Genesis 13
13
Abram-lu Lot-lu Avirrutimmagnik
1Abram mayuŋaruq Egypt-miñ Negev-mun tuvaaqatiniḷu suġauttapayauraniḷu kaluqługich, aasii Lot-gum aullaqatigiŋammigaa. 2Abram una umialgupiaġataŋaruq, imnaigukkaqłuni, nagruligniglu, pamiqsaaniglu, qatiqtuaniglu kaviqsuaniglu maniukkaġmivḷuni. 3Aullaqami tavraŋŋa nuktaġaŋaruq ininiñ allanun ininun, tuŋaaġivlugu Bethel. Tikiñŋagaa ini akunġagni Bethel-guvlu Ai-vḷu sivuani nullaġvigiŋarani 4suli ikipkaiviḷiuġvigiŋarani. Tavrani nanġautiqaŋaruq Ataniġmun.
5Tavraptauq Lot, iglauqataa Abram, imnaiqaŋaruq, nagrulignik, pamiqsaaniglu, piqatigivlugich nanmiñiq iḷagiich kivganiḷu. 6Aasii tavra niġrutiŋich niqiksraiḷḷiuŋarut tavraniitkaluaqpagnik iluqatik, iñugiakpaił̣ł̣utiŋ niġrutautiŋik. 7Tavraasii qanaaġutiraġaliŋarut niġrutiŋiñik Abram-gum qaunaksriruat tamatkualu Lot-gum niġrutiŋiñik qaunaksriruat. (Taimani Canaan-miullu Periz-miullu iñuuniaŋŋaisa tamaani nunami.)
8Abram aasii uqallaktuq Lot-mun, “Uvvauvaguk nanmiñiq iḷagiiksuguk, aasiuvva iñuktillu iñutkalu qanaaġutiruksrauŋitchut. 9Atautchimiinŋaiġḷuk uvaguk. Naliġagiñ suqpanipayaaq nunami pisuktaġnik. Sugnamun aullaġuvich, uvaŋali allamun aullaġisiruŋa.”
10 #
Gn 2.10. Lot nasisaaqłuni suŋnamulliqaa tautukkaa Jordan Valley, Zoar-muaglaan, qiñiġaa imaukkaqtilaaŋa, Nautchiaqaġviŋatun Atanġum: naakkaqaa nunaŋatun Egypt. (Taamna piŋaruq Atanġum suksraunġiŋaiñŋaagnik iniqpaŋik Sodom-lu Gomorrah-vlu.) 11Tavraasii Lot-gum naliġaaġiŋagaa inmiñun iluqaan Jordan Valley aasii aullaqłuni kivanmun. Tavra tainnaqłutiŋ avirrutiŋaruk aŋaalugiik. 12Abram aullaŋaiñŋaruq Canaan-miñ, aasiiḷi Lot inillakłuni akunġannun nunaaqqiuruat natiġnaami tupiqtiŋaruq qaniŋanun Sodom. 13Iñuŋich Sodom atqunaq piḷuusiqiraumaruat paaqłakługu Ataniq.
Abram Nuuttuq Hebron-mun
14Lot aullaanigman, Atanġum uqallautigaa Abram, “Tavraŋŋa irvigniñ, qiñimmaġiksaaġiñ suŋnamulliqaa. 15#Ac 7.5.Qaiññiaġiga ilignun kiŋuvaaġiniaqtaġnullu iluqaan nuna qiñiqtan, aasii piginiaġiñ taimuŋa isuitchuamun. 16Kiŋuvaaqsriññiaġikpiñ iñugiakpaktuanik kia unnii kisitchumiñaitchaŋiññik; kisiññaqpan nunam avyuŋa tainnaptauq kiŋuvaatin kisiññaġniaġmiut. 17Tavraasii, qimilġulluataġiaġuŋ nuna pisuaġlugu iluqaan, qanuq uvva qaiññiaġiga iluqaan ilignun.” 18Tavra Abram nuunŋaruq tupiqtuġvigmiñiñ aasii inillakłuni qaniŋanun Mamre-m napaaqtuniqłuŋiññun qiksigñaqtuanun, Hebron-miittuanun, tavrani aasii ikipkaiviḷiuŋaruq Ataniġmun.
Àwon tá yàn lọ́wọ́lọ́wọ́ báyìí:
Genesis 13: INUPIAQ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)