa qhalo atsaneghu kutomo ae, ike timi kumtsuno iqave, timi 5000 kutolo ae. 11Jisu no ashopa ikhiluno Alhou shikimthive eno timi iqa akeqo kijetsu. Pano akha ghi titoi shitsu eno timi kumtsu panonguno chunike thaqhu chulu. 12Kughou timiqono aghaqive keno, Jisu no pa khopemi vilo pi, “Munomugho qhivekeu kichekutsulo, atachu mu pevekevilo.” 13Ike timiqono athikishino shikeu sho pungu chu puzu munomugho chukhamono qhivekeu panonguno kichekutsukelo ashoghi chighi kini chhitoi shilue. 14Jisu no amchipu kumla hipau shikeu timiqono ithulu puzu panonguno pi, “Kuchouno ayeghiqhalo tungkupu ighiniepi chekeu hu hike!” 15Timiqono ighi puzu pa pesu tsumomo akukau shipeniye akeu Jisu no vethaluve, ikehu itaghi paye pa likhi chesu naghuto kudau wuve.
Jisu no Azu shou Alache
(Mt 14.22-33; Mk 6.45-52)
16Kijiliu shivekelo Jisu khopemiye azughilo iqive eno 17ashuka lakhilo iku puzu Kapernaum kudau wunike ghenguno azughi kathasu che. Putho shiwuvemu Jisu ye panoqo lau ighimoe, 18eno amlhu kuloghino mulhu akehu azu fuchighipuku ae. 19Akhopemino ashuka sasu mili kini-kuthu tohilo wuve kethiuno Jisu no azu shouno ashuka kudau alache cheghike ithulu eno panonguye shishe msave. 20Ikemu Jisu no panoqo vilo pi, “Nike, nonguye msa kevilo!” 21Tilehi panonguye ashukalo pa pelo ikughive penishive ikemu paikhavino ashuka huye panonguno khilau wuchenikeno tipa-a tove.
Timiqono Jisu Phujue
22Tishiwo thoghiu, azughi tuxau timi ngovekeqono tikudauye ashuka lakhi likhi ake ithulupua eno Jisu ye ashuka tipaulo pa khopemi gholo ikumokeu panonguno ithi ae, eno akhopemi likhi ashuka lono wuvekeu panonguno ithia. 23Tishi akelo, Tiberiya alono ashuka hami ighi eno Ampeu no khilehino Alhou shikimthi puzu timi aqo kitikhino asho chukeno tipa-a phivilo ighi. 24Timi aqokitikhi huye Jisu ngo pa khopemi ashuka qolo jupuhave, ike panonguye ashukalo iku puzu Kapernaum lo Jisu phusu ighi.
Jisu ye Akuxupu Sho
25Kughou timiqono azughi tuxa kudauno Jisu phulu keno panonguno pa vilo iniju, “Akukutsuu, noye kughono hilau wuve kya?” 26Jisu no panongu khochile, “Kuchouno ino nongu vilo pini: Nonguye amchipu kumla ithuluke ghenguno kumo puzu nongu ghakiqishi asho chuluke ghenguno iphu cheni. 27Puhavekepu chuqupu ghenguno ime mla kevilo, ikemu lhokta kuxupu kutolo achekepu chuqupu ghenguno ime mlalo. Achuqupu tiye Timi Nu no nongu tsu nani, kughengu Apu Alhou no pa shou pa ghaqikeu michipu bevae.” 28Tileno panonguno pa vilo iniju, “Alhou kumla shinike ghenguno ninguye kiu shi amasa kya?” 29Jisu no khochile, “Alhou no nongu pelo hipau shipenishi ani: pano khuu puwu puani keno nonguye tipau shou pulubelo.” 30Ike panonguno pi, “Tishiaye ninguno opulupenike ghenguno noye kiu michipu kumla shipe ningu piyeni kya? Noye kiu kumla shilu nani kya? 31Nipuasuye timi kughunamoke alo manna sho chucheke; tiye kuchoyesulo hitoi pipuani: ‘Panoqo pelo chupeniye pano kungugha lono asho tsue.’ ” #Ipe 16.4; 4.15; Leshe 78.24 32Tileno Jisu no panoqo vilo pi, “Kuchouno ino nongu vilo pini: Muse no kungugha lono asho nongu tsuke kumoe, iPuh no kungugha lono kuchou sho nongu tsue. 33Kughengu Alhou no tsukeu sho huye kungugha launo iqighikeu eno ayeghilo akuxupu tsukeuke.” 34Tileno panonguno pa vilo khue, “Akijeu asho tipau pulhapuju nitsulo.” 35Jisu no panoqo vilo pi, “Niye akuxupu shoke, khunono ilau ighi nikeno khilemu muzuthimo nani, eno khunono ipulu nikeno khilemu tughuthimo nani.”
36“Ikemu ino nongu vilo piveake, nonguye ni ithuluvae ikeghi ipulumoe. 37IPuh no itsukemiqo kumtsu ilau ighi nani, eno ilau ighikemiye khilemu hapheve moe, 38kughengu niye ighopulou shiniye kungugha lono iqighike kumoe, ikemu ipuwu puakeu ghopulou shiniye ke. 39Ipuwu puakeu ghopulouye hike: pano khunoqomi itsuveakeno niye tipaqo lakhimu puhavepemo niyeke, eno ashekha tsalalo niye tipaqo kumtsu akuxupu shi xuputhu peniyeke. 40Kughengu iPuh ghopulouye hike: khunono Anu ithulu puzu pa pulubelu nikeno lhokta kuxupu apeniyeke; eno ashekha tsalalo akuxupushi ino pa xuputhu nani.”
