SAN MATEO 14

An jama'paxana Juan tama'nilh

(Mr. 6:14-29; Lc. 9:7-9)

1Anchunu panch'e'ex an rey Herodes asmatlhi li sawalhcha ixlichiwinkani an Jesús, 2Pus an ixma'tsukunin jajuniy:

―Yucha an jama'paxanaj Juancha la'awcho'olh, xliyu lay lhilak'ilhtuy yu masuy an ix'alhp'asninti Dios.

3Chunchacha ixnajun an Herodes, mu ixmalaklhchajuta laka pulach'ini an Juan, wa xliyu li an Herodes ixt'at'ajuni ixt'iwi wa ixt'ala'ajuncha, yu junkan Felipe, an ixt'iwi Felipe ixjunkan Herodías. 4Chi mu an Juan ixjuniya an Herodes:

―Jantu oxi li t'ats'uk'uniy an ixt'iwi ixjunita mint'ala'ajun Felipe.

5Chi an Herodes ixma'niputuni an Juan, pero wa ixjatalhamniya an lapanakni li kaxtat'atasp'itchalh, mu an lapanakni ixtakiklaka'iya li an Juan Diosi ixmakminta. 6Walh akxni la'tsalh ixk'ata an Herodes, chi ixk'atanit'ajuncha, an istsi an t'aku Herodías jat'inilhi ixtan'ajni an tan ixk'atanikan, pus oxicha lhiwilalh an Herodes. 7Wa chuncha an Herodes juniy an jatsi li kaxta'ni'oya wa tuchicha kask'iniya', jantucha wa lhi'elh'amanan. 8Pus an jatsi, mu ixmap'a'sitacha an ixnati, najun:

―Ak'ixt'a'nin laka pulatoj an ix'a'tsulh jama'paxanaj Juan.

9Wa chuncha an rey Herodes ta'oxila'alhilh pero mu ixjunitacha li kaxta'niya sawalhi watuchicha kask'iniya chi ta'asmat'acha an yu ancha ixtat'awilanalh laka mesa, pus lhinawlhcha li kaxta'nikalh. 10Lhinawlhcha an rey Herodes li ka'a'cha'xkalhi an Juan an laka pulach'in. 11Lhiminkalhcha an ix'a'tsulh laka pulatoj, xta'nikalhcha an jatsi chi yucha xta'nilhcha an ixnati.

12Wa chuncha tacha'alhi an ixt'alhtanan an Juan, taki'ilhi an ixlakatunaj, tamaknulhcha chi ta'alhcha juninini an Jesús.

La'akisi milh lapanakni jamawalh an Jesús

(Mr. 6:30-44; Lc. 9:10-17; Jn. 6:1-14)

13Akxni k'atsaalhcha an Jesús li tama'nilhi an Juan, tajulhcha laka barco, alhcha ma'at tan wa jasa'nik'a, pero an lapanakni tala'ts'ilhi tan pu'alh, pus tat'a'alh, yu'uncha wa lakaat'uni tapu'alh akxni tataxtulh an la'acha'anaxni. 14Chi akxni ixtakutt'ajuncha an Jesús, la'ts'incha li wa ts'anakscha ixlakyakalh, pus ixjamapayniycha, jak'uch'ulhi an yu wa ixtala'ta'an'ay. 15Ixtats'isit'ajuncha, an ixt'alhtanan an Jesús tajuniy:

―Ani jantu xamati wilh chi ta'oxaycha, k'aja'un an lapanakni li kata'alhcha an la'acha'anaxni para li katatamawlhcha yu kata'uya'.

16Yucha jajuniy:

―Jantu task'iniya li inta kata'alh, k'ajaxt'a'nitcha uxitnani yu kata'uya'.

17Pus ta'alhtaylh tajuniy:

―Wa a'xkisi pan chi wa ma'at'uy jatanti iklhit'awnaw.

18An Jesús jajuniy:

―Akilalhiminiw.

