MITHEW 13
13
Muchi Worna Roumu shuk
(Mak. 4:1-9; Luk. 8:4-8)
1Hani rungnie makka Jisu na inn ha haophur weta amona tuipi ahao wa thinga, ong weta chupi ae. 2Wairul riha na amota ahul tunga rachon chu, tam hai sulla amona kung chunga lut ta ong so, chuna wairul riha na tui hao wa ngirre. 3Amona manita roumu shuk eja rilleh, “Apha akha ah apa akhana muchi wor ranga shukkae. 4Amo na muchi louloija theja hla juija ahre na lampi ah tulla awa na sar weta bakso. 5Ahre na lungkai chunga alei atam am nona ah tulla, hana alei atam am no jarra tou len ae. 6Chuti weta nie na dinga hang juija chu atou te ngei ha hui ae, tichu chu ato na alei athukka lut no pa chu. 7Muchi ahre na aling akha chu rampa bella mani na tau wa hang halkom aling jam na shoun so weh. 8Chuti weta muchi ahre chu ahra alei ja tulla muchi atam ra ae, ahre na riha, akhana somruk, hana adangna somthum.”
9“Akur am malmashi lim na ngei oh ta rilweta Jisu na treem so weh!”
Roumu Shuk Hina Dangrang
(Mak. 4:10-12; Luk. 8:9-10)
10Hana arui ngei na Jisu kolla wa weta makolla sai, “Alo sarukka nangna malmashi ngei ta natrong juija roumu shukka ah rilla che?”
11Jisu na sange, “Thangwan rengram ma athup rou hi nagei kolla chak thinwar pe phur ae chuti weta mani ta chu takno ae. 12Rouram chu atujong malmashi akha kolla madon chunga makolla tam tek rang lollange, hata lea chu amo ha makolla am ta lella am tek kange; chuti weta ephao don no malmashi makolla chu madon te phao la ange. 13Manina karil katrong juija rou mushuk kapek na chu mani na an hal kom mani na ri no ae akha chu ngai hal kom mani na thei no ae akha chu lunglang thei no ae. 14Chuna sarukka rouphu Isaiah rilsuk ha mani chunga shuk so weh:
‘Na malmashi ngei na ngaija ngai ja lunghal thei no ae;
mani na anna, anna ri pha nea no ae.
15Ti chu mani lunghal mo so ae akha
chu mani kur kom thei nijowe mit kom ri pi nijowe,
ano lea chu mani mitna ri nea ange mani
kur na thei ange mani lunghal nakom hal la shukne ange.
Akha chu mani ha ka am na ah, hai lea ange akha chu
mani ta keina ahra adam pi ange ta
Chungthieng na rilleh.’
16“Nataranga chu nanghi rawan hra ae! namit na ri pha akha chu nakurna kom theipha ae. 17Keina nangei kolla diekka rillinge rouphu thiempu ngei akha chu Chungthieng rouchoi ngeina nangei ripha nea ha leima tam ri num meh, chuti weta manina rino, akha chu nangei theipha ha theipi num meh, chuti weta manina theino ae.
Jisu Na Muchi Worna Roumu Shuk Kol-ahad Chu
(Mak. 4:13-20; Luk. 8:11-15)
18“Muchi worpa hina roumu shuk hi hrabakta nangei na theijo akha chu chu oh. 19Rengram hina rouril thei chu thei-weta lunghal theino ngei hi lampi ah tul muchi ae hrano na phao weta muchi lim ha sar ah thing so weh. 20Kengkai chunga tul muchi rilna chu manina ahra rouril theipha lea ariemma la sil ngei ha ae. 21Chuti weta ato na thukka lut no jarra asotta am nea no ae, ti na chu ahra routrong sharukka aol ana pha juija manina hla ah hou len ae. 22Aling abom sunga tou hana ril na chu ahra rouril thei ha chu, thei weta, aring chang taranga aol hana achong areng ta di ah mani na ara ra no ngei ae. 23Akha chu ahra warah alei chunga tul muchi ta rilna chu ahra rouril hata ngai thei weta lunghal thei mani na ara ra ae ahre na riha, akha na somruk adang na somthum ra ae.”
Thingna Rampa Amu Roumu Shuk
24Jisu na roumu shuk adang akha ah manita rilleh: “Wanram ma Rengram chu hihakti ange. Apa akha na malao lai ah ahra muchi worphur ae. 25Nahani jantienga meelim na jal sutakka, hrano apa akha na phao weta gehu amu karra rampa amu worphur so. 26Chuti weta akung changa lokka hanga ara rajuija rampa kung hakom ripha so. 27Apa hana asuuk na phao weta makolla hita rilleh, ‘Ocha, nalaolai ah muchi ahra chak worphur weta; hoitianga rampa amu phao wa meh?’ 28‘Nahi hrano mee na ae phur sa ae ta amo na sange,’ ‘nangna rampa makhai chu phoija hou pi num cha mo ae, mani na amo ta sai.’ 29‘Phoi no oh,’ ‘rampa kung makhai nangei na phoi juija shang kung ngei kom juitol ange mani hitta. 30Shangpot malim chu hata shang akha chu rampa kung ani mak tou ha shu oh. Chuna kei na sangpot juija tullu lu ngeita hita rillange masha ah rampa kung pot weta ahu ahu hup weta sarmei hollo hana nutienga chu shang makhai hana ka serkunga shi oh.’ ”
Atam Mu Hina Roumu Shuk
(Mak. 4:30-32; Luk. 13:18-19)
31Jisu na mani ta adang roumu shuk akha rilleh. “Wan ramma rengram chu apa akha na alou lai ah atam amu choi weta worra hou hek ti ae. 32Amu lim karra sin tek ti halkom tou ah hang juija chu kungpi chang so weh hana awa ngei na phao weta abakka abu sa ae.”
