RAPHA HIQWA LAK 4
4
Kain Nai Abel
1Kriijai maq Atam ka tsang-nyung rai haingato, kiimaq tsang-nyung ka wiihan she riito. Apaiq raq ase maiqwe ashi humto. Kiimaq akha nguto, “Tatiwe khrum maq ngi raq ise ashi humkang.” Krai mren apaiq raq ase ka Kain nguta mangto. 2Kriijai maq apaiq raq ase ashi Abel ka humto. Abel ka sku riimti ma jato. Shatmaq Kain ka wak sham seati riito. 3Kriijai maq ashaqpuq siraüta, Kain raq atsam juttaq kiiwa wiijam lam wan raüta Tatiwe ma honglu na kuqto. 4Kiitiikaq Abel raq apaiq sku kong phongwa apha shaq shaq ase anyung skuse ka lam wanto. Raüta tato. Raüta kriiwa ngam ahea pinthum ba ka lam raüta honglu na kuqto. Tatiwe ka Abel ma nai ahonglu kuqtaq kiima atsan ahea riito. 5Shatmaq apaiq raq Kain nai ahonglu ka tao mak riito. Kiimaq Kain ka atsan khiqtsi ma ashiila anyaqlii she riito. 6Kiijiishe Tatiwe raq Kain ma nguto, “Ümniika jam nguto khiqtlaü? Ümtheaphi na ashiila anyaq liika jaro? 7Ümniiraq riikhaqli shamlaü jiika, naihü hihe mirhaüwa. Shatmaq ümniiraq abi klo laü kha na, ngarai ka ümkilamda na tiipaü raüta ümnaq ka kaqho ma khetlo. Ngarai raq ümniika jamshaho dantlo. Shatmaq ngarai ka ümniiraq tang chang.”
8Kiijiishe Kain raq ano Abel ma nguto, “Nanai rum na ki i.” Kiimaq tsangnai ka rum na shon, Kain raq trosaq raüta ano ka tsat baiqto.
9Kiijiishe Tatiwe raq Kain ma waito, “Ümno Abel ka ümbano?”
Apaiq raq treto, “Ngi raq sap mang. Ngi ka ino rümtiwe shea?”
10Kiijiishe Tatiwe raq nguto, “Ümniiraq atinkhan tiibitaq abi ka jam nguto klolaü? Ümno tiijai ka hiq mong maq ngi ma maiq raq aphuk lam kuqlaq nguta hoqtlaq ikha hoqtlo. 11Ümniika manson kharü mong niishe thiito. Kiimaq hiqraikhü na minshiiqsiq lot maü she mirhaü. Hiq raq ümno tiijai ka ümniiraq apaiq tsat laü kriiwa anü tiiki raüta shuptlaq ikhiishe hiq mong na nyam wanto. 12Kriikha na ümniiraq hiq ka shamsiq haü min, hiq raq jamlai phan min heakuq mak miraq. Ümniika hiqraikhü na jamhü wakhü mangtam miishe jalaüta misi haü.”
13Kiijiishe Kain raq Tatiwe ma akha nguto, “Ara ngi ma mo tiiho kuqlaü arka laihea pinthum, ngi raq holot mangchang tiiho kuqlaü. 14Ümniiraq ngi ka armung wa alu niishe jobaitlaü. Kiimaq ümmakki wiishe jobaiqlaü. Ngi ka hiqraikhü na mangtam ashi she miraq. Kiimaq juwa ngi rai riihumtlaq kriiti raq ngi ka mitsat baiq.”
15Shatmaq Tatiwe raq treto, “Riimak. Kiikhiika riimak. Jurwa ümniika tsat jiiq, kra phuklam miika maiq miisaq wemiishi she mitsai.” Kra ningkhan Tatiwe raq Kain khakam na awaiq raüta thüto. Kriika maiq raq apaiq rai riihum raüjaq apaiq miisaq ka tiithum maimak nguta honlam bom chongke waiqto. 16Kiimaq Kain ka Tatiwe makki wa alu na kihoto. Raüta mung ashi, “Mangtam mung” ngutlaq kiiniishe kihoto. Kriika Eden hiq maq shedong mung nü na riito.
Kain Saüse Phan
17Kain nai tsang-nyung raq tsangse ashi humto. Kiimaq ase ka Enokh nguta mangto. Raütiishe Kain raq chela ashi teito. Raüta chela ka ase mang na mangto. 18Enokh raq ase ashi humto. Apaiq mang ka Irad. Irad ka Mehujael ma awe. Kiimaq Mehujael se ka ashi riito. Apaiq mang ka Methushael. Methushael ka Lamekh ma awe. 19Lamekh raq achak nyung nai lamto. Tsangnai mang ka Ada nai Jilla. 20Ada raq ase ashi humto. Apaiq mang ka Jabal. Jabal saüse phan ka nyamse riimtinok ma ja wanto. Raüta tsangshiq ka tombutiip na sito. 21Apaiq ma anowe mang ka Jubal. Jubal saüse phan ka phanrap tsü ngiiti phaqlam toro nai paimin tsüngiiti phan ma jawanto. 22Jilla raq ase Tubal Kain chiito. Apaiq ka miiki maq nai jin maq phanrap phanrii hupsam thun tiiqto. Tubal Kain ma ano jechakse mang ka Naama.
23Lamekh raq tsang-nyung nai ma nguto.
“Ada nai Jilla lei, tairong laq;
Ngi raq jerowe ashi tsat baiq kang,
jamkhano ngukla apaiq raq ngi bukto.
24Kain tseabaiq kha na,
phuklam maiq miisaq miishi thumtaq jiika,
Ashi ra raq ngi tsat raüla,
iphuk lam na maiq miisaq roqmiishi ri miishi mithum.”
Seth Nai Enosh
25Atam nai tsang-nyung raq ase weshi hali humto. Krii-nyung raq nguto, “Shiikeawe raq ngi ma maiqwese ashi kuqto, Kain raq tsattaq Abel pumsong ma,” Kra ningkhan anyung raq apaiq ka Seth nguta mangto. 26Seth raq ase weshi humto. Apaiq raq ase ka Enosh nguta mangto. Kra akhing na maiqse raq Tatiwe mang asii kra chongphaho raüta shomnoq wanto.
Àwon tá yàn lọ́wọ́lọ́wọ́ báyìí:
RAPHA HIQWA LAK 4: TANGSBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.