JOHAN 2
2
Kana Khua A Kitenna
1Huan ani thum ni in, Galili gam a Kana ah kitenna a-om a, huai ah Jesu nu a-om hi. 2Jesu leh anungzuite leng kitenna ah chial in a-om uhi. 3Uain abeitak in Jesu nu'n akiang ah, “Uain atasamta uh e,” achi hi.
4Jesu'n akiang ah, “Numei, nang na hon theihsak ding bang ahia om? Ka hun atung nai kei hi,” achi hi.
5Anu'n sikhate kiang ah, “Na kiang ua agen peuhmah hih zel un,” achi hi. 6Huan Judate silsiang dan bang in suang tuibel guk, buk sawmli mun nih hiam, mun thum hiam ta chiat, huai ah atung uhi. 7Jesu'n akiang uah, “Tuibelte tui in dimsak un,” achi hi. Agong toh kikim in adimsak chiat uhi. 8Akiang uah, “Tu in dim unla, nekbawl thusa kiang ah paipih un,” achi hi. Huchi in apaipihta uhi. 9Nekbawl thusa in, tui uain hong suak achiam a, ahong kipatna athei kei a, tuidim sikhate'n ahihleh athei uh, mouneipa asam a, akiang ah, 10“Michih in atung in uain hoih ahawm ua, atam deuh adawn nung un, ahoih lou ahawm uh; nang bel tutan in uain hoih na kem lailai a,” achi hi.
11Jesu'n hiai a thillamdang hihpatna Galili gam Kana khua a ahih ahi; athupina alangsakta a; anungzuite'n amah agingta uhi.
12Huan huai khit in Kapernaum ah ahohsuk a, amah leh anu toh, a-unaute leh anungzuite toh; huai ah ni tam lou a-om uhi.
Pathian Tempul Siansakna
(Mat 21.12-13; Mar 11.15-17; Luk 19.45-46)
13Huan Judate Paikan Ankuangluina anaita a, Jerusalem ah Jesu ahohtou hi. 14Tempul a bawng, belam leh vakhu zuak leh dangka kheng a tute amu hi. 15Huan khauhual in zepna ding abawl a, belam leh bawng avek un tempul a kipan adelhkhia a, dangka khengte dangka asungbua a, adohkante uh leng asawnpuksak hi. 16Vakhu zuakte kiang ah, “Hiai thilte hiai a kipan paipih un, ka Pa inn sumsinna mun in bawl kei un,” achi hi. 17Huan “Na inn a ka phatuamngaihna in ahon gai ding,” chih gelh ahi chih anungzuite'n athei nawnta uhi.
18Huchi in Judate'n akiang ah, “Hiai na thilhih chiamtehna bang ahia na hon lah theih?” chi in adong uhi.
19Jesu'n akiang uah, “Hiai inn hihse le uchin, ni thum sung in ka tungding nawn ding,” chi in adawng hi.
20Huan Judate'n, “Hiai inn kum sawmli-le-guk sung lam ahi, nang ni thum sung in na tungding ding maw?” achi uhi.
21Himahleh amah pumpi inn thu gen ahi zaw hi. 22Huaiziak in misi lak a kipan athohnawn in, anungzuite'n huai thugen athei nawnta uhi. Laisiangthou thu leh Jesu thugen agingta uhi.
Jesu Kikangkoihna
23Huan Jerusalem a Paikan Ankuangluina a-om lai in, athillamdang hihte amu ua, mi tampi in amin agingta uhi. 24Himahleh Jesu bel alak uah akikangkoih a, mi tengteng athei hi. 25Mihing thu kuamah hilhchet akiphatmoh louh ziak in; amah mah in mihing sung a om peuhmah athei ngal hi.
Àwon tá yàn lọ́wọ́lọ́wọ́ báyìí:
JOHAN 2: PAITBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
