Lík 24

Yéesu li ayitowul li eketayi

(Máciya 28:1-10; Maak 16:1-8; Saŋ 20:1-10)

1Muñeˈe li líiŋ li hunakahu hútinaalahu hata esimenayi, kanaalaabuku li kujow li bújom bíb bajuk huyaakahu hata Yéesu. Li kulako ejowayi li kújowetumoo múki’ man kutofotoole li eheeñ. 2Nan kúliiŋumuu, li kutook hugisaahu háfibumuu kánoonumaku kata huyaakahu, ho mabakkeneli kaan li kakaŋ kánoonumaku. 3Kanaalaabuku li kunoken li huyaakahu kúliiŋ, kujukut ehuluŋayi yata Amaaŋenawu Yéesu. 4Bajukelabu ban kujukumuu li bújiyiil li kuliiwo kulako to. Kánayine kúl̥uba, kakaanowe wañ waleñe li kúfululiil. 5Emmuu kanaalaabuku kúkolikoli ŋáa’, li kúsiten. Kánayinaabuku kúl̥ubaaku li kooniil:

— Wáa újiye li joono li huŋes li kaketumuu, anawu aanomuu li buloŋ? 6Alet láale, bale layitowuuyitowul li eketayi. Jiwayil̥o wahawu wan alobuulumuu nan alakomuu li etaamayi yata Gálile: 7«Añool-An laate abeti li kuŋen kuhoofoola, min kubaaŋool li ekuluwa, ban li ayitowul li eketayi li hunakahu húhaajutahu.»

8Muñeˈe kanaalaabuku li kuwayil̥o kulimaku kan Yéesu alobiil nomuu. 9Li kúlaañumul bata huyaakahu kúliiŋul, li kulob mabajumuu feh kúgoomaku kuŋen li ano, li bukan kaabuku feh. 10Kanaalaabuku umbuku buko koonomuu: Mali Madala, Saan li Mali jaawawu ata Saak. Kanaale kaabuku kan kunaboomuu li kulob manolamu kufootalaku. 11Bale Kufootalaku li kuyinoo li koon wahawu wan kanaalaabuku kulobiilumuu bul̥uuhoo, kúyinenutiil. 12Muñeˈe Fiyeel li ayito atey boot bata huyaakahu álíiŋ, li aŋaalo li huyaakahu li ajuk ló ul̥aacawu wata úbilawu bale. Li alaañ ajow bóot, masegowe ŋáa’ mata wahawu wabajumuu.

Yéesu li áfu’ kúgoom kúl̥uba li bútinabu bajowumuu boot Emáyis

(Maak 16:12-13)

13Li hunakahu unhu hanolahu, kúgoom kúl̥uba li kulako ejow boot li ésuk yakee yan koone Emáyis. Li ésukayi inyu boot Yeelusalem iyilo baj sikilomeet soono kuŋen. 14Kúgoomaku li kulako elob mata wahawu feh wabajumuu. 15Nan kulakomu elobayi li búwonnoolabu, Yéesu humumool li ákoojuliil min anaboo li buko. 16Kúgoomaku li kujuk Yéesu, bale li baj wah wáhiliil kúhaasumool. 17Yéesu li aaniil:

— Waa jíwonnoole li wo, mo jijowemaa?

Li kuyiten, máyiyeniye ŋáa’. 18Akee li buko an koone Kilewofaas li aan Yéesu:

— Kama li bukanabuku kalakomuu Yeelusalem feh, awu baleyi ujamutumuu wahawu wabaj bomuu kunakaku unke?

19Yéesu li aaniil:

— Wah way?

Kúgoomaku kúl̥ubaaku li koonool:

— Wahawu wabajumuu Yéesu ata Nasalet! Lakankaan afulofet. Bakaanelabu boola bubabbaj sembe li kulimaku koola, hákil Ateemit li hákil ésukayi feh. 20Huhaanaahu hata élambaayi yoololaal li kunahaanaku koololaal li kuŋa’ Yéesu kusen Filat min aan laate aket, ban li kubaaŋool li ekuluwa. 21Jíyinenenyinen kaanaku okila aateenumuu afaken kata Isilayeel. Bale famen to li wahawu unwu feh, síyaat hunak húhaajut nan wahawu unwu feh ubajumuu. 22Li mal̥egenamu, babbaj kanaale kakee li óloli kákaanoli jisego ŋáa’. Kújowaalijowaali síyaat li bújomabu boot bata huyaakahu. 23Bale nan kúliiŋumuu kutookut ló ehuluŋayi yata Yéesu. Muñeˈe li kúlaañul kubil kóonoli emalaka éfuliil min yooniil, Yéesu ummu li buloŋ. 24Kukee li kúfaaloli li kujow boot bata huyaakahu kúliiŋ, mal̥egen li kujuk wahawu feh loon kanaalaabuku kukittenumuu, bale Yéesu okila, kujukutool ló.

25Muñeˈe Yéesu li aaniil:

— Bale mo jikite jíbaamo! Mo jikite jiŋaay káyinen wahawu feh wan kufulofetaku kulobuulumuu! 26Kama Afakenaawu aateenut álaam loon muñowu átowum alako li máyiineniyamu moola?

27Fúlum tó, Yéesu li akitteniil wahawu feh walobimuu uya li okila li Bakiicelabu foof bo feh, kítum li síliibalasu sata Móyiis ló li sata kufulofetaku feh.

