Genesis 2
2
1Tavra qiḷaiḷḷu nunalu naanŋarut supayaurallu qiḷaŋmiittuat nunamiittuallu. 2#Ex 20.11.#He 4.4, 10.Tallimat malġuŋanni uvlut God-im naanŋagaa savaani aasii savaaġiŋaiqł̣ugu. 3God-im nuimarualiuŋagaa tallimat malġuŋat uvlut aasiisuli salumarualiuqługu, qanukkii taaptumani uvlumi naanŋagaa ilaata savaaġirani aasii savaaġiŋaiqł̣ugu. 4Tavraasii tainna savaaġiŋagaik God-im qiḷaglu nunalu.
Nautchiaqaġviŋa Eden
Atanġum God-auruam savaaġimmagik qiḷaglu nunalu, 5nauruaqaŋaiñŋaruq nunami kanġaqsruutauruat nautchiaksrat nausaŋaiñmiut, qanukkii ilaa sialuktitchiŋaił̣ł̣unisuli, iñuił̣ł̣uniḷu nauyumiññaksaqtiksraŋanik nunam; 6aglaan imaq maqisuuruq nunam iḷuaniñ aasii imaqtiqługu nuna.
7 #
1 Co 15.45. Ataniq God nunaviñiġmik tigusiŋaruq nunamiñ aasii iñuliuġutigivlugu; aniqsaaġvigiŋagaa iñuunaqtuamik aniġniġmik suġluŋanun tavraasii iñuk iñuġuŋaruq.
8Tavra Ataniq God nautchirriŋaruq nautchiaqaġvigmik tatqavani, Eden-mi, aasii iḷivḷugu tavruŋa iñuliani. 9#Rev 2.7; 22.2, 14.Qanusiḷimaanik napaaqtunik naupkaiŋaruq tavrani qiñiyunaqtuaniglu naurisuuruaniglu niġiyumiñaqtaptignik. Qitqani nautchiaqaġvium napaaqtuq inŋaruq iñuggunmik qaitchiḷḷaruaq suli iḷisimmatiksritchiḷḷaruaq suna nakuutilaaŋanik naakka nakuuŋisilaaŋanik.
10Kuuk maqiugaġmiñiqsuq Eden-mi aasii imaqtaaġutauvluni nautchiaqaġvigmun; Eden-miñ kuuk maqiruaq sisamanik kuuliuŋamaruq. 11Sivulliq kuuk Pishon-guruq; maqiruaq kiavallakługu nunaŋa Havilah-m, kaviqsuanik maniqaqtuaq. 12(Tavraniittuaq kaviqsuaq manik nakuuniqsrauŋaruq suli tivraġiksuat bdellium onyx-giḷḷu uyaġagiksuat tamaaniinmiut.) 13Tuglia aasii kuugum Gihon-guruq; maqiruaq kiavallakługu nuna atiqaqtuaq Cush-mik. 14Piŋayuat aasii kuugich Tigris-guruq, maqiruaġli kivaliñaaŋani Assyria-m, aasii sisamaŋat kuugich Euphrates-guruq.
15Tavra aasii Atanġum God-auruam inillaŋagaa iñuk nautchiaqaġvigmun Eden-mi nauyumiññaksaquvlugu munaġitquvlugulu. 16Ilaata uqallautiŋagaa, “Niġiyumiñaqtutin siiġñaŋiñik nallipayaaŋisa napaaqtut nautchiaqaġvigmiittuat, 17aglaan niġiruksrauŋitchutin napaaqtumiñ iḷisimmatiksritchiḷḷaruamiñ suna nakuutilaaŋanik naakka nakuuŋisilaaŋanik. Niġiñiaŋitchutin siiġñaŋanik taaptuma napaaqtum; niġituaġuvich, tuquniaqtutin taaptumani uvlumi.”
18Tavraasii Ataniq God uqallaktuq, “Iłuaŋitchuq uvva una aŋun kisimi iñuuniaqpan. Iñiqsiñiaqtuŋa iñuuniaqatilluataksraŋanik.” 19Tavra tigusiŋaruq nunaviñiġmik nunamiñ aasii iluqaisa niġrutit iluqaisalu tiŋmiat savaaġivlugich. Aasii aanŋagaich aŋunmun sunik atchiġñiaġmagaisa; tavra tainna iluqatik atchiqsauŋarut. 20Tavra tainna aŋutim atchiḷḷaaŋagaich niġrutipayaurat, tiŋmiat, pamiqsaat, pamiqsaaguŋitchuallu. Aglaan nalliat unnii nalaunŋaruaguŋitchuq iñuuñiaqatauyumiñaġluni ilaanun.
21Tavra Atanġum God-auruam aŋun naluksrisipiaqługu siqupkaŋagaa, aasii siñiktillugu, piiqsiŋaruq atausimik tulimaaŋanik aŋutim aasii mamitinmivḷugu timaa. 22Aġnaliuŋaruq tulimaamiñ aasii aŋunmuutivlugu. 23Aŋun aasii uqallaktuq,
“Kiisaimmaa tavra, uvva una uvaptun ittuaq
Sauniq piiqsauruaq saunimniñ, suli timaa timigiramniñ.
‘Aġnaq’ atiġiniaġaa qanuq ilaa savaaguŋaruq aŋunmiñ.”
24 #
Mt 19.5; Mk 10.7, 8; 1 Co 6.16; Eph 5.31. Tainnamik tavra aŋutim uniññiaġaik aapaniḷu aakaniḷu aasii nayuqsiutilugu tuvaaqatini, aasii atausitun iḷiŋaruk.
25Aŋullu aġnaġlu annuġaaqaŋaitchuk iluqatik, aglaan kanŋusuutiqaŋaitchuk.
Àwon tá yàn lọ́wọ́lọ́wọ́ báyìí:
Genesis 2: INUPIAQ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)