MATTHAI 5
5
1Mibu kha a hmuh tikah tlâng cungah a kai i a ṭhut hnu ah zultu kha a sinah an ra. 2Akâ pau in hitihin a cawnpiak hna: 3“Thlarau in sifakmi cu mithluachuak an si, zeitintiah vanbawi pennâk cu anmah ta a si. 4Ngaihchiami cu mithluachuak an si, zeitintiah hnangam tein an um te lai. 5Lungnêmmi cu mithluachuak an si, zeitintiah vulei ro an co te lai. 6Dinnâk i rawlṭâm tihalmi cu mithluachuak an si, zeitintiah khim tein an um te lai. 7Zângfahnâk a ngeimi cu mithluachuak an si, zeitintiah zângfah an si ve te lai. 8Lungthin a thiangmi cu mithluachuak an si, zeitintiah Pathian an hmuh te lai. 9Daihnâk sertu cu mithluachuak an si, zeitintiah Pathian fa tiah kawh an si te lai. 10Dinnâk ruang i serhsatmi cu mithluachuak an si, zeitintiah vanbawi pennâk cu anmah ta a si. 11Keimah ruang i lih le thilṭha lo phunkip an in puh hna i serhsat le sikvelh nan tuar tikah mithluachuak nan si te lai. 12I lawm u law, i nuam tak tak ko u, zeitintiah vanah a nganmi nan ṭuanman a um, zeitintiah nanmah hlan i profet hna zong cubantukin an rak serhsat cang hna. 13“Vulei cite nan si; asinain cite hi a alnâk a loh ahcun, zeitindah alter a si khawh ti lai? Hlawnh i lamh ding sawhsawh dah tilo san a tlai ti lo. 14“Vawlei ceunâk nan si. Tlângcung tlakmi khua cu thuhkhawh a si lo. 15Minih mei-in vângin kho in an khuh bal lo, innchung i a ummi vialte a ceuh hna nâkhnga a chiahnâk ah an chiah tawn. 16Cubangin nan ceunâk cu mi hmaiah ceu seh law nan tuahmi ṭhatnâk kha an hmuh lai i van i a ummi nan Pa kha an thangṭhat lai. 17“Nawlbia siseh, profet bia siseh hrawh awkah ara tiah ka ruat hlah u. Hrawh awkah si loin tlinter awkah ka ra. 18Zeitintiah biataktein kan chimh hna, lei le van an rawh hlan pauh cu Nawlbia chung i a deh hmete le a rin hmete zong an rawk lai lo. A dihlak i a tlinhlan pauh cu an rawk lai lo. 19Cucaah hi Nawlpêkmi lak i a hmebik hmanh a buar i midang zong a buartertu pauh cu vanbawi pennâk ah mi hme bik an ti lai; asinain mizei pauh zulin, midang a cawnpiaktu cu vanbawi pennâk ah mingan an ti lai. 20Zeitintiah nan dinnâk nih nawlbiacawnpiaktu hna le Farasih hna dinnâk a lonh lo ahcun vanbawi pennâk ah nan lut hrimhrim lai lo, tiah kan chimh hna. 21“Hlan liomi hna sinah, ‘lai nawng hlah, lai nawngmi cu biaceihtu hmaiah chuahpi a si lai,’ tiah an rak chimmi nan theih. 22Asinain a chan um lo i a unau cungah a thin a hungmi pauh cu ṭih a nungmi biaceihnâk ah chuahpi an si lai. A unau sinah, ‘mimolhpa’ a timi pauh cu biaceihnâk sângah chuahpi an si lai, ‘mihrutpa’ a timi pauh zong ṭih a nungmi hell mei ah a kal lai, kan ti hna. 23Cucaah biakṭheng cung i raithawinâk thil na ratpi lio ah, na unau nih na cungah lungsilonâk a ngei ti kha na hngalh ahcun, 24biakṭheng hmaiah na pêkmi thil kha chia ta law, kir ṭhân, na unau sinah remnâk vatuah, cun ra ṭhân law na pêk hngami thil