28Nan kúliiŋumuu li ésukayi, ban kúgoomaku kúl̥uba kulakomuu ejowayi, Yéesu li akaan loon boot min ajow ahaaŋ. 29Bale kúgoomaku kúl̥ubaaku li kujokool min koonool:

— Ulako taate li óloli, mata títiimoye, ban banakabu bumbu li bujon. Mal̥egen Yéesu li anoken li eluufayi kujow kulako ló. 30Nan kubahumuu boot hutiñahu, Yéesu li aŋa’ húmbuuluwahu min ásooniyen ho aban, li amuncul ho aseniil. 31Muñeˈe li kaaniil gáam, li kukit kuhaas koon kama okila Yéesu. Bale li ayaan ájim to hákiliil. 32Kúgoomaku kúl̥uba li kugel̥l̥enoo koon:

— Inti súfolasuf loon sambun sóomiwola káta láala, nan alobumuu li alola li nan alakowolamuu bakittenabu bata Bakiicelabu, alolaal li ejowayi.

33Kúgoomaku kúl̥ubaaku li kuyaan kuyito kulaañ boot Yeelusalem. Kúliiŋ, li kutook bo Kufootalaku kuŋen li ano mawooge li kufaaliil kaabuku, 34min koonemuu:

— Li mal̥egenamu, Amaaŋenawu lajukoojuk!

35Kúgoomaku kúl̥uba li kukitteniil wahawu wabajumuu buko li ejowayi li bútinabu, li buu kúhaasummuu Yéesu nan alakomuu kamunculaku kata húmbuuluwahu.

Yéesu li áfu’ kúgoomaku koola

(Máciya 28:16-20; Maak 16:14-18; Saŋ 20:19-23; Bakaanelabu 1:6-8)

36Nan kúgoomaku kúl̥uba kulakomuu elobayi loon muñaˈa, Yéesu humumool li áfululiil li tut min aaniil:

— Kásuumaay kulako li bukuluul#24:36 Hulimahu unhe hulet li síliibal sakee li sahaanasu!

37Kúgoomaku li kuwaŋulo ban li kúkoli ŋáa’, min kuyin li koon áfulafu’ kujuke. 38Bale Yéesu li aaniil:

— Wáa újiye li jiwaŋulo? Wáa újiye lí jíwettoo li uyinumuul? 39Fan jijuke kuŋenaku kúmbaam li kootaku kúmbaam. Laalu ínje humumom! Jigolom min jijuk, mata áfulafu’ abajut eniil, abajut siwuul. Injé libaje, jiyilo jijukelom min jijuk.

40Nan alobumuu loon muñaˈa aban, li áhiisiil kuŋenaku koola li kootaku koola. 41Emmuu buko bayiliwolut kúyinen, mata ésuumansuum yáamak elako li buko, ban foof li kusego ŋáa’, Yéesu li agel̥l̥eniil aaniil:

— Jibaje taate mutiñaay?

42Li kusenool humuncul hata jiwol jasowi. 43Li aŋa’ ho atokoñ hákiliil. 44Ban li aaniil:

— Wahawu unwu lilobuulumuu nan ilakomuu li bukuluul, eenuul: wahawu feh wakiicimuu uya lí ínje li eluwaayi, lí Síliibalasu sata Ukijenawu, woote ubaj.

Yéesu li alob waa Hulimahu hata Ateemit hulobe

45Muñeˈe Yéesu li ábabuliil uyinum min kuyili kúnaanum Bakiicelabu. 46Ban li aaniil:

— Muñeˈe bakiicelabu bulobe: Afakenaawu laate álaam ban fan ayitowul li eketayi li hunakahu húhaajutahu. 47Ban kúgoomaku koola koote kúwaalewum li kajawaku koola hákil bukanabuku feh, kítum Yeelusalem, kooniil kukat kahoofoo min kútiiwo kuŋa’ buloŋ buwunkul, min Ateemit abonket uhoofoolawu wooliil. 48Bukuluul jimaatumuu wahawu unwu. 49Ban ínje humumom fan íboñuluul wahawu wan Atuubawom aanumuu fan asen wo. Bale jilako li ésukayi boot yok nan sembaasu sata haatiya sommuu li síwalowul sibil silako li bukuluul#Bakaanelabu 1:4-5.

Yéesu li ajow boot li emitayi

(Maak 16:19-20; Bakaanelabu 1:9-11)

50Fúlum tó, Yéesu li ájowetum kúgoomaku koola kúfu’ li ésukayi, kujow kulehen ésukayi yata Betani, kúliiŋ, li ateb kuŋenool min ásooniyeniil. 51Nan Yéesu alakomuu kásooniyenaku kooliil, li akatiil to min Ateemit aŋalool ájowetum boot li emitayi#24:51 Sakee li síliibalasu sihaanasu sibajut «ájowetumi boot bata Ateemit». 52Kúgoomaku buko li kumanenool kuban, li kulaañ boot Yeelusalem li ésuumahukow ló yáamak. 53Kúliiŋ bó, kunaakut kukat kawoog li eluufayi yata Ateemit, min kunaak kusal Ateemit.

Àwon tá yàn lọ́wọ́lọ́wọ́ báyìí:

Lík 24: cskDBL

Ìsàmì-sí

Pín

Daako