RAPHA HIQWA LAK 8
8
Rathup Jujang Thumto
1Shiikeawe raq Nowaq nai apaiq rai lai mong na nyamse thun sitlaq kra laqbaiq mak riito. Kiimaq apaiq raq ra tiihaito. Kiimaq jü ka riiwan wan she riiwanto. 2Hiqmong wa khamrai kuksetiim thun nai ra na khamkuk kilü thun ka ashaq she riibaiqto. Kiimaq rajun ka tsaqto. 3Kiimaq jü ka chaosusu maq riiwan wan she ranaiq shishi ri raroq biingi na saüli riiwanto. 4Raüta jipi lümiishi wa jikham ramiishi ranaiq na lai ka Ararat pum kaü thaq na ngakito. 5Jü lüm ka rüwan ruq li rüwanto. Kiimaq jipi lüroqshi she angu na kra jipi wa jiha ranaiqshi ranaiq na pum khupo thun kra tiichhi phato.
6Kra jai maq raroqblai siraüta Nowaq raq kitanpu ashi ka dito. 7Raüta khala kaü ashi ka tiibibaiqto. Riita kra kaü ka jangwa mak she riito. Shatmaq jü wiita mirü shaq wiiwii ra na tro biruq li bito. 8Kra bala na hali, Nowaq raq haütaü kaü ashi kra hali tiibibaiqto, jü ka riitiishea riimak shaq li wa kra sap ma. 9Shatmaq kham raq hiqraikhü ka lümshat li kha maq, haütaü kaü raq athiim chang hiq ka hummak riito. Kra ningkhan wushi kaü ka lai na hali jang wa nongto. Kiimaq Nowaq raq ajaq maq lapto. Raüta lai mong na hali thüto. 10Apaiq raq ramiishi hali khe nongto. Raüta kra haütaü kaü ka tiibi baiq nongto. 11Kra haütaü kaü ka raji na apaiq phana jang wato anübok na olip pejaq nümphase kra kamraü. Krai mren Nowaq raq kham ka riikito she nguta sapto. 12Kra jai maq apaiq raq ramiishi hali khe nongto. Raüta kra haütaü kaü ka thongshi ri hali tiibibaiq nongto. Kra lak na haütaü kaü ka jang wa nong mak she riito.
13Riita Nowaq ka arawii 601 she angu na, kra rawii wa jipi phawan lüwa jiha ranaiq shi angu na, kham ka riikito. Kiimaq Nowaq raq lai wukhu pang chang kra linbaiqto. Raüta trotam na liito. Kiimaq hiqraikhü ka awe rai wantlaq kra chhito. 14Kiimaq jipi lünai kiiwa raroqnai ri ramiishi she angu ranaiq na hiq raikhü ka wiita shinriiq riiq she weto.
15Kiijiishe Shiikeawe raq Nowaq ma nguto, 16“Laimong wa ümchak, ümsetiim, kiimaq tsang-nyungtiim rai dongholaq. 17Kiimaq wushi kong thun wiita kiimaq nyamse kong thun wiita ümniirai kinphai na tiidong sheaholaq. Raüta tsangshiq ka mipuchi wanlaq raüta hiqraikhü ka kunli miham wanlaq.” 18Kiimaq Nowaq ka lai mong wa tsang-nyung rai kiimaq asetiim, kiimaq anam-nyungtiim rai kinphai na donghoto. 19Kiimaq wiita nyamse kong kiimaq wushi kong thun ka lai mong wa maiq miimii phan krai akong akong maq donghoto.
Nowaq Raq Honglu Takuqto
20Nowaq raq berong-wacha ashi Tatiwe miitu haito. Raüta apaiq raq asii sii phan nyamse nai wushi kong kriiwa kaüshi shi lamto. Raüta wiipumtam-chaqtlii honglu na berong-wacha kiijaq chaqto. 21Kra honglu ataakuq wa na chaqtaq kra khiimtsang ka Tatiwe ma tsan tiiheali riito. Kiimaq apaiq nai apaiq akha tiingoto, “Maiqse raq jamlai wa klotlaq kra ningkhan, Ngi raq ümtiikiimin mangjong hiq ma manson mang she. Ngi raq asapha maiqse ka noseji miiphü dongdii apaiq tsantsii ka abi. Li jiimin Ngi raq atra phan sitlaq kriika ümchaü lak na tiithen baiqkang akiika ümtiikiimin tiithenbaiq mang she. 22Mangjong hiq ka sishat wiiwii, tsam jang choji akhing, kiimaq tsamjut choji akhing ka siruqli she miraq. Kiimaq akaiq nai akei ka wranaiqshe siruq miraq, rajuji nai diwinji, kiimaq ranaiq nai rawa ka siruq li she miraq.”
Àwon tá yàn lọ́wọ́lọ́wọ́ báyìí:
RAPHA HIQWA LAK 8: TANGSBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.