APOSTOLMI 5
5
Anania ngo Safira
1Ike timi lakhi Anania eno pa nipu Safira pamano amheghi lakhi je, 2eno pa nipu sasu kuptsaveno jelukeu pisa hamiye pamano qhipe puaveno hami likhi suwo apostolmi ulo sue. 3Pitor no pa vilo pi, “Anania, kushiye Satan pelo omlo qhasuluvepe puzu noye Aghungu Kimthe pishiqhi eno olu jekeu lono pisa ithulukeu hami qhipe puave kya? 4Amheghi jemphi lomu tiye owu eno ti jevekethiu mu pisa ye owue. Imaye, kushiye hikithipu shinikeu omlolo kughuphe kya? Noye timi vilo mikike kumo puzu Alhou zulo mikivae!” 5Anania no hi chilu kemtsa iluqi thive, eno ti chilukemi kumtsu akumsano chhitoive. 6Apumiqono ithuno pa kumo kuzuveno pa khape ipe puzu akumo qhovetsu.
7Ayi kihedo kuthu-a thiu pa nipu iloghi, ti kiu shivekeno liye kiumu mthae. 8Pitor no li vilo pi, “Ivilo pilo, okujo akimi anipuno alu jekeu meye akuchopu hi kesha?” Li no ishi khochile, “Iye, akuchopu tihike.” 9Ikelo Pitor no li vilo pi, “Kishi puzu okujoye kugha kumtsaveno Ampeu Ghungu pejuniye shi kya? Inijulo okimi kumo shi-qhowukemi ahukikhalo cheae panonguno noghi khape ipeve nani!” 10Paikhavino liye Pitor pukhu philo ikiqi thive. Apumiqono iloghi kelo liye thive aghi, eno panonguno li khape ipeve puzu li kimi phivilo qhove. 11Akukuhomi eno hipau tsa chilukemi shou akumsa kumzapu ighive.
Amchipu eno Akumzapu
12Apostolmino timiqo gholo amchipu eno akumzapu kutomo shiphepiyelu. Kupulumi kumtsu Solomon kisheqholo kuhokumqo che. 13Kutamiye panongu gholo kuhonike ighukeu ae, ikemu timiqono shishe panongu gihukeu ae; 14Ampeu puluvekemi, kiptimi ngo totimi kutomo alau alau shi panongu gholo hekutsuluve. 15Ikelauye kusukinimi ghi alaghi lalo khape ighino azua ngo ayephulo puzu, tishianguno Pitor no chewuchekelo pa kusho, likhimu tipaqo shou yekhu puku peniyeke. 16Jerusalem che-axulo aphu akeqo lono timi aqokitikhi ighikha eno kusukinimi ngo tughakusano ghimeqhikeqo saghi kelo panoqo kumtsu shipivilukha.
Apostolmi Shikighime
17Tile achinetou ngo pa gholo kumtsa akemi Sadukimi loji huye anhekushu launo amlozuzushive. 18Panonguno apostolmiqo tshuluve eno akughukilo suve. 19Ikemu putholo Ampeu wu kungumi lakhino akughu hukikha khaqhino panoqo sasu khalau ipe puzu pi. 20“Wulo eno achinekilo puthugho puzu akuxu kithe tsa hipau pesu timiqo vilo pilo.” 21Panonguye hipau chilu puzu tsutho ipeghi kelo achinekilo ilono kutsuthue.