kha va pe. 25Na ralpa cu lam i nan kal lio ah remnâk tuah, culoahcun na ral nih biaceihtu hmaiah an chuahpi lai, biaceihtu nih uktu sinah an in chanh lai i thongah an in thlak lai. 26Biataktein kan chimh, fangkhat te tiang na cham lo ahcun cuka hmun cun na chuak ti lai lo. 27Ṭângdang kai hlah, tiah hlanlio mi hna sin i chimmi nan theih cang. 28Asinain kei nih cun, sualpi duhnâk mit in nu a zohtu pauh cu a lungthin in ṭângdang a kai cang, kan ti hna. 29Na orhlei mit nih an tlukter ahcun khoih law hlawnh, na pumpuluk, hremhmun i hlawnhnâk cha cun, na pum nge pakhat hloh cu na caah a ṭha deuh. 30Na orhlei kut nih an tlukter ahcun tan law hlawnh ko. Na pumpuluk, hremhmun i hlawnhnâk cha cun, pum nge pakhat hloh cu na caah a ṭha deuh. 31Nupi ma mi nih mâknâk ca kha pe ta seh tiah, ti a rak si. 32Asinain keinih cun ṭângdang a kai ruangah si loin thildang ruang i nupi a ma mi cu a nupi ṭângdang a kai tertu a si. Mâkmi nu a ngeitu zong ṭangdang kai a si. 33Hlan lio mi hna sinah, lih in chiat i serh hlah, BAWIPA sin i chiat na serhmi tu cu tlinter ko, an timi nan theih cang. 34Asinain kei nih cun, chiatserh in bia i kam hrimhrim hlah u. Van chalh in chiat i serh hlah u, zeitintiah cucu Pathian bawiṭhutdanh umnâk a si. 35Vulei chalh in chiat i serh hlah u, zeitintiah cucu a ke chiahnâk a si, Jerusalem chalh in chiat i serhhlah u, zeitintiah cucu a liannganmi Siangpahrang khualipi a si. 36Na lu chalh in chiat i serh hlah, zeicatiah na samfa pakhat te hmanh na rânter in na nahter kho lo. 37Na chimmi bia cu a simi kha ‘asi’ ti law, a silomi kha ‘a silo’ ti ko. Cupin lei pauhpauh cu Misual pa sinin a rami a si. 38‘Mit caah mit, ha caah ha, an ti nan rak theih bal cang’. 39Asinain kei nih cun misual ralchanh lo dingin kan chimh hna. Na orh lei biang an bengtu sinah khatte lei biang zong i chit rih. 40Na angki lâk duh ah taza an in cuai ahcun, na puan zong va pêk chih. 41Meng khat an in kalter ahcun, meng hnih va kal. 42An haltu sinah pe law, an cawitu sinah cawih ko. 43Na innpa daw law, na ral va hua, an timi nan theih cang. 44Asinain kei nih cun, nan ral va daw hna u law, chiat an serhtu kha thluachuah va pe hna u, an huatu hna caah ṭhatnâk tuah u law, an diriamtu hna le serhsattu hna caah thlacam u, 45cucu van i a ummi nan Pa fale nan si khawh nâkhnga caah a si. Anih nih cun misual le miṭha cungah ni a tlanter i miding le miding lo cungah ruah a surter. 46Zeitintiah an dawtu hna lawng nan dawt ah hin, zeidah a man nan hmuh? Ngunkhuai khawltu hmanh nih cucu an tuah ve lo maw? 47Cun nan unau sin lawngah biaṭha nan chim ah hin, zeidah a man nan hmuh? Ngunkhuai khawltu hmanh nih cucu an tuah ve lo maw? 48Cucaah van i nan Pa a tlin bantukin nannih zong nan tlin ve awk a si.
Àwon tá yàn lọ́wọ́lọ́wọ́ báyìí:
MATTHAI 5: HAKABSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
