Genesis 4
4
Cain-ankuk Abel-aaq-llu
1Adam-aam nuliani Eve-aq qingiraa. Qetunrangami Eve-aq qanertuq, “Agayutem ikayuanga qetunrangua.” Aciraa-llu Cain-amek.#4.1: Cain: Una ateq ayuqaa Hebrew-tun qaneryaram “unakluku.” 2Allamek qetunrangenqigcami Abel-aamek aciraa. Abel-aaq-llu qusngiliurten͞gurtuq, Cain-aq tau͡gken nauceciiyurten͞guluni. 3Erenret iliitni Cain-aq naucetaami ilaitnek elliiguq Atanermun. 4Abel-aaq-llu taituq qusngimi irniaqerraaranek. Assinqurra-llu Atanermun elliitekaa. Atanrem-llu ilukegcitkaa Abel-aaq elliitekellra-llu. 5Tau͡gaam ciuniunritaa Cain-am elliitii. Cain-aq-llu qenqe'rtuq qavyurrluni cakneq. 6Atanrem-llu qanrutaa Cain-aq, “Ciin qenercit? Ciin-llu qavyurcit? 7Elluarrluten pillrukuvet elliillerpeni ciuniullruya'arqa elliitekellren. Tau͡gaam assiilnguum ingcuraaten amigpet elatiini; atanirturyugyaaqluten, elpet tau͡gaam cirlaknarqan.”
8Cain-am-llu kinguqlini Abel-aaq qanrutaa, “Yuilqumun ayakarluk.” Yuilqumun-llu tekicamek Cain-am kinguqlini caugaa tuqulluku-llu.
9Taum kinguani Atanrem Cain-aq aptaa, “Nauwa-mi kinguqliin Abel-aaq?”
Kiugaa, “Nalluaqa, kinguqlirma-qaa qaunqestekaanga?”
10 Ataneq-llu qanertuq, “Ciin waten pisit? Kinguqlirpet augan qayagauraanga nunamek. 11Aniqlaamauten nauceciingairulluten kinguqlirpet auga nunamun meciucan tuqutellerpeni. 12Nauceciingnaq'nge'rpet nuna naugingaituq. Nunaunak qimagauciquten calliggluten nunami.”
13Cain-am Ataneq qanrutaa, “Anucimirqecetaarutemni-lli arturnaqvaa. 14Nunamek uitavimnek antarpenga, ciuqerpenek-llu. Nunaunii qimagauciqua nunam qaingani, nalaqestem̄a-llu tuquciiqaanga.”
15Tau͡gaam Atanrem kiugaa, “Qang'a. Yuum tuquskaten malrunelgen yuut tuqucimaciqut akinaurulluten.” Atanrem-llu Cain-aq nallunailkuciraa aarcirtuutngusqelluku tuqucugtainun. Tauna tangerrluku tuqutesqevkenaku. 16Cain-aq-llu Agayutem ciuqerranek ayagtuq, uitaluni-llu Nod-ami, calaralirnerani Eden-aam.
Cain-am Kinguvri
17Cain-ankuk nuliani-llu qetunranguk Enoch-aamek. Nunaliuq nunarpagmek acirluku-llu qetunrami atranek. 18Enoch-aaq-llu qetunranguq Irad-amek, Irad-aq atakaa Mahujael-aam, Mahujael-aaq-llu qetunrangluni Mathusael-aamek, Lamech-aam atiinek. 19Lamech-aaq-llu malrugnek nulirturtuq, aipaa atengqerrluni Adah-mek aipaa-llu Zillah-mek. 20Adah-llu qetunranguq Jabal-aamek. Taum kinguvri enengqertut pelatekanek, qunguturanek-llu anglicariluteng. 21Anelgutii-llu atengqertuq Jubal-aamek; taum kinguvri aturcetaanek elisngaut. 22Zillah-llu qetunranguq Tubal-Cain-amek, tauna taqurqelartuq calissuutnek punernernek cavignek-llu. Nayagarluni-llu Naamah-mek.
23Lamech-aam-llu qanrutak nuliagni,
“Adah, Zillah, niicugnitegnga:
Angutmek tuqucillruunga yaq'errlua akngircanga.
24Cain-am tuqucimallra akinaurumakan,
tuqulluki malrunelgen yuut,
Wii akinaurucimaciqua tuqulluki
yuinaat pingayun akimiaq malrugnek cipluku (77).”
Seth-ankuk Enosh-aaq-llu
25Adam-aankuk nuliani-llu allamek qetunranguk, acirluku-llu Seth-amek.#4.25: Seth: Una nepengqertuq Hebrew-tun “cikiqenglleq.” Eve-aq qanertuq, “Agayutem allamek irniangevkaraanga Abel-aam cimirkaanek, Cain-am tuqutellran.” 26Seth-aq-llu qetunranguq acirluku-llu Enosh-aamek. Taum nalliini yuut piicalangellruut Atanrem atra aturluku.
Àwon tá yàn lọ́wọ́lọ́wọ́ báyìí:
Genesis 4: YPK
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Yupik Bible © 2012 American Bible Society. All rights reserved.