Achinetou ngo pa gholo akemiqono wuve puzu Judami Hoho kuho nike ghenguno Judami Hoho wu muchomiqo kumtsu kukutsue, eno apostolmi saghi penike akughukilo ahza tsupuwu. 22Ikemu kijemi qono akughukilo ighikelo panonguye apostolmi phumlave, ikehu panonguno idewo Judami Hoho lo ishi pi. 23“Ninguno akughuki tokelo tiye tsatsai khape puaghi eno aghukhemi ahukikhalo puthughope khe aghi, ikemu kughou ninguno khaqhi iloghikeno alou khumu kuhave aghie.” 24Kughou panonguno hi chilukeno, achineki khemi shou akijeu ngo achinetomiye apostolmi kishiveakela pi qheghuyive. 25Tileno timi lakhi iloghi puzu panongu vilo pi, “Le nonguno akughukilo suvekemiqoye achinekilo puthughono timiqo kutsu anie!” 26Ikelo akijeuno pawu timiqo sasu wu puzu apostolmi saighive. Tishimu panongu shou aku-agha vesumoe, kughengu timiqono atu pesu panongu veqhi pithivenosa kehu.
27Panonguno apostolmi sailoghino Judami Hoho zulo puthughope, eno achinetouno panoqo vilo ishi iniju. 28“Timi hipau jelono kutsu kevilo pi ninguno tsatsayi ahza tsuvae, ikeghi nongu kukutsu pesu Jerusalem nhakhava, eno timi hipau kithi ningu makho shivetsu niye anie!” #Mt 27.25 29Pitor ngo apostolmino ishi khochile, “Ninguye timi nguno Alhou gholu masae. 30Ningu puasu Lhou no Jisu xuputhuvae, nonguno kros lo pa yedave puzu pithive kemu. 31Alhou no pa xaputhu pesu pa-u ajeu Sakipheu eno Xakuluu shipe, tishikeu lono Israilmi pelo xaideghi lukepudo tsuniye eno panongu xine pevetsu niyeke. 32Hipaqolo ninguno thopimi, eno Aghungu Kimthe ghike, paye Alhou gholukemiqo shou Alhou no agho tsukeuke.”
33Judami Hohomi no ti chilu puzu axuideve eno apostolmi pithiveni shiqhiyive. 34Ikemu Ahohomi gholo Ayezah kukutsumi Farisimi lakhi pa je Gamaliel, khuu timi kumtsuno qhoqhu gihu chekeno pano Ahoho lo puthughono apostolmi khalau ipeve aghipe nikeu zah tsue. 35Tishino pano Ahohomi vilo pi, “Israil lo timi ipikeqo, nonguye timi hipaqo shou kiu shiniye anikeno tsaquyi shipaghilo. 36Kughengu wovekeu tsala ghulokilo ghi Theudas ipeghi eno pa ghi pa shelo kije kepi puzu timi 400 toike pa gholo checheke. Ikemu pa pithive eno pa gholo kichemi apanaghaveno tino panoqo shekha shiveke. 37Hipathiu, timi lhoxu kihike ghulokilo Galilmi Judas ipeghi, pano saphepiye puzu timi khamino xukide ipeghi, ikemu pa ghi pithive eno pa gholo chechekemi kumtsu kuhave. 38Ike, hipau shelo ghi ino nongu vilo piani, timi hipaqo shou kiumu shikevelo eno panoqo lokutovelo, kughengu panongu kukughu kumla hipau timi launo ighikeu shiaghi aye hauve nani; 39ikemu tsala kuchouno Alhou launo shiaghiaye nonguye panongu theqhivemla eno nonguno Alhou mujochilekeu shiaghiluvike!” Ahohomi no pano pikeulo pulosulu khave. 40Panonguno apostolmi ku-suno panoqo ghaqhipe eno khilemu Jisu jelono timi putsa kevilo pi a-ghoshi ahzatsu, tishieno panongu phepuwuve. 41Apostolmino Judami Hoho lono alokivishi cheve, kughengu Jisu je ghenguno shikukujo pekepushi Alhou no panonguye akuzuepi kishelupe kehu. 42Tsalakipetsu achinekilo ngo timiqo kilo panonguno Jisu ye Mesiya ke pikeu tsakiviu pesu tamono asheshu ae.
Àwon tá yàn lọ́wọ́lọ́wọ́ báyìí:
APOSTOLMI 5: SUMIBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.