RAPHA HIQWA LAK 6
6
Maiqse Shutphit
1Maiq phan ka puwan raüta mangjong hiq raikhü na wiita nyam wanto. Kiimaq jechaksere thun ka hum wanto. 2Kiimaq ra na siti thun raq ara jechaksere ka shamhea wiqsetiim chhito. Krai mren tsangshiq raq aro aroti ka tsangshiq raq lamto. 3Kiijiishe Tatiwe raq nguto, “Ngi raq maiqse ka pattup pat-sa tiisi mang. Tsangshiq ka atsaikaiti. Ümchaü miiphat sanha tsangshiq rilung ka wiishishi ri wiiroqnai thaq niika simak miraq.” 4Kiitinchoji akhing na, kiimaq kriima jai niimin, hiqraikhü na siti maiq phan jechakre nai ra na sitibi setiim maiq jonghea phan ka mangjong hiq na asi riito. Tsangshiq ka pinthum srea nola jongbi riito kiimaq tsangshiq ka richü pat na ratsa ikha tsakito.
5Riita Tatiwe raq hiqraikhü na siti maiqse angu kunli ka pinthum abi siisaq chhito kiimaq tsangshiq tiima tsantsii ka wranaiqshe pinthum abi siisaq chhito. 6Kra chhiraüta apaiq ka maiqse ka jaramli wa phansang kang kiimaq hiqraikhü na jaram li wa tiisikang nguta kai atsan bito. Apaiq ka kai tiishudaqto. 7Kra ningkhan apaiq raq akha nguto, “Ngi raq aphan sangha maiq thun ara wiita miqchup mishthen baiqha. Kiimaq ngamsaü ngiqse thun nai peshap wushi thun kiimin mishthen baiqha. Jamkhano ngukla Ngi raq tsangshiq phansang kang kra khana kai tiishudaq tiikang.” 8Shatmaq Tatiwe ka Nowaq rai tsan aheawiq sito.
Nowaq
9-10Arka Nowaq manphan. Asetiim ka wetsam, Shem, Ham, kiimaq Japheth. Nowaq ka jamlai shut phit min ahü riito. Kiimaq apaiq pat wa maiqshaq ka apaiq kli riito. Apaiq ka Shiikeawe rai rintiishi maq sito. 11Shatmaq Shiikeawe makki na maiq angu wiitarü ka abi siisaq riito. Kiimaq barapse na jasam piqsii riili nyam wanto. 12Shiikeawe raq mangjong hiq ka liito. Kiimaq mangjong hiq ka abi chhito. Jamkhano ngukla maiqse kunli ka abi kiimungti siisaq.
13Kriikha na Shiikeawe raq Nowaq ma nguto, “Ngi raq maiq phan tlotli ka chongthum mitiijabaiqha. Ngi raq tsangshiq ka tiisiirai mitiithen baiqha. Jamkhano ngukla mangjong hiq ka tsangshiq mat kha tsa kha riili she wiita ma wanto. 14Arningkhan, ümnaq miitu pe ahea phan khunda lam laüta, lai ashi hailaq. Laüta lai mong na khok thun hailaq. Kiimaq among thun nai akii thun ka kaichang tai maq lolaq. 15Kriika alu nü na 133 mitar, ajong nü na 22 mitar, kiimaq adii lu na 13 mitar hailaq. 16Kra lai khuthaq na wukhu hailaq. Kiimaq wukhu nai khechong heawea niika 44 sentimitar apu li laüta thülaq. Lai ka thongtsam hailaq. Kiimaq kilü ka ashi asiim na tiihonglaq. 17Ngi raq mangjong hiq na rathup jüjang mitii saüha. Lata atra wiitsitsü phan wiita mishthen baiqha. Hiqraikhü na ümchuwa sitlaq kra wiita mijiim. 18Shatmaq Ngi raq ümniirai ka tong mishongha. Ümniika lai mong na ümchak rai, ümsetiim rai, kiimaq ümnam-nyungtiim rai nyap wanlaq. 19-20Kiimaq ümniirai lai mong na nyamse phan kunli wa ali ashi akaü ashi kiimaq wushi phan ngusaq wiita wa ali ashi akaü ashi alai ma thülaq. 21Kiimaq ümniirai phanrap aphaq asea chang phan ümnaq miitu kiimaq nyamse thun kra miitu lai na thülaq.” 22Kiimaq Nowaq raq Shiikeawe raq aming kuqtaq kra phan phan kloto.
Àwon tá yàn lọ́wọ́lọ́wọ́ báyìí:
RAPHA HIQWA LAK 6: TANGSBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.