Achol Hina Roumu Shuk
(Luk. 13:20-21)
33Jisu na adang roumu shuk manita rilla am songe, “Wan ramma rengram chu namei nu akha na wainoi tingkung inthum ripta porra hong malim hlak ahol hekti ae.
Jisu Na Chol Roumu Shuk
(Mak. 4:33-34)
34Jisu na nalim hi roumu shuk changa ril shuke. Chuna roumu shuk tolno ah rengpa na ril no ae. 35Amo na ma ae hi rouphu rilphur ha tung so weh,
“Kei na manita karil juija roumu shuk tolla rillange;
simlei ram hai thou thuppa am limpa ha
kei na ril shuk kange.”
Jisu Na Rampa Amu Hina Roumu Shukka Dangpi
36Amona wairul riha hao phur weta inn sunga lut so. Arui ngei na ma am na wa weta sai, “Kanita loulai ah rampa wor na rouram ma dangpi oh.”
37Jisu na sange, “Ahra muchi worpa ha hamee sanao pa ae; 38Lou ha chu simlei chunge ahra muchi ha chu rengram malmashi ngei ha sha; rampa mu ngei chu hrano pa hana mee ngei ae; 39hana rampa mu worphur ha chu hrano mee ha ae. Louluk ti hina shimlei ashu ang apha ae sang pottang ngei ha chu wanrui ngei ae. 40Rampa mu lim hom weta sar meija hol chu hekta atreem ni apha wak juija hahek ta shuk kange. 41Meesanaopana mawanrui hla ah diekno tullu lu mee akha chu hrano pak tullu lu meelim ta marengram hom mange. 42Akha chu manita sarmei kum sunga denga hla ange hana mani na aha riella tappange. 43Hana juija Chungthieng mee ngeina chu pathieng rengram ma niwar soun hekta war range chuna ejonga nakur am ngei na thei shu oh!
Athup Sumpang Hina Roumu Shuk
44“Wan rengram chu hihek ti ae lou lai ah thuppa apa akha na loulaija sumpang thuppa shi tukhek ti ae, hana amona ariem ma lea weta adon anei ehai lim jurra akha chu lea weta loumun akha lei so weh.
Kungkap Maramma Roumu Shuk
45“Woihapa, wan rengram chu apa akha na kungkap lung jonga rol akha hek ti ae. 46Akha chu amant tam kung kapllung tuk juija chu thing weta manei madon am makhai jurweta naha lei so ae.
Len Maramma Roumu Shuk
47“Woihapa kom wan rengram chu hihekti ae apa ngei na mani len tuipi ah jun deng weta tuiriek chat lim mant ha hek ti ae. 48Manina len shihak ti juija tui hou wa kaja shuk weta akha chu onga tuiriek hita hran so, Ahra tuiriek na mani pai sunga thung hana hrano lim chu denga hao so ae. 49Ringchang hina atreem na apha hana chu hi hekti ange wanrui ngei jung weta ahra ngei karra hrano ngeita halweta rachun pi ange. 50Hana manita sarmei kum ma deng juija amunt maniha aha riella trappange.
Athar Adiek Akha Chu Alui
51Jisu na manita sai ae, “Nangei na na lim hi lunghal thei chau?”
“Oh weh” ta manina sange.
52Chuna amona sange, “Rouram chu wan rengram ma rui changpi rouphun ocha lim na mata anei adon haithou wa athar akhu chu alui choija shuk inn mitpu akha jongpa ae.”
Nazaret Ta Jisu Ta Ngai No Na
(Mak. 6:1-6; Luk. 4:16-30)
53Jisu na roumu shuk lim ril su nutienga amunt ha houphur so. 54Akha chu ma am na mahu maram tienga lea so. “Amo na synagog sunga machu pi takpi thei meelim na angak shukka, amona hija lungsing hi hoija chu thing mo?” ta mani na sai, “Hana akha na angakpi hina alo ti mo nu?” 55Amo hi thing tullu lu sanao pa no mo? Mary hi manu no mo, akha chu Jacob Josep, Simon akha chu Judas ngei na ma-u-manao ngei no meh? 56Masarnu ngei ha no meh hina am ngei ha? “Amona nalim hi hoitinga pha meh? 57Chuna amo ta mani na ngei no ae.
Jisu na manita rou ril, “Rouphu ta amunt aram adang adanga ajak ati ae mahu sunga akha chu ma inn sung hur na chakna ngei no ae.” 58Rouram chu mani ngoiring am no jarra amona kom anealah tullu ha mani maikunga ripi no ae.
Àwon tá yàn lọ́wọ́lọ́wọ́ báyìí:
MITHEW 13: CHOTBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