41Jisu no, “Niye kungugha lono iqighikeu shoke,” ipike ghenguno Judamiqoye aghaideveno 42ishipi, “Timi hipauye Josef nu Jisu ke kumo kesha? Nino papuh aza ithi anino paye kishi puzu kungugha lono iqighi kepi ani kya?” 43Jisu no panongu khochile, “Nonguye aghaide kevilo. 44IPuh ipuwu puakeuno ilau pa sunhesaghi moke loye khumu ilau ighimlae; eno ashekha tsalani ino pa xuputhuve nani. 45Tungkupumino ishi yehpe puani, ‘Timi kumtsu Alhou no shika nani.’ Apu tsa chilu eno pa launo shikalu chekeqono ilau ighi cheni. #Isa 54.13 46Tipau kiqiye Alhou launo khuu ighikeno pa likhino Apu ithuluveake thono kumtsuno Alhou ithuluve akepi niye piamoe. 47Kuchouno ino nongu vilo pini: timi khuno pulu ani keno lhokta kuxupu ani. 48Niye akuxupusho ke. 49Nongu pu-asuqono timi kughunamoke-alo manna sho chua ikemu panonguye thiveke. 50Ikemu asho khipau kungugha lono hi iqighikeu khunono ti chuni keno panoye thimoe. 51Niye timi puxulukepu sho kungugha lono iqighie. Timi khunono hipa sho chuni keno paye alhokupuju xu nani, eno ino asho tsuniye akeuye ishi ajike, hi ayeghiqha puxunike ino tsu anie.”
52Tile Judami qoye panongu dolono mutomushu thuve. Panonguno iniju, “Timi hipauye kishi puzu ningu pelo chupenike pa shi aji tsuluni kya?” 53Jisu no panoqo khochile, “Kuchouno ino nongu vilo pini: nonguno Timi Nu shi aji chumo eno shomo aye nonguye nongu lolo akuxupu kuha nanie. 54Khunono ishi aji chuni eno shoni keno lhokta kuxupu ani eno ashekha tsalani ino pa xuputhu nani. 55Kughengu ishi ajiye kuchou chuqupuke eno ihjiye sho kepu kuchouke. 56Timi khunono ishi aji chuni eno shoni keno igholo xukuqha ani eno niye pa gholo xukuqha ani. 57Apuh xuakeu huno ipuwuke eno Apu ghenguno nighi xulu ani. Tihutoi khunono ishi iji chu-shoni keno ighenguno paye xulu nani. 58Tishiaye kungugha lono iqighikeu shoye hike, tiye nongu puasu qono chu puzu thive keu sho toi moe. Timi khuno asho hipau chuni keno alhokupuju xulu nani.” 59Hiye Kapernaum lo Sinagog lono Jisu no kutsukeu ke.
Lhokta Kuxupu Tsa
60Pa kukutsu papekemi gholo kutomono hipatsa chiluno pi. “Akukutsu hipauye ighono mukamughayi loke khuno inikulupu kya?” 61Khunomu pa vilo pimokemu pa khopemiye pano pikeulo aghaidevekeu Jisu no ithive puzu panoqo vilo pi, “Nongu lo kumopu shivetsua kesha? 62Tishiaye, Timi Nu no puzuu pano khile achekeno tile ikuchekeu nonguno ithuluaye nonguye kishi nani kya? 63Aghungu no akuxupu tsu cheni; ashiye kiumu ala shilu chemoe. Ino nongu vilo pikeqo tsaye aghungu eno akuxupu ke. 64Ikeghi nongu gholo khamiye pulumoe.” (Kughengu khunoqono pulumo nani keno eno khuno pa kughape atheshive nikeu keno Jisu ye abothu lono ithi ae.) 65Pano pi, “Highenguno ino nongu vilo pivae, ike Apu no pa pelo ighilu kepushi shilupemo aye khumu ilau ighimlae.”
66Highenguno pa kukutsu ikhiluvekemi gholo kutomono idechile wove eno pa gholo chemove. 67Ikehu Jisu no pa khopemi chighikini vilo pi, “Nongu ghi wuvenishi ani kesha?” 68Simon Pitor no pa khochile, “Ampeu, ninguye khuu lau wukepu ani kya? Nono lhokta kuxupu tsukepu tsa anie. 69Nino pulu eno ithikeuno noye Alhou launo ighikeu Akimthe lakhike.” #Mt 16.16; Mk 8.29; Lk 9.20 70Jisu no panoqo khochile, “Ino no chighikini kishelu kekumo kesha? Ikeghi nongu gholo lakhiye tughamie.” 71Paye Simon Iskariot nu Judas ghili piake, kughengu paye akhopemi chighikini gholo lakhi shi anamu pano Jisu kughape aghumi ulo suvetsu nikeu shiake.
Àwon tá yàn lọ́wọ́lọ́wọ́ báyìí:
JOHAN 6: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
