JOHAN 11
11
Lazar Kithi
1Maria ngo li tsunipu Martha pamaye Bethani phulo ache, eno pama peu Lazar ye suae.#Lk 10.38-39 2Maria hipauye tsungquyikeu teli pesu Jisu shou lepuku puzu lino li sa pesu pa pukhu isuve tsukeu huke, ike li peu Lazar ye suake.#Jn 12.3 3Ikehu pama atsunipuno Jisu lau ishi pipuwu: “Ampeu, nono kimiyechekeu oshou huye su anie.” 4Ikemu hipatsa chilu kelo Jisu no pi, “Akusu hipauye akithi kusu kumoe; hiye Alhou lau akimthe jekipipu ghenguno ke, eno hipau vechewono Alhou no pa Nu jekipipu shitsuniye ke.”
5Ike Jisu ye Martha, Maria eno Lazar ishi kimiyeqhiyiche. 6Kughou Lazar ye su anie pikeu tsa Jisu no chilu keno, pano khile akeno tipa-alo ghulo kini ngokitheve. 7Tipathiuno pano ishi pa khopemi vilopi, “Itaghi ningu Judia lo wuni nolo.” 8Akhopemino pa vilopi, “Kutsuchekeu, Judamino atupe oveqhiniye shikeu kushuwa kumphi puzu noye itaghi tilau wuni kesha?” 9Jisu no khochile, “Pucho-tsala lakhilo ayikihedo chighi kini anike kumo kesha? Ikehu timi khunono puchouno checheni keno paye kutusulumo nani kughengu pano hipa yeghiqha kuvu ithulu anie. 10Ikemu pano putho lono cheche aye paye kutusulu cheni kughengu pa lolo akuvu kuha kehu.” 11Jisu no hi pive puzu panoqo vilo pi, “Ningu shou Lazar ye zuhuvae, ikemu ino wupuzu pa kudaputhuni cheni.” 12Akhopemino pa vilopi: “Ampeu, paye zuaghi aye ida thughive nani thono.” 13Jisu ye Lazar thivekeu piae ikemu panonguye Lazar no zuakeu piani kepi kumsuve. 14Tileno Jisu no mtsuqheyi panongu vilo pi: “Lazar ye thivae; 15ikemu nongu ghenguno niye tilau aghimovekeuno imlokiqi shivae tishianguno nongu pelo pululu peniyeke. Ningu pa lau wuni kholo.” 16Thoma khuu pesu Diduma ipi ku-chekeno pano akusami akhopemi vilo pi: “Ningu ghi kutsuchekeu sasu thikepushi pa gholo wuni kholo.”
Jisu ye Xachilethughikeu eno Akuxupu
17Kughou Jisu ighi keno Lazar ye akumokilo qhokeu atsala bidi shivae pikeu sutsa Jisu no chilu. 18Bethani ye Jerusalem lono mili kini nguno akughukhou kehu 19Judami kutomono Martha ngo Maria pama lau ighi puzu pama peu kithi ghenguno pama lokughuno tsuniye ighi. 20Kughou Jisu chenie pikeu chilu keno Martha ye wuno pa sasu kusho; ikemu Maria ye akilo ngove. 21Martha no Jisu vilo pi, “Ampeu, nono hilau aghike aye ipeuye thimoni cheke! 22Ino ithi anike, itehimu Alhou vilo nono kiu kiumu khuaye Alhou no otsu nanike.” 23Jisu no li vilo pi, “Opeuye xuputhuve nani.” 24Lino ishi pa vilo pi: “Ino ithi anike ashekha tsalalo paye xuputhuve nani.” 25Jisu no li vilo pi, “Niye xuchilethughikeu eno akuxupue, khunono ishou pulubeni keno paye thive namu xuluve nani; 26eno khunono igholo xuani eno ishou pulube ani keno paye khilemu thimo nani, noye hipau pulu anima?” 27Lino pa vilo pi: “Iye, Ampeu, ino pulu akeuno noye Alhou Nu Khristo ayeghilo ighini kuau huke.”
Jisu no Qah
28Martha no hipatsa pive puzu liye idewove eno lino li tsunipu Maria ku puzu aqhouno ishipi, “Kutsuchekeu hicheni eno noighiju anie.” 29Kughou Maria no hi chilukeno lino ilhethuve eno pa sasu kushouniye wue. 30Ike Jisu ye aphu to-mphi ikemu tikutolo khile Martha no pasasu kusho keno tipa-alo aghi. 31Judami khunoqono Maria sasu akilo li lokughunotsu akeno lino ilhethuveno khalau ipevekeu ithuluno papewu. Panonguno kumsukeuno liye akumoki lono kumsu qahniye wucheni kughashi ae. 32Jisu no khile akeno tipa-alo Maria no ighi no pa ithulu kelo lino Jisu pukhu philo itsaiqino pi: “Ampeu, nono hilau ake aye ipeuye thimoni cheke.” 33Lino qah akeu eno li gholo Judami ighikeqo ghi qah akeu Jisu no ithulu kelo palo khummuyive eno pa mlo ghime shive. 34Panoqo vilo pano iniju, “Nonguye khilehi pa qhove kya?” “Ampeu, ighieno julo” ipi panonguno khochile. 35Jisu no qah. 36Ikehu Judamino ishipi, “Paye kiutoi Lazar kimiye chekeno julo!” 37Ikemu panongu khamiye ishipi, “Paye anhethi kighichemi nhethi tsukholuvepe chenike kumo kesha? Paye Lazar puxuluvemoni kesha?”