19Wa chuncha an Jesús jajuniy an lapanakni li katalaktawilhka an tan jala'awnininta. Xa'a'ilhcha an a'xkisi pan chi an ma'at'uy jatanti chi, tala'st'alhcha an lakt'iyan, xta'lhicha lhimala'puchajun. La'ch'e'elhcha an pan chi jala'xta'nilhcha an ixt'alhtanan. Yu'uncha tamala'pitsilhcha. 20Ixchuxchak'ani talak'ulh chi talhikiklalhcha. Ixli'astan tamach'ixtamilhcha la'akawt'uy kanastaja an xaxajni pan chi an jatanti akxni talakway'olhcha. 21Katacha la'akisi milh lapanakni yu talakwaylh, an t'akunin chi an jas'at'an jantu jat'aput'e'ekalh.

An Jesús ukxjalhtanan an alamalh

(Mr. 6:45-52; Jn. 6:15-21)

22Ixli'astan an Jesús, jajuniy an ixt'alhtanan li katapu'alhcha an barco an ixtapiktutam lakxkan, mu yucha ma katijala'axa'alaya an lapanakni li kata'ancho'oyacha. 23Akxni ta'alhcha an lapanakni, an Jesús alhcha tapaynini a'stitawk'a, wa ix'akstu. Walh tats'isilhcha, yucha anchaka ixt'awnachalh wa ix'akstucha. 24An ixt'alhtanan ixtan'ajnicha an lakxkani ixtapu'antachalh an barco. Wa milh, milhcha ixlaklayi an xkan, mu an un p'asi wa ixjalakatast'uk'a, chi p'ascha ixmalaklay an barco. 25Ixtunkunmintacha, las trescha, jataymalhcha an Jesús, wa ix'ukxjalhtanaj'anta an lakxkan. 26Pus an ixt'alhtanan mu ixtala'ts'incha li ix'ukxjalhtanani an lakxkan, ixtalaktalhanancha, p'ascha ixtalaknajun:

―¡Ka wa takuwincha! 27Pero an Jesús jaxa'alalh watukan, jajuniy:

―¡Oximaj'ayi k'a'unt'it, mu kit'in, jant'u k'alakt'alhanant'it!

28Pus an Pedro alhtaylh, juniy:

―Li uxint'i Jamach'alhkat Jesús, k'a'ilht'u li lay akla'ancha'an an la ix'ukxni lakxkan.

29Yucha juniy:

―K'at'at'icha.

Takutlhi an laka barco an Pedro, ukxjalhtanaj'alhcha an lakxkan an tan ixyachalh an Jesús. 30Pero akxni la'ts'ilhi an Pedro li p'asi ixmin an un, talhanalh, pus tsukulh talak'aknuy, chi ixpukilht'asaycha, ixnajun:

―¡Jamach'alhkat, ak'ima'alht'axt'ut'i!

31Watukan las mak'anilhi an Jesús, ma'ch'apachalh, chi juniy:

―¡Jantu ayi mijakiklaka'inti! ¿T'asu li jant'u k'ilhiwilayi?

32Wa chuncha sa'cha walhi an un akxni tatajulhcha an laka barco. 33Ixli'astan an yu ixtatajumanalh an laka barco stalhcha tala'alhi an Jesús, chi tatatso'ottanilhcha, tajuniy:

―Uxint'i isTs'alhk'at'i Dios sawalh.

An Jesús jak'uch'ulh ta'an'anin

(Mr. 6:53-56)

34Akxni tapatakutchalhcha an lakxkan, tacha'alhcha xalakaat'un tanchun junkan Genesaret. 35Walh akxni tamispalhi an Jesús an lapanakni an yu ancha tawilanalh, tama'pitsi'olhi chiwinti ta ixlijalhi'ay, pus chux an ta'an'anin jalhicha'anikalhi an Jesús. 36Ixtatapayniniycha li ma kajamakawnilhi masi wa yucha an ixpiktucha ixla'ch'it katapiktuch'apanichalh, yu an tach'apanichalh an ixla'ch'it ixchuxk'ani tatak'uch'ulh.

Àwon tá yàn lọ́wọ́lọ́wọ́ báyìí:

SAN MATEO 14: tpp

Ìsàmì-sí

Pín

Daako