MATTHAI 11
11
1Cun hitihin a si, Jesuh nih zultu hleihnih nawl a pêk dih hna hnu ah, anmah khua cio i cawnpiak le phungchim awkah cu hmun cu a chuahtâk. 2Johan nih thong chungin Krih rianṭuannâk thawng a theih tikah, a zultu pahnih a thlah hna i, 3A sinah, “A ra dingmi cu na si maw, midang dah kan hngah rih lai? tiah an hal. 4Jesuh nih, “Va kal ulaw, nan hmuhmi le nan theihmi hna hi Johan cu va chim u; 5Mitcaw mi nih khua an hmuh, kei beimi ke in an kal, thinghmuimi an thiang, hnachetmi nih thawng an theih, mithi hna thawhter an si i sifak hna nih thawngṭha an theih. 6Keimah kong i a lung a hring lomi cu mithluachuak an si;” tiah a leh hna. 7An kal hnu ah, Jesuh nih Johan kong kha mizapi sinah a chim, “Zeizohahdah ramcar ah nan kal? Thli nih a hninhmi hluangkung zoh ah maw? 8Zeizohsetahdah nan kal kha? Â dawhmi puan in â ṭamhmi zoh ah maw? A ngai ngai ti ahcun, puan dawh â aihmi cu siangpahrang in ah pei an um tawn cu. 9Asiah zeizohsetahdah nan kal? Profet zoh ah maw? A si ko khah. Kan chim hna, Profet nâk hmanh in a ngan deuh. 10Zeitintiah, “Zohhmanh ka lamkal na hmaiah ka thlah. Amah nih na hmaiah na lam a remh lai,” tiah a kong ṭial a si. 11Biataktein kan chimh hna, nu hrin lakah Baptisma petu Johan nâk ngan an um rih lo, asinain vanbawi pennâk i a hme bik zong amah nâkin an ngan deuh. 12Cun baptisma petu Johan cân in atu tiang vanbawi pennâk nih zângen in tuknâk a ton tawn, cun zângen a hmangmi hna nih hranhrâm loin an lâk tawn. 13Zeitintiah Profet vialte le nawlbia nih Johan tiang kha an rak phuan. 14Nan cohlan duh ahcun, hihi a ra laimi Elijah cu a si. 15Theihnâk ding i hna a ngeimi nih thei ko hna seh. 16Asinain atu chanthar mi hna hi zeihedah kan tahchunh hna hnga? Market ah a ṭhumi ngakchia â chawn lengmang mi hna, 17“Thanglawi kan tum i nan lâm duh lo. Kan in tuarpi hna i nan ngaih a chia fawn lo,” timi bantuk nan si. 18Zeitintiah Johan cu a ra i a ei in a ding lo, khua chia tuahmi nan ti. 19Mi fapa a ra i a ei, a ding, zohhmanh u, zuram le pawkau pa, ngunkhuai khawltu le misual hna hawikawm nan ti. Asinain fimnâk cu a fale nih thiam an coter ko. 20Cuticun an i ngaihchih lo ruangah khuaruahhar tambik a tuahnâk khualipi kha a sîk hna. 21Korazin, a poi tuk ê, Bethsaida, a poi tuk ê! Zeitintiah na sin i tuahmi khuaruahhar hna kha Tair le Sidon khua ah tuah hei si sehlaw, buri puan aih le lei dipah ṭhu in tuanah an i ngaihchih diam ko hnga. 22Hihi kan chimh hna, biaceih ni ah nan tuarding cu, Tair le Sidon khua tuar ding nâkin a zualhma deuh lai. 23Nang Kepernaum van tawngin cawisan sihmanhsehlaw, mithi khua ah hlawnh na si te lai, na chung i tuahmi khuaruahhar thil hna kha Sodom khua ah tuah hei si sehlaw, atu tiangin a um rih ko hnga. 24Sihmanhsehlaw kan chimh, biaceih ni ah cun Sodom ram tuarmi nâk hmanh in na tuar ding cu a zualhma deuh lai. 25Cu cân ah Jesuh nih, “Maw, ka Pa, lei le van Bawipa, Nangmah nih mifim le mithiam hna lakah hi bia hi na thuh i ngakchia sem sin tu ah na phuan caah lawmhnâk bia kan chimh. 26Asi, ka Pa, cubantuk tuah cu na hmaiah a ṭhami a si. 27Ka Pa nih thil vialte ka kut ah a chiah cang, Pa dah ti lo cun ahohmanh nih Fa hi an hngal lo. Pa zong cu Fa le an sin i Fa nih a hngalhter duhmi dah ti lo cun ahohmanh nih an hngal kho lo. 28Nannih a bami le thilrit a phormi vialte hna, kasin ah ra ulaw, dinhnâk kan pêk hna lai. 29Ka hngawngkual i banh ulaw, ka sin in cawng u. Lungthin a nêmmi le toidormi ka si. Cuticun nan thlarau nih dinhnâk a hmuh lai. 30Zeitintiah ka hngawngkual banh cu a nuam i ka thil zong a zâng” tiah a ti.
Àwon tá yàn lọ́wọ́lọ́wọ́ báyìí:
MATTHAI 11: HAKABSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