Lazar Xuputhuve
38Jisu ye itaghi pa lo khummuyi kitheveno akumokilo ighi; akumoki tipauye atuki lakhi eno tipau hukikhalo atuquno nhapuae. 39Jisu no panoqo vilo pi, “Atuqu ikhivelo!” Akithiu Lazar chepu Martha no pi, “Ampeu, pa qhokeu atsala bidi shiveake itehiye munashushuyive aghiniae.” 40Jisu no li vilopi, “Nono pulu aye noye Alhou kimthe jukuvu ithulu nani kepi niye ovilo piveake kumo kesha?” 41Ikelo panonguno atuqu ikhive. Tile Jisu no kunguu jupuku puzu pi, “Apu, ino oshikimthi akeuno nono ino pikeu initsu cheni. 42Noye pulhapuju ino pikeu initsu cheni kepi ino ithi ani, ikemu ino hi piakeuye timi hile puthugho akeqo ghengunoke, ike tiye panongu pelo nono ipuwukepi pulu peniyeke.” 43Pano hipatsa pive puzu asutsa kuloghi lono ighamuku pi: “O Lazar, khalau ipeghilo” 44Akithiu no akumo phino pa phi-au chijepusu eno aphi lakhino pa gi kuzupusu khalau ipeghive. Jisu no tile timi akeqo vilo pi, “Pa kuqhophevelo eno pa pelo wuluve pelo.”
Jisu Pithivenike Kughuthuve
(Mt 26.1-5; Mk 14.1-2; Lk 22.1-2)
45Tilehi Maria putsaniye ighikemi Judami kutomono Jisu no kiu shikeno ithuluve eno pa shou pulukeu auve. 46Ikemu panoqo gholo khamiye Farisimi lau idewono Jisu no kiu shikeno tipau panoqo vilo pivetsue. 47Ikehu Farisimi ngo Achinetomino kuhokumqono ishipi, “Ninguye kishini kya? Kughengu timi hipauno amchipu kumla kutomo shi auvae. 48Ninguno pa pelo hitoi shiauvepe aye timi kumtsuno pau puluveni cheni, eno Rom Yehkipemino ighino akimthe chineki ngo nishiayeh kumtsu puhavetsuni chenie!” 49Ikemu panoqo gholo Kaifa ipikeuno, tipa mpelo Achinetomi shou Akijeu shiake, pano pi, “Nonguye kiumu mthae. 50Ashiayeh lakhi akuchopu pughave penike zuqhulo timi lakhino timiqo ghenguno thivekeu pavi kepi nonguye kumsumla kesha? 51Hiye pa likhi pa kutoshino pikeuke kumoe, ikemu tipa mipelo Achinemi gholo Akijeu kehu Jisu ye pano shiayeh ghenguno thimasa kepi pano tungkupu-tsa pike, 52panoqo ghengu likhi kumo ikemu Alhou nuliqo apanagha akeqo kumqo sawo lakhi shinikehue. 53Ikehu tipa tsala nguno tilaye Judami ayehkipemiqoye kishino Jisu pithive nikeno kuchughu acheuve. 54Tighenguno Jisu ye Judami nhepithe ghi iqho-iqimove ikemu tileno cheve puzu timi kughunamokeu-a phivilo aphu lakhi Efraim ipichekeu phulo wuno akhopemi sasu tilehi ache.”
55Judami Hechekulu Ghulhu kupunu ighive eno timi kutomono aphu lono Jerusalem lo iqhoe, tiye Aghulhu shimphi lono panoqoye shikimthekeu chini niyeke. 56Panonguye Jisu phuche eno panonguno achinekilo kumqokelo lakhino lakhi vilo ishi iniju ae, “Nonguye kiu kumsulu ania? Paye kutomu aghulhulo ighimo nani keniae?” 57Achinetomi ngo Farisimino ahza tsupuakeuno, khukhumu Jisu ye khile ani keno ithi aye tipau panoqo pithilo pie, tishianguno panonguno Jisu kughaluveniyeke.
Àwon tá yàn lọ́wọ́lọ́wọ́ báyìí:
JOHAN 11